Go Fitlhelela Dipelo Tsa ba Losika ba e Seng Basupi

JESU KERESETE o ne a re: “Ya gae kwa go ba losika lwa gago, mme o ba begele dilo tsotlhe tse Jehofa a di go diretseng le kafa a neng a go utlwela botlhoko ka gone.” Ka nako eo, a ka tswa a ne a le kwa Gadara e e kwa borwabotlhaba jwa Lewatle la Galalea fa a ne a bua le monna yo o neng a batla go nna molatedi wa gagwe. Mafoko ao a ga Jesu a bontsha gore o ne a tlhaloganya mokgwa o gantsi batho ba nang le one—keletso ya go bolelela ba masika a bone dilo dingwe tse di ba kgatlhileng.—Mar. 5:19.

Gompieno le gone re sa ntse re bona mokgwa oo, le fa mo ditsong tse dingwe o bonala thata go feta mo go tse dingwe. Ka jalo, fa motho a simolola go nna moobamedi wa Modimo wa boammaaruri e bong Jehofa, gantsi o batla go bolelela ba masika dilo tse disha tse a ithutileng tsone. Mme gone, o tshwanetse go dira seno jang? A ka kgona jang go fitlhelela dipelo tsa ba masika ba ba leng mo bodumeding jo bo farologaneng le jwa gagwe—kgotsa ba ba seng mo tumelong epe? Baebele e re naya kgakololo e e siameng le e e utlwalang.

Mo lekgolong la ntlha la dingwaga, Anderea e ne e le mongwe wa batho ba ntlha ba ba neng ba lemoga gore Jesu ke Mesia. Mme ke mang wa ntlha yo o neng a mmolelela se a se lemogileng? “Sa ntlha yono [Anderea] a bona morwarraagwe, e bong Simone mme a mo raya a re: ‘Re bone Mesia’ (mo, fa go ranolwa, go rayang, Keresete).” Anderea o ne a isa Petere kwa go Jesu, mme ka go dira jalo a naya Petere tshono ya go nna mongwe wa barutwa ba ga Jesu.—Joh. 1:35-42.

Mo e ka nnang dingwaga di le thataro moragonyana fa Petere a ne a nna kwa Jopa, o ne a kopiwa gore a ye kwa bokone kwa Kaesarea go etela ntlo ya ga Korenelio, yo e neng e le motlhankedi wa masole. Petere o ne a fitlhela go kokoane bomang mo ntlong eo? “Ee, Korenelio o ne a . . . lebeletse [Petere le ba a neng a tsamaya le bone] e bile o ne a phuthile ba losika lwa gagwe le ditsala tse a atamalaneng thata le tsone.” Ka jalo, Korenelio o ne a naya ba masika a gagwe tshono ya gore ba reetse Petere le gore ba dire tshwetso malebana le se ba se utlwileng.—Dit. 10:22-33.

Re ka ithuta eng malebana le kafa Anderea le Korenelio ba neng ba tshwara ba masika a bone ka gone?

Anderea le Korenelio ba ne ba tsaya kgato. Anderea ke ene a neng a itsise Petere mo go Jesu, mme Korenelio o ne a dira dithulaganyo tsa gore ba masika a gagwe ba ye go utlwa se Petere a neng a se bua. Mme gone, Anderea le Korenelio ga ba a ka ba pateletsa ba masika a bone kgotsa ba leka go ba tsietsa gore e nne balatedi ba ga Keresete. A go na le se o se ithutang mo go seo? Le rona re tshwanetse go dira jalo. Re ka kgona go bolelela ba masika a rona sengwe se re ithutileng sone le go ba bulela ditsela tsa gore ba ithute boammaaruri jwa Baebele kgotsa gore ba kopane le badumedimmogo le rona. Le fa go ntse jalo, re a itse gore ba na le kgololesego ya go itlhophela mme re tlotla seo e bile ga re batle go ba tsenya letsatsi. Go bona kafa re ka thusang ba masika a rona ka teng, ela tlhoko sekai sa ga Jürgen le Petra, banyalani bangwe ba kwa Jeremane.

