Kgaolo ya Boraro

Letsatsi la ga Jehofa—Kgang ya Botlhokwa

1, 2. (a) Baporofeti botlhe ba ba 12 ba umaka kgang efe ya botlhokwa? (b) Bangwe ba baporofeti ba ba 12 ba ne ba umaka letsatsi la ga Jehofa jang ka tlhamalalo?

“LETSATSI le legolo la ga Jehofa le gaufi. Le gaufi e bile le itlhaganela thata.” (Sefania 1:14) Gangwe le gape baporofeti ba Modimo ba ne ba tlhagisa batho ka letsatsi la ga Jehofa le le gaufi. Gantsi ba ne ba bontsha kafa go tla ga lone go tshwanetseng ga ama matshelo a batho ka teng le boitshwaro jwa bone. Ka metlha go ne go utlwala mo melaetseng ya bone gore go tshwanetse ga tsewa kgato ka potlako. Fa o ka bo o ikutlwetse melaetsa eno ka bowena, o kabo o ile wa dira eng?

² Fa o ntse o bala dibuka tseno tse 12 tsa boporofeti, o tla fitlhela gore botlhe ba ne ba bua ka letsatsi la ga Jehofa, bangwe e le ka tlhamalalo mme ba bangwe e se ka tlhamalalo.a Ka jalo, pele o sekaseka dikgaolo tse di latelang tse di nang le tshedimosetso ya botlhokwa e e neng e bolelwa ke baporofeti bano, akanya ka kgang e e boaboelediwang mo dibukeng tseno: letsatsi la ga Jehofa. Baporofeti ba le barataro mo go bone ba ne ba dirisa one mafoko ao jaaka a ntse kgotsa ba dirisa mangwe a a tsamaisanang le one. Joele o ne a tlhalosa dintlha ka botlalo kaga “letsatsi le legolo le le le boitshegang la ga Jehofa.” (Joele 1:15; 2:1, 2, 30-32) Amose o ne a bolelela Baiseraele gore ba ipaakanyetse go kopana le Modimo wa bone, gonne letsatsi la ga Jehofa e ne e tla nna letsatsi la lefifi. (Amose 4:12; 5:18) Moragonyana, Sefania o ne a bua mafoko a a nopotsweng mo serapeng sa 1. Mme pele fela Jerusalema a senngwa, Obadia o ne a tlhagisa jaana: “Letsatsi la ga Jehofa kgatlhanong le ditšhaba tsotlhe le atametse.”—Obadia 15.

3. Ke ka ntlha yang fa re ka re baporofeti ba ba neng ba romelwa morago ga gore Bajuda ba boe kwa botshwarwa ba ne ba bua ka letsatsi la ga Jehofa?

³ Gape o tla lemoga gore baporofeti ba le babedi ba ba neng ba romelwa kwa Bajudeng fa ba sena go boa kwa botshwarwa ba ne ba dirisa mafoko a a tshwanang le ao. Sekarea o ne a bua ka letsatsi le ditšhaba tsotlhe tse di tlhaselang Jerusalema di neng di tla nyelediwa ka lone. O ne a tlhalosa ka botlalo se se neng se tla direga ka “letsatsi le le lengwe le le itsiweng e le la ga Jehofa.” (Sekarea 12:9; 14:7, 12-15) Mme Malaki o ne a tlhagisa batho gore “letsatsi le legolo le le le boitshegang la ga Jehofa” le etla.—Malaki 4:1-5.

