“O ne A sa Bue le Bone Sepe Fa e Se ka Setshwantsho”

1-3. (a) Barutwa ba ba tsamayang le Jesu ba na le tshono efe e e sa tshwaneng le epe, mme o dira jang gore go nne motlhofo gore ba gakologelwe dilo tse a di rutang? (b) Ke eng fa go le motlhofo go gakologelwa ditshwantsho tse di dirisitsweng sentle?

BARUTWA ba ba tsamayang le Jesu ba na le tshono e e sa tshwaneng le epe. Ba ithuta go tswa mo Morutising yo Mogolo ka tlhamalalo. Ba nna le tshono ya go mo ikutlwela ka ditsebe fa a tlhalosa Lefoko la Modimo le go ba ruta dithuto tsa boammaaruri tse di itumedisang. Ga jaanong ba tshwanelwa ke go ipolokela mafoko ao a gagwe a a botlhokwatlhokwa mo megopolong le mo dipelong tsa bone; ga e ise e nne nako ya gore mafoko ao a kwalwe.a Le fa go ntse jalo, Jesu o ba direla dilo motlhofo gore ba kgone go gopola dilo tse a ba rutang tsone. O dira seo jang? Ka tsela e a rutang ka yone, segolobogolo ka mokgwa wa gagwe wa go dirisa ditshwantsho ka botswerere.

² Ee ruri, ditshwantsho tse di molemo ga di lebalege motlhofo. Mokwadi mongwe o ile a bolela gore ditshwantsho “di fetola ditsebe go nna matlho” le gore di “thusa bareetsi go kgona go bona se ba se utlwang ka leitlho la mogopolo.” E re ka gantsi re kgona go tlhaloganya dilo fa re di bona ka matlho, ditshwantsho di ka re thusa go tlhaloganya motlhofo megopolo e go leng thata go e tlhaloganya. Ditshwantsho di ka thusa motho go tlhaloganya sentle mafoko a a tlhalosiwang, di ka re ruta dithuto tse di ka nnelang ruri mo megopolong ya rona.

³ Ga go na morutisi ope yo mongwe mo lefatsheng yo o kileng a nna le bokgoni jo bo fetang jwa ga Jesu Keresete jwa go dirisa ditshwantsho. Le gompieno, ditshwantsho tsa gagwe di motlhofo go gopolwa. Ke eng fa Jesu a ile a ikaega thata ka mokgwa ono wa go ruta? Ke eng se se neng se dira gore ditshwantsho tsa gagwe di nne le matswela? Re ka ithuta jang go dirisa mokgwa ono wa go ruta?

4, 5. Ke eng fa Jesu a ne a dirisa ditshwantsho?

⁴ Baebele e tlhalosa mabaka a mabedi a botlhokwa a go bo Jesu a ne a dirisa ditshwantsho. La ntlha, o ne a dira jalo go diragatsa boporofeti. Mo go Mathaio 13:34, 35, re bala jaana: “Jesu o ne a . . . bua le boidiidi ka ditshwantsho. Eleruri, o ne a sa bue le bone sepe fa e se ka setshwantsho; gore go tle go diragadiwe se se neng sa buiwa ka moporofeti yo o neng a re: ‘Ke tla bula molomo wa me ka ditshwantsho.’” Moporofeti yo Mathaio a buang ka ene e ne e le mokwadi wa Pesalema 78:2. Mopesalema yoo o ne a tlhotlhelediwa ke moya wa Modimo go kwala boporofeti joo makgolokgolo a dingwaga pele ga Jesu a tsholwa. Akanya gore seo se bolela eng. Jehofa o ne a bolelela pele makgolokgolo a dingwaga pele ga go direga, gore Mesia o ne a tla ruta ka ditshwantsho. Ruri he, Jehofa o tshwanetse a bo a tsaya mokgwa oo wa go ruta o le botlhokwa tota.

