Dipotso Tse di Tswang Kwa Babading

A Dafide, monna yo o amogelwang ke Modimo, o ne a tshwara magolegwa a gagwe setlhogo, jaaka bangwe ba dumela jalo go ya ka 2 Samuele 12:31 le 1 Ditiragalo 20:3?

Nnyaa. Dafide o ne a atlholela magolegwa a Amona go dira tiro e e boima. Se Dafide a ileng a se dira ga se a ka sa tlhaloganngwa sentle ka ntlha ya tsela e dithanolo dingwe tsa Baebele di tlhalosang ditemana tseno ka yone.

Dithanolo tseo tsa Baebele di bontsha Dafide a le setlhogo fa di tlhalosa ka katlholo e Baamona ba neng ba tshwarwa ka yone. Ka sekai, 2 Samuele 12:31, e balega jaana go ya ka Baebele e e Boitshepo: “Batho ba ba mo go one a ba ntshetsa kwa ntle, a ba baya fa tlase ga dišage, le fa tlase ga dikokola tsa tshipi le fa tlase ga dilepe tsa tshipi a ba raledisa bobesetso jwa setene; a direla metse yotlhe ya bana ba Baamone jalo.” Pego e e mo go 1 Ditiragalo 20:3 e ranolwa ka tsela e e batlang e tshwana le eno.

Le fa go ntse jalo, fela jaaka go boletse mokanoki wa Baebele e bong Samuel Rolles Driver, bosetlhogo “ga bo dumalane le sotlhe se re se itseng ka botho jwa ga Dafide.” Ka jalo, kakgelo ya The Anchor Bible ya re: “Dafide o ne a bopa ditlhopha tsa badiri ba magolegwa gore a tle a solegelwe molemo ke ikonomi ya naga e e fentsweng, mme go bonala dikgosi tse di fentseng di ne di tlwaetse go dira jalo.” Adam Clarke o akgela jaana ka tsela e e tshwanang: “Ka jalo seo se raya gore Dafide o ne a dira batho makgoba mme a ba naya tiro ya go dirisa saga, ba dira didirisiwa tsa tshipi kgotsa ba dira mo moepong, . . . le mo go remeng dikgong le mo go direng ditena. Ga go na sepe mo temaneng eno se se bontshang gore Dafide o ne a fatoganya batho ka saga kgotsa a ba rema ka yone, fela jaaka a se kile a dira jalo ka Baamona.”

Fa re akanya ka tsela e re tlhaloganyang dilo sentle ka yone, dithanolo di le mmalwa tsa bosheng di bontsha sentle gore Dafide o ne a sa tshwanela go latofadiwa ka go tshwara batho setlhogo.a Ela tlhoko thanolo ya New English Translation (2003): “O ne a ntsha batho ba ba neng ba le mo go one mme a dira gore ba bereke ka natla ka disaga, dipeke tsa tshipi le dilepe tsa tshipi, a ba berekisa kwa bobesetsong jwa ditena. Eno e ne e le tsela e a dirang ka yone ka metse yotlhe ya Baamona.” (2 Samuele 12:31) “A ntsha baagi ba motse, mme a ba berekisa ka disaga, dipeke tsa tshipi le ka dilepe. Dafide o ne a dira seno mo metseng yotlhe ya Baamona.” (1 Ditiragalo 20:3) Thanolo ya Lefatshe le Lesha e dumalana le se bakanoki ba bosheng ba se dumelang: “A ntsha batho ba ba neng ba le mo go one gore a ba beye fa majeng a a shagang le fa didirisiweng tse di bogale tsa tshipi le fa dilepeng tsa tshipi mme a dira gore ba direle mo go direng ditena.” (2 Samuele 12:31) “Mme a ntsha batho ba ba neng ba le mo go one, mme a ba boloka ba dira ka maje a a shagang le ka didirisiwa tse di bogale tsa tshipi le ka dilepe; mme eo ke tsela e Dafide a neng a dira metse yotlhe ya bomorwa Amona ka yone.”—1 Ditiragalo 20:3.

Dafide ga a ka a dira gore Baamona ba ba fentsweng ba tlhokofadiwe botlhoko kgotsa ba bolawe. Ga a ka a dira setlhogo jaaka fa go ne go dirwa mo dintweng tsa motlha wa gagwe.

[Ntlha e e kwa tlase]