Kgaolo 43

Go Ruta Ka Ditshwantsho

GO BONALA fa Jesu a le mo Kaperenama fa a kgalemela Bafarisai. Moragonyana mo letsatsing leo o tswa mo ntlong mme o ya fa Lewatleng la Galilea le le gautshwane, koo matshwititshwiti a batho a phuthegelang gone. Fa a tsena koo o pagama mokorwana, o ba katoga go sekae, mme o simolola go ruta batho ba ba mo lotshitshing kaga Bogosi jwa magodimo. O dira jalo ka motseletsele wa dikai, kana ditshwantsho, sengwe le sengwe se itebagantse le dilo tse batho ba di tlwaetseng.

Santlha, Jesu o bua kaga mojadi yo o neng a jala peo. Peo nngwe e wela fa thoko ga tsela mme e jewa ke dinonyane. Peo e nngwe e wela mo mmung o o nang le maje kwa tlase. Ereka medi e sa kgone go ya kwa teng, dimela tse di sa tswang go tlhoga di swabisiwa ke letsatsi je le fisang. Mme peo e nngwe e wela mo mitlweng, eo e hupetsang dijalo fa di tlhoga. Labofelo, dingwe tsa dipeo di wela mo mmung o o molemo mme di ungwa ga lekgolo, dingwe ga masome a marataro, mme tse dingwe ga masome a mararo.

Mo setshwantshong se sengwe, Jesu o bolela gore Bogosi jwa Modimo bo tshwana le fa monna a jala peo. Fa malatsi a ntse a feta, fa monna a ntse a robetse lefa a tsogile, peo e nna e ntse e gola. Monna yoo ga a itse gore jang. E ikgolela fela ka boyone mme e ungwa mabele. Fa mabele a butswa, monna o a a roba.

Jesu o bua setshwantsho sa boraro kaga monna yo o jalang peo e e siameng, “me e rile go robecwe,” mmaba o a tla mme o feta a jala mofoka mo mabeleng. Batlhanka ba monna yoo ba botsa gore a ba ka khumola mofoka. Mme o araba ka go re: ‘Nnyaa, fa lo ka dira jalo, lo ka tla lwa khumola mangwe a mabele. Mmang di gole mmogo, go fitlhela ka nako ya thobo. Mme ke tla raya barobi ke re ba tlhaole mofoka mme ba o fise mme ba beye mabele mo mabolokelong.’

Fa a ntse a tsweletse ka go bua le matshwititshwiti mo lotshitshing, Jesu o neela ditshwantsho tse dingwe tse pedi. O tlhalosa gore “bogosi yoa legodimo” bo tshwana le tlhaka ya mosedara eo monna mongwe a neng a e jala. O bolela gore, lemororo e le e potlana go feta dipeo tsotlhe, e gola gore e bo e fete dijalo tsotlhe. E nna setlhare seo dinonyane di tlang go kotama mo go sone, mme di bona moruti kafa tlase ga dikala tsa sone.

Bangwe gompieno ba a ganela ba re go na le dipeo dingwe tse di potlana go feta dipeo tsa mosedara. Mme Jesu fano ga a rute kaga kitso ya ditlhare. Mo dipeong tseo Bagalilea ba motlha wa gagwe ba tlwaelaneng natso, peo ya mosedara ruri ke e potlana go di feta tsotlhe. Jalo ba lemoga kgang ya kgolo e e sa tlwaelegang eo Jesu a fang setshwantsho ka yone.

Labofelo, Jesu o bapisa “bogosi yoa legodimo” le sebediso seo mosadi a se tsayang a se tlhakanya le dilekanyo tse dikgolo tse tharo tsa bupe. Morago, o a bolela, se bidisa bupe jotlhe.

Morago ga fa a sena go neela ditshwantsho tseno tse tlhano, Jesu o phatlalatsa matshwititshwiti a bo a boela kwa ntlong eo a nnang kwa go yone. Ka bonakonyana baaposetoloi ba gagwe ba ba 12 ba mo latela koo.