⁵ Lebaka la bobedi ke gore, Jesu o ne a tlhalosa gore o ne a dirisa ditshwantsho go tlhaola batho ba dipelo tsa bone ‘di sa amogeleng sepe.’ (Mathaio 13:10-15; Isaia 6:9, 10) Ditshwantsho tsa gagwe di ne di kgona go senola jang se se leng mo dipelong tsa batho? Mo maemong mangwe o ne a dirisa ditshwantsho gore bareetsi ba gagwe ba mo kope go ba tlhalosetsa ka botlalo bokao jwa se a se buang. Batho ba ba boikokobetso ba ne ba iketleeleditse go botsa, fa ba ba boikgogomoso kana ba ba sa kgatlhegeng bone ba ne ba sa nna jalo. (Mathaio 13:36; Mareko 4:34) Ka gone, ditshwantsho tsa ga Jesu di ne di senolela batho ba ba nyorilweng boammaaruri; mme ka nako e e tshwanang di bo fitlhela batho ba ba boikgogomoso.

 6. Ditshwantsho tsa ga Jesu di ne di na le melemo efe?

⁶ Ditshwantsho tsa ga Jesu di ne di na le melemo e mengwe gape e mentsi. Di ne di godisa kgatlhego ya batho, di ba dira gore ba reetse. Di ne di dira gore batho ba bone dilo tse a di tlhalosang ka leitlho la mogopolo gore go nne motlhofo go di tlhaloganya. Jaaka go tlhalositswe kwa tshimologong, ditshwantsho tsa ga Jesu di ne di thusa bareetsi ba gagwe go gakologelwa mafoko a gagwe. Thero ya kwa Thabeng e e kwadilweng mo go Mathaio 5:3–7:27, ke sekai se se molemo sa ditshwantsho tse dintsi tse Jesu a ileng a di dirisa. Go begwa gore thero eno e na le dikapuo di feta 50. Gore re tlhaloganye seo sentle, se lebale gore motho a ka balela thero eno ya gagwe kwa godimo mo metsotsong e ka nna 20. Mo nakong eo yotlhe, go buiwa sekapuo se le sengwe metsotswana mengwe le mengwe e le 20! Ga go pelaelo gore Jesu o ne a bona botlhokwa jwa go dirisa ditshwantsho!

 7. Ke eng fa re tshwanetse go etsa tsela e Jesu a neng a dirisa ditshwantsho ka yone?

⁷ E re ka re le balatedi ba ga Keresete, re batla go etsa tsela ya gagwe ya go ruta, go akaretsa le tsela e a neng a dirisa ditshwantsho ka yone. Fela jaaka diloki tse di natetshang dijo, ditshwantsho tse di molemo di ka dira gore tsela ya rona ya go ruta e natefele ba bangwe. Gape ditshwantsho tse di akanyeditsweng sentle di ka dira gore dithuto tse di botlhokwa tsa boammaaruri di nne motlhofo go tlhaloganngwa. Mma jaanong re sekaseke dilo dingwe tse di neng tsa dira gore ditshwantsho tsa ga Jesu di nne le matswela. Seo se tla re thusa go bona gore re ka dirisa mokgwa ono o o botlhokwa wa go ruta jang ka tsela e e molemo.

8, 9. Jesu o ne a dirisa dipapiso tse di sa raraanang jang, mme ke eng se se neng se dira gore dipapiso tsa gagwe di nne le matswela?

⁸ Fa Jesu a ruta, gantsi o ne a dirisa dipapiso tse di neng di sa raraana, tse di neng di tlhoka mafoko a se kae fela. Le fa go ntse jalo, mafoko ao a a sa raraanang a ne a dira gore motho a bone se go buiwang ka sone ka leitlho la mogopolo e bile a gatelela dithuto tse di botlhokwa tsa boammaaruri. Ka sekai, fa Jesu a ne a kgothaletsa barutwa ba gagwe gore ba se ka ba tlhobaela ka dilo tse ba di tlhokang tsa letsatsi le letsatsi, o ile a bapisa seo le “dinonyane tsa legodimo” le ‘dithunya tsa masoma tsa legola.’ Dinonyane ga di jale le fa e le go roba, mme le dithunya tsa masoma ga di otlhe le fa a le go loga. Le fa go ntse jalo, Modimo o a di tlhokomela. Kgang e e gatelelwang fano e motlhofo go tlhaloganngwa—e leng gore, fa Modimo a tlamela dinonyane le dithunya, ruri o tla tlhokomela batho ba gagwe ba ba ‘nnang ba batla pele bogosi le tshiamo ya gagwe.’—Mathaio 6:26, 28-33.

