“Bona! Yono ke Modimo wa Rona”

Tshedimosetso e go tlotliwang ka yone mo ditlhogong tseno ka bobedi e tswa mo bukeng ya Atamalana le Jehofa, e e neng ya gololwa kwa dikopanong tsa kgaolo tse di neng di tshwerwe mo lefatsheng lotlhe ka 2002/03.—Bona setlhogo se se reng “E Kabile Phatlha mo Pelong ya Me,” mo go tsebe 20.

“Bona! Yono ke Modimo wa rona. Re solofetse mo go ene, mme o tla re boloka. Yono ke Jehofa.”—ISAIA 25:9.

1, 2. (a) Jehofa o ile a bitsa Aborahame tlhogo ya lotso a reng, mme seno se ka dira gore re ipotse eng? (b) Baebele e re tlhomamisetsa jang gore go a kgonega gore re nne le botsala jo bogolo le Modimo?

“TSALA ya me.” Jehofa, Mmopi wa legodimo le lefatshe, o ne a bitsa Aborahame tlhogo ya lotso jalo. (Isaia 41:8) Akanya fela—motho fela yo o sa itekanelang a nna le botsala le Morena Molaodimogolo wa lobopo! O ka nna wa ipotsa, ‘A go a kgonega gore ke atamalane jalo le Modimo?’

² Baebele e re tlhomamisetsa gore go a kgonega gore motho a nne le botsala jo bogolo le Modimo. Aborahame o ne a nna le botsala jo bo ntseng jalo le Modimo ka gonne “o ne a dumela mo go Jehofa.” (Jakobe 2:23) Le gompieno Jehofa “o atamalane thata le bathokgami.” (Diane 3:32) Mo go Jakobe 4:8 Baebele e re kgothatsa jaana: “Atamelang Modimo, mme o tla lo atamela.” Ga go pelaelo gore fa re tsaya dikgato tsa go atamela Jehofa le ene o tla dira se se tshwanang. Ee, o tla atamalana le rona. A mme mafoko ano a a tlhotlheleditsweng a kaya gore ke rona—rona batho ba ba boleo le ba ba sa itekanelang—ba re tsayang kgato pele? Nnyaa. Re kgona go nna le botsala le Jehofa fela ka gonne Modimo wa rona yo o lorato a ile a tsaya dikgato tse pedi tse di botlhokwa.—Pesalema 25:14.

 3. Jehofa o tsere dikgato dife tse pedi go dira gore re kgone go nna le botsala le ene?

³ Kgato ya ntlha, Jehofa o ne a dira thulaganyo ya gore Jesu a ‘ntshe moya wa gagwe e le thekololo gore a bone ba le bantsi.’ (Mathaio 20:28) Setlhabelo seo sa thekololo se dira gore re kgone go atamalana le Modimo. Baebele ya re: “Mme rona, re a rata, ka gonne a re ratile pele.” (1 Johane 4:19) Ee, e re ka Modimo “a re ratile pele,” o ne a re bulela tsela ya gore re kgone go nna le botsala le ene. Ya bobedi, Jehofa o re itshenoletse. Mo botsaleng bongwe le bongwe jo re nnang le jone, kamano ya rona le motho yo e leng tsala ya rona e ikaegile gotlhelele ka go itse motho yoo, go anaanela dinonofo tsa gagwe tse di tlhomologileng le go di tseela kwa godimo. Akanya gore seno se kaya eng. Fa Jehofa e ka bo e le Modimo yo o fitlhegileng, yo o sa itseweng, re ne re se kitla re atamalana le ene. Mme go na le gore Jehofa a re iphitlhele, o batla gore re mo itse. (Isaia 45:19) Mo Lefokong la gagwe Baebele, o re itshenolela ka go dirisa mafoko a re kgonang go a tlhaloganya—e leng se se sa bontsheng fela gore o a re rata mme gape se bontsha gore o batla gore re mo itse le gore re mo rate ka gonne e le Rraarona wa selegodimo.

