Kgaolo ya Lesomennè

“Lesego go Fitlha lo sa Tlhole lo Tlhoka Sepe”

1, 2. (a) Ke dilo dife tsa botlhokwa tse mongwe le mongwe wa rona a ka di itlhophelang? (b) Ke go diragadiwa ga boporofeti bofe go go amang masego a re ka a itumelelang?

NAKO e re leng mo go yone ke ya katlholo le masego. Ke nako ya go senyega ga bodumedi le go tsosolosiwa ga kobamelo ya boammaaruri. Ruri o tshwanetse wa bo o batla masego le melemo ya gone jaanong le ya mo isagweng ya go tsosolosiwa ga kobamelo ya boammaaruri! Mme o ka tlhomamisega jang gore o tla e bona? Karabo e mo boporofeting jo karolo ya jone e kgolo e ileng ya diragadiwa fela fa ‘metlha ya bofelo’ e sena go simologa ka 1914. (2 Timotheo 3:1) Malaki o ne a bolelela pele jaana: “‘Go tla tla Morena wa boammaaruri [Jehofa] mo tempeleng ya Gagwe, yo lo mo senkang, le morongwa wa kgolagano yo lo itumelang mo go ene. Bonang! Ruri o tla tla,’ go buile Jehofa wa masomosomo.”—Malaki 3:1.

² Boporofeti jono jo bo botlhokwa thata mo botshelong jwa gago bo mo bukeng ya bofelo ya dibuka tse 12 tsa boporofeti. Mo kgaolong eno ya bofelo ya tshekatsheko ya dibuka tseno, re tla fitlhela se Malaki a se kwadileng se le botlhokwa thata. Buka ya gagwe e na le kaelo ya botlhokwa e e go letlang, wena le batlhanka ba bangwe ba ga Jehofa gore lo amogele “lesego go fitlha lo sa tlhole lo tlhoka sepe.” (Malaki 3:10) A re sekasekeng kgaolo 3 ya buka ya ga Malaki.

NAKO YA GO NTLAFADIWA SEMOYENG

 3. Ke tiragalo efe mo bathong ba Modimo ba bogologolo e e ileng ya felela ka gore go tlhophiwe “Iseraele wa Modimo”?

³ Mo e ka nnang makgolo a matlhano a dingwaga morago ga motlha wa ga Malaki, Jehofa, a emetswe ke Keresete (“morongwa [wa Modimo] wa kgolagano” ya ga Aborahame), o ne a tla mo tempeleng ya mmatota mo Jerusalema a tla go atlhola batho ba a dirileng kgolagano le bone. Ka kakaretso, setšhaba seo se ne se bontshitse gore ga se tshwanelwe ke go tlhola se amogelwa, mme Jehofa o ne a se latlha. (Mathaio 23:37, 38) O ka bona bosupi jwa seo mo go se se diragetseng ka 70 C.E. O ka tlhomamisega fela jalo gore Modimo bogolo o ne a tlhopha “Iseraele wa Modimo,” setšhaba sa semoya sa batho ba ba 144 000 ba ba tswang mo ditšhabeng tsotlhe. (Bagalatia 6:16; Baroma 3:25, 26) Le fa go ntse jalo, eo e ne e se yone tiragatso ya bofelo ya boporofeti jwa ga Malaki. Boporofeti jono bo bua gape ka se se neng se tlile go direga mo motlheng wa rona mme bo amana ka tlhamalalo le go lebelela ga gago go amogela ‘lesego go fitlha o sa tlhole o tlhoka sepe.’

 4. Ke eng se se neng sa tshwanelwa ke go arabiwa fa Jesu a sena go tlhomiwa mo setulong sa bogosi ka 1914?

⁴ Go diragadiwa ga boporofeti jwa Baebele go tlhomamisa gore ka 1914, Jesu Keresete o ne a tlhomiwa e le Kgosi ya Bogosi jwa ga Jehofa jo bo kwa legodimong. Go tswa foo go ne ga tla nako ya gore Jesu a tlhaole setlhopha sa Bakeresete ba ba neng ba tshwanelwa ke go amogelwa ke Modimo. Ke mang yo o neng a tla atlega fa ba lekwa go bona gore a ba itshekile semoyeng? Karabo e mo mafokong ano a ga Malaki: “Ke mang yo o tla itshokelang letsatsi la go tla ga gagwe, e bile ke mang yo o tla emang fa a bonala? Gonne o tla bo a ntse jaaka molelo wa moitshekisi.” (Malaki 3:2) Jehofa o ne a tla mo “tempeleng” ya gagwe leng le gone jang a tla go atlhola?

