Atamalana le Modimo

“Wena Jehofa, . . . O a Nkitse”

“GA GO na selo se se ka imelang motho go gaisa go itse gore ga go ope yo o amegang ka ene kana yo o tlhaloganyang seemo sa gagwe.”a A o kile wa ikutlwa jalo? A o kile wa utlwa e kete ga go ope yo o amegang kgotsa yo o tlhaloganyang se se go diragalelang, tota le gore o ikutlwa jang? Fa go ntse jalo, o ka gomodiwa ke seno: Jehofa o amega thata ka baobamedi ba gagwe mo e leng gore o tsaya tsia sengwe le sengwe se se ba diragalelang mo matshelong a bone a letsatsi le letsatsi. Mafoko a ga Dafide a a mo go Pesalema 139 a re tlhomamisetsa ntlha eno e e boammaaruri.

Dafide o ne a bua jaana a tlhomamisegile gore Modimo o amega ka ene: “Wena Jehofa, o ntlhatlhobile, mme o a nkitse.” (Temana 1) Fano Dafide o dirisa papiso e e kgatlhang. Lediri la Sehebera le le ranotsweng go twe ‘go tlhatlhoba’ le ka kaya go epa leje la tshipi (Jobe 28:3), go sekaseka lefatshe (Baatlhodi 18:2) kgotsa go tlhotlhomisa dintlha tsa kgetsi ya molao (Duteronome 13:14). Ee, Jehofa o re itse sentle mo go ntseng jaaka e kete o sekasekile karolo nngwe le nngwe ya botshelo jwa rona. Dafide o re ruta gore Modimo o kgatlhegela mongwe le mongwe wa batlhanka ba gagwe. O a ba tlhatlhoba mme o itse mongwe le mongwe wa bone sentle.

Fa Dafide a ne a tlhalosa go ya pele kafa Modimo a tlhatlhobang ka botlalo ka teng o ne a re: “O itse go nna ga me le go ema ga me. O akanyeditse kakanyo ya me go tswa kgakala.” (Temana 2) Ka tsela nngwe Jehofa o “kgakala” ka gonne o nna kwa magodimong. Le fa go ntse jalo, o itse fa re nna fa fatshe, gongwe kwa bowelong jwa letsatsi le le lapisang, le fa re tsoga mo mosong re bo re tswelela ka botshelo jwa rona jwa letsatsi le letsatsi. Gape o itse dikakanyo, dikeletso le maikaelelo a rona. A Dafide o ne a tshosiwa ke go bo a tlhatlhobiwa thata jalo? Nnyaa, o ne a go itumelela. (Temana 23, 24) Ka ntlha yang?

Dafide o ne a itse sentle gore Jehofa o tlhatlhoba baobamedi ba gagwe ka maitlhomo a a siameng. Dafide o ne a kwala jaana a umaka maitlhomo ao: “O lekantse go eta ga me le go namalala ga me, e bile o tlwaelane le ditsela tsa me tsotlhe.” (Temana 3) Letsatsi le letsatsi Jehofa o bona ‘ditsela tsotlhe tsa rona’—diphoso tsa rona le ditiro tsa rona tse di molemo. A o tlhoma mogopolo mo go se se bosula se re se dirang kgotsa mo go se se molemo? Lefoko la Sehebera le le ranotsweng go twe “lekantse” le ka kaya go “fefera,” fela jaaka molemi a ka fefera mabele gore go tswe moroko o o se nang mosola mme go sale mabele a a siameng. Lefoko “tlwaelane” le ranotswe go tswa mo lefokong la Sehebera le le ka kayang “go anaanela.” Fa Jehofa a tlhatlhoba se baobamedi ba gagwe ba se buang le se ba se dirang letsatsi le letsatsi, o anaanela se se molemo. Ka ntlha yang? O anaanela maiteko a ba a dirang a go mo itumedisa.

Pesalema 139 e re ruta gore Jehofa o amega thata ka baobamedi ba gagwe. O a ba tlhatlhoba e bile o ba baya leitlho fa ba ntse ba dira ditiro tsa bone tsa letsatsi le letsatsi. Ka jalo o itse mathata a ba lebanang le one e bile o tlhaloganya kutlobotlhoko e ba ka nnang le yone ka ntlha ya mathata ano. A o tlhotlheletsega go obamela Modimo yono yo o amegang jaana? Fa go ntse jalo, o ka tlhomamisega ka seno: Le ka motlha Jehofa a ka se ‘lebale tiro ya gago le lorato lo o lo bontshitseng leina la gagwe.’—Bahebera 6:10.

Dikgaolo tsa Baebele tse di ka Balwang ka August:

◼ Pesalema 119-150

[Ntlha e e kwa tlase]