 4. Re tla ikutlwa jang ka Jehofa fa re simolola go itse dinonofo tsa ga gagwe botoka?

⁴ A o kile wa bona ngwana yo monnye a supetsa ditsala tsa gagwe rraagwe, a bo a bua jaana ka boipelo e bile a le motlotlo, “Papa ke yole”? Baobamedi ba Modimo le bone ba na le lebaka le le molemo la go ikutlwa jalo ka Jehofa. Baebele e bolelela pele gore go tlile go tla nako e mo go yone batho ba ba ikanyegang ba tla tlhaeletsang ba re: “Bona! Yono ke Modimo wa rona.” (Isaia 25:8, 9) Fa o ntse o nna le kitso e e oketsegileng ka dinonofo tsa ga Jehofa, o tla ikutlwa o na le Rre yo o ba gaisang botlhe le Tsala e o atamalaneng thata le yone. Ee, go tlhaloganya dinonofo tsa ga Jehofa go re naya mabaka a le mantsi a go atamalana le ene. Ka gone, a re sekaseke kafa Baebele e senolang dinonofo tse dikgolo tsa ga Jehofa ka teng—maatla, tshiamiso, botlhale le lorato. Mo setlhogong seno re tlile go sekaseka tsa ntlha tse tharo.

“O Goletsegile mo Maatleng”

 5. Ke eng fa go tshwanela go bo e le Jehofa fela yo e leng “Mothatayotlhe,” mme o dirisa maatla a gagwe a a boitshegang ka ditsela dife?

⁵ Jehofa o “goletsegile mo maatleng.” (Jobe 37:23) Jeremia 10:6 ya re: “Ga go na ope yo o tshwanang le wena ka tsela epe, wena Jehofa. O mogolo, e bile leina la gago le na le thata e kgolo.” Jehofa ga a tshwane le sebopiwa sepe, ene o na le maatla a a ka se kang a lekanngwa. Ke gone ka moo e leng ene fela yo e leng “Mothatayotlhe.” (Tshenolo 15:3) Jehofa o dirisa maatla a gagwe a a boitshegang go bopa, go nyeletsa, go sireletsa le go tsosolosa. Akanya ka dikai di le pedi fela—maatla a gagwe a go bopa le a go sireletsa.

6, 7. Letsatsi le maatla go le kana kang, mme le re supela boammaaruri bofe jwa botlhokwa?

⁶ Fa o eme kwa ntle mo letsatsing le le bogale la selemo, ke eng se o se utlwang mo letlalong la gago? Mogote wa letsatsi. Tota boammaaruri ke gore, o utlwa matswela a maatla a ga Jehofa a go bopa. Letsatsi le na le maatla a a kana kang? Mogote wa lone mo karolong ya lone e e fa gare o ka nna didikirii tsa Celsius di ka nna dimilione di le 15. Fa o ne o ka tsaya karolwana e e lekanang le tlhogwana ya phini ya karolo e e fa gare ya letsatsi mme o bo o e baya mono lefatsheng, o ne o ka sha fa o ne o ka ema sekgala sa dikilometara tse 140 go tswa mo mogoteng oo wa karolwana eo! Motsotswana mongwe le mongwe letsatsi le tlhagisa maatla a a lekanang le a go thunya ga dibomo tsa nuklea di le dintsintsi. Le fa go ntse jalo, lefatshe le dikologa boubelo joo jo bo tukang le le sekgala se se lekaneng sentle go tswa mo go jone. Fa le ne le ka bo atamela thata, metsi otlhe a lone a ne a tla kgala; fa le ne le ka bo katoga thata, a ne a tla swa dikgapetla. Maemo ano a a feteletseng oomabedi a ne a tla dira gore dilo di se ka tsa kgona go tshela mo lefatsheng.

⁷ Batho ba le bantsi ga ba tseye letsatsi tsia go le kalo le mororo botshelo jwa bone bo ikaegile thata ka lone. Ka jalo ba tlhokomologa thuto e letsatsi le ka ba rutang yone. Pesalema 74:16 e bua jaana ka Jehofa: “O ne wa baakanya sebonesi, e leng letsatsi.” Ee, letsatsi le galaletsa Jehofa, “Modiri wa legodimo le lefatshe.” (Pesalema 146:6) Mme gone, letsatsi ke selo se le sengwe fela mo go tse dintsintsi tse di bopilweng tse di re rutang ka maatla a magolo a Jehofa a nang le one. Fa re ntse re ithuta go le gontsi ka maatla a ga Jehofa a popo, seo se tla dira gore tsela e re mo tlotlang ka yone le yone e gole.

8, 9. (a) Ke setshwantsho sefe se se molemo se se bontshang kafa Jehofa a iketleeleditseng ka teng go sireletsa baobamedi ba gagwe le go ba tlhokomela? (b) Modisa wa mo metlheng ya Baebele o ne a tlhokomela dinku tsa gagwe ka tsela efe, mme seno se re ruta eng ka Modisa wa rona yo Mogolo?