5, 6. (a) Fa Jehofa a ne a tla go tlhatlhoba tempele ya gagwe ya semoya, o ne a fitlhela seemo e le sefe mo bontsing jwa batho ba ba neng ba ipolela e le baobamedi ba gagwe? (b) Batlhanka ba ba tloditsweng ke Modimo ka moya ba ne ba tlhoka eng?

⁵ Ruri Modimo ga a ka a tla mo tempeleng ya mmatota e e agilweng ka maje le seretse. Tempele ya bofelo e e ntseng jalo ya mmatota ya kobamelo ya boammaaruri e ne e sentswe ka 70 C.E. Go na le moo, Jehofa o ne a tla mo tempeleng ya semoya, e leng thulaganyo e ka yone batho ba ka tlang kwa go ene le go mo obamela mo motheong wa setlhabelo sa ga Jesu sa thekololo. (Bahebera 9:2-10, 23-28) Dikereke tse di ipitsang tsa Bokeresete ruri di ne di sa bope tempele eo ya semoya, ka gonne di ne di le mo thulaganyong ya bodumedi e e nang le molato wa go tsholola madi le wa boaka jwa semoya e bile e rotloetsa dithuto tsa maaka e seng kobamelo e e itshekileng. Jehofa o ile a nna “mosupi yo o bofefo kgatlhanong” le tsone, mme o a itse gore katlholo ya gagwe e e botlhoko e ne e siame. (Malaki 3:5) Le fa go ntse jalo, fa Bogosi jwa Modimo bo sena go tlhomiwa, go ne go na le setlhopha sa Bakeresete ba boammaaruri ba ba neng ba direla mo lelwapeng la tempele ya Modimo ya semoya ba ba neng ba bontsha gore ba ineetse mo Modimong le fa ba lekwa ka diteko tse di botlhoko. Le fa go ntse jalo, tota le bone batlodiwa bao ba ne ba tlhoka go ntlafadiwa. Dibuka tsa baporofeti ba ba 12 di ne di bua ka gone ka gonne di na le ditsholofetso tse di itumedisang tsa go tsosolosiwa ga semoya le ga mmatota ga batlhanka ba Modimo. Malaki o ne a bolelela pele gore go ne go tla nna le batho ba Jehofa a neng a tla ba “itshekisa jaaka gouta le jaaka selefera.” “Ruri ba [ne ba] tla nna batho ba ba isang tshupelo ya mpho ka tshiamo.”—Malaki 3:3.

⁶ Go ya ka bosupi jo bontsi jo bo leng teng, fa e sa le ka 1918 go ya pele, Jehofa o ile a ntlafatsa Bakeresete ba ba tloditsweng kafa go tlhokegang ka gone, a ntlafatsa kobamelo ya bone, mekgwa ya bone le dithuto tsa bone.a Bone le ba “boidiidi jo bogolo” ba ba ileng ba kopanela le bone moragonyana ba ile ba solegelwa molemo thata. (Tshenolo 7:9) Jaaka setlhopha se se utlwanang, ba tswelela pele go ntsha “tshupelo ya mpho ka tshiamo,” e le tshupelo e e ‘kgotsofatsang Jehofa.’—Malaki 3:3, 4.

