Kgaolo 126

“Rure Eo, E Ne E Le Morwa Modimo”

JESU o ne a ise a nne sebaka mo koteng ya tlhokofatso fa, ka sethoboloko, go nna lefifi le le gakgamatsang, leo le neng la tsaya diura di le tharo. Ga se ka ntlha ya phifalo ya letsatsi go bo seno se diragala, ereka seno se diragala fela ka ngwedi yo mosha le ka nako ya Tlolaganyo fa ngwedi e le kgolokwe. Mo godimo ga moo, phifalo ya letsatsi e diragala fela ka nako ya metsotso e se mekae. Ka jalo lefifi leno ke le le bakilweng ke Modimo! Go bonala le dira gore bao ba sotlang Jesu ba iketle go se kaenyana, le gore ditshotlo tsa bone di khutle.

Fa e le gore tiragalo e kgolo e e tshosang eno e direga pele ga gore sesenyi se sengwe se kgale tsala ya sone mme a kope Jesu gore a mo gakologelwe, seno e ka tswa e le sone seo se dirileng gore a sokologe. Gongwe e ne e le ka nako ya fa go ne go le lefifi jalo fa basadi ba le banè, eleng, mmaagwe Jesu le morwadiarraagwe ebong Salome, Maria Magadalena, le Maria mmaagwe moaposetoloi Jakobe yo Mmotlana, ba ne ba atamela kota ya tlhokofatso. Johane, ebong moaposetoloi yo o rategang wa ga Jesu, o na le bone moo.

Abo pelo ya ga mmaagwe Jesu ‘e utlwa botlhoko’ jang ne fa a lebelela morwa yo a ileng a mo amusa a bo a mo tlhokomela a kaleditswe jalo a le mo botlhokong! Lefa go ntse jalo, Jesu ga a akanye ka botlhoko jo a bo utlwang, mme ka go tshela sentle ga ga mmaagwe. A iteka ka natla, o supa Johane ka tlhogo a bo a raya mmaagwe a re: “Mosadi, bōna morwao!” Morago ga moo, a supa Maria ka tlhogo, o raya Johane a re: “Bōna mmago!”

Ka go dira jalo Jesu o neela moaposetoloi wa gagwe yo o mo ratang thata gore e nne ene a tlhokomelang mmaagwe, yo go bonalang jaanong e le motlholagadi. O dira jalo ka gonne barwa ba bangwe ba ga Maria ga ba ise ba bontshe tumelo mo go ene. Ka go dira jalo o tlhoma sekao se se molemo sa go dira dithulaganyo tsa gore mmaagwe a se ka a bona fela dilo tseo a di tlhokang tsa mmele mme gape le tsa semoya.

Mo e ka nnang ka ura ya boraro mo thapameng, Jesu o bolela jaana: “Ke nyorilwe.” Jesu o ikutlwa jaaka ekete Rraagwe ga a tlhole a mo sireleditse, jaaka go ka tualo, e le gore a tle a lekwe bothokgami jwa gagwe ka mo go feletseng. Jalo o kua jaana ka lentswe le le kwa godimo: “Modimo oa me, Modimo oa me, u ntatlhetseñ?” Fa ba utlwa a bua jalo, bangwe ba bao ba neng ba eme fa gaufi ba khutsa jaana: “Bōnañ, o bitsa Eliya.” Gone ka yone nako eo yo mongwe wa bone o a taboga mme, a dirisa ngami eo e innweng mo bojalweng jo bo botšarara e tlhometswe ka lotlhaka, o mo neela gore a nwe. Mme ba bangwe ba bolela jaana: “Lesañ; mmañ re bōneñ bo Eliya o tla tla go mo pagolola.”

Fa Jesu a amogela bojalwa jo bo bots̆arara, o goa jaana: “Go wedicwe.” Ee, o weditse sengwe le sengwe seo Rraagwe a mo rometseng mo lefatsheng gore a tle go se dira. Kwa bokhutlong, o bolela jaana: “Rra, ke neèla mōea oa me mo diatleñ tsa gago.” Ka go dira jalo Jesu o neela Modimo maatla a botshelo jwa gagwe a solofetse gore Modimo o tla a mmusetsa gape. Morago ga moo o oba tlhogo ya gagwe a bo a swa.

Ka nako ya fa Jesu a ntsha moya wa gagwe wa bofelo, go nna le thoromo e kgolo ya lefatshe, mme e phatlola mafika. Thoromo eno e maatla mo eleng gore diphuphu tse di ka kwa ntle ga Jerusalema di a atlhamologa, mme e dira gore le ditoto di tswe mo go tsone. Bafetibatsela, bao ba bonang ditoto di tswetse kwa ntle, ba tsena mo motseng mme ba bega ka gone.

Mo godimo ga moo, ka nako ya fa Jesu a swa, sesiro se segolo seo se kgaoganyang Felo ga Boitshepo le Felo ga Boitshepo jwa Maitshepo mo tempeleng ya Modimo se gagoga ka bogare, go tswa kwa godimo go ya kwa tlase. Go bonala sesiro seno seo se neng se kgabisitswe bontle se le selekanyo sa mo e ka nnang dimitara di le 18 ebile se le boima thata! Kgakgamatso eno eo e ba tlogelang ba gakgametse ga e bontshe fela kafa Modimo o galefetseng babolai ba ga Morwawe ka gone mme gape e bontsha gore go tsena mo Felong ga Boitshepo jwa Maitshepo, eleng legodimo ka bolone, jaanong go a kgonega ka loso lwa ga Jesu.

Ebu, fa batho ba utlwa thoromo ya lefatshe ebile ba bona dilo tseo di diregang, ba simolola go boifa thata. Molaodi wa mophato yo o neng a tlhokometse go bolawa gono o galaletsa Modimo. “Rure eo, e ne e le Morwa Modimo,” o bolela jalo. Go bonala a ne a le gone fa kgang ya go nna morwa Modimo e ne e tlotlwa mo tshekong ya ga Jesu e e neng e tshwerwe ke Pilatwe. Mme jaanong o tlhatswegile pelo gore Jesu ke Morwa Modimo, ee, gore eleruri ke ene monna yo mogolo go gaisa botlhe ba ba kileng ba tshela.

Ba bangwe le bone ba gamaregisiwa ke ditiragalo tseno tse di gakgamatsang, mme ba simolola go boela gae ba ntse ba ititaya dihuba, e le go bontsha gore ba utlwile botlhoko tota ebile ba tlhabilwe ke ditlhong. Basadi bao eleng barutwa ba ga Jesu ba ne ba emetse kgakala ba lebeletse seo se neng se diragala mme ba ne ba amilwe thata ke ditiragalo tseno tse dikgolo tseo di neng di diragala. Moaposetoloi Johane le ene o gone. Mathaio 27:45-56; Mareko 15:33-41; Luke 23:44-49; 2:34, 35; Yohane 19:25-30.

▪ Ke ka ntlha yang fa phifalo ya letsatsi e ka se ka ya bo e le yone e bakileng lefifi leo le neng la tsaya diura di le tharo?

▪ Pelenyana fela ga loso lwa gagwe, Jesu o neela sekao sefe se se molemo mo go bao ba nang le batsadi bao ba godileng?

▪ Mafoko a bofelo a manè a Jesu a neng a a bua pele fela ga a swa ke afe?

▪ Thoromo ya lefatshe e dirang, mme lebaka la go bo sesiro sa tempele se gagoga le bolelang?

▪ Molaodi wa mophato yo o neng a tlhokometse go bolawa gono o angwa jang ke dikgakgamatso?