 4. Bangwe ba baporofeti ba ba 12 ba umaka letsatsi la ga Jehofa jang?

⁴ Le fa ba ne ba sa dirise mafoko a a reng “letsatsi la ga Jehofa,” ba bangwe mo go ba ba 12 ba ne ba umaka letsatsi leo mme e se ka tlhamalalo. Hosea o ne a bolela gore Jehofa o ne a tla dira gore Iseraele, mme moragonyana Juda, a arabele maleo a gagwe. (Hosea 8:13, 14; 9:9; 12:2) Gantsi melaetsa eno e ne e amana le se Jehofa a neng a se dira mo metlheng eo. Ka sekai, Jona o ne a bolela katlholo ya Modimo e e neng e tlela Ninife, mme Mika o ne a tlhalosa se se neng se tla diragala fa Modimo a tsaya kgato kgatlhanong le ditšhaba tse di tsuologang. (Jona 3:4; Mika 1:2-5) Nahume o ne a solofetsa gore Jehofa o ne a tla ipusolosetsa mo babeng ba Gagwe. (Nahume 1:2, 3) Habakuke o ne a ikuela a batla tshiamiso mme a tlhalosa “letsatsi la matshwenyego.” (Habakuke 1:1-4, 7; 3:16) Mengwe ya melaetsa e e mo dibukeng tseno ruri e ne e lebisitswe kwa ditiragalong tse di neng di tla ama Bakeresete ba boammaaruri. Ka sekai, Hagai, mongwe wa baporofeti ba ba neng ba porofeta morago ga nako ya botshwarwa, o ne a bolelela pele kaga go reketlisiwa ga ditšhaba. (Hagai 2:6, 7) Moaposetoloi Paulo o ne a nopola mafoko a Hagai 2:6 a rotloetsa Bakeresete gore ba bo ba le mo seemong se se amogelegang fa Modimo a fedisa magodimo a a boikepo a tshwantshetso.—Bahebera 12:25-29; Tshenolo 21:1.

LETSATSI LA GA JEHOFA—KE ENG?

5, 6. Go ya ka baporofeti, letsatsi la ga Jehofa le tla nna jang?

⁵ Go a utlwala gore o ipotse ka letsatsi la ga Jehofa gore le tla nna jang. O ka nna wa botsa jaana, ‘A letsatsi la ga Jehofa le ama tsela e ke tshelang ka yone gone jaanong le bokamoso jwa me ka tsela nngwe?’ Jaaka baporofeti ba bontshitse, letsatsi la ga Jehofa ke nako ya fa Jehofa a tla bo a tsaya kgato ya go diragatsa katlholo mo babeng ba gagwe, ke letsatsi la ntwa. Letsatsi leo le le boifisang e tshwanetse ya bo e tla nna letsatsi la ditiragalo tse di sa tlwaelegang kwa magodimong. “Letsatsi le ngwedi ka botsone di tla fifala, le tsone dinaledi di tla busa phatsimo ya tsone.” (Joele 2:2, 11, 30, 31; 3:15; Amose 5:18; 8:9) Go tla diragalang mo lefatsheng leno le re tshelang mo go lone? Mika o ne a re: “Dithaba di tla gakologa kafa tlase ga [ga Jehofa], le mabala a a kwa tlase a tla fatoga, jaaka bonota ka ntlha ya molelo, jaaka metsi a a tshololwang mo lefelong le le fologelang.” (Mika 1:4) Tlhaloso eno e ka tswa e le ya tshwantshetso, mme e re thusa go tla mo tshwetsong ya gore se Modimo a tlileng go se dira se tla felela ka masetlapelo mo lefatsheng le mo banning ba lone. Le fa go ntse jalo, e seng mo bathong botlhe. Bone baporofeti bao ba ne ba bontsha gore batho ba ba “batlang se se molemo” ba tla bona masego a magolo mme ka jalo ba tswelele ba tshela.—Amose 5:14; Joele 3:17, 18; Mika 4:3, 4.

⁶ Ba bangwe mo baporofeting bano ba ba 12 ba ne ba tlhalosa dilo tse dingwe tse di tshosang ka letsatsi leno la ga Jehofa. Habakuke o ile a tlhalosa ka tsela e e utlwalang sentle kafa Jehofa a tla thubaganyang “dithaba tsa bosafeleng” ka teng le “dithota tse di nnang ka bosakhutleng,” tse e leng tshwantshetso e e tshwanelang sentle ya mekgatlho ya batho, e e ka lebegang e kete e tla nnela ruri. (Habakuke 3:6-12) Ee, letsatsi la ga Jehofa “ke letsatsi la tšhakgalo, letsatsi la matshwenyego le la tlalelo e e mahehe, letsatsi la matsubutsubu le la kgakgabalo, letsatsi la lefifi le la letobo, letsatsi la maru le letobo le lentshontsho.”—Sefania 1:14-17.