 7. Ke eng se go tshwanelang gore re ka se ipotsa malebana le tsela e Modimo a re lebang ka yone?

⁷ Go ntse jalo ka batho ba Modimo fa ba le setlhopha, mme go tweng ka mongwe le mongwe wa rona? O ka nna wa ipotsa jaana: ‘A ke na le maikutlo mangwe kgotsa ditiro tse di sa ntseng di tlhoka go ntlafadiwa? A ke sa ntse ke tlhoka go ntlafatsa boitshwaro jwa me, fela jaaka Jehofa a ntlafaditse batlodiwa ba gagwe?’ Re bone mo dikgaolong tse di fetileng gore baporofeti ba ba 12 ba ne ba tlhalosa maikutlo le ditiro tse di sa siamang mmogo le tse di siameng. Seo se dirile gore o kgone go itse gore Jehofa o “kopa eng mo go wena.” (Mika 6:8) Ela tlhoko mafoko a a reng “mo go wena.” Seo se gatelela lebaka la go bo mongwe le mongwe wa rona a tshwanetse go sekaseka gore a o tlhoka go iitshekisa kgotsa go intlafatsa ka boene.

“NTEKANG, TSWEETSWEE”

 8. Jehofa o laleditse batho ba gagwe go dira eng?

⁸ Ela tlhoko se Jehofa a tswelelang pele go se bua a dirisa Malaki mo go kgaolo 3, temana 10. Koo go na le taletso eno e e botsalano: “‘Tlisang ditsabosome tsotlhe mo ntlong ya polokelo, gore go tle go nne le dijo mo ntlong ya me; mme ntekang, tsweetswee, ka ga seno,’ go buile Jehofa wa masomosomo, ‘gore a ga nkitla ke lo bulela dikgoro tsa morwalela tsa magodimo ke bo ke lo tshololela lesego go fitlha lo sa tlhole lo tlhoka sepe.’” Tsholofetso eo e newa batho ba Modimo botlhe. A o utlwa taletso eno e lebisitswe le kwa go wena ka namana?

 9. O ka ntshetsa Jehofa ditshupelo le ditsabosome tse di ntseng jang?

⁹ O ka naya Jehofa “ditsabosome” jang? Gone ke boammaaruri gore ga o tlhoke go tlisa ditshupelo kgotsa ditsabosome tsa mmatota, jaaka tse di tlhalositsweng mo Molaong. Gone jaanong Modimo o lebeletse dimpho tsa semoya. Jaaka go tlhalositswe mo kgaolong e e fetileng, Paulo o ne a re tiro e o e dirang ya go rera ke tshupelo. (Hosea 14:2) Go tswa foo moaposetoloi o ne a umaka mofuta o mongwe wa setlhabelo, a kwala jaana: “Lo se ka lwa lebala go dira molemo le go abalana dilo [dithoto] le ba bangwe, gonne Modimo o itumedisiwa thata ke ditlhabelo tse di ntseng jalo.” (Bahebera 13:15, 16) Ka jalo go bonala sentle gore “ditsabosome” tse di umakwang mo go Malaki 3:10 di emela ditshupelo tsa semoya le tsa senama. Fa o le Mokeresete yo o kolobeditsweng, o ineetse gotlhelele mo go Jehofa, sa bosome se o se ntshang ke karolo ya dilo tse e leng tsa gago tse o kgonang go di isetsa Jehofa, kgotsa go di dirisa mo tirelong ya gagwe. Di akaretsa nako, maatla, le dimpho tsa dithoto tse o kgonang go di ntsha gore di dirisediwe tirelo ya ga Jehofa.

10. O ka ‘leka Jehofa’ jang ka tsela e e tshwanetseng?

¹⁰ A bo go tshwanela jang gore o neye Jehofa ditsabosome tseno tsa tshwantshetso ka boineelo le ka lorato! Gape o tshwanetse wa nna le boikutlo jwa gore go potlakile. O lemoga gore letsatsi le legolo la ga Jehofa le atamela ka bofefo le gore “le boitshega thata.” (Joele 2:1, 2, 11) Matshelo a batho a mo kotsing. Modimo o go laletsa go dira sengwe se o ka se tsibogelang wena ka namana. Jehofa o go kopa gore ‘o mo leke.’ Gone ke boammaaruri gore ga go motho ope yo o tshwanetseng go leka Jehofa jaaka e kete Modimo ga a ikanyege. (Bahebera 3:8-10) Mme gone o ka mo leka ka boikokobetso ka tsela e e tshwanetseng. Jang? O go solofeditse masego. Fa o mo ikobela, go ntse jaaka e kete o a mo leka, wa re, ‘A o tla ntshegofatsa?’ Ene o tsibogela seo ka go itlama gore a dire jalo, a diragatsa tsholofetso ya gagwe. Ka jalo, lebaka la go bo Modimo a go letla gore o ‘mo leke’ le nonotsha tumelo ya gago ya gore o tla go segofatsa thata.

