Kgaolo 12

Kolobetso ya ga Jesu

MO E ka nnang dikgwedi tse thataro morago ga gore Johane a simolole go rera, Jesu, yo jaanong a nang le dingwaga di le 30, o tla kwa go ene kwa Joredane. Ka ntlha yang? A ke go mo jela nala fela ka tsela ya botsalano? A Jesu o kgatlhegela fela ka moo tiro ya ga Johane e tswelang pele ka gone? Nnyaa, Jesu o kopa Johane gore a mo kolobetse.

Gone fela foo Johane o gana ka go re: “Ke chwanetse ka bo ke kolobediwa ke wèna, me a u tla mo go nna?” Johane o itse gore ntsalae ebong Jesu ke Morwa wa Modimo yo o kgethegileng. Aitsane, Johane o ne a tlola ka boitumelo mo sebopelong sa ga mmaagwe fa Maria, yo o neng a imile Jesu, a ne a ba etetse! Mmaagwe Johane ebong Elisabetha kwantle ga pelaelo o ne a mmolelela kaga seno moragonyana. Mme gape e ka tswa e le gore o ne a mmolelela ka kitsiso ya moengele ya go tsholwa ga ga Jesu le kaga go itlhagisa ga baengele mo badiseng mo bosigong jo Jesu a tsetsweng ka jone.

Jalo Jesu ga se moeng go Johane. Mme Johane o itse gore kolobetso ya gagwe ga se ya ga Jesu. Ke ya bao ba ikwatlhaelang dibe tsa bone, mme Jesu ga a na sebe. Lefa go ntse jalo, go sa kgathalesege go gana ga ga Johane, Jesu o ne a mo pateletsa jaana: “Mma go nnè yalo gompiyeno: gonne go re chwanetse go dihatsa tshiamō eotlhe yalo.”

Ke ka ntlhayang fa go siame gore Jesu a kolobediwe? Gonne go kolobediwa ga ga Jesu ke lotshwao, e seng lwa go ikwatlhaela dibe, mme lwa go itlhagisa go dira thato ya ga Rraagwe. Jesu e ne e le mmetli, mme jaanong nako e fitlhile ya gore a simolole bodihedi joo Jehofa Modimo a mo rometseng gore a bo dire mo lefatsheng. A o akanya gore Johane o ne a lebeletse gore sengwe se se sa tlwaelegang se diragale fa a ne a kolobetsa Jesu?

Ebu, moragonyana Johane o bega jaana: “Me èna eo o nthomileñ, gore ke tlè go kolobetsa ka metse, ke èna eo o ntheileñ a re, Eo u bonañ Mōea o hologèla mo go èna, o nna go èna, ke èna eo o kolobetsañ ka Mōea o o Boitshèpō.” Jalo Johane o lebeletse gore moya wa Modimo o fologele mo go mongwe yo o mo kolobetsang. Ka gone, gongwe ruri ga a gakgamale fa, e re Jesu a tswa mo metsing, Johane o bona ‘moya wa Modimo o bo o fologela mo go ena jaaka lephoi.’

Mme go diragala se se fetang seo fa Jesu a kolobediwa. ‘Magodimo a a mmulegela.’ Seno se kaya eng? Go bonala gore fa a kolobediwa, o gakologelwa botshelo jwa gagwe jwa pele ga a nna motho. Ka jalo, Jesu jaanong o gakologelwa ka botlalo botshelo jwa gagwe jaaka morwa wa ga Jehofa Modimo wa semoya, go akaretsa dilo tsotlhe tse Modimo o neng wa di bua le ene kwa legodimong pele ga go nna gone ga gagwe pele ga a nna motho.

Mo godimo ga moo, ka nako ya go kolobediwa ga gagwe, go bua lentswe le tswa kwa legodimong le re: “Eo ke morwake eo o ratègañ; eo ke itumelañ thata mo go èna.” Lentswe leo ke la ga mang? A ke lentswe la ga Jesu ka boene? Ga go kake ga bo go ntse jalo! Ke la Modimo. Ka phepafalo, Jesu ke Morwa Modimo, e seng Modimo ka sebele, jaaka batho bangwe ba bolela.

Lefa go ntse jalo, Jesu ke morwa wa Modimo yo e leng motho, fela jaaka go ne go ntse ka motho wa ntlha, Adame. Morutwa Luke, morago ga a sena go tlhalosa kolobetso ya ga Jesu, o kwala jaana: “Yesu ka esi, o rile a simolola go ruta, a bo a le e ka ne e le dinyaga di le mashomè mararo me,—yaka go no go gopolwa,—ea bo e le morwa Yosefe, morwa Heli, . . . morwa Dafide, . . . morwa Aberahame, . . . morwa Noa, . . . morwa Adame, morwa Modimo.”

Ereka Adame e ne e le “morwa Modimo” wa motho, jalo go ntse fela jalo le ka Jesu. Jesu ke motho wa maemo a a kwa godimo go feta botlhe ba ba kileng ba tshela, eleng selo seo se phepafalang fa re tlhatlhobisa botshelo jwa ga Jesu. Lefa go ntse jalo, fa a kolobediwa, Jesu o simolola kamano nngwe e ntšha le Modimo, o nna gape Morwa wa semoya wa Modimo. Jaanong Modimo o mmiletsa gape kwa legodimong, jaaka go ne go ka tualo, ka go mo simolodisa tsela eo e tla mo isang kwa go reng a ntshetse botshelo jwa gagwe jaaka motho setlhabelo ka bosakhutleng a bo ntshetsa batho ba ba atlhotsweng. Mathaio 3:13-17; Luke 3:21-38; 1:34-36, 44; 2:10-14; Yohane 1:32-34; Bahebera 10:5-9.

▪ Ke ka ntlha yang fa Jesu e se moeng mo go Johane?

▪ Ereka Jesu a ne a sa dira boleo bope, ke ka ntlha yang fa a kolobediwa?

▪ Go ya ka se Johane a se itseng kaga Jesu, ke ka ntlha yang fa a ka nna a seka a gakgamala fa moya wa Modimo o ne o fologela mo go Jesu?