O Aga mo Motheong o o Ntseng Jang?

GORE kago e kgone go tshwarelela lobaka lo loleele go ikaegile thata ka gore motheo wa yone o nonofile go le kana kang. Ka dinako tse dingwe Baebele e dirisa molaomotheo ono ka tsela ya tshwantshetso.

Ka sekai, moporofeti Isaia a re Jehofa Modimo o “thaya motheo wa lefatshe.” (Isaia 51:13) Motheo ono o akaretsa melao e e sa fetogeng ya Modimo e e laolang motsamao wa lefatshe e bile e dira gore le nne le le mo maemong a lone. (Pesalema 104:5) Lefoko la Modimo, Baebele, gape le bua ka “metheo” e setšhaba se theilweng mo go yone. Metheo eno ke tshiamiso, molao le tolamo. Fa e “rutlololwa,” kana e koafadiwa ke go tlhoka tshiamiso, ditiro tse di seng kafa molaong le thubakanyo, seno se dira gore setšhaba se se ka sa itshetlela.—Pesalema 11:2-6; Diane 29:4.

Molaomotheo ono o a dira le mo bathong. Fa Jesu Keresete a ne a konela Thero ya gagwe e e itsegeng ya kwa Thabeng, o ne a re: “Mongwe le mongwe yo o utlwang mafoko ano a me a ba a a dira o tla tshwantshanngwa le monna yo o botlhale, yo o neng a aga ntlo ya gagwe mo lefikeng. Mme pula ya tshologa le merwalela ya tla le diphefo tsa foka tsa itaaka ntlo eo, mme ya se ka ya wela, gonne e ne e thailwe mo lefikeng. Go feta moo, mongwe le mongwe yo o utlwang mafoko ano a me mme a sa a dire o tla tshwantshanngwa le monna yo o seeleele, yo o neng a aga ntlo ya gagwe mo motlhabeng. Mme pula ya tshologa le merwalela ya tla le diphefo tsa foka tsa itaaka ntlo eo mme ya wela, mme go gosomana ga yone go ne go le go golo.”—Mathaio 7:24-27.

O aga botshelo jwa gago mo motheong o o ntseng jang? A o bo aga mo motlhabeng o o sa itsetsepelang wa difilosofi tsa batho ba ba sa boifeng Modimo, o e leng motheo o o ka dirang gore botshelo jwa gago bo gosomane? Kana o bo aga mo lefikeng le le nonofileng ka go ikobela mafoko a ga Jesu Keresete, mo go tla go thusang gore o falole matsubutsubu a tshwantshetso a botshelo?