11, 12. Ke masego afe a Jehofa a a neileng batho ba gagwe a o a iponetseng ka matlho?

¹¹ O ka bona gore batho ba ga Jehofa ba mo file ditshupelo tse dintsi tsa dithoto le ditlhabelo tse dintsi tsa semoya. Mme Jehofa o ba tshololetse ‘lesego go fitlha ba sa tlhole ba tlhoka sepe.’ O ka tswa o lemogile gore masego ao a ntse a tlela batho ba Modimo mme a bonala ka dipalopalo tsa koketsego e e ntseng e direga mo Basuping ba ga Jehofa go tloga kwa tshimologong ya lekgolo la bo20 la dingwaga go fitlha jaanong. Gape o bone kafa go tlhaloganngwa ga “dilo tse di boteng tsa Modimo” go ntseng go oketsega thata ka teng. (1 Bakorintha 2:10; Diane 4:18) Le fa go ntse jalo, leba kgang eno ka tsela e nngwe: Wena ka bowena go go amile jang?

¹² Gongwe nako nngwe o ne o tsena kereke, kgotsa o le motho yo o sa tswang go simolola go tla dipokanong tsa Basupi ba ga Jehofa. Ka nako eo, o ne o tlhaloganya dithuto tsa motheo tsa Baebele go le kana kang? Jaanong bapisa seo le se o setseng o se ithutile go tla go fitlha jaanong se o ka se supang ka tlhamalalo go tswa mo Dikwalong. Kgotsa akanya ka dilo tse di kwa teng tse o setseng o di tlhaloganya, go akaretsa dipolelelopele tse di diragadiwang gone jaanong. Ela tlhoko le kafa o gatetseng pele ka teng go dirisa ditemana dingwe tsa Baebele mo botshelong jwa gago. A kgatelopele ruri! O ka nna wa bua ka botshelo jwa gago, fela jaaka moaposetoloi Petere, wa re: “Re na le lefoko la boporofeti le tlhomamisitswe segolo.” (2 Petere 1:19) Ntlha ke gore: O ‘rutilwe ke Jehofa,’ wena ka namana e bile o mongwe wa batho ba ba mo Bokereseteng jwa boammaaruri mme o batla go direla Jehofa ka bosakhutleng. (Isaia 54:13) O setse o ka bua sentle wa re o go segofaditse thata.

LEINA LA GAGO MO BUKENG YA BOTSHELO

13. Motho a ka dira jang gore a kwalwe mo bukeng ya Modimo ya kgakologelo?

¹³ Go na le masego a mangwe gape a a tswang kwa go Jehofa a a umakwang mo go Malaki 3:16: “Ka nako eo ba ba boifang Jehofa ba ne ba buisana mmogo, mongwe le mongwe le molekane wa gagwe, mme Jehofa a nna a tlhwaya tsebe a ba a reetsa. Mme buka ya kgakologelo ya simolola go kwalwa fa pele ga gagwe e kwalelwa ba ba boifang Jehofa le ba ba akanyang ka leina la gagwe.” Batlodiwa mmogo le ba boidiidi jo bogolo ba bontsha go ‘boifa Jehofa’ jalo ka go mo tlotla. A ga o bone e le tshiamelo go nna mongwe wa Basupi ba ga Jehofa, mongwe wa batho ba ba itumetseng ba ba akanyang ka leina la ga Jehofa le go le tlotlomatsa mo lefatsheng lotlhe? Ruri o ka kgotsofala, o tlhomamisega gore Jehofa o gakologelwa boikanyegi jwa gago!—Bahebera 6:10.