Go Solegelwa Molemo ke Ditshwantsho tsa ga Jesu

Fa barutwa ba tla kwa go Jesu morago ga a sena go buisa boidiidi jwa batho mo lotshitshing lwa lewatle, ba batla go itse thata kaga tsela e ntšha ya gagwe ya go ruta. Ebu, ba kile ba mo utlwa a dirisa ditshwantsho pele, mme eseng ka mo go kalokalo. Ka gone ba batla go itse: “Ana u buèlañ nabō ka dichwanchō?”

Lebaka le lengwe la go bo a dira jalo ke go diragatsa mafoko a moperofeti: “Ke tla tumolola molomo oa me ka dichwanchō; ke tla kakanya dilō tse di saleñ di lōywa ka go thaiwa ga lehatshe.” Mme go na le mo gontsi go na le moo. Go dirisa ditshwantsho ga gagwe go thusa go senola boikutlo jwa dipelo tsa batho.

Boammaaruri ke gore, bontsi jwa batho ba kgatlhegela Jesu fela jaaka radipolelo yo mogolo le modiradikgakgamatso, eseng yo o ka direlwang jaaka Morena le yo o ka salwang morago kwantle ga bogagapa bope. Ga ba batle go kgorelediwa mo ponong ya bone ya dilo kana tsela ya bone ya botshelo. Ga ba batle gore molaetsa o loelele mo go kalokalo.

Ka gone Jesu a re: “Ke gōna kaha ke buañ nabō ka dichwanchō ka gōna; ka go bo leha ba lebile, ga ba bone, leha ba utlwa, ga ba utlwe, le gōna ga ba tlhaloganye. Me polèlèlō pele ea ga Isaia e ba dihaletse, e e rileñ, . . . Gonne dipelo tsa batho ba di akotse.”

“Me,” Jesu o a tswelela, “matlhō a lona a segō, gonne aa bōna; le ditsèbè tsa lona, gonne dia utlwa. Gonne amarure kea lo raea, baperofeti ba le bantsi, le basiami, ba eleditse go bōna dilō tse lo di bōnañ, me gaa ba ka ba di bōna; le go utlwa dilō tse lo di utlwañ, me gaa ba ka ba di utlwa.”

Ee, baaposetoloi ba ba 12 le bao ba nang le bone ba na le dipelo tse di bulegileng. Ka gone Jesu a re: “Lona lo neilwe go itse masaitsiweñ a bogosi yoa legodimo; me bōnè ga baa go nèwa.” Ka ntlha ya keletso ya bone ya go tlhaloganya, Jesu o neela barutwa ba gagwe tlhaloso ya setshwantsho sa mojadi.

“Peo ke lehoko ya Modimo,” Jesu a rialo, mme mmu ke pelo. Kaga peo e e jetsweng fa go kwakwaletseng fa thoko ga tsela, o tlhalosa jaana: “Hoñ go tle diabolo, a tlose lehoko mo peduñ tsa bōnè, gore ba se ka ba dumèla me ba bolokwa.”

Mo letlhakoreng le lengwe, peo e e jetsweng mo mmung o o matlapa ke dipelo tsa batho ba ba amogelang lefoko ka boipelo. Lefa go ntse jalo, ka ntlha ya gore lefoko le ka seke le itshetlele mo dipelong tseo, batho bano ba boela morago fa nako ya teko kana pogiso e tla.

Mabapi le peo e e wetseng fa gare ga mitlwa, Jesu o tswelela ka go tlhalosa gore seno se raya batho ba ba utlwileng lefoko. Lefa go ntse jalo, bano ba itewa tsebe ke matshwenyego le dikhumo le menate ya botshelo jono, ka gone ba hupediwa gotlhelele mme ba seke ba dire sepe se se siameng.