⁹ Jesu gape o ne a dirisa tshwantshiso thata, e leng sekapuo se se maatla le e leng go feta dipapiso. Tshwantshiso e tshwantshanya dilo tse pedi tse di sa tshwaneng. Le mo kgannyeng eno o ne a dira gore dipapiso tsa gagwe di se ka tsa raraana. Nako nngwe o ne a raya barutwa ba gagwe a re: “Lona lo lesedi la lefatshe.” Barutwa ba ne ba kgona go tlhaloganya bokao jwa tshwantshiso eno sentle, e leng gore, ka mafoko le ditiro tsa bone ba ne ba ka phatsimisa lesedi la semoya la boammaaruri mme ba thusa batho ba bangwe go galaletsa Modimo. (Mathaio 5:14-16) Ela tlhoko ditshwantshiso dingwe tse Jesu a ileng a di dirisa: “Lona lo letswai la lefatshe” le “nna ke mofine, lona lo dikala.” (Mathaio 5:13; Johane 15:5) Le mororo dikapuo tse di ntseng jalo di le motlhofo go tlhaloganngwa, di na le maatla a magolo.

10. Ke dikai dife tse di bontshang kafa o ka dirisang ditshwantsho ka teng fa o ruta?

¹⁰ O ka dirisa ditshwantsho jang fa o ruta? Ga o tlhoke go dirisa dikgang tse ditelele le tse di raraaneng. Leka go akanya fela ka dipapiso tse di motlhofo. A re re o bua le mongwe ka kgang ya tsogo mme o batla go dirisa setshwantsho se se bontshang gore Jehofa a ka se palelwe ke go tsosa baswi. Ke papiso efe e o ka akanyang ka yone? Baebele e bapisa loso le boroko. O ka nna wa re, “Modimo a ka kgona go tsosa baswi motlhofo fela, fela jaaka re ka tsosa motho yo o robetseng.” (Johane 11:11-14) A re re gongwe o batla go dira setshwantsho se se bontshang gore bana ba tlhoka lorato le tlhokomelo gore ba kgone go gola sentle. O ka dirisa sekai sefe? Baebele e dirisa tshwantshiso eno: Bana ba tshwana le “matlhogela a ditlhare tsa motlhware.” (Pesalema 128:3) O ka nna wa re, “Lorato le tlhokomelo mo ngwaneng di tshwana le lesedi la letsatsi le metsi mo setlhareng.” Fa papiso e le motlhofo e tla dira gore go nne motlhofo thata gore bareetsi ba gago ba tlhaloganye se o se buang.

11. Neela dikai tse di bontshang kafa ditshwantsho tsa ga Jesu di bontshang ka teng gore o ne a dirisa dilo tse a neng a tle a di bone fa a ntse a gola kwa Galalea.

¹¹ Jesu e ne e le setswerere mo go diriseng ditshwantsho tse di amanang le botshelo jwa batho. Bontsi jwa ditshwantsho tsa gagwe di ne di amana le maemo a letsatsi le letsatsi a go ka diregang gore o ne a tle a a bone fa a ntse a gola kwa Galalea. Akanya go se kae ka botshelo jwa gagwe fa a sa ntse a le monnye. O tshwanetse a bo a ne a tle a bone mmaagwe ka makgetlo a le mantsi a sila dithoro go dira bopi, a tsenya tlhabego mo tlhameng e a e dubileng, a bonesa lebone kana a feela ntlo. (Mathaio 13:33; 24:41; Luke 15:8) O tshwanetse a bo a ne a tle a lebe ka makgetlo a le mantsi batshwari ba ditlhapi ba latlhela matloa a bone mo Lewatleng la Galalea. (Mathaio 13:47) O tshwanetse a bo a ne a tle a bone bana ka makgetlo a le mantsi ba tshameka mo marekisetsong. (Mathaio 11:16) Ga go pelaelo gore Jesu o ne a tle a bone dilo tse dingwe tse di tlwaelegileng tse di umakwang mo ditshwantshong tsa gagwe—peo e jalwa, mekete e e itumedisang ya lenyalo le dithoro di butswa ka ntlha ya letsatsi mo masimong.—Mathaio 13:3-8; 25:1-12; Mareko 4:26-29.