⁸ Gape Jehofa o dirisa maatla a gagwe a magolo go sireletsa batlhanka ba gagwe le go ba tlhokomela. Baebele e dirisa ditshwantsho tse di kgatlhang mme e le tse di amang pelo go tlhalosa ditsholofetso tsa ga Jehofa tsa gore o tla re sireletsa. Ka sekai, ela tlhoko Isaia 40:11. Mo go yone Jehofa o itshwantsha le modisa mme batho ba gagwe o ba tshwantsha le dinku. Re bala jaana: “O tla disa motlhape wa gagwe jaaka modisa. O tla phutha dikwanyana mmogo ka lebogo la gagwe; mme o tla di tshola mo sehubeng sa gagwe. Tse di amusang o tla di etelela pele ka tlhoko.” A o kgona go bona se se tlhalosiwang mo temaneng eno ka leitlho la mogopolo?

⁹ Ke diphologolo di sekae fela tse di ka tlhaselwang motlhofo jaaka nku. Modisa wa mo metlheng ya Baebele o ne a tshwanelwa ke go nna pelokgale go sireletsa dinku tsa gagwe mo diphiring, mo dibereng le mo ditaung. (1 Samuele 17:34-36; Johane 10:10-13) Mme ka dinako tse dingwe go sireletsa dinku le go di tlhokomela go ne go mo tlhoka gore a nne bonolo. Ka sekai, fa nku e ne e ka tsalela kgakala le lesaka, modisa o ne a sireletsa jang kwanyana eo e e ka se kang ya itshireletsa? O ne a e tshola, gongwe ka malatsi a le mantsi, “mo sehubeng sa gagwe”—memeno e e lepeletseng ya seaparo sa gagwe sa fa godimo. Mme go ne go tla jang gore kwanyana e nne mo sehubeng sa modisa? Kwanyana e ne e ka atamela modisa gongwe e bile e mo kgoma leoto. Le fa go ntse jalo, modisa o ne a tshwanelwa ke go khubama go tsaya kwanyana a e tsholetsa a bo a e baya ka pabalesego mo sehubeng sa gagwe. A bo seo se tshwantshetsa sentle jang ne tsela e e bonolo e Modisa yo Mogolo a sireletsang le go tlhokomela batlhanka ba gagwe ka yone!

10. Jehofa o re neela tshireletso efe gompieno, mme ke eng fa tshireletso e e ntseng jalo e le botlhokwa thata?

¹⁰ Jehofa ga a re solofetse fela gore o tla re sireletsa. Mo metlheng ya Baebele, o ne a bontsha ka ditsela tse di gakgamatsang gore o kgona go ‘golola batho ba boineelo jwa bomodimo mo tekong.’ (2 Petere 2:9) Go tweng ka gompieno? Re a itse gore gone jaanong ga a dirise maatla a gagwe go re sireletsa mo masetlapelong otlhe. Le fa go ntse jalo, o re neela tshireletso e e botlhokwa go gaisa tsotlhe—tshireletso ya semoya. Modimo wa rona yo o lorato o re sireletsa mo dikotsing tsa semoya ka go re tlamela ka se re se tlhokang gore re kgone go itshokela diteko le go sireletsa kamano ya rona le ene. Ka sekai, Luke 11:13 ya re: “Fa lona, le mororo lo le boikepo, lo itse kafa lo ka nayang bana ba lona dimpho tse di molemo ka gone, a bo Rara yo o kwa legodimong bogolo jang a tla naya moya o o boitshepo ba ba mo kopang!” Moya oo o o maatla o ka re thusa go emelana le teko kana bothata bope fela jo re ka lebanang le jone. (2 Bakorintha 4:7) Ka gone Jehofa o dira ka natla go sireletsa botshelo jwa rona ka bosakhutleng, e seng fela ka dingwaga di le mmalwa. Ka gone, re ka nna ra tshwanelwa ke go leba pogo epe fela e re lebanang le yone mo tsamaisong eno e le “ya nakwana e bile e le motlhofo.” (2 Bakorintha 4:17) A ga re tlhotlheletsege go atamalana le Modimo yo o ntseng jalo yo ka lorato a dirisang maatla a gagwe go re sireletsa?

“Jehofa ke Morati wa Tshiamiso”

11, 12. (a) Ke eng fa tshiamiso ya ga Jehofa e dira gore re batle go atamalana le ene? (b) Ke tshwetso efe e Dafide a ileng a e dira malebana le tshiamiso ya ga Jehofa, mme mafoko ano a a tlhotlheleditsweng a ka re kgothatsa ka tsela efe?