 7. Go bolelelwa pele sebetso sefe, mme se ka nna sa diragadiwa jang?

⁷ Akanya fela gore batho ba ba kgatlhanong le Modimo ba tla welwa ke sebetso se se ntseng jang! “Nama ya motho e tla bola a ntse a eme ka dinao; mme matlho a motho a tla bola mo dikgapeng tsa one, le loleme lwa motho lo tla bola mo molomong wa gagwe.” (Sekarea 14:12) Go sa kgathalesege gore a ponatshegelo eno e tla diragadiwa ka tsela ya mmatota kgotsa nnyaa, o ka bona gore e tla tlisa masetlapelo mo bathong ba le bantsi. Tota le fa e ka se diragadiwe ka tsela ya mmatota, maleme a baba ba Modimo a tla bola ka tsela ya gore ba ka se tlhole ba bua dipuo tsa bone tsa lonyatso. Le fa ba ne ba tle ba akanye gore ba tla ipopa ngatana go nna kgatlhanong le batho ba Modimo, ba ne ba ka se bone seo se direga.

MABAKA A GO BO MODIMO YO O LORATO A TSAYA KGATO

8, 9. (a) E le gore o tlhaloganye lebaka la go bo Jehofa a tseela baikepi kgato, o tshwanetse wa akanyetsa eng? (b) Boikanyegi jwa gago mo botshelong jwa letsatsi le letsatsi bo amana jang le go tsaya kgato ga ga Jehofa?

⁸ O ka tswa o ile wa utlwa batho ba botsa jaana: ‘Modimo yo o lorato a ka tlisa jang masetlapelo a a ntseng jaana mo babeng ba gagwe? Ke eng fa Modimo a ka tlisa tshenyo e e ntseng jaana mo lefatsheng? A Jesu ga a ka a rotloetsa batho gore ba rate le baba ba bone tota mme ka jalo ba itshupe e le bana ba ga Rara yo o kwa magodimong?’ (Mathaio 5:44, 45) O ka araba dipotso tseno ka go akanyetsa kwa mathata a batho a simologileng teng. Modimo o ne a bopa batho ba ntlha ba babedi mo setshwanong sa gagwe—ba ne ba itekanetse. Le fa go ntse jalo, ba ne ba tsenya boleo le loso mo losikeng lwa batho mme ka jalo ba di tsenya mo botshelong jwa rona. Ba ne ba ema Satane Diabolo nokeng mo kgannyeng ya gore ke mang yo o nang le tshwanelo e e feletseng ya go busa batho. (Genesise 1:26; 3:1-19) Mo makgolong a a ntseng a feta a dingwaga, Satane o ile a leka go supa gore fa batho ba raelwa, ba ka latlha Jehofa. O a itse gore Satane o paletswe. Jesu Keresete le batlhanka ba bangwe ba bantsi ba ga Jehofa ba ile ba nna ba ikanyega mo Modimong mme ba bontshitse gore ba mo direla ka lorato. (Bahebera 12:1-3) O tshwanetse wa bo o itse batho ba le bantsi ba ba direlang Modimo jalo ka boikanyegi.

⁹ Mo godimo ga moo, o a amega mo kgannyeng eno e e tla felelang ka gore Jehofa a fedise boikepo. Ka sekai, fa o ntse o bala dibuka tseno tse 12, o tla lemoga gore bangwe ba baporofeti bano ba ne ba bua ka botshelo jwa manobonobo jwa batho ba ba neng ba tlhokomologa kobamelo ya ga Jehofa. Baporofeti ba ne ba gakolola batho ba Modimo gore ba ‘tlhome pelo ya bone mo ditseleng tsa bone’ mme ba fetole matshelo a bone. (Hagai 1:2-5; 2:15, 18; Amose 3:14, 15; 5:4-6) Ee, baporofeti ba ne ba bontsha batho kafa ba tshwanetseng go tshela ka teng. Ba ba neng ba amogela kgakololo eo ba ne ba bontsha gore Jehofa ke Mogodimodimo wa bone, ka jalo ba supa fa Satane e le moaki. Jehofa o tla bontsha gore o ikanyega mo bathong bano fa a fedisa baba ba gagwe.—2 Samuele 22:26.