Petra o ne a ithuta Baebele le Basupi ba ga Jehofa, mme fa nako e ntse e ya o ne a kolobediwa. Monna wa gagwe e bong Jürgen, e ne e le molaodi wa masole. Kwa tshimologong, Jürgen o ne a sa itumelele tshwetso ya mosadi wa gagwe. Mme fa nako e ntse e ya, o ne a lemoga gore Basupi ba ruta boammaaruri jo bo tswang mo Baebeleng. Le ene o ne a ineela mo go Jehofa, mme gompieno ke mogolwane mo phuthegong ya lefelo la bone. O re naya kgakololo efe malebana le go fitlhelela dipelo tsa ba masika a rona ba e seng Basupi?

Jürgen a re: “Ga re a tshwanela go pateletsa ba masika a rona go amogela se re ba bolelelang sone le go ba bolelela dilo tse dintsintsi tsa semoya. Seo se ka dira gore ba se ka ba batla go re reetsa gotlhelele. Fa nako e ntse e ya, go ka nna molemo gore nako le nako re ba bolelele go le gonnye fela. Gape go ka nna mosola go kopanya ba masika a rona le bakaulengwe ba ba mo dingwageng tsa bone le ba ba kgatlhegelang dilo tse di tshwanang le tsa bone. Seo se ka dira gore go nne motlhofo go ba thusa.”

Moaposetoloi Petere le ba masika a ga Korenelio ba ne ba amogela molaetsa wa Baebele ka bonako. Batho bangwe mo lekgolong la ntlha la dingwaga ba ba neng ba utlwa boammaaruri, ba ne ba tlhoka nako e ntsinyana gore ba dire tshwetso.

Bangwe ba masika a ga Jesu ba ne ba bontsha tumelo mo go ene ka nako ya bodiredi jwa gagwe. Ka sekai, go bonala moaposetoloi Jakobe le Johane e ne e le bontsalaagwe Jesu mme mmaabone e bong Salome, e ne e le morwadiarraagwe mmaagwe Jesu. E ka tswa e ne e le mongwe wa “basadi ba bangwe ba le bantsi, ba ba neng ba . . . direla [Jesu le baaposetoloi] ka dilo tsa bone.”—Luke 8:1-3.

Le fa go ntse jalo, bangwe ba masika a ga Jesu ga ba a ka ba bontsha tumelo ka bonako. Ka sekai, nako nngwe fa Jesu a sena go fetsa ngwaga a kolobeditswe, boidiidi bo ne jwa phuthega mo ntlong go mo reetsa. “E rile ba losika lwa gagwe ba utlwalela ka gone, ba tswa ba ya go mo tshwara, gonne ba ne ba re: ‘O latlhegetswe ke tlhaloganyo.’” Nako nngwe morago ga foo, fa bomorwarraagwe Jesu ba mmotsa gore o ya kae, ga a ka a ba araba ka tlhamalalo. Ka ntlha yang? Ka gonne “totatota, bomorwarraagwe ba ne ba sa supe tumelo mo go ene.”—Mar. 3:21; Joh. 7:5.

Re ithuta eng kafa Jesu a neng a dirisana ka gone le ba masika a gagwe? Ga a ka a kgopisega fa bangwe ba ne ba re o latlhegetswe ke tlhaloganyo. Tota le fa a sena go bolawa le go tsosiwa, Jesu o ne a kgothatsa ba masika a gagwe fa a ne a iponatsa mo go morwarraagwe e bong Jakobe. Seno ga se a ka sa thusa Jakobe fela gore a tlhatswege pelo gore ruri Jesu e ne e le Mesia mme se ne sa thusa le bomorwarraagwe Jesu ba bangwe. Ke gone ka moo, go ka diregang gore ba ne ba amogela moya o o boitshepo fa ba ne ba na le baaposetoloi le batho ba bangwe kwa phaposing e e kwa godimo kwa Jerusalema. Fa nako e ntse e ya, Jakobe le Juda yo le ene e neng e le morwarraagwe Jesu, ba ne ba itumelela ditshiamelo tse di molemo.—Dit. 1:12-14; 2:1-4; 1 Bakor. 15:7.

Fela jaaka mo lekgolong la ntlha la dingwaga, gompieno bangwe ba masika ba tlhoka nako e ntsi pele ga ba ka amogela boammaaruri. Ka sekai, akanya ka Roswitha yo e neng e le modumedi yo o tlhoafetseng wa kereke ya Katoliki ya Roma, fa monna wa gagwe a kolobediwa go nna mongwe wa Basupi ba ga Jehofa ka 1978. E re ka Roswitha a ne a tlhoafetse mo tumelong ya gagwe, kwa tshimologong o ne a ganetsa monna wa gagwe. Le fa go ntse jalo, fa dingwaga di ntse di ya, o ne a fokotsa go nna kgatlhanong le monna wa gagwe mme a lemoga gore Basupi ba ruta boammaaruri. Le ene o ne a kolobediwa ka 2003. Ke eng se se dirileng gore a fetoge? Go na le gore monna wa gagwe a kgopisiwe ke go bo a ne a mo ganetsa, o ne a mo naya ditshono tsa gore a fetole mogopolo. Roswitha o re naya kgakololo efe? “Fa motho a le pelotelele a ka fitlhelela dilo di le dintsi.”