¹¹ Jehofa o dira dilo ka tshiamo mme o dira jalo ka dinako tsotlhe, a sa gobelele. Tshiamiso ya Modimo ga se nonofo e e makgwakgwa e e re katoganyang le Jehofa, go na le moo, ke nonofo e e molemo e e re tlhotlheletsang go atamalana le ene. Baebele e tlhalosa sentle kafa nonofo eno e amang pelo ka teng. A jaanong re sekaseke ditsela tse tharo tse Jehofa a bontshang tshiamiso ya gagwe ka tsone.

¹² Tsela ya ntlha ke gore, tshiamiso ya ga Jehofa e mo tlhotlheletsa go dirisana le batlhanka ba gagwe ka boikanyegi. Mopesalema Dafide o ne a iponela ka namana karolo eno ya tshiamiso ya ga Jehofa. Ke tshwetso efe e Dafide a neng a e dira go ya ka se se mo diragaletseng le go ya ka se a se ithutileng mo ditseleng tsa Modimo? O ne a re: “Jehofa ke morati wa tshiamiso, mme ga a na go tlogela batho ba gagwe ba ba ikanyegang. Ba tla disiwa ka bosakhutleng.” (Pesalema 37:28) A mafoko a a gomotsang ruri! Le ka motlha Modimo wa rona a ka se latlhe batho ba ba ikanyegang mo go ene. Ka gone, re ka ikaega ka botsala jwa gagwe le tlhokomelo ya gagwe e e lorato. Tsela e a leng tshiamiso ka yone e re tlhomamisetsa seno!—Diane 2:7, 8.

13. Tsela e Jehofa a amegang ka yone ka batho ba ba sotlegang e bonala jang mo Molaong o a neng a o naya Baiseraele?

¹³ Tsela ya bobedi ke gore, tshiamiso ya Modimo e tsaya tsia dilo tse batho ba ba mo kutlobotlhokong ba di tlhokang. Tsela e Jehofa a amegang ka yone ka batho ba ba sotlegang e bonala mo Molaong o a neng a o naya Baiseraele. Ka sekai, Molao o ne o na le dithulaganyo tse di kgethegileng tsa go tlhomamisa gore dikhutsana le batlholagadi ba a tlhokomelwa. (Duteronome 24:17-21) E re ka Jehofa a ne a lemoga kafa botshelo bo ka nnang boima ka teng mo malapeng a a ntseng jalo, ene ka boene o ne a nna Moatlhodi le Mosireletsi wa bone yo o lorato. (Duteronome 10:17, 18) O ne a tlhagisa Baiseraele gore fa ba ne ba ka sotla basadi le bana ba ba neng ba ka se ka ba itshireletsa, o ne a tla utlwa selelo sa bone. O ne a bua mafoko ano a a kwadilweng mo go Ekesodo 22:22-24: “Bogale jwa me bo tla tuka.” Le fa gone kgalefo e se nonofo ya konokono ya Modimo, ditiro tsa tshiamololo di mo galefisa ka tsela e e tshwanetseng, segolobogolo fa di direlwa batho ba maemo a a kwa tlase ba ba ka se kang ba itshireletsa.—Pesalema 103:6.

14. Ke bosupi bofe jo bo molemo go gaisa jo bo bontshang gore Jehofa ga a na tlhaolele?

¹⁴ Tsela ya boraro ke gore, mo go Duteronome 10:17 Baebele e re tlhomamisetsa gore Jehofa ‘ga a tshware ope ka go mo tlhaola e bile ga a amogele pipamolomo.’ Jehofa ga a tshwane le bontsi jwa batho ba ba nang le maatla kana taolo, ga a forwe ke dikhumo kana ditebego tsa motho. Ga a ke a gobelela ka gope kana a tlhaola batho. Bosupi jo bo molemo go gaisa jwa gore ga a gobelele ke jono: Tshono ya go nna moobamedi wa gagwe wa boammaaruri ka tsholofelo ya go bona botshelo jo bo sa feleng, ga e bonwe fela ke batho ba sekae ba maemo. Go na le moo, Ditiro 10:34, 35 ya re: “Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.” Tsholofelo eno e e molemo e ka bonwa ke batho botlhe go sa kgathalasege maemo a bone, mmala wa bone kana naga e ba nnang mo go yone. A seno ga se bontshe tshiamiso ya boammaaruri? Ee ruri, go tlhaloganya tshiamiso ya ga Jehofa sentle go dira gore re atamalane le ene!