10. Se Mika a se boneng se nonotsha jang lebaka la gore Jehofa a tseye kgato?

¹⁰ Go na le lebaka le lengwe gape la go bo Modimo a tsaya kgato. Akanya ka dingwaga tsa bo 700 B.C.E. fa Mika a ne a porofeta kwa Juda. A bua jaaka e kete ke ene setšhaba seo, o tshwantsha seemo sa sone le tshimo ya mofine kgotsa ya maungo morago ga thobo, go se na merara epe kgotsa mofeige ope o o setseng. Go ne go ntse jalo mo setšhabeng sa Juda, fa go ne go batla go se na batho bape ba ba siameng. Baiseraele ba ne ba tsoma Baiseraele ka bone, ba ba lalela gore ba tle ba ba bolaye. Baeteledipele le baatlhodi ba bone ba ne ba senka go ikgotsofatsa bone fela. (Mika 7:1-4) Fa o ne o tshela mo seemong se se ntseng jalo, o ne o tla ikutlwa jang? O tshwanetse wa bo o ne o tla tlhomogela batho ba ba bolawang ba se na molato pelo. Ka jalo, a bo Jehofa a utlwela botlhoko jang ne batho ba ba gateletsweng! Gompieno Jehofa o tlhatlhoba ditiro tsa batho. O akanya gore o fitlhela eng fa a di tlhatlhoba jalo? O fitlhela go na le batho ba ba gatelelang ba bangwe, ba ba ja ntsoma ka tsela e e setlhogo mme ba tlhasela baagelani ba bone botlhoko. Fa e le ka batho ba ba ikanyegang, ba mmalwa fela fa ba bapisiwa le batho botlhe ba ba mo lefatsheng. Mme ga re a tshwanela go itlhoboga. E re ka Jehofa a rata batho bano ba ba tshwarwang setlhogo, o tla diragatsa tshiamiso.—Esekiele 9:4-7.

11. (a) Letsatsi la ga Jehofa le kayang mo bathong ba ba mmoifang? (b) Molaetsa wa ga Jona wa tlhagiso o ne wa ama Baninife jang?

¹¹ Go bonala sentle gore letsatsi la ga Jehofa le tla felela ka gore baba ba gagwe ba senngwe mme ba ba mmoifang e bile ba mo direla ba gololwe.b Mika o ne a bolelela pele gore ditšhaba di ne di tla ologela kwa thabeng ya ntlo ya ga Jehofa, mme seo se ne se tla felela ka kagiso le kutlwano ya lefatshe lotlhe. (Mika 4:1-4) Mo metlheng eo, a lebaka la go bo baporofeti ba ne ba bolela letsatsi la ga Jehofa le ne le dira phetogo epe mo matshelong a batho? Mo go bangwe, le ne le e dira. Gopola gore fa Jona a ne a bolela molaetsa wa katlholo kgatlhanong le Ninife, banni ba ba boikepo ba ba ratang thubakanyo ba motse oo ba ne ba “simolola go dumela mo Modimong” mme ba ‘boela morago ba tswa mo tseleng ya bone e e bosula.’ Ka ntlha ya moo, Jehofa ga a ka a tlisa masetlapelo ka nako eo. (Jona 3:5, 10) Molaetsa o o kaga letsatsi la katlholo la ga Jehofa le le neng le ntse le atamela o ne wa ama matshelo a Baninife!

LETSATSI LEO LE GO AMA JANG?

12, 13. (a) Baporofeti ba ba 12 ba ne ba porofeta kaga mang? (b) Ke ka ntlha yang fa re ka re mafoko a boporofeti a banna bano ba ba 12 a ne a kaya dilo tse di sa ntseng di tla diragala mo isagweng?