12, 13. Ke eng fa go le botlhokwa go bo Jesu a ile a bua ka tsela e e ‘tswang kwa Jerusalema e ya kwa Jeriko,’ go gatelela ntlha ya gagwe mo setshwantshong sa Mosamarea yo o molemo?

¹² Jesu mo ditshwantshong tsa gagwe o umaka dintlha tse bareetsi ba gagwe ba neng ba di itse sentle. Ka sekai o ne a simolola setshwantsho sa Mosamarea yo o molemo jaana: “Monna mongwe o ne a fologa a tswa Jerusalema a ya Jeriko mme a wela mo gare ga dinokwane, tse di neng tsa mo tsola tsa ba tsa mo itaaka, . . . di mo tlogela a le gaufi le go swa.” (Luke 10:30) Jesu o umaka tsela e e neng e ‘tswa Jerusalema e ya Jeriko’ go gatelela kgang ya gagwe. Ka nako ya fa a bua setshwantsho seno, o ne a le kwa Judea a se kgakala le Jerusalema; ka jalo ga go pelaelo gore bareetsi ba gagwe ba ne ba itse tsela eo sentle. Tsela eo e ne e itsege ka go nna kotsi thata, segolobogolo mo mothong yo o tsamayang a le nosi. E ne e tsamaya e itsoketsa mo nageng e batho ba neng ba sa fete ka yone ka bontsi, mme seo se ne se dira gore e nne le mafelo a le mantsi a dinokwane di ka iphitlhang mo go one.

¹³ Jesu o ne a akaretsa dintlha tse dingwe tse di itsegeng malebana le tsela eno e e ‘tswang kwa Jerusalema e ya kwa Jeriko.’ Go ya ka setshwantsho seno, go ne ga feta pele moperesiti mme morago ga moo ga feta le Molefi mo tseleng eno—mme ga go ope wa bone yo o neng a ema go thusa motho yo o gobetseng. (Luke 10:31, 32) Baperesiti ba ne ba direla kwa tempeleng kwa Jerusalema mme ba ne ba thusiwa ke Balefi. Baperesiti ba le bantsi le Balefi ba ne ba nna kwa Jeriko fa ba sa dire tiro ya tempele; Jeriko e ne e le dikilometara di le 23 fela go tswa mo Jerusalema. Ke gone ka moo ba neng ba tle ba bonwe ba tsere tsela eno. Gape ela tlhoko gore Jesu o tlhalosa monna yono a “fologa”—e seng a tlhatloga—tsela a “tswa Jerusalema.” Bareetsi ba gagwe ba ne ba kgona go tlhaloganya seno sentle. Naga ya Jerusalema e ne e le kwa godimo fa e bapisiwa le ya Jeriko. Ka gone fa motho a tsere mosepele “a tswa Jerusalema,” totatota o ne a ‘fologela.’b Ga go pelaelo gore Jesu o ne a akanyetsa bareetsi ba gagwe.

14. Fa re dirisa ditshwantsho re ka bontsha jang gore re akanya ka bareetsi ba rona?

¹⁴ Fa re dirisa ditshwantsho le rona re tshwanetse go akanyetsa bareetsi ba rona. Ke dilo dife tse di kaga bareetsi ba rona tse di ka amang ditshwantsho tse re tlhophang go di dirisa? Gongwe re ka akanyetsa dilo tse di jaaka dingwaga tsa bone, setso kana tsela e ba godisitsweng ka yone le tiro ya bone ya boitshediso. Ka sekai, setshwantsho se se umakang dilo tse di amanang le temo se ka tlhaloganngwa ka bonako ke batho ba ba nnang mo lefelong la temo go na le ba ba nnang mo toropong e kgolo. Botshelo jwa letsatsi le letsatsi le ditiro tsa bareetsi ba rona—bana ba bone, matlo a bone, ditiro tsa bone le dijo—e ka nna dilo tse di tshwanelang tse re di dirisang mo ditshwantshong tsa rona.