Monika o ne a kolobediwa ka 1974, mme bomorwaawe ba babedi e ne ya nna Basupi mo e ka nnang dingwaga di le lesome moragonyana. Le fa monna wa gagwe e bong Hans a ne a sa ba ganetse, o ne a kolobediwa ka 2006, morago ga dingwaga di le dintsi. E re ka lelapa leno le na le maitemogelo, le re naya kgakololo efe? “Nna o ikanyega mo go Jehofa, mme o se ka wa dira sepe se se kgatlhanong le tumelo ya gago.” Gone ke boammaaruri gore go ne go le botlhokwa gore ba nne ba tlhomamisetsa Hans gore ba a mo rata. Mme ga ba a ka ba mo tlhoboga gore kgabagare o tla amogela boammaaruri.

Nako nngwe Jesu o ne a tlhalosa gore molaetsa wa boammaaruri o tshwana le metsi a a nayang botshelo jo bo sa khutleng. (Joh. 4:13, 14) Re batla gore ba masika a rona ba lapolosiwe ke go nwa metsi a a tsiditsana a a phepa a boammaaruri. Ga go pelaelo gore ga re batle gore ba kgamiwe ka gonne re ba pateleditse gore ba nwe metsi a mantsi ka bonako. Gore a ba tla lapologa kgotsa ba tla kgamiwa go ikaegile ka gore re ba tlhalosetsa boammaaruri jang. Baebele ya re, “pelo ya mosiami e a tlhatlhanya gore e tle e arabe” le gore “pelo ya yo o botlhale e dira gore molomo wa gagwe o bontshe temogo, mme e tsenya tlhotlheletso mo dipounameng tsa gagwe.” Re ka dirisa jang kgakololo eno?—Dia. 15:28; 16:23.

Mosadi a ka nna a batla go tlhalosetsa monna wa gagwe se a se dumelang. Fa a ‘tlhatlhanya gore a arabe,’ o tla tlhopha mafoko a gagwe ka kelotlhoko mme a ka se itlhaganelele go bua. Ga a tshwanela go bonala e kete o na le maikutlo a go ipona tshiamo kgotsa gore o botoka. Mafoko a gagwe a a a akanyeditseng sentle a ka lapolosa le go dira gore go nne le kagiso. Ke nako efe e monna wa gagwe a iketlileng ka yone e bile a atamelesega motlhofo? Ke dilo dife tse a ratang go bua kgotsa go bala ka tsone? A o kgatlhegela saense, dipolotiki kgotsa metshameko? A ka dira jang gore a kgatlhegele Baebele mme a ntse a tlotla maikutlo a gagwe le kafa a lebang dilo ka gone? Go akanya ka dipotso tseno go tla mo thusa gore a bue le go dira dilo ka temogo.

Go fitlhelela dipelo tsa ba lelapa ba ba iseng ba nne Basupi ga go kaye fela go nna re ba bolelela se re se dumelang. Se re se buang se tshwanetse go tsamaisana le boitshwaro jwa rona jo bo siameng.

Jürgen, yo go builweng ka ene pelenyana a re: “Tswelela o dirisa melaometheo ya Baebele mo botshelong jwa gago letsatsi le letsatsi. Ke tsela e e molemo ya go dira gore wa losika a ele tlhoko kafa o farologaneng le ene ka teng le fa gone a sa dumele seo.” Hans, yo o ileng a kolobediwa mo e ka nnang dingwaga di le 30 morago ga mosadi wa gagwe, o dumalana le seo. A re: “Go botlhokwa gore Mokeresete a nne le boitshwaro jo bo siameng gore wa losika a kgone go bona kafa boammaaruri bo amang botshelo jwa gagwe ka teng.” Ba masika a rona ba tshwanetse go bona gore tumelo ya rona e dira gore re farologane le bone, ka tsela e e molemo e seng e e sa siamang.

