Kgaolo 31

Go Roba Mabele ka Sabata

KA BONAKO fela Jesu le barutwa ba gagwe ba tloga mo Jerusalema go boela morago kwa Galilea. Ke nako ya dikgakologo, mme mo masimong mabele a na le diako. Barutwa ba tshwerwe ke tlala. Jalo ba roba diako tsa mabele ba bo ba di ja. Mme ereka e le Sabata, seo ba se dirang se a lemogiwa.

Baeteledipele ba bodumedi kwa Jerusalema ba ne ba sa tswa go batla go bolaya Jesu ka ntlha ya go bo go bolelwa fa a tlola molao wa Sabata. Jaanong Bafarasai baa mo latofatsa. Ba re, “Bōna, barutwa ba gago ba diha se se sa lètlèlèlwañ go dihwa ka sabata.”

Bafarasai ba bolela gore go kgetla mabele le go a foforela mo diatleng motho a bo a ja ke go roba le go photha. Mme tlhaloso ya bone e e gagametseng ya se tota eleng tiro e dirile gore Sabata e nne boima, lemororo e ne e diretswe go nna nako e e ipedisang, e e agang semoyeng. Jalo Jesu o ganetsa seo ka go ba fa dikai mo Dikwalong go bontsha gore Jehofa Modimo le ka motlha o ne a sa ikaelela gore molao wa Gagwe wa Sabata o dirisiwe ka mo go sa tshwanelang jalo ka tsela e e gagametseng.

Jesu o bolela gore, fa Dafide le banna ba gagwe ba ne ba tshwerwe ke tlala, ba ne ba ema fa motlaaganeng mme ba ja dinkgwe tsa tshupelo. Dinkgwe tseo di ne di setse di tlositswe fa pele ga ga Jehofa mme di emiseditswe ka tse disha, mme ka tlwaelo di ne di beetswe baperesiti go di ja. Lefa go ntse jalo, tlase ga mabaka ao, Dafide le banna ba gagwe ga baa ka ba sekisediwa go di ja.

Fa Jesu a ba fa sekai se sengwe, a re: “A ga lo e se lo ko lo bale mo molaoñ, kaha baperisiti ba tleñ ba itshepolole sabata ka gōna mo tempeleñ ka letsatsi ya sabata, me ba bo ba sena molato?” Ee, le eleng ka Sabata baperesiti ba ne ba tswelela ka go tlhaba le go dira ditiro tse dingwe kwa tempeleng go baakanya ditlhabelo tsa diphologolo! Jesu a re, “Me nna kea lo raea, moñwe eo o leñ mogolo go heta tempela o hano.”

Fa Jesu a ne a tlhagisa Bafarasai o tswelela a re: “Ha lo ka bo lo tlhalogantse, go re, lehoko lea reñ ha le re, Ke eletsa boutlwèlō botlhoko, eseñ setlhabèlō, lo ko lo se ka loa sekisa ba ba senañ molato.” Morago ga moo o konela ka go re: “Gonne Morwa Motho ke morèna oa sabata.” Jesu o kayang ka seo? Jesu o lebisitse go puso ya gagwe ya Bogosi ya kagiso ya dingwaga tse di sekete.

Mo e ka nnang dingwaga di le 6 000 jaanong, batho ba ntse ba le mo bokgobeng jo bo botlhoko ba busiwa ke Satane Diabolo, thubakanyo le ntwa e le sejo sa letsatsi fela. Mo letlhakoreng le lengwe, puso ya Sabata e kgolo ya ga Keresete e tla nna nako ya go ikhutsa mo pogong eno yotlhe le kgatelelo tse di ntseng jalo. Mathaio 12:1-8; Lefitiko 24:5-9; 1 Samuele 21:1-6; Dipalō 28:9; Hosea 6:6.

▪ Barutwa ba ga Jesu ba latofalediwa eng, mme Jesu o araba jang?

▪ Jesu o lemoga bokoa bofe jwa Bafarasai?

▪ Jesu ke “morèna oa sabata” ka tsela efe?