15. Ke eng fa go sa gakgamatse go bo Jesu a ne a itse go le gontsi ka dilo tsa popo?

¹⁵ Ditshwantsho di le dintsi tse Jesu a ileng a di dirisa di bontsha gore o ne a na le kitso e kgolo ka dilo tsa popo, go akaretsa le dimela, diphologolo, le maemo a bosa. (Mathaio 16:2, 3; Luke 12:24, 27) O ne a bona kae kitso eo? Fa a ntse a gola kwa Galalea, ga go pelaelo gore o ne a na le tshono e ntsi ya go ela popo tlhoko. Mo godimo ga moo, Jesu ke “leitibolo la popo yotlhe,” mme Jehofa o dirisitse ene go nna “modiri yo o setswerere” go bopa dilo tsotlhe. (Bakolosa 1:15, 16; Diane 8:30, 31) Ga go gakgamatse go bo Jesu a ne a itse go le gontsi jaana ka dilo tsa popo. A re bone kafa a neng a dirisa ka teng kitso ya gagwe ya popo ka botswerere.

16, 17. (a) Ke eng se se bontshang gore Jesu o ne a itse mekgwa ya dinku sentle? (b) Ke sekai sefe se se bontshang gore ruri dinku di reetsa lentswe la modisa wa tsone?

¹⁶ Se lebale gore Jesu o ile a itlhalosa e le “modisa yo o molemo” mme balatedi ba gagwe bone e le “dinku.” Mafoko ano a ga Jesu a bontsha gore o ne a itse mekgwa ya dinku sentle. O ne a itse gore go ne go na le kamano e e kgethegileng gareng ga badisa le dinku tsa bone. O ne a etse tlhoko gore diphologolo tseno tse di ikanyang beng ba tsone di ne di iketleeletsa go itetla go kaelwa ke badisa ba tsone mme di ne di ba sala morago ka boikanyegi. Ke eng fa dinku di latela modisa wa tsone? Jesu o ile a re: “Ka gonne di itse lentswe la gagwe.” (Johane 10:2-4, 11) A ke boammaaruri gore dinku di itse lentswe la mong wa tsone?

¹⁷ George A. Smith o ile a kwala jaana a tlhalosa ka se a se iponetseng ka matlho mo bukeng ya gagwe ya The Historical Geography of the Holy Land: “Re ne re a tle re ikhutse go le sethoboloko gaufi le sediba sengwe sa Judea, se badisa ba le bararo kana ba le banè ba neng ba tla go nosa matsomane a bone mo go sone. Matsomane ano a ne a tlhakatlhakana mme re ne ra ipotsa gore modisa mongwe le mongwe o tla itse jang letsomane la gagwe. Mme morago ga gore di fetse go nwa le go tshameka, modisa mongwe le mongwe o ne a ema kafa letlhakoreng le sele la mokgatšha mme mongwe le mongwe a bitsa tsa gagwe ka tsela ya gagwe; mme dinku tsa modisa mongwe le mongwe di ne di kgaogana le tse dingwe di ya kwa modiseng wa tsone mme di ne di kgaogana ka tsela e e matsetseleko.” Ruri Jesu o ne a tlhopha setshwantsho se se tshwanelang tota go gatelela kgang ya gagwe ya gore, fa re tsaya tsia dithuto tsa gagwe e bile re di ikobela mme re mo sala morago fa a re kaela, re tla nna kafa tlase ga tlhokomelo ya “modisa yo o molemo.”