14. Baporofeti ba ba 12 ba go thusitse jang go bona maikutlo le mekgwa e Jehofa a e tlhoileng?

¹⁴ Mme wena ka nosi o ka dira jang gore leina la gago le tsenngwe mo ‘bukeng eo ya kgakologelo,’ e e ntseng e kwalwa gone jaanong fa pele ga ga Jehofa? Gopola dingwe tsa dikgakololo tse di molemo tse re di boneng mo dibukeng tsa baporofeti ba ba 12. Re ithutile ka boitsholo, dinonofo le maikutlo a a sa itumediseng Jehofa. Ka sekai, baporofeti ba ne ba re tlhagisa ka mekgwa e Modimo a reng ga e tsamaisane le melao ya gagwe ya tshiamo e bile e ka senya matshelo a rona, e e jaaka “boitshwaro jo bo repileng” le “moya wa kgokafalo.” (Hosea 4:12; 6:9) Modimo o tlhoile batho ba ba tsietsang balekane ba bone kgotsa le ba bangwe ba malapa a bone. (Malaki 2:15, 16) Jehofa o ne a tlhotlheletsa baporofeti gore ba gatelele gore ga a rate thubakanyo, go sa kgathalesege gore ke ya mofuta ofe. (Amose 3:10) Gape o ne a dira gore ba bontshe kafa go tlhokegang ka teng go tila tsietso kgotsa go sa ikanyege mo kgwebong le mo ditirisanong tse dingwe tsa madi. (Amose 5:24; Malaki 3:5) Mme dibuka tse 12 di ne tsa gatelela kafa go leng botlhokwa ka teng gore banna ba ba neilweng maikarabelo ba se ka ba letla tshiamiso ya bone e kgorelediwa ke go tlhaola batho kgotsa go ipatlela molemo ka bobone.—Mika 7:3, 4.

15. Mengwe ya melemo e o tla nnang le yone ka go latela kgakololo ya baporofeti ba ba 12 ke efe?

¹⁵ Le fa go ntse jalo, baporofeti bano ga ba a re bontsha fela dilo tse re tshwanetseng go di tila. Gape ba bontshitse melemo e re ka e amogelang ka go tshela ka melao ya Modimo. Re tla nna le botsala jo bogolo le Jehofa. (Mika 4:5) Phuthego ya rona e tla nna e itsetsepetse e bile e dira ka natla fa go rena tshiamo. Lenyalo la rona le tla nonofa, lelapa la rona le tla utlwana, le dira ka natla mo dilong tsa semoya. (Hosea 2:19; 11:4) Fa re dira ka tshiamo le ka boikanyegi, batho ba bangwe ba tla re tlotla. Re tla etsa bopelotlhomogi jwa ga Jehofa ka go bontsha kutlwelobotlhoko le bopelonomi jo bo lorato mme bakaulengwe le bokgaitsadi ba rona le bone ba tla re bontsha dinonofo tseo. (Mika 7:18, 19) Ee, re tla bo re tshela le batho ba ba ratang dilo tsa semoya, bakaulengwe le bokgaitsadi ba ba ratang boammaaruri le kagiso, mme mo godimo ga tsotlhe, re tla bo re na le botsala le Jehofa. (Sekarea 8:16, 19) A ga se boammaaruri gore o setse o bona masego ao?

16. Ke pharologanyo efe e e leng teng gompieno, mme e tla nna le ditlamorago dife ka nako ya letsatsi la ga Jehofa la katlholo?

¹⁶ Ka ntlha ya se re sa tswang go tlotla ka sone, go boammaaruri gore “pharologanyo fa gare ga yo o siameng le yo o boikepo”—fa gare ga Bakeresete ba boammaaruri le ba maaka—e setse e bonala sentle go feta le fa e le leng pele. (Malaki 3:18) Re leka go tshela ka melao ya ga Jehofa fa lefatshe lone le ntse le tsenela kwa teng mo ditirong tse di sa siamang. Mme o a itse gore pharologanyo eno e tla nna le ditlamorago tse di masisi fa “letsatsi le legolo la ga Jehofa” le tla.—Sefania 1:14; Mathaio 25:46.