¹² Mongwe a ka nna a re, ‘Mme baporofeti bao ba ne ba tshela makgolokgolo a dingwaga a a fetileng. Melaetsa ya bone ka letsatsi la ga Jehofa e nkama jang nna?’ Gone ke boammaaruri gore baporofeti bao ba tshedile lobaka lo loleele thata le eleng pele Jesu a tsholwa, mme le fa go ntse jalo re tshwanetse ra akanyetsa gore mafoko a bone kaga letsatsi la ga Jehofa a re ama jang mo dingwageng tseno tsa bo2000. Dilo tse ba neng ba di bua kaga letsatsi le legolo la ga Jehofa di ka re solegela molemo jang? Go na le sengwe sa botlhokwa se se ka re thusang go bona gore melaetsa ya bone e re ama jang le gore e re solegela molemo go le kana kang. Selo seo ke go lemoga gore baporofeti ba ne ba tlhagisa batho ka letsatsi la ga Jehofa le le neng le tla tlela Iseraele, Juda le ditšhaba tse di ba dikologileng le mebuso mengwe ya lefatshe ya motlha oo.c Ntlha ke gore dipolelelopele tseo di ne tsa diragadiwa! Baasiria ba ne ba tlhasela Samarea, Juda e ne ya swafadiwa ka 607 B.C.E., mme ditšhaba tse di fa gaufi tse di tletseng letlhoo di ne tsa swafadiwa moragonyana. Kgabagare, mebuso e megolo ya Asiria le Babelona e ne ya wa, mme seo sotlhe e le go diragatsa dipolelelopele dingwe.

¹³ Jaanong akanya ka letsatsi la Pentekosete ya 33 C.E., lobaka lo loleele morago ga bontsi jwa dipolelelopele tseo di sena go diragadiwa lekgetlho la ntlha. Ka letsatsi leo, moaposetoloi Petere o ne a bontsha gore go tshololwa ga moya o o boitshepo wa Modimo go ne go diragatsa boporofeti jwa ga Joele. Go tswa foo Petere o ne a nopola mafoko ano go tswa mo bukeng ya ga Joele: “Letsatsi le tla fetolwa lefifi le ngwedi madi pele ga letsatsi le legolo le le le tlhomologileng thata la ga Jehofa le goroga.” (Ditiro 2:20) Seno se bontsha gore go ne go sa ntse go tla nna le ditsela tse dingwe tse boporofeti jo bo kaga letsatsi la ga Jehofa di neng di tla diragadiwa ka tsone. Mme boporofeti jwa ga Joele jone bo ne jwa diragadiwa lekgetlho la bobedi ka 70 C.E. fa masole a Roma a ne a senya Jerusalema, mme ruri eno e ne e le nako ya lefifi le tshololo ya madi.

14, 15. (a) Ke ka ntlha yang fa re ka re dipolelelopele tse di kaga letsatsi la ga Jehofa di a re ama gompieno? (b) Re ka lebelela gore letsatsi la ga Jehofa le diragale leng?

¹⁴ Le fa go ntse jalo, boporofeti jwa ga Joele le jwa ba bangwe kaga letsatsi la ga Jehofa bo sa ntse bo tla diragadiwa lekgetlho la bofelo, mme tsela eo e bo tla diragadiwang ka yone e ama rona ba re tshelang mo dingwageng tsa bo2000. Jang? Petere o ne a gakolola Bakeresete gore ba nne ba “akantse thata ka go nna gone ga letsatsi la ga Jehofa.” Moaposetoloi yono o ne a tswelela pele a re: “Go na le magodimo a masha le lefatshe le lesha tse re di letetseng go ya ka tsholofetso ya gagwe, mme ruri go tla nna tshiamo mo go tsone.” (2 Petere 3:12, 13) Ga go a ka ga tlhomiwa magodimo ape a masha (puso e ntšha ya Modimo) le lefatshe le lesha (setšhaba sa batho ba ba siameng ba busiwa ke puso eo) fela fa Jerusalema e sena go senngwa ka 70 C.E. Ka jalo mafoko a boporofeti kaga letsatsi la ga Jehofa a tshwanetse a bo a ne a tla diragadiwa ka tsela e nngwe gape. Ee, dipolelelopele tseno di a re ama gompieno, rona ba re tshelang mo ‘dinakong tsa mathata’!—2 Timotheo 3:1.