18. Re ka bona kae tshedimosetso kaga popo ya ga Jehofa?

¹⁸ Re ka ithuta jang go dirisa ditshwantsho tse di amanang le dilo tsa tlholego? Re ka dirisa mekgwa e diphologolo di itshwarang ka yone go dira ditshwantsho tse di motlhofo mme e le tse di nang le matswela. Re ka bona kae tshedimosetso kaga popo ya ga Jehofa? Baebele e na le tshedimosetso e ntsi ka diphologolo tse di farologaneng, mme ka dinako tse dingwe, e dirisa mekgwa e diphologolo di itshwarang ka yone go dira ditshwantsho. Baebele e bua ka go nna bonako jaaka tshephe kana lengau, go nna botlhajana jaaka noga le go se nne molato jaaka lephoi.c (1 Ditiragalo 12:8; Habakuke 1:8; Mathaio 10:16) Metswedi e mengwe e e botlhokwa ya tshedimosetso ke dimakasine tsa Tora ya Tebelo, Tsogang! le dikgatiso tse dingwe tse di gatisiwang ke Basupi ba ga Jehofa. O ka ithuta go le gontsi ka go ela tlhoko kafa dikgatiso tseno di dirisang dipapiso tse di motlhofo ka teng go tswa mo ditirong tse dintle tsa popo tsa ga Jehofa.

19, 20. (a) Jesu o ne a dirisa jang tiragalo nngwe ya bosheng ka tsela e e molemo go senola thuto ya maaka? (b) Re ka dirisa dikai le ditiragalo tsa mmatota jang fa re ruta?

¹⁹ Ditshwantsho tse di nang le matswela di ka akaretsa go dirisa dikai tsa mmatota tse di diragetseng. Nako nngwe Jesu o ile a dirisa tiragalo ya bosheng go senola tumelo ya maaka ya gore masetlapelo a tlhagela batho ka gonne a ba tshwanela. O ile a re: “Ba ba lesome le borobedi bale ba tora ya Siloame e neng ya wela mo godimo ga bone, ka go rialo e ba bolaya, a lo ithaya lo re ba ne ba le ba molato o mogolo [e le baleofi] go feta batho botlhe ba bangwe ba ba nnang mo Jerusalema?” (Luke 13:4) Ee ruri, batho bao ba ba 18 ga ba a swa ka gonne ba ne ba dirile boleo bongwe jo bo neng jwa dira gore Modimo a ba galefele. Go na le moo, ba sule loso loo lo lo setlhogo ka ntlha ya “motlha le tiragalo e e sa bonelwang pele.” (Moreri 9:11) Ka gone, Jesu o ne a ganetsa thuto ya maaka ka go umaka tiragalo e bontsi jwa bareetsi ba gagwe ba neng ba e itse sentle.

²⁰ Re ka dirisa jang dikai le ditiragalo tsa mmatota fa re ruta? A re re o bua ka go diragadiwa ga boporofeti jwa ga Jesu jo bo malebana le sesupo sa go nna gone ga gagwe. (Mathaio 24:3-14) O ka nna wa umaka dikgang tsa bosheng tse di kaga dintwa, mauba, kana dithoromo tsa lefatshe go bontsha gore dikarolo dingwe tsa sesupo seo di a diragadiwa. Kana akanya o batla go dirisa tiragalo nngwe go bontsha diphetogo tse di batlegang fa motho a batla go apara botho jo bosha. (Baefeso 4:20-24) O ka bona kae tiragalo eo? O ka nna wa akanyetsa maemo a a sa tshwaneng a badumedi ka wena, kana o ka nna wa dirisa tiragalo e e gatisitsweng mo go nngwe ya dikgatiso tsa Basupi ba ga Jehofa.

21. Ke matswela afe a motho a ka a bonang ka ntlha ya go nna morutisi yo o molemo wa Lefoko la Modimo?

²¹ Ruri Jesu e ne e le Morutisi yo Mogolo! Jaaka fa re bone mo karolong eno, ‘go ruta le go rera dikgang tse di molemo’ e ne e le tiro e e botlhokwa thata mo botshelong jwa gagwe. (Mathaio 4:23) Le rona ke tiro e e botlhokwa mo botshelong jwa rona. Maduo a go nna morutisi yo o molemo a magolo. Fa re ruta, re a bo re abela ba bangwe sengwe, mme go aba goo go leretse motho boitumelo. (Ditiro 20:35) Boitumelo joo ke boipelo jwa go itse gore re a bo re ruta ba bangwe sengwe sa mmatota le sa botlhokwa jo bo nnelang ruri—boammaaruri kaga Jehofa. Gape re ka nna le kgotsofalo ya go itse gore re etsa sekao sa ga Jesu, Morutisi yo mogolo go gaisa botlhe ba ba kileng ba nna gone mo lefatsheng.