Atamalana le Modimo

“Bogosi Jwa Gago Ruri bo Tla Nitama”

2 SAMUELE 7:1-16

GO RALALA hisitori, babusi ba le bantsi ba lefatshe ba ile ba tlosiwa mo maemong a bone. Ba bangwe ba ile ba ntshiwa morago ga ditlhopho mme bangwe ba ntshiwa ka dikgoka. Go tweng ka Jesu Keresete, Kgosi ya Bogosi jwa Modimo jo bo kwa legodimong? A go na le sengwe se se ka mo thibelang go busa e le Kgosi e e tlhophilweng ke Modimo? Karabo ya potso eno e ka bonwa mo mafokong a Jehofa a neng a a bolelela Kgosi Dafide wa Iseraele ya bogologolo jaaka a kwadilwe mo go 2 Samuele kgaolo 7.

Fa kgaolo eno e simolola, re lemoga gore Dafide o tlhabilwe ke ditlhong, ka go bo ene, kgosi e e sa reng sepe, o nna mo ntlong e ntle ya segosi, fa letlole la Modimo le nna mo mogopeng wa maemo a a kwa tlase.a Dafide o bontsha gore o batla go agela Jehofa ntlo e e tlotlegang kgotsa tempele. (Temana 2) Mme gone Dafide ga se ene a tla agang ntlo eo. Jehofa o ne a dirisa moporofeti Nathane go bolelela Dafide gore morwawe ke ene a tla agang tempele.—Temana 4, 5, 12, 13.

Jehofa o ne a amiwa ke keletso e Dafide a neng a na le yone. Ka ntlha ya boineelo jwa ga Dafide le go ya ka boporofeti, Modimo o dira kgolagano le Dafide ya gore o tla tlhoma mongwe mo losikeng lwa segosi lwa ga Dafide yo o tla busang ka bosakhutleng. Nathane o bolelela Dafide se Modimo a neng a ikana go se dira: “Ntlo ya gago le bogosi jwa gago ruri bo tla nitama ka bosakhutleng fa pele ga gago; setulo sa gago sa bogosi ka bosone e tla nna se se tlhomamisitsweng ka thata ka bosakhutleng.” (Temana 16) Ke mang Mojaboswa wa leruri wa kgolagano eno—Ene yo o tla busang ka bosakhutleng?—Pesalema 89:20, 29, 34-36.

Jesu wa Nasaretha e ne e le setlogolwana sa ga Dafide. Fa moengele a ne a itsise ka go tsholwa ga ga Jesu, o ne a re: “Jehofa Modimo o tla mo naya setulo sa bogosi sa ga Dafide rraagwe, mme o tla busa ntlo ya ga Jakobe ka bosaengkae e le kgosi, mme bogosi jwa gagwe ga bo na go nna le bokhutlo.” (Luke 1:32, 33) Kgolagano le Dafide e diragadiwa ke Jesu Keresete. Ka jalo o busa e seng ka gonne a tlhophilwe ke batho mme se Modimo a neng a ikana gore o tla se dira ke sone se se dirang gore a tshwanelwe ke go busa ka bosakhutleng. A re gakologelweng gore ditsholofetso tsa Modimo ka metlha di a diragala.—Isaia 55:10, 11.

Go na le dilo tse pedi tse di botlhokwa tse re di ithutang mo go 2 Samuele kgaolo 7. Sa ntlha, re ka tlhomamisega gore ga go na sepe le gore ga go na ope yo o ka thibelang Jesu Keresete gore a buse. Ka jalo, re ka tlhomamisega gore o tla diragatsa boikaelelo jwa puso ya gagwe, e leng go dira thato ya Modimo ka botlalo mo lefatsheng jaaka kwa legodimong.—Mathaio 6:9, 10.

Sa bobedi, pego eno e re ruta thuto e e kgothatsang ka Jehofa. Gakologelwa gore Jehofa o ne a bona le go anaanela se Dafide a neng a ikaeletse go se dira. Go a gomotsa go itse gore Jehofa o anaanela boineelo jwa rona mo kobamelong ya gagwe. Ka dinako dingwe, maemo a re sa kgoneng go a laola a a jaaka botsogo jo bo bokoa kgotsa botsofe, a ka re thibela go dira sotlhe se re batlang go se dira fa re direla Modimo. Fa go le jalo, e kete re ka gomodiwa ke go itse gore Jehofa o bona le maikaelelo a motho yo o batlang go mo obamela ka pelo yotlhe.

[Ntlha e e kwa tlase]