Moaposetoloi Petere o ne a naya basadi ba banna ba bone e seng Bakeresete kgakololo eno: “Nnang mo taolong ya banna ba lona, e le gore, fa bangwe ba sa utlwe lefoko, ba gapiwe kwantle ga lefoko ka boitshwaro jwa basadi ba bone, ka ntlha ya go bo ba nnile basupi ba ba boneng ka matlho ba boitshwaro jwa lona jo bo itshekileng mmogo le tlotlo e e boteng. Mme a mokgabo wa lona e se ka ya nna wa go loga moriri loetse kafa ntle le wa go rwala mekgabiso ya gouta kgotsa wa go apara diaparo tsa kafa ntle, mme a e nne motho wa sephiri wa pelo yo o apereng diaparo tse di sa senyegeng tsa moya o o didimetseng le o o bonolo, tse e leng tsa botlhokwa jo bogolo mo matlhong a Modimo.”—1 Pet. 3:1-4.

Petere o ne a kwala gore monna a ka tlhotlhelediwa ke tsela e e molemo e mosadi wa gagwe a itshwarang ka yone. Fa kgaitsadi mongwe e bong Christa, a akantse ka temana eo, o ntse a leka go ama pelo ya monna wa gagwe ka boitshwaro jwa gagwe fa a sa le a kolobediwa ka 1972. Le fa monna wa gagwe a ne a kile a ithuta le Basupi, ga a ise a amogele boammaaruri. O ne a nna gone kwa dipokanong tsa Bokeresete mme a dirisana sentle le ba ba mo phuthegong. Mme le bone ba a tlhaloganya gore o na le tshwanelo ya go itirela ditshwetso. Christa o leka jang go fitlhelela pelo ya gagwe?

A re: “Ke ikemiseditse go tswelela ke dira se Jehofa a batlang gore ke se dire. Mme gape ke leka go gapa monna wa me ‘kwantle ga lefoko,’ ka boitshwaro jwa me jo bo siameng. Ke dira sotlhe se nka se kgonang go dirisana le ene, fa fela seo se se kgatlhanong le melaometheo ya Baebele. Mme ke a tlhaloganya gore o na le tshwanelo ya go itlhophela mme ke tlogelela dilo mo go Jehofa.”

Tsela e Christa a dirang dilo ka yone e bontsha botlhokwa jwa go fetofetoga le maemo. O tswelela a ikaga ka dilo tsa semoya, go akaretsa go nna gone ka metlha kwa dipokanong le go nna le seabe mo bodireding jwa Bokeresete. Le fa go ntse jalo, o tlhaloganya se monna wa gagwe a se tlhokang, a lemoga gore o tshwanetse go mmontsha lorato a bo a iphe nako le ene. Rotlhe ba re dirisanang le ba masika ba e seng Basupi, re tshwanetse go fetofetoga le maemo le go ba tlhaloganya. Baebele ya re: “Sengwe le sengwe se na le nako e se e tlhometsweng.” Seno se akaretsa nako e re e fetsang le ba malapa a rona, segolobogolo balekane ba rona ba ba seng mo tumelong ya rona. Go fetsa nako mmogo go dira gore le buisane. Maitemogelo a batho ba bangwe a bontsha gore go buisana sentle go dira gore batho ba se ka ba ikutlwa ba jewa ke bodutu, ba kgaphetswe kwa thoko kgotsa ba fufega.—Mor. 3:1.

Holger yo rraagwe a kolobeditsweng dingwaga di le 20 morago ga ba bangwe mo lelapeng, a re: “Go botlhokwa gore re bontshe mongwe mo lelapeng gore re a mo rata le gore re a mo rapelela.” Christa o tlhalosa gore ‘ga a kitla a itlhoboga gore monna wa gagwe o tla nna moobamedi wa ga Jehofa a bo a amogele boammaaruri.’ Ka metlha re tshwanetse go tshwara ba masika a rona ba e seng Basupi ka tsela e e molemo, re bontsha gore ga re a ba tlhoboga.

Mokgele wa rona ke gore re tswelele re na le kamano e e molemo le ba masika a rona mme re ba neye tshono ya go amogela boammaaruri le go fitlhelela dipelo tsa bone ka molaetsa wa Baebele. Mme mo dilong tsotlhe re tshwanetse go itshwara “ka bonolo le tlotlo e e boteng.”—1 Pet. 3:15.