17. Mo isagweng, o ka dirisa jang tshedimosetso e e mo bukeng eno?

¹⁷ Ka jalo go bonala sentle gore kgakololo ya baporofeti ba ba 12 ga e felelwe ke nako. Fa o ntse o lebana le mathata a a rileng kgotsa o tshwanelwa ke go dira ditshwetso, o ka nna wa batla go sekaseka tshedimosetso e e molemo e e mo dikgaolong tsa buka eno. Fa o dira jalo o tla bo o bontsha gore o nna o na le keletso ya go rutiwa ditsela tsa ga Jehofa le go “tsamaya mo ditselaneng tsa gagwe.” (Mika 4:2) Le fa go ntse jalo, go tsamaya ka tsela eo ga se kgang ya gone jaanong fela. O eletsa ka tlhoafalo gore leina la gago le kwalwe mo bukeng ya ga Jehofa ya kgakologelo le bo le nnele ruri mo go yone, a ga go jalo? Dibuka tsa baporofeti ba ba 12 di ka go thusa go dira jalo.

TUMELO E ISA POLOKONG

18. Joele 2:32 e bontsha eng sa botlhokwa se se tshwanetseng go dirwa, mme moaposetoloi Paulo o ne a oketsa seo ka eng?

¹⁸ Joele o ne a bolela jaana a gatelela ntlha ya botlhokwa e e ka dirang gore Modimo a go amogele ka bosakhutleng: “Mongwe le mongwe yo o bitsang leina la ga Jehofa o tla falola.” (Joele 2:32) Baaposetoloi ba babedi e bong Petere le Paulo, ba ne ba nopola ntlha eno ya botlhokwa e e tlhokegang. (Ditiro 2:21; Baroma 10:13) Paulo o ne a oketsa kgakololo eo ka ntlha e nngwe gape fa a ne a botsa a re: “Ba tla bitsa jang yo ba sa dumelang mo go ene?” (Baroma 10:14) Fa e le wena, o tshwanetse wa bo o batla go bitsa leina la ga Jehofa le go dumela mo go ene gone jaanong le ka bosakhutleng!

19. Go bitsa leina la ga Jehofa go akaretsa eng?

¹⁹ Go bitsa leina la ga Jehofa ga go kaye go itse leina la Modimo fela le go le dirisa. (Isaia 1:15) Ditemana tse di dikologileng Joele 2:32 di gatelela gore motho o tshwanetse a nna le boikwatlhao jwa mmatota a bo a ikanye gore Jehofa o a itshwarela. (Joele 2:12, 13) Go bitsa leina la Modimo go kaya go mo itse tota, go mo ikanya, go mo ikobela le go mmaya kwa pele mo botshelong jwa rona. Ee, go direla Jehofa e nna sone selo sa botlhokwa thata. Seo se felela ka gore re tshele botshelo jo bo kgotsofatsang le jo bo nnelang ruri, e leng masego a a tswang kwa Modimong.—Mathaio 6:33.

20. Fa o ntse o bontsha tumelo, ke tuelo efe e e molemo e e go lebaneng?

²⁰ Jehofa o ne a bolela jaana a dirisa Habakuke: “Fa e le mosiami ene, o tla nna a tshela ka boikanyegi jwa gagwe.” (Habakuke 2:4) Tlhomamisa gore o nna o gopotse seo ka metlha. Ke nngwe ya dithuto tsa konokono tsa Baebele. Paulo o ne a umaka temana eo makgetlho a le mararo mo dibukeng tsa gagwe tse di tlhotlheleditsweng.b (Baroma 1:16, 17; Bagalatia 3:11, 14; Bahebera 10:38) Thuto eno ya boammaaruri e tlhoka gore o bontshe tumelo mo setlhabelong se Jesu Keresete a se ntsheditseng maleo a rona. Jesu o ne a tlhalosa jaana: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene . . . a nne le botshelo jo bo sa khutleng.” Gape re bala jaana: “Yo o supang tumelo mo go Morwa o na le botshelo jo bo sa khutleng.” (Johane 3:16, 36) Setlhabelo seo se tlisa phodiso e e ka tlisiwang fela ke Morekolodi wa rona. Fa Malaki a sena go kwala mafoko a ga Jehofa a a bontshang se letsatsi la gagwe le legolo le tla se direlang lefatshe le le boikepo la ga Satane, o ne a tswelela jaana: “Lona ba lo boifang leina la me letsatsi la tshiamo le tla lo phatsimela, ka phodiso mo diphukeng tsa lone.” Ee, Jesu o tla phatsima ka phodiso. Seo se akaretsa phodiso ya semoya e re nang le yone gone jaanong. Le fa go ntse jalo, a bo go itumedisa jang go akanya gore phodiso eo e tla dira le gore kwa lefatsheng le lesha, batho ba fole gotlhelele mo mmeleng!—Malaki 4:2.