‘A Boteng Jwa Botlhale Jwa Modimo!’

15. Botlhale ke eng, mme Jehofa o bo bontsha ka tsela efe?

¹⁵ Moaposetoloi Paulo o ile a tlhotlheletsega go bua mafoko ano a a kwadilweng mo go Baroma 11:33: ‘A boteng jwa botlhale le kitso ya Modimo!’ Ee, fa re ntse re ithuta dikarolo tse di farologaneng tsa botlhale jo bogolo jwa ga Jehofa, seo se tla dira gore dipelo tsa rona di tlhotlheletsege go mo tlotla ka tlotlo e e boteng. Mme gone, re ka tlhalosa jang nonofo eno ya Modimo? Botlhale bo thusa motho go dirisa kitso, temogo le tlhaloganyo ka tsela e e molemo. Ka metlha Jehofa o dirisa kitso ya gagwe e kgolo le tlhaloganyo ya gagwe e e boteng go dira ditshwetso tse di siameng, a di diragatsa ka tsela e e molemo go gaisa tsotlhe.

16, 17. Popo ya ga Jehofa e supa jang gore o na le botlhale jo bogolo? Neela sekai.

¹⁶ Ke dikai dife tse di maleba tse di bontshang botlhale jo bo bogolo jwa ga Jehofa? Pesalema 104:24 ya re: “A bo ditiro tsa gago di le dintsi jang ne, Jehofa! O di dirile tsotlhe ka botlhale. Lefatshe le tletse ditiro tsa gago.” Ee ruri, fa re ntse re ithuta go le gontsi ka dilo tse Jehofa a di dirileng, re tla gakgamadiwa thata ke botlhale jwa gagwe. Ka sekai, baitsesaense ba ithutile dilo di le dintsi go tswa mo popong ya ga Jehofa! Tota e bile, go na le mofuta wa thuto ya boenjeniri jo bo bidiwang biomimetics, e e lekang go etsa thulaganyo ya botlhami e e fitlhelwang mo dilong tsa tlholego.

¹⁷ Ka sekai, o ka tswa o ile wa gakgamadiwa ke bontle jwa bobi jwa segokgo. Bo dirilwe ka tsela e e gakgamatsang tota. Maodi a jone a a lebegang a le lotsatsa a nonofile go gaisa tshipi, a tiile go feta faeba e e dirisiwang mo diaparong tse marumo a tlhobolo a sa kgoneng go di phunyeletsa. Tota seo se bolela eng? Akanya bobi jwa segokgo bo godisitswe gore bo lekane le letlowa le le dirisiwang mo mokorong wa go tshwara ditlhapi. Bobi joo bo ne bo tla nonofa thata jaana mo bo neng bo tla kgona go tshwara sefofane se ntse se fofa! Ee, Jehofa o dirile dilo tseo sotlhe “ka botlhale.”

18. Botlhale jwa ga Jehofa bo bonala jang mo kgannyeng ya go bo a dirisitse batho go kwala Lefoko la gagwe Baebele?

¹⁸ Bosupi jo bogolo go gaisa jwa botlhale jwa ga Jehofa bo ka bonwa mo Lefokong la gagwe, Baebele. Kgakololo e e molemo e e fitlhelwang mo go lone e re bontsha tsela ya botshelo e e molemo go gaisa tsotlhe. (Isaia 48:17) Botlhale jwa ga Jehofa jo bo sa lekaneng le bope bo bonwa gape le mo tseleng e Baebele e ileng ya kwalwa ka yone. Jang? Jehofa o ne a dirisa botlhale jwa gagwe ka go tlhopha gore a dirise batho go kwala Lefoko la gagwe. Fa a ka bo a dirisitse baengele go kwala Lefoko la gagwe le le tlhotlheleditsweng, a Baebele e ka bo e re ama ka tsela e e re amang ka yone? Ke boammaaruri gore, baengele ba ne ba ka kgona go tlhalosa Jehofa ka tsela ya bone ya maemo a a kwa godimo, ba tlhalosa tsela e ba ineetseng ka yone mo go ene. Mme gone, a re ne re ka kgona go tlhaloganya tsela ya go akanya ya dibopiwa tseo tsa semoya tse di itekanetseng, tse kitso ya tsone, maitemogelo le nonofo di fetang tsa rona kgakala?—Bahebera 2:6, 7.

19. Ke sekai sefe se se bontshang gore go dirisiwa ga batho gore ba kwale Baebele go dira gore e ame maikutlo le go gogela?

