Kgaolo 121

O fa Pele ga Sanehederine, Go Tswa foo O ya kwa go Pilatwe

BOSIGO bo setse bo tla sa. Petere o setse a itatotse Jesu gararo, le maloko a Sanehederine a feditse tsheko ya one ya tshotlo mme ebile a phatlaletse. Lefa go ntse jalo, ba kopana gape ka Labotlhano mo mosong ka bonako fela fa letsatsi la Labotlhano le sena go tlhaba, ka nako eno ba kopanela kwa Holong ya bone ya Sanehederine. Boikaelelo jwa bone go lebega e le go leka go dira ekete tsheko ya bosigo e ne e le kafa molaong. Fa Jesu a tlisiwa kwa go bone, ba bolela jaana, fela jaaka ba ne ba bua bosigo: “Ha u le èna Keresete re bolèlèlè.”

“Ha ke lo bolèlèla, ga lo ketla lo dumèla,” Jesu o araba jalo. “Le gōna ha ke lo botsa, ga lo ketla lo mphetola.” Lefa go ntse jalo, Jesu o supa ka bopelokgale fela gore ke mang, ka go bolela jaana: “Me go tloga hano yana, Morwa Motho o tla dula kaha lecogoñ ye legolo ya nonohō ea Modimo.”

“Me a u Morwa Modimo?” botlhe ba batla go itse.

“Lona loa re, Ke nna èna,” Jesu o ba fetola jalo.

Karabo eno e lekane go kgotsofatsa banna bano, ereka ba ikaeletse go mmolaya. Ba e leba jaaka tlhapatso Modimo. “Re sa nntse re dihañ ka chupō?” ba a botsa. “Ka re mo ikutlwetse a bua ka molomo oa gagwè.” Ka jalo ba bofa Jesu, ba mo tlosa foo, mme ba mo naya mmusi wa Moroma, Ponto Pilatwe.

Judase, yo o okileng Jesu, o ne a ntse a lebeletse se se diragalang. Fa a bona gore Jesu o atlhotswe, o a ikwatlhaya. Ka jalo o ya kwa baperesiting ba bagolo le banna bagolo go ba busetsa dipapetlana tse 30 tsa selefera, a tlhalosa jaana: “Ke leohile, ka ke okile motho eo o senañ molato.”

“Ana go mo re go dihañ? Go itse go na nau hèla,” ba mo fetola jalo ba sa mo utlwele botlhoko. Ka jalo Judase o latlhela dipapetlana tsa selefera mo tempeleng a bo a tsamaya a ya go leka go ikaletsa. Lefa go ntse jalo, kala ya setlhare eo Judase a bofelelang mogala mo go yone go lebega e ile ya robega, mme mmele wa gagwe o wela mo majweng kwa tlase, koo o phatloganang gone.

Baperesiti ba bagolo ga ba itse gore ba dire eng ka dipapetlana tseo tsa selefera. “Ga goa siama go di tsenya mo letlodiñ ya dikhumō ya tempela,” ba konela jalo, “ka e le tlhwatlhwa ea madi a motho.” Jalo, fa ba sena go buisana, ba reka setsha mo mothong mongwe yo o bopang dipitsa tsa mmopa gore ba fitlhele batho ba baeng gone. Ke gone ka moo setsha seo se neng sa bidiwa “Lehatshe ya madi a motho.”

Jesu o isiwa kwa legaeng la mmusi go santse go le phakela thata mo mosong. Mme Bajuda ba ba nang nae ba gana go tsena gonne ba dumela gore go kopana le Baditšhaba ka tsela eo e e gaufi go tla ba leswefatsa. Ka jalo go ba thusa, Pilatwe o tswela kwa go bone. “Lo shupa molato ohe mo monneñ eo?” o a ba botsa.

“Ha monna eo e ka bo e se modiha boshula, re ka bo re se ka ra mo go neèla,” ba araba jalo.

Pilatwe o araba jaana, a tila go nna le seabe mo go seno: “Mo itseèleñ, lo mo sekisè kaha molaoñ oa lona.”

Bajuda ba bolela jaana ba senola boikaelelo jwa bone jwa go batla go mmolaya: “Ga rea lètlèlèlwa go bolaea motho opè.” Eleruri fa ba ne ba ka bolaya Jesu ka nako ya Moletlo wa Tlolaganyo, seo se ne se tla tsosa khuduego, gonne bontsi jwa batho ba tseela Jesu kwa godimo. Mme fa ba ne ba ka dira gore a bolawe ke Baroma ka tatofatso ya sepolotiki, seno se ne se tla dira gore ba se nne le boikarabelo bope mo go seno fa pele ga batho.

Jalo baeteledipele ba bodumedi, ba sa umake tsheko ya bone ya pele eo mo go yone ba neng ba kgala Jesu ba re o tlhapatsa Modimo, jaanong ba mo latofatsa ka ditatofatso tse di farologaneng. Ba mo latofatsa ka tatofatso e e dikarolo tse tharo: “Re hitlhetse monna eo, [1] a shokamisa morahe, [2] a itsa gore Kaesare a se ka a nèwa lekgètho, a re, [3] le èna ka esi ke Keresete, Kgosi.”

Pilatwe o tshwenngwa ke tatofatso ya gore Jesu o bolela fa e le kgosi. Ka gone, o tsena gape mo ntlong ya segosi, o bitsa Jesu, a bo a mmotsa jaana: “A ke wèna Kgosi ea Bayuda?” Ka mafoko a mangwe, a o tlotse molao ka go ipitsa kgosi Kaesare e ntse e le kgosi?

Jesu o batla go itse gore Pilatwe o setse a utlwile go le kana kang kaga gagwe, ka jalo o mmotsa jaana: “A u bua lehoko ye ka wesi, goñwe ba bañwe ba le gu boleletse kaga me?”

Pilatwe o supa fa a sa itse sepe ka ene mme gore o batla go itse. “A ke Moyuda?” o araba jalo. “Aitse morahe oa ga eno, le ditlhōgō tsa baperisiti, ke bonè ba ba gu nnetseñ: u dihileñ?”

Jesu ga a leke le eseng go tila kgang eno, eo tota e leng kaga go nna kgosi ga gagwe. Kwantle ga pelaelo karabo eo Jesu a arabang ka yone jaanong e gakgamatsa Pilatwe. Luke 22:66–23:3; Mathaio 27:1-11; Mareko 15:1; Yohane 18:28-35; Ditihō 1:16-20.

▪ Sanehederine e kopana gape ka boikaelelo bofe mo mosong?

▪ Judase o swa jang, mme go dirwa eng ka dipapetlana tse 30 tsa selefera?

▪ Ke ka ntlha yang fa Bajuda ba batla gore Baroma ba bolaye Jesu go na le gore ba mo ipolaele bone ka bobone?

▪ Bajuda ba latofatsa Jesu ka ditatofatso dife?