21. Ke eng fa o ka nna le tumelo ya gore Jehofa a ka kgona go diragatsa thato ya gagwe?

²¹ Gape go botlhokwa go dumela gore Modimo o kgona go diragatsa thato ya gagwe. Mo motlheng wa ga Mika, go ne go le thata go ikanya batho ba bangwe. Moporofeti o ne a re: “O se ka wa dumela mo molekaneng. O se ka wa ikanya tsala e lo ntshanang seinong le yone.” Le fa go ntse jalo, Mika o ne a sa palelwe ke go ikanya Jehofa; le wena ga o a tshwanela go palelwa. Mika o ne a re: “Fa e le nna, ke tla nna ke lebeletse Jehofa.” (Mika 7:5, 7) Batho ga ba ikanyege, mme Jehofa ene o na le keletso e bile o na le thata ya go diragatsa boikaelelo jwa gagwe jwa gore bolaodi jwa gagwe bo tlotlomadiwe le gore batho ba ba nang le tumelo ba tshele sentle ka bosakhutleng.

22. Ba ba bitsang leina la ga Jehofa ka tumelo ba ka bona ditlamorago dife?

²² O ka bua mafoko a a tshwanang le ano a ga Habakuke o sa belaele sepe: “Ke tla itumela mo go Jehofa ka boene; ke tla ipela mo Modimong wa poloko ya me.” (Habakuke 3:18) Moporofeti Joele o bontsha sentle lebaka la go ipela ga batho ba ba bitsang leina la ga Jehofa ka tumelo a re: Ba “tla falola” kgotsa, jaaka Paulo a e beile, ba “tla bolokwa.” (Joele 2:32; Baroma 10:13) Ba tla falola, kgotsa ba tla bolokwa, ka tsela efe? Go nna le tumelo ga gago go setse go go faloditse mo maanong a a boferefere a ga Satane le mo matlhokong a mantsi a batho ba ba boikepo ba tshwanelwang ke go lebana le one. (1 Petere 1:18) Le fa go ntse jalo, mo godimo ga moo, o ka lebelela pele ka tsholofelo kwa nakong ya fa o tla bo o bolokwa fa tsamaiso eno e e boikepo ya dilo e fedisiwa. Seo se tla go bulela sebaka sa gore o itumelele masego a mantsi a a neng a bolelelwa pele ke baporofeti ba ba 12.

SE RE KA SE LEBELELANG MO PARADAISENG

23, 24. (a) Dingwe tsa ditlhaloso tsa Paradaise tse di newang ke baporofeti ba ba 12 ke dife? (b) Tsela e o lebang isagwe ka yone e amilwe jang ke se baporofeti ba ba 12 ba se kwadileng?

²³ Go na le masego a a nnelang ruri a a tla bonwang ke batho “ba ba boifang Jehofa.” (Malaki 3:16) Bangwe ba baporofeti ba ba 12 ba ne ba tlhalosa Paradaise ya mo lefatsheng e e sa ntseng e tla, ba e tlhalosa ka tsela e e utlwalang sentle e e ka dirang gore o itumele o bo o e lebelele ka tlhoafalo. Ka sekai, Mika o ne a kwala jaana: “Ruri ba tla nna, mongwe le mongwe kafa tlase ga mofine wa gagwe le kafa tlase ga setlhare sa gagwe sa mofeige, mme go tla bo go se na ope yo o ba boifisang.” (Mika 4:4) Mo Bogosing jwa Modimo, ruri o tla ikutlwa o sireletsegile e bile o tla bona maduo a a kgotsofatsang a ditiro tsa gago!

