LAEBORARI YA MO INTERNET

‘Tsweetswee, Ikobeleng Lentswe la ga Jehofa’

Modimo o Bua le Rona ka Jeremia
- 12. Ka dinako tse dingwe bagolwane ba tshwanelwa ke go dira eng go sireletsa phuthego?
  
  ¹² Bajuda ba le bantsi ba ne ba gana thuso e Jehofa a neng a ba naya yone gangwe le gape ka Jeremia. Ka tsela e e tshwanang le gompieno, go ka direga gore motho yo o dirileng boleo jo bo masisi a bo a sa ikwatlhaye, a gana thuso ya bagolwane. Fa go ntse jalo, bagolwane ba tshwanetse go latela kaelo ya Dikwalo ya go sireletsa phuthego ka go kgaola modiraphoso yoo. (1 Bakor. 5:11-13; bona lebokose le le reng “Go Tshela Kwantle ga Molao,” le le mo go tsebe 73.) Mme gone, a seo se raya gore motho yoo o tshwanetse go tlhobogwa, gore Jehofa ga a kitla a tlhola a mo amogela? Nnyaa, le e seng! Baiseraele ba ne ba sa bolo go nna ba tsuologa; mme gone Modimo o ile a ba raya a re: “Boang, lona barwa ba batlhanogi. Ke tla fodisa boemo jwa lona jwa botlhanogi.” (Jer. 3:22)a Jehofa o kopa batho ba ba dirileng diphoso gore ba boele kwa go ene. Tota e bile, o ba laela gore ba dire jalo.
  
  GO TSHELA KWANTLE GA MOLAO
  
  Botshelo jwa Bajuda bo ne bo ntse jang fa Jerusalema e sena go senngwa? Mo go Dikhutsafalo 2:9 Jeremia o re tlhalosetsa dilo dingwe tse di neng tsa direga. Dipota tsa motse di ne tsa thujwa, gongwe le dikgoro tse pele di neng di sireleditse motse. Mme se se maswe le go feta, go ne go se na “molao.” A Jeremia o ne a kaya gore bafalodi ba ne ba fetogile segopa se se sa laolegeng? Go bonala a ne a bua ka go tlhoka tshireletsego ya semoya le kgomotso e ka nako nngwe Bajuda ba neng ba na le yone fa baperesiti le baporofeti ba ba ikanyegang ba ne ba ba ruta Molao wa Modimo. Baporofeti ba maaka ba jaanong go neng go reediwa bone ba ne ba sa neye batho ‘ponatshegelo’ kgotsa kaelo e e tswang kwa go Jehofa; ka jalo ‘ponatshegelo’ e ba neng ba e bona e ne e se na mosola.—Dikhu. 2:14.
  
  Motho yo o kgaotsweng mo phuthegong ya Bokeresete a ka ikutlwa a le mo seemong se se tshwanang le seo. Botsalano jo bo lorato jo a neng a bo itumelela le bakaulengwe le bokgaitsadi ba gagwe ba semoya mmogo le tlhokomelo e e lorato ya bagolwane, di fedile. Mme o kgakala le kaelo e e botlhokwatlhokwa ya semoya e a neng a itumelela yone pele. Kwa lefatsheng, kwa go se nang “molao” wa ga Jehofa teng, a ka nna a ikutlwa a latlhegile tota. Le fa go ntse jalo, a ka kgona go boa gape a amogelwa ke Jehofa le go itumelela masego a magolo. (2 Bakor. 2:6-10) Le wena o tshwanetse wa bo o lemoga gore go molemo go ikobela Jehofa go na le go tshela kwantle ga molao wa gagwe.

‘Tsweetswee, Ikobeleng Lentswe la ga Jehofa’

Modimo o Bua le Rona ka Jeremia
- a Mono Jehofa o ne a bua le batho ba bogosi jo bo kwa bokone jwa Iseraele. Fa Jeremia a ne a isa molaetsa ono, batho bao ba ba neng ba le mo bogosing jwa ditso tse di lesome tsa Iseraele ba ne ba na le dingwaga di ka nna 100 ba le kwa botshwarwa. O ne a bua gore go tla go fitlha mo motlheng wa gagwe, setšhaba seo se ne se ise se ikwatlhaye. (2 Dikg. 17:16-18, 24, 34, 35) Le fa go ntse jalo, batho ba ne ba sa ntse ba ka boelana le Modimo, le e leng go boa go tswa kwa botshwarwa.