Labofelo, fa e le kaga peo e e jetsweng mo mmung o o nonneng, Jesu a re, bano ke ba ereng fa ba sena go amogela lefoko ka dipelo tse di molemo le tse di siameng, ba le tshegetse le go nna le maungo ka boitshoko.

Abo barutwa bano ba segofaditswe jang ne bao ba ileng ba batla gore Jesu a ba tlhalosetse dithuto tsa gagwe! Maikaelelo a ga Jesu ke gore ditshwantsho tsa gagwe di tlhaloganngwe gore di fetisetse boammaaruri mo go ba bangwe. “A lobōnè lo tlo lo tlisiwe gore lo huhumèdiwè tlhatse ga seèlō, kgotsa kaha tlhatse ga bolaō?” o a botsa. Nnyaa, “A ga se gore lo tlhōñwè mo setlhomoñ?” Ka gone Jesu o a oketsa: “Ke gōna, itiseñ kaha lo utlwañ ka gōna.”

Ba Segofadiwa Ka Tao E E Oketsegileng

Barutwa ba sa tswa go amogela tlhaloso ya ga Jesu ya setshwantsho sa mojadi, mme jaanong ba batla go itse mo go oketsegileng. Ba kopa jaana, “Re phuthololèlè sechwanchō sa mohoka mo tshimoñ.”

Abo boikutlo jwa barutwa bo farologane jang ne le jwa boidiidi jwa batho jo bo mo lotshitshing! Batho bao ga ba na keletso e e tlhoafetseng ya go itse seo ditshwantsho di se kayang, ba kgotsofadiwa fela ke seo go buiwang ka sone mo go tsone. Fa Jesu a bapisa bareetsi bao ba ba fa thoko ga lewatle le barutwa ba gagwe ba ba batlang go itse, a re:

“Selekanyō se lo lekanyañ ka shōna, lo tla lekanyediwa ka shōna hèla: me lo tla okelediwa.” Barutwa ba lekanya sentle mo go kgatlhegeleng Jesu le go mo tlhwaela tsebe ka tlhoafalo mme ka jalo ba segofadiwa ka go amogela tao e e oketsegileng. Ka gone, fa Jesu a araba potso ya barutwa ba gagwe, o tlhalosa jaana:

“Moyadi oa peo e e molemō ke Morwa Motho; Tshimo ke lehatshe; peo e e molemō bōnè, ke bana ba bogosi; me mohoka ke bana ba eo o boshula; Mmaba eo o ba yadileñ ke diabolo; thōbō ke bokhutlō yoa lehatshe; barobi ke baengele.”

Morago ga fa Jesu a sena go tlhalosa karolo nngwe le nngwe ya setshwantsho sa gagwe, o tlhalosa phelelo. O bolela gore, kwa bokhutlong jwa tsamaiso ya dilo, barobi, kana baengele, ba tla kgaoganya Bakeresete ba eseng bone ba ba tshwanang le mofero le “bana ba bogosi” ba boammaaruri. Go tswa foo “bana ba eo o boshula” ba tla atlholelwa tshenyo, mme bana ba Bogosi jwa Modimo, “basiami,” ba tla phatsima ka go galalela mo Bogosing jwa ga Rraabone.

Go tswa foo Jesu o segofatsa barutwa ba gagwe ba ba batlang go itse ka ditshwantsho tse dingwe di le tharo. Santlha, a re: “Bogosi yoa legodimo bo chwana le khumō e e hitlhegileñ mo nageñ; e motho o na a e bōna, me a e lōba; me ka boitumèlō yoa gōna, a ea a bapatsa cotlhe tse o nañ nacō, a rèka naga euō.”

O tswelela ka go re, “Gapè bogosi yoa legodimo bo chwana le moreki eo o batlañ diperela tse dintlè; Me ea re a sena go bōna ñwe e e tlhwatlhwa e kgolo, a ea a bapatsa cotlhe tse o nañ nacō, a e rèka.”

