Kgaolo 112

Tlolaganyo ya Bofelo ya ga Jesu E Atametse

JAAKA letsatsi la Labobedi, Nisane 11, le phirima, Jesu o fetsa go ruta baaposetoloi ba gagwe mo Thoteng ya Lotlhware. Abo e nnile letsatsi le a dirileng dilo tse dintsi jang ne mo go lone! Jaanong, gongwe fa a boela kwa Bethania go ya go lala gone, o raya barutwa ba gagwe a re: “Loa itse ha e tla re malatsi a le mabedi a sena go heta, go bo go tla modihō oa Tlolaganyō; me Morwa Motho o ba a neèlwa go bapolwa.”

Mo letsatsing le le latelang, Laboraro, Nisane 12, go lebega Jesu a ikhuditse ka tidimalo le barutwa ba gagwe. Mo letsatsing le le fetileng, o ne a kgala baeteledipele ba bodumedi phatlalatsa, mme o lemoga gore ba batla go mmolaya. Ka jalo ka Laboraro ga a ba itshupegetse, ereka a sa batle gore sepe se kgaupetse go keteka ga gagwe Tlolaganyo le baaposetoloi ba gagwe mo maitseboeng a a latelang.

Fa go ntse jalo, baperesiti ba bagolo le banna ba bagolo ba batho bao ba phuthegetse kwa ntlong ya moperesiti yo mogolo, Kaiafase. Ka ba tlhabisitswe ditlhong ke kafa Jesu a neng a ba tlhasela ka gone mo letsatsing le le fetileng, ba loga maano a go mo tshwara ka maretshwa a bone mme ba mmolaye. Lefa go le jalo, ba ntse ba re: “Eseñ go le modihō, go ka tla ga coga pheretlhègō mo bathuñ.” Ba tshaba batho, bao ba ratang Jesu.

Fa baeteledipele ba bodumedi ba ba boikepo ba ntse ba loga maano a go bolaya Jesu, ba etelwa ke mongwe. Se se ba gakgamatsang ke gore, ke mongwe wa baaposetoloi ba eleng ba ga Jesu, Judase Isekariota, ene yo Satane a tsentseng mo go ene kakanyo ya go oka Mong wa gagwe! Abo ba itumela jang ne fa Judase a ba botsa a re: “Lo tla nnaea eñ, ke tlè ke mo lo neèlè?” Ba dumela ka boitumelo fela gore ba tla mo duela dipapetlana tsa selefera di le 30, tlhwatlhwa ya motlhanka go ya ka Molao wa kgolagano ya ga Moshe. Go tloga foo, Judase o batla nako e e siameng ya go ba neela Jesu fa batho ba seyo.

Nisane 13 e simolola fa letsatsi la Laboraro le phirima Jesu o goroga go tswa kwa Jeriko ka Labotlhano, ka jalo jono ke bosigo jwa borataro le jwa bofelo joo a bo robalang mo Bethania. Mo letsatsing le le latelang, la Labone, go tla tlhoka gore ba dire dithulaganyo tsa bofelo tsa Tlolaganyo, eo e tla simololang fa letsatsi le phirima. Leo ke letsatsi le kwanyana ya Tlolaganyo e tshwanetseng go bolawa ka lone mme e besiwe fela e sa segelelwa. Ba tla tshwarela moletlo ono kae, mme ke mang yo o tla o baakanyetsang?

Jesu ga a bua sepe ka seo, gongwe a thibela gore Judase a seka a bolelela baperesiti ba bagolo gore ba seka ba tshwara Jesu ka nako ya moletlo wa Tlolaganyo. Mme jaanong, Jesu o roma Petere le Johane go tswa kwa Bethania, gongwe mo thapameng ya Labone, a ba raya a re: “Eañ, lo re baakanyetsè Tlolaganyō gore re e yè.”

“U rata ra e baakanya kae?” baa mmotsa.

“E tla re lo sena go tsèna mo motsiñ,” Jesu o a tlhalosa, “lo tla kgatlhana le monna a rwele nkgwana ea metse; lo mo salè moragō, lo eè naè mo tluñ e o tsènañ mo go eōna. Me lo reè muñ oa ntlo, lo re, Moruti oa gu botsa, a re, Ntlo ea boyèlō ea baeñ e kae, e ke tla yèlañ Tlolaganyō gōna le barutwa ba me? Me o tla lo shupetsa ntlwana e kgolwane, e e kwa godimo, e e adilweñ: lo baakanyè gōna.”

Ga go belaetse gore mong yono wa ntlo ke morutwa wa ga Jesu yo gongwe a lebeletseng gore Jesu a ka kopa go dirisetsa ntlo ya gagwe tiragalo eno e e kgethegileng. Lefa go le jalo, fa Petere le Johane ba fitlha kwa Jerusalema, ba fitlhela dilo di ntse fela jaaka Jesu a di boleletse pele. Ka jalo bobedi jwa bone bo baakanya kwanyana le go dira dithulaganyo tse dingwe gape go baakanya seo batho ba ba 13, bao ba tlileng go keteka Tlolaganyo, Jesu le baaposetoloi ba gagwe ba ba 12 ba tla se tlhokang. Mathaio 26:1-5, 14-19; Mareko 14:1, 2, 10-16; Luke 22:1-13; Ekesodo 21:32.

▪ Go lebega Jesu a dira eng ka Laboraro, mme ka ntlhayang?

▪ Ke pokano efe e e tshwarelwang kwa legaeng la moperesiti yo mogolo, mme Judase o ne a etela baeteledipele ba bodumedi ka boikaelelo bofe?

▪ Ke bomang bao Jesu a ba romelang kwa Jerusalema ka Labone, mme e le go ya go dira eng?

▪ Ke eng seo ba ba romilweng bano ba se bonang seo gape se senolang maatla a ga Jesu a a gakgamatsang?