²⁴ Ga se go ijesa dijo tsa ditoro fela go akanya ka nako e ka yone go tla bong go sa tlhole go na le bolwetse, khutsafalo, le e leng loso. Akanya fela boitumelo jwa batho ba ba tla tsosediwang gape mo botshelong ka tsholofelo ya go tshela ba itekanetse! Ba tla iponela ka botlalo mo lefatsheng se se boletsweng mo go Hosea 13:14: “Ke tla ba golola mo seatleng sa Sheole; ke tla ba golola mo losong. Mabolela a gago a kae, wena Loso? Tshenyo ya gago e kae, wena Sheole?” Paulo o ne a nopola temana eo a bua ka tsogo ya selegodimo.—1 Bakorintha 15:55-57.

25. O tla nna le maikutlo afe kwa lefatsheng le lesha?

²⁵ Ga go a tshwanela ga nna thata go dumela gore batho ba ba suleng ba tla tsoga mo lefatsheng. (Sekarea 8:6) Fa Amose le Mika ba ne ba bolelela pele gore batho ba Modimo ba ne ba tla boa kwa botshwarwa, go ne go ka nna ga lebega go le thata go dumela seo. Le fa go ntse jalo, o a itse gore seo se ile sa direga. (Amose 9:14, 15; Mika 2:12; 4:1-7) Batho ba ba neng ba boa ba ne ba re: “Re ne ra nna jaaka ba ba lorang. Ka nako eo molomo wa rona o ne wa tlala setshego, le loleme lwa rona lwa tlala go goa ka boipelo. . . . Jehofa o dirile selo se segolo ka se a se re diretseng. Re a ipela.” (Pesalema 126:1-3) O tla ikutlwa fela jalo mo lefatsheng le lesha fa o bona ‘lesego go fitlha o sa tlhole o tlhoka sepe.’

26. Go tla diragala eng ka batho ba ba nnang ba gopotse letsatsi la ga Jehofa?

²⁶ Fa “letsatsi la ga Jehofa” le sena go fedisa boikepo mo lefatsheng, “bogosi e tla nna jwa ga Jehofa” ka botlalo. (Obadia 15, 21) A seo e tla bo e se masego a a gakgamatsang mo bathong ba a ba busang ba le mo lefatsheng? Mme o ka nna mongwe wa batho ba mafoko a Malaki kgaolo 3 a tla dirang mo go bone: “‘Ruri ba tla nna ba me,’ go buile Jehofa wa masomosomo, . . . ‘Ke tla ba bontsha bopelotlhomogi, fela jaaka rre a bontsha bopelotlhomogi mo go morwawe yo a mo direlang.’” (Malaki 3:17) Ee ruri, go ikanyega ga gago, mo jaanong go dirang gore o tshwanelegele go bolokwa, go tla go tlisetsa ‘lesego go fitlha o sa tlhole o tlhoka sepe.’ A tsholofelo e e itumedisang ruri!

[Dintlha tse di kwa tlase]

GO GO AMILE JANG?

• O solegetswe molemo jang ke go ntlafadiwa ga semoya ga batho ba ga Jehofa ba motlha wa gompieno?—Daniele 12:10; Malaki 3:12.

• Ke ka ntlha yang fa o batla go oketsa ditlhabelo tse o di isetsang Modimo?—Hosea 14:2; 1 Petere 2:5.

NNA O GOPOTSE LETSATSI LA GA JEHOFA

• O akanya gore ke ka ntlha yang fa go le botlhokwa go nna re akantse ka Habakuke 2:4?—Hosea 2:18, 20.

• Baporofeti ba ba 12 ba go thusitse jang gore o tlhologelelwe lefatshe le lesha?—Pesalema 126:1-3.

• Ke ka ntlha yang fa o ikemiseditse go nna o gopotse letsatsi la ga Jehofa?—Joele 2:1, 2; Habakuke 2:2, 3.

[Setshwantsho mo go tsebe 180, 181]

Jehofa o ntse a ntlafatsa batho ba gagwe ba le setlhopha. A rona, motho ka namana, re sa ntse re tlhoka go ntlafadiwa?

[Setshwantsho mo go tsebe 187]

Joele

[Ditshwantsho mo go tsebe 188, 189]

Batlhanka ba ga Jehofa ba mo gare ga batho ba ba ratang boammaaruri le tshiamiso