Jesu ka boene o tshwana le monna yo o bonang khumo e e fitlhilweng le jaaka mmapatsi yo o bonang perela ya tlhwatlhwa e kgolo. O ne a rekisa sengwe le sengwe, jaaka go ka tualo, a tlogela boemo jo bo tlotlegang kwa legodimong go tla go nna motho yo o kwa tlase. Go tswa foo, jaaka motho mo lefatsheng, o utlwisiwa botlhoko ke go kgobiwa le pogiso ya kilo, go supa fa a tshwanelega go nna Mmusi wa Bogosi jwa Modimo.

Balatedi ba ga Jesu ba gwetlhiwa gore le bone ba rekise sengwe le sengwe gore ba bone tuelo e e molemo ya go nna mmusimmogo le Keresete kana mmusiwa wa Bogosi mo lefatsheng. A re ka bona fa go nna le karolo mo Bogosing jwa Modimo e le selo se se tlhwatlhwakgolo go feta sengwe le sengwe mo botshelong, jaaka khumo e e ka se beelweng tlhwatlhwa kana perela e e botlhokwa thata?

Kwa bofelong, Jesu o tshwantsha “bogosi yoa legodimo” le letloa leo le gogobang ditlhapi tsa mofuta mongwe le mongwe. Fa ditlhapi di kgaoganngwa, tse di seng monate di a latlhiwa mme tse di monate di a bolokiwa. Jalo, Jesu o bolela gore go tla nna jalo mo bokhutlong jwa tsamaiso ya dilo; baengele ba tla kgaoganya baikepi le basiami, ba emisetsa baikepi go senngwa.

Jesu ka boene o simolola tiro ya gagwe ya go tshwara ditlhapi, ka go bitsa barutwa ba gagwe ba ntlha gore ba tle go nna “bachwara batho.” Kafa tlase ga tlhokomelo ya baengele, tiro ya go tshwara ditlhapi e ntse e tsweletse go kgabaganya makgolokgolo a dingwaga. Labofelo nako e a fitlha ya go tsholetsa “lotloa,” loo lo tshwantshang diphuthego tsa lefatshe tse di ipolelang gore ke tsa Bokeresete.

Lemororo ditlhapi tse di seng monate di senngwa, re lebogela go bo re ka balelwa gareng ga ‘ditlhapi tse di monate’ tse di bolokiwang. Ka go bontsha keletso e e tlhoafetseng e e tshwanang le eo barutwa ba ga Jesu ba neng ba e bontsha mo go batleng kitso e e oketsegileng le go tlhaloganya, re tla segofadiwa eseng fela ka tao e e oketsegileng mme ka lesego la Modimo la botshelo jo bosakhutleng. Mathaio 13:1-52; Mareko 4:1-34; Luke 8:4-18; Pesalema 78:2; Isaia 6:9, 10.

▪ Jesu o ne a bua le matshwititshwiti leng ka ditshwantsho mme kae?

▪ Ke ditshwantsho dife tse tlhano tse Jesu jaanong a di bolelelang matshwititshwiti?

▪ Ke ka ntlhayang fa Jesu a ne a re peo ya mosedara ke e potlana go feta dipeo tsotlhe tse dingwe?

▪ Ke ka ntlhayang fa Jesu a bua ka ditshwantsho?

▪ Barutwa ba ga Jesu ba supa jang gore ba farologane le boidiidi jwa batho?

▪ Jesu o tlhalosa setshwantsho sa mojadi jang?

▪ Barutwa ba farologana jang le boidiidi jwa batho jo bo mo lotshitshing?

▪ Ke bomang kana ke eng se se tshwantshiwang ke mojadi, tshimo, peo e e molemo, mmaba, thobo, le barobi?

▪ Jesu o ne a neela ditshwantsho dife tse dingwe tse tharo, mme re ka ithuta eng mo go tsone?