“Ba Tlhogonolofala mo Botlhogoputsweng”

BATHO ba bantsi kwa dinageng tsa Mediterranean ba lema ditlhare tsa mokolane mo dijarateng tsa bone. Ditlhare tseno di itsege ka bontle jwa tsone le ka maungo a tsone a a monate. Mme gape di tswelela di ungwa ka dingwaga tse di fetang lekgolo.

Kgosi Solomone wa Iseraele wa bogologolo o ne a tlhalosa ka tsela ya go boka seemo sa mosetsana yo montle wa Moshulame a re o tshwana le setlhare sa mokolane. (Sefela sa Difela 7:7) Buka ya Plants of the Bible ya re: “Lefoko la Sehebera la setlhare sa mokolane ke ‘tàmâr.‘ . . . Setlhare seno se ne sa nna letshwao la Bajuda la bontle mme gantsi basetsana ba ne ba bidiwa ka lone leina leo.” Ka sekai, kgaitsadie Solomone yo montle o ne a bidiwa Tamare. (2 Samuele 13:1) Batsadi bangwe ba sa ntse ba raya bana ba bone ba basetsana leina leo.

Basadi ba bantle ga se bone fela ba ba tshwantshiwang le setlhare sa mokolane. Mopesalema o ne a opela a re: “Mosiami o tla tlhagisa dithunya jaaka setlhare sa mokolane se dira; o tla gola a nna motona jaaka mosedara kwa Lebanona. Ba ba jadilweng mo ntlong ya ga Jehofa, mo malwapeng a Modimo wa rona, ba tla tlhagisa dithunya. Ba tla nna ba tlhogonolofala mo botlhogoputsweng, ba tla tswelela pele ba nonne e bile ba le banana.”—Pesalema 92:12-14.

Ka tsela ya tshwantshetso, batho ba ba direlang Modimo ka boikanyego mo botsofeng ba tshwana le setlhare se sentle sa mokolane. Baebele ya re: “Botlhogoputswa ke serwalo sa bontle fa bo bapalwa ka tsela ya tshiamo.” (Diane 16:31) Le fa bontle jwa bone jwa kafa ntle bo ka fela fa ba ntse ba tsofala, batsofe ba ka tswelela ba na le nonofo ya semoya ka go ikotla ka go ithuta Lefoko la Modimo, Baebele, ka metlha. (Pesalema 1:1-3; Jeremia 17:7, 8) Ka ntlha ya mafoko a bone a a monate le sekao sa bone se se molemo, batsofe ba ba ikanyegang ba kgothatsa ba bangwe thata mme ba tswelela ba ungwa maungo ngwaga le ngwaga. (Tito 2:2-5; Bahebera 13:15, 16) Jaaka setlhare sa mokolane, bagodi ba ka tlhogonolofala mo botsofeng.