¹⁵ Ditlhaloso tsotlhe tsa letsatsi la ga Jehofa tse di mo dibukeng tseno tse 12 tsa Baebele di dira gore re akanye ka mafoko ano a ga Jesu Keresete: “Go tla nna le pitlagano e kgolo e e jaaka e e iseng e ko e nne fa e sale ka tshimologo ya lefatshe go fitlha jaanong, nnyaa, le gone e se kitla e nna gone gape.” O ne a re “ka bonako fela morago ga” tshimologo ya pitlagano eo e kgolo, “letsatsi le tla fifala, le ngwedi ga e na go ntsha lesedi la yone, mme dinaledi di tla wa di tswa kwa legodimong, le maatla a magodimo a tla reketlisiwa.” (Mathaio 24:21, 29) Seno se re thusa go bona gore letsatsi la ga Jehofa tota le tla nna leng. Le fela fa gaufi. Dikwalo di bontsha gore pitlagano e kgolo e tla senya “Babelona o Mogolo,” bodumedi jotlhe jwa maaka. Mme pitlagano e kgolo e tla konela ka gore letsatsi la ga Jehofa le fedise baba ba Modimo mo lefatsheng.—Tshenolo 17:5, 12-18; 19:11-21.

16. Dipolelelopele tse di kaga letsatsi la ga Jehofa di tla diragadiwa ka tsela efe e kgolo?

¹⁶ Basupi ba ga Jehofa ba lemogile kafa dipolelelopele tse di kaga letsatsi la ga Jehofa di diragadiwang ka teng. Go le gantsi, e bile e le ka ditsela tse di farologaneng, Jerusalema wa motlhanogi, Samarea yo o sa ikanyegeng, Baedoma ba ba letlhoo, Baasiria ba ba ratang thubakanyo le Bababelona, ba ne ba tshwantshetsa e sa le pele dilo tse di farologaneng ka bodumedi jwa maaka. Bodumedi jotlhe jo bo ntseng jalo bo tla senngwa mo karolong ya ntlha ya pitlagano e kgolo. Mme ka “letsatsi le legolo le le le boitshegang la ga Jehofa” le le tla latelang morago ga moo, go tla senngwa dinyatsi tsa jone tsa dipolotiki le tsa kgwebo.—Joele 2:31.

NNANG LO IPAAKANTSE

17, 18. (a) Ke ka ntlha yang fa Amose a ne a re go latlhega batho ba ba “eletsang letsatsi la ga Jehofa”? (b) Go ne go tla direga eng ka ba ba neng ba sa ipaakanyetsa letsatsi la ga Jehofa?

¹⁷ E re ka melaetsa ya katlholo e dira thata mo bodumeding jwa maaka, Bakeresete bangwe ba ka akanya gore ga ba kitla ba amiwa ke go diragadiwa ga dipolelelopele tseno. Le fa go ntse jalo, se Amose a neng a se bolelela Baiseraele se mosola thata mo bathong botlhe: “A bo go latlhega bone ba ba eletsang letsatsi la ga Jehofa!” Baiseraele bangwe mo motlheng wa ga Amose ba ne ba akanya gore letsatsi la ga Jehofa le ne le tla ba tlisetsa masego fela, ba dumela gore e ne e tla bo e le letsatsi la gore Modimo a tseye kgato go namola batho ba gagwe. E bile ba ne ba eletsa letsatsi leo! Le fa go ntse jalo, Amose o ne a tswelela ka go bolela gore mo bathong ba baithati, letsatsi la ga Jehofa e ne e tla nna letsatsi la “lefifi, go se na lesedi.” Ee, Baiseraele bao ba ne ba tla utlwa kgalefo ya ga Jehofa!—Amose 5:18.

