A O NE O ITSE?

Ka dinako dingwe, lefoko leno le ka kaya monna yo o kgaotsweng ditshika tse di fetisang peo ya bonna. Mo metlheng ya ditiragalo tsa Baebele, banna bangwe ba ne ba atlholwa ka go kgaolwa ditshika tse di fetisang peo ya bonna kgotsa ba tshwarwa kgotsa ba dirwa makgoba. Banna ba ba ntseng jalo ba ba ikanngwang ba ne ba okamela mafelo a basadi kwa ntlong ya segosi. Ka sekai, moopafadiwa Hegai le Shaashegase ba ne ba tlhokomela matlo a basadi le a bagadingwana ba Kgosi Ahasueruse wa Peresia, yo go neng go tsewa gore ke Xerxes I.—Esethere 2:3, 14.

Le fa go ntse jalo, ga se batho botlhe ba Baebele e ba bitsang baopafadiwa ba tota ba neng ba kgaotswe ditshika tse di fetisang peo ya bonna. Bakanoki bangwe ba re lefoko leno le ka dirisiwa ka tsela e nngwe gape, le kaya molaodi yo o abetsweng go dira ditiro dingwe mo ntlong ya kgosi. Go lebega lefoko leno le dirisitswe ka tsela eno mo go Ebede-meleke, tsala ya ga Jeremia le Moithopia yo a sa umakwang ka leina yo moefangele Filipo a neng a mo rerela. Go bonala Ebede-meleke e ne e le modiredimogolo wa maemo a a kwa godimo ka gonne o ne a tsena kwa go Kgosi Sedekia. (Jeremia 38:7, 8) Moithopia ene o tlhalosiwa e le motshwaramatlotlo wa kgosi yo o neng “a ile Jerusalema go ya go obamela.”—Ditiro 8:27.

Fa Jesu a tlhalosa katlholo ya mo isagweng o ne a re: “Fa Morwa motho a goroga a le mo kgalalelong ya gagwe, . . . o tla kgaoganya batho mongwe mo go yo mongwe, fela jaaka modisa a kgaoganya dinku le dipodi.” (Mathaio 25:31, 32) Ke eng fa badisa ba ne ba kgaoganya diphologolo tseno?

Dinku le dipodi di ne di fudisiwa mmogo fa go le motshegare. Mme fa go le bosigo di ne di tsenngwa mo masakeng go di sireletsa mo dibataneng tsa naga, mo magodung le mo serameng. (Genesise 30:32, 33; 31:38-40) Diphologolo tseno di ne di tsenngwa mo masakeng a a farologaneng go sireletsa dinku tse di bonolo, segolobogolo dikwana tse di tona le tse di namagadi gore di se ka tsa gobadiwa ke dipodi tse di bogale. Buka ya All Things in the Bible ya re gape badisa ba ne ba kgaoganya dinku le dipodi fa di “tsala, fa di gamiwa le fa di beolwa.” Jesu o ne a dirisa setshwantsho sa dilo tse batho ba kwa Iseraele wa bogologolo ba neng ba tlwaetse go di dira le go di bona tse di jaaka badisa le dinku.