Kgaolo 106

Ba Senolwa ka Ditshwantsho tsa Tshimo ya Mofine

JESU o kwa tempeleng. O sa tswa go tlhakanya baeteledipele ba bodumedi tlhogo ba ba neng ba mmotsa gore o dira dilo tseno ka taolo efe. Pele ga ba ka rarabologelwa mo go tlhakaneng tlhogo ga bone, Jesu o ba botsa jaana: “Me lo gopolañ?” Morago o ba bontsha ka setshwantsho gore eleruri ke batho ba mofuta ofe.

“Monna moñwe o na a na le bomorwawè ba le babedi,” Jesu o a anela. “Me a tla mo go oa ntlha, a re, Morwaaka, ea u dihè mo tshimoñ ea me ea mafine gompiyeno. Me a mo hetola a re, Kea gana: me moragō a ikwatlhaea, a ea. Me a tla mo go oa bobedi, a bua yalo. Me èna a hetola, a re, Kea ea, morèna: me a se ka a ea. Ke ohe oa bobedi yo, eo o dihileñ go rata ga raagwè?” Jesu o a botsa.

“Oa ntlha,” baganetsi ba gagwe ba mo araba jalo.

Jalo Jesu o tlhalosa jaana: “Amarure kea lo raea, Bakgethisi le diaka baa lo heta, ba tsèna pele ga lona mo bogosiñ yoa legodimo.” Totatota, bakgethisi le diaka kwa tshimologong ba ne ba ganne go direla Modimo. Mme, jaaka ngwana wa ntlha, ba ile ba ikwatlhaya mme ba a mo direla. Mo letlhakoreng le lengwe, baeteledipele bao ba bodumedi, ba ne ba bolela gore ba direla Modimo, jaaka ngwana wa bobedi, lefa go le jalo Jesu o akgela jaana ka bone: “Yohane [Mokolobetsi] o na a tla kwa go lona ka tsela ea tshiamō; me ga loa ka loa mo dumèla; me bakgethisi le diaka ba mo dumèla: me lona ga ea ka ea re lo go bōna, leha e le go sala lo ikwatlhaea moragō, gore lo mo dumèlè.”

Morago Jesu o bontsha gore baeteledipele bao ba bodumedi ga ba a palelwa fela ka go tlogela ga bone go direla Modimo. Nnyaa, mme ke banna ba ba bosula tota, ba ba boikepo. “Go kile ga ne go le muñ oa ntlo,” Jesu o anela jalo, “a tlhomile tshimo ea mafine, a e beèla ka logōra, a èpa bogatèlō yoa boyalwa mo go eōna, a aga sehata sa baleti, me tshimo a e neèla badiha masimo ba ba e thapañ ka tuèlō; me a ètèla kwa lehatshiñ le sele. Me e rile motlha oa mauñō o atamèla, a roma batlhanka ba gagwè kwa go bōnè badiha masimo, gore ba eè go tsaea mauñō a gagwè. Me badiha masimo ba chwara batlhanka ba gagwè, ba betsa moñwe, ba bolaea eo moñwe, le eo moñwe ba mo kgobotletsa ka mayè. A ba a tloga a roma batlhanka ba bañwe, ba le bantsi bogolo go ba pele: le bōnè ba ba dihèla hèla yalo.”

“Batlhanka” ke baperofeti bao “muñ oa ntlo,” Jehofa Modimo, a ba romileng go “badiha masimo” ba “tshimo ea mafine” ya gagwe. Badiri bano ba masimo ke baemedi ba ba eteletseng morafe wa Iseraele pele, morafe oo Bibela e o supang e le “tshimo ea mafine” ya Modimo.

Ereka “badiha masimo” ba bogisa le go bolaya “batlhanka,” Jesu o tlhalosa jaana: “Me kwa morago [mong wa tshimo ya mafine] a roma morwawè kwa go bōnè, a re, Ba tla sisimoga morwaake. Me ea re badiha masimo ba bōna morwawè, ba raana ba re, Eo, ke morua boshwa; ntloñ, re mmolaeeñ, re gapè boshwa yoa gagwè. Me ba mo chwara, ba mo latlhèla kwa ntlè ga tshimo ea mafine, ba mmolaea.”

Jaanong Jesu fa a bua le baeteledipele ba bodumedi, o ba botsa jaana: “Ke gōna e tla reñ morèna oa tshimo ea mafine a tla, o tla ba dihañ badiha masimo bauō?”

“Batho bauō ba ba senañ pelo,” ba a araba, “o tla ba senya ka botlhoka pelo, me o tla neèla ba sele tshimo ea gagwè, ba ba tla mo naeañ mauñō mo metlheñ ea aōna.”

Ka gone ba itigela katlholo ba sa lemoge, ereka le bone ba akarediwa mo Baiseraeleng ba “badiha masimo” ba “tshimo ea mafine” ya ga Jehofa ya morafe wa Iseraele. Maungo ao Jehofa a a lebeletseng mo badiring bao ba masimo ke go dumela mo go Morwawe, Mesia wa boammaaruri. Ka go bo ba palelwa ke go ntsha maungo a a ntseng jalo, Jesu o ba tlhagisa jaana: “A ga lo e se lo ko lo bale mo dikwaloñ [mo go Pesalema 118:22, 23], ha go tweñ, Lencwè ye baagi ba le ganneñ, e bile ke yeōna ye le dihilweñ lencwè ya kgōkgōchō: go mo ga cwa kwa go Yehofa, me goa gakgamatsa mo matlhoñ a rona? Ke gōna ke lo raeañ, ke re, Bogosi yoa Modimo lo tla bo tlosediwa, me bo tla nèwa morahe o o tla ntshañ mauñō a yōna. Me eo o wèlañ mo lencweñ ye, o tla thubagañwa; me eo le mo wèlañ, le tla mo phatlalatsa yaka lorole.”

Bakwadi le baperesiti ba bagolo jaanong ba lemoga gore Jesu o bua ka bone, mme ba batla go mmolaya, ene yoo tota e leng “morua boshwa.” Jalo tshiamelo ya bone ya go nna babusi mo Bogosing jwa Modimo ba tla e amogwa jaaka morafe, mme go tla bopiwa morafe o mosha wa ‘badira masimo a mofine’ oo one o tla ntshang maungo a a tshwanetseng.

Ereka baeteledipele ba bodumedi ba boifa bontsintsi jwa batho, bao ba tsayang Jesu jaaka moperofeti, ga ba leke go mmolaya mo lekgetlong leno. Mathaio 21:28-46; Mareko 12:1-12; Luke 20:9-19; Isaia 5:1-7.

▪ Bana ba babedi ba setshwantsho sa ntlha sa ga Jesu ba tshwantshetsa bomang?

▪ “Muñ oa ntlo,” “tshimo ea mafine,” “badiha masimo,” “batlhanka,” le “morua boshwa,” ba go buiwang ka bone mo setshwantshong sa bobedi ba tshwantshetsa bomang?

▪ ‘Badira masimo a mofine’ ba tla diragalelwa ke eng, mme ba tla tseelwa ke bomang sebaka?