¹⁸ Go tswa foo Amose o ne a tlhalosa gore go ne go tla direga eng ka batho ba ba neng ba eletsa letsatsi la ga Jehofa. Akanya ka monna yo o tshabang tau a bo a kopana le bera. Fa a bona bera, o tshabela mo ntlong. O tswala kgoro a ntse a fegelwa a bo a re o ikaega ka lobota, mme a bo a longwa ke noga. Ka tsela nngwe go tla direga fela jalo ka batho ba tota ba sa ipaakanyetsang letsatsi la ga Jehofa.—Amose 5:19.

19. Ke eng se re tshwanetseng go se dira go ipaakanyetsa letsatsi la ga Jehofa?

¹⁹ A o bona kafa kgang eno e ka nnang mosola ka teng mo go wena? Gopola gore Amose o ne a bua le batho ba ba neng ba ineetse mo Modimong. Le fa go ntse jalo, go ne go na le dilo tse di amanang le ditiro tsa bone le maikutlo a bone tse di neng di tlhoka go fetolwa. A ga go mosola go sekaseka botshelo jwa gago go bona gore a o ipaakanyeditse letsatsi leo la botlhokwa kgotsa gore o tlhoka go dira diphetogo dingwe? O ka bontsha jang gore tota o ipaakantse? Ruri e ka se ka ya nna ka go aga lefelo la botshabelo, go boloka dijo tse di tlhokegang, go ithuta go phepafatsa metsi a a nowang kgotsa go kgobokanya madi a gouta, jaaka bangwe ba tle ba dire ba re ba ipaakanyetsa masetlapelo a a tlang. Sefania a re: “Selefera ya bone le fa e le gouta ya bone e ka se kgone go ba golola mo letsatsing la tšhakgalo ya ga Jehofa.” Ka jalo go ipaakanya go ka se tlhoke gore re ipolokele dithoto. (Sefania 1:18; Diane 11:4; Esekiele 7:19) Go na le moo, re tshwanetse go nna re thantse semoyeng mme re tshele letsatsi le letsatsi jaaka batho ba ba ipaakantseng. Re tshwanetse go nna le boikutlo jo bo tshwanetseng re bo re dire ditiro tse di tsamaisanang le boikutlo joo. Mika o ne a re: “Fa e le nna, ke tla nna ke lebeletse Jehofa. Ke tla supa boikutlo jwa go leta mo Modimong wa poloko ya me.”—Mika 7:7.

20. Ke dilo dife tse di sa fetoleng boikutlo jwa rona jwa go leta?

²⁰ Fa o na le boikutlo jono jwa go leta, o tla bo o bontsha gore o ipaakantse, o emetse letsatsi la ga Jehofa. Ga o kitla o tshwenyega ka gore letsatsi leo le ka tla ka letlha lefe kgotsa gore o ntse o le emetse ka lobaka lo loleele go le kae. Dipolelelopele tsotlhe ka letsatsi leo di tla diragadiwa ka nako ya ga Jehofa e e tshwanetseng mme ga di kitla di diega. Jehofa o ne a bolelela Habakuke a re: “Ponatshegelo e sa ntse e na le nako e e tlhomilweng, mme e ntse e itlhaganelela kwa bokhutlong, mme ga e kitla e bua maaka. Le fa e ka diega [go ya kafa batho ba lebang dilo ka teng], nna o e lebeletse; gonne ruri e tla diragala. Ga e kitla e tla morago ga nako [go ya kafa Jehofa a lebang dilo ka teng].”—Habakuke 2:3.

