A o Ne o Itse?

Mo Therong ya gagwe ya kwa Thabeng, Jesu o ne a bolelela balatedi ba gagwe jaana: “Lona lo letswai la lefatshe; mme fa letswai le tswapoga, botswai jwa lone bo ka busediwa jang? Ga le tlhole le ka dirisediwa sepe fa e se go latlhelwa kwa ntle gore le gatakwe ke batho.” (Mathaio 5:13) Letswai le kgona go thibela dilo gore di se ka tsa bola. Ka jalo, tota setshwantsho sa ga Jesu se ne se kaya gore barutwa ba gagwe ba ka sireletsa batho ba bangwe gore ba se ka ba senyega mo boitsholong le mo semoyeng e bile ba ne ba tshwanetse gore ba dire jalo.

Le fa go ntse jalo, malebana le se Jesu a ileng a se bua ka ga go tswapoga ga botswai jwa letswai, The International Standard Bible Encyclopedia ya re: “Letswai le le tswang mo kgaolong ya Lewatle le le Suleng gantsi le ne le kgotlelwa ke diminirale; ka jalo letswai le ka tlhaologa mo motswakong ono mme la tlogela sengwe se se se nang tatso.” Ka jalo, go a utlwala go bo Jesu a ile a tlhalosa gore letswai le le setseng “ga le tlhole le ka dirisediwa sepe fa e se go latlhelwa kwa ntle.” Buka eno ya tshedimosetso e oketsa ka gore: “Le fa leswe la Lewatle le le Suleng le dira gore letswai la teng le nne le boleng jo bo kwa tlase ga letswai la mawatle a mangwe, lone o kgona go le bona motlhofo (le ne le ka kgona go selwa mo lotshitshing lwa lewatle) mme seo se dira gore e nne letswai le le dirisiwang thata kwa Palesetina.”

Jesu o ne a bua ka setshwantsho sa mosadi yo e neng ya re fa a sena go latlhegelwa ke ledi la tshipi la derakema mo go a le lesome a ileng a tsaya lebone mme a feela ntlo ya gagwe ka kelotlhoko go fitlha a le bona. (Luke 15:8-10) Mo motlheng wa ga Jesu, ledi la tshipi la derakema le ne le ka lekana le tuelo ya tiro ya letsatsi lotlhe, ka jalo, e ne e le madi a mantsi tota gore a ka latlhega. Le fa go ntse jalo, tiragalo e a neng a e tlhalosa e ne e le boammaaruri mo botshelong jwa batho ba bangwe ka mabaka a mangwe.

Dipatlisiso dingwe di bontsha gore gantsi basadi ba ne ba dirisa madi a tshipi e le mekgabiso. Ka jalo, Jesu a ka tswa a ne a bua ka ledi la tshipi le e neng e le mokgabiso le le neng le sa bolo go nna mo ntlong ya mosadi yoo kgotsa e le lengwe la madi a bogadi jwa gagwe. Le fa go ka tswa go ne go ntse jalo kgotsa go sa nna jalo, go a utlwala go bo go latlhegelwa ke ledi la tshipi le le lengwe mo go a le lesome go ile ga dira gore mosadi yoo a tshwenyege thata gore a le bone.

Mo godimo ga moo, matlo a batho ba ba tlwaelegileng fela ba motlha wa ga Jesu a ne a dirilwe gore go se ka ga tsena lesedi le le ntsi le mogote o montsi. A ne a na le difensetere di le mmalwa fa e le gore di ne di le teng. Gantsi boalo bo ne bo khurumediwa ka lotlhaka kgotsa dithito tse di omeletseng tsa dimela tse di farologaneng. Fa ledi la tshipi le ne le ka wa, go ne go ka nna thata go le bona. Motlhalosi mongwe a re: “Le fa go ntse jalo, fa sengwe se sennye jaaka ledi se ne se ka latlhega mo lefelong le le ntseng jalo, go tshuba lebone kgotsa go feela ntlo e ne e le tsela e e tlwaelegileng thata ya go se batla.”