¹⁹ Kgang ya go bo go dirisitswe batho go kwala Baebele e dira gore e ame maikutlo le go gogela. Bakwadi ba yone e ne e le batho ba ba nang le maikutlo a a tshwanang le a rona. E re ka ba ne ba sa itekanela, ba ne ba lebana le diteko le mathata a a tshwanang le a rona. Ka dinako tse dingwe, moya wa ga Jehofa o ne o ba tlhotlheletsa go kwala ba tlhalosa maikutlo a bone le mathata a bone. (2 Bakorintha 12:7-10) Ka jalo ba ne ba kwala mafoko a go seng moengele ope yo o neng a ka kgona go a dirisa. Ka sekai, akanya ka mafoko a ga Dafide a a kwadilweng mo go Pesalema 51. Go ya ka mafoko a a tlhagang fa godimo ga kgaolo eo, Dafide o ile a tlhama pesalema eo morago ga gore a dire boleo jo bo masisi. O ne a tlhalosa kafa a neng a ikutlwa ka teng, a tlhalosa khutsafalo e a neng a le mo go yone mme a kopa Modimo gore a mo itshwarele. Temana ya 2 le ya 3 di a re: “Ntlhatswe tlolo ya me ka botlalo, mme o mphepafatse mo boleong jwa me. Gonne nna ke itse ditlolo tsa me, le boleo jwa me bo fa pele ga me ka metlha.” Ela tlhoko temana ya 5: “Bona! Ke tsholetswe mo tlolong ka ditlhabi tsa pelegi, mmè o ne a inthwalela mo boleong.” Temana ya 17 e oketsa jaana: “Ditlhabelo tse di yang kwa Modimong ke moya o o ngomogileng; pelo e e phatlogileng le e e gateletsweng, wena Modimo, ga o kitla o e nyatsa.” A mafoko ano ga a dire gore o utlwe kutlobotlhoko e kgolo e mokwadi a neng a le mo go yone? Ke mang yo mongwe yo o neng a ka kgona go tlhalosa maikutlo ano a a tswang pelong fa e se fela motho yo o sa itekanelang?

20, 21. (a) Ke eng fa go ka twe Baebele e na le botlhale jwa ga Jehofa le mororo go dirisitswe batho go e kwala? (b) Go tla tlotliwa ke eng mo setlhogong se se latelang?

²⁰ Ka go dirisa batho ba ba ntseng jalo ba ba sa itekanelang, Jehofa o ne a re abela sone se re neng re se tlhoka—pego e e ‘tlhotlheleditsweng ke Modimo’ mme gone e le e e kwadilweng ka tsela e batho ba ka e tlhaloganyang. (2 Timotheo 3:16) Ee, bakwadi bao ba ne ba kaelwa ke moya o o boitshepo. Ka gone ba ne ba kwala botlhale jwa ga Jehofa, e seng jwa bone. Botlhale joo bo ikanyega ka botlalo. Bo feta botlhale jwa rona kgakala jaana mo Modimo a re kgothatsang jaana ka lorato: “Ikanye Jehofa ka pelo ya gago yotlhe mme o se ka wa ikaega ka tlhaloganyo ya gago. Mo tseye tsia mo ditseleng tsotlhe tsa gago, mme o tla tlhamalatsa ditselana tsa gago.” (Diane 3:5, 6) Go sekegela tsebe kgakololo eo e e molemo go dira gore re atamalane le Modimo wa rona yo o botlhale.

²¹ Nonofo ya ga Jehofa e e molemo le e e kgatlhang go gaisa tsotlhe ke lorato. Mo setlhogong se se latelang re tla tlotla ka tsela e Jehofa a ileng a bontsha lorato ka yone.

A o A Gakologelwa?

• Ke dikgato dife tse Jehofa a di tsereng go re thusa gore re nne le botsala le ene?

• Dingwe tsa dikai tsa maatla a ga Jehofa a go bopa le a go sireletsa ke dife?

• Jehofa o dirisa tshiamiso ya gagwe ka ditsela dife?

• Botlhale jwa ga Jehofa bo bonala jang mo popong ya gagwe le mo Baebeleng?

[Setshwantsho mo go tsebe 10]

Jehofa o tlhokomela dinku tsa gagwe ka bonolo fela jaaka modisa yo o beileng kwanyana mo sehubeng sa gagwe

[Setshwantsho mo go tsebe 13]

Re bona botlhale jwa ga Jehofa mo tseleng e Baebele e ileng ya kwalwa ka yone