21. O ka solegelwa molemo jang ke se o sa ntseng o tla se bala mo bukeng eno?

²¹ Mo bukeng eno, o tla ithuta kafa o ka bontshang go leta Modimo wa poloko ka teng. O ka lebelela melemo efe ka go bala buka eno? Buka eno e tla bo e remeletse mo karolong ya Baebele e o ka tswang o sa e tlwaela thata—dibuka tse 12 tse go tweng ke Dibuka Tse Dinnye Tsa Boporofeti. Ka jalo, go tla nna le dilo tse di kgatlhang tse o tla di lemogang. Ka sekai, mo go Karolo 2, o tla bona gore o ka ‘batla Jehofa’ jang mme wa nna o ntse o tshela. (Amose 5:4, 6) Dibuka tseno tse 12 di ka go thusa go lemoga kafa o ka itseng Jehofa botoka ka teng le go nna le pono e e tshwanetseng ka go mo direla, o mo direla ka botlalo. Kwantle ga pelaelo, ka thuso ya dibuka tseno tsa boporofeti, ruri o tla kgona go tlhaloganya botho jwa gagwe botoka. Mo go Karolo 3, o tla bona sentle gore Jehofa o lebeletse eng mo go wena fa o ntse o dirisana le ba lelapa la gago le batho ba bangwe. Seo se ka go thusa gore o ipaakanyetse letsatsi la gagwe le legolo. La bofelo, mo go Karolo 4, o tla sekaseka kgakololo ya baporofeti malebana le kafa o tshwanetseng go ikutlwa ka teng fa letsatsi la ga Jehofa le ntse le atamela, o bo o ithuta kafa bodiredi jwa gago jwa Bokeresete bo ka amegang ka teng. Kwantle ga pelaelo, o tla kgatlhiwa ke go sekaseka molaetsa wa baporofeti bano o o bontshang kafa isagwe ya gago e ka nnang ka teng.

22. O ka rata go tsibogela jang kgakololo e e fitlhelwang mo dibukeng tsa baporofeti ba ba 12?

²² A o gopola mafoko a ga Sefania a a nopotsweng kwa tshimologong ya kgaolo eno a a tlhokang go tseelwa kgato ka potlako? (Sefania 1:14) Molaetsa wa gagwe o ne wa ama botshelo jwa ga Kgosi Josia yo mmotlana. Fa Josia a ne a na le dingwaga di le 16 fela, o ne a simolola go batla Jehofa. Fa a digela dingwaga tse 20, o ne a simolola letsholo la go fedisa kobamelo ya medingwana, go dumalana le kgothatso e Sefania a neng a e naya batho ba Juda le Jerusalema. (2 Ditiragalo 34:1-8; Sefania 1:3-6) A tlhagiso e e kaga letsatsi la ga Jehofa e amile botshelo jwa gago fela jaaka e ne ya ama jwa ga Josia? A re boneng gore baporofeti ba ba 12 ba ka thusa mongwe le mongwe wa rona jang.

[Dintlha tse di kwa tlase]

O ITHUTILE ENG?

• Baporofeti botlhe ba ba 12 ba umaka kgang efe ya botlhokwa?—Joele 1:15; Sefania 1:7, 14.

• Letsatsi la ga Jehofa le tla nna jang?—Joele 2:30, 31; Sekarea 14:12.

• Ke ka ntlha yang fa Modimo yo o lorato a ka tseela baikepi kgato, jaaka e kete ke ka letsatsi le le lengwe fela?—Mika 7:2-4; Bahebera 12:1-3.

KAFA O KA SOLEGELWANG MOLEMO KA TENG

• Letsatsi la ga Jehofa le ka go ama jang?—Ditiro 2:19, 20; 2 Petere 3:13.

• O ka lebelela gore letsatsi la ga Jehofa le diragale leng?—Mathaio 24:21, 29.

• O ka bontsha jang gore o ipaakanyeditse letsatsi la ga Jehofa?—Amose 5:4, 6; Habakuke 2:3.

[Setshwantsho mo go tsebe 30]

“Letsatsi le legolo la ga Jehofa le gaufi” fela jaaka sefefo se se gomagomelang naga

[Setshwantsho mo go tsebe 34]

Tsela e Baninife ba neng ba arabela ka yone fa ba newa molaetsa wa ga Jona e ka re kgothatsa jang?

[Setshwantsho mo go tsebe 39]

Ka Pentekosete ya 33 C.E., Petere o ne a bontsha gore boporofeti jwa ga Joele bo ne bo diragadiwa. Le mo motlheng wa rona bo a diragadiwa

[Setshwantsho mo go tsebe 40]

Bontsha gore o letetse Modimo wa poloko, fela jaaka Mika