Kgaolo 56

Ke Eng se se Itshekololang Motho?

KGANETSO kgatlhanong le Jesu e a gotela. Ga se fela gore bontsi jwa barutwa ba gagwe ba a mo tlogela mme gape Bajuda mo Judea ba batla go mmolaya, fela jaaka ba ne ba dira fa a ne a le mo Jerusalema ka Tlolaganyo ya 31 C.E.

Jaanong ke Tlolaganyo ya 32 C.E. Jaaka go lebega, tumalanong le patlafalo ya Modimo ya gore o tshwanetse go nna gone, Jesu o ya Tlolaganyong kwa Jerusalema. Lefa go ntse jalo, o dira jalo ka kelotlhoko ka ntlha ya gore botshelo jwa gagwe bo mo kotsing. Moragonyana o boela kwa Galilea.

Gongwe Jesu o mo Kaperenama fa Bafarasai le bakwadi ba ba tswang kwa Jerusalema ba tla kwa go ene. Ba senka magotlho ao ba ka mmonang molato wa go tlola molao wa bodumedi ka one. Ba botsa ka go re, “Ke go reñ ha barutwa ba gago ba tlola mekgwa ea ba bogologolo? ka gonne ha ba ya diyō ga ba ke ba tlhapa diatla.” Seno ga se sengwe sa dilo tse Modimo o batlang gore batho ba di dire mme gone Bafarasai ba tsaya gore go sa dire tiro eno ya ngwao, e e akaretsang go tlhapa diatla go fitlha kwa dikgonong, ke molato o o masisi.

Mo boemong jwa go araba tatofatso ya bone, Jesu o supa go tlola Molao wa Modimo ga bone ga boikepo le ga ka boomo. “Ke go reñ ha le lona lo tlola molaō oa Modimo ka ntlha ea mekgwa ea lona?” o batla go itse. “Gonne Modimo o rile, Tlotla rrago le mmago: gapè, Eo o buañ boshula kaga rragwè, leha e le mmagwè, a a shwè rure. Me lona loa re, Leha e le mañ eo o tla raeañ rragwè leha ele mmagwè, a re, Se u ka boñ u thusiwa ke nna ka shōna, se abecwe Modimo; A a se tlotle rragwè leha e le mmagwè.”

Eleruri, Bafarasai ba ruta gore madi, dithoto, kana sepe fela se se neetsweng Modimo jaaka mpho ke sa tempele, mme se ka seke se dirisediwe sepe se sele. Lefa go le jalo, boammaaruri ke gore, mpho e e ntshitsweng eo e tsholwa ke motho yo o e ntshitseng. Ka tsela eno morwa, fela ka go bolela gore madi a gagwe kana thoto ke “korebana”—eleng mpho e e neetsweng Modimo kana e e ntsheditsweng tempele—go mo rola boikarabelo jwa gagwe jwa go thusa batsadi ba gagwe ba ba godileng, ba gongwe ba ka tswang ba le mo letlhokong le legolo.

A gakaditswe ka tshwanelo ke go sokamisa Molao wa Modimo ga boikepo ga Bafarasai, Jesu a re: “Lo diholotse lehoko ya Modimo ka ntlha ea mekgwa ea lona. Baitimokanyi ke lona, Isaia o boletse sentlè kaga lona, a re, Chaba e, e ntlotla ka dipounama; me dipelo tsa bonè di kgakala le nna. Me ba nkōbamèlèla lehèla, ka ea tle e re ba ruta, dithutō tsa bōnè e be e le dipolèlō tsa batho hèla.”

Gongwe bontsi jwa batho ba ile ba boela kwa morago go sutela Bafarasai go botsa Jesu. Jaanong, fa Bafarasai ba palelwa ke go araba molato o mogolo o Jesu a ba o pegang, o biletsa boidiidi jwa batho gaufi le ene. “Utlwañ,” a rialo, “lo tlhaloganyè: Se se tsènañ ka molomo, ga se shōna se se itshekololañ motho; me se se cwañ ka molomo, ke shōna se se itshekololañ motho.”

Moragonyana, fa ba tsena mo ntlong nngwe, barutwa ba gagwe ba botsa ka go re: “A ua itse ha e rile Bafarasai ba utlwa lehoko ye, ba kgocwa?”

“Setlhatshana señwe le señwe se Rrè ao legodimo o sa se tlhōmañ, se tla khumolwa ka mecwe,” Jesu o araba jalo. “Ba leseñ; ke bagogi ba ba hohuhetseñ. Me ha sehohu se gōga sehohu, di tla wèla mmōgō mo kgatampiñ.”

Go bonala fa Jesu a ne a gakgametse fa, mo boemong jwa barutwa, Petere a ne a kopa gore a tlhalosediwe se se itshekololang motho. “A le lona le gompiyeno lo sa nntse lo tlhōka tlhaloganyo?” Jesu o fetola jalo. “A ga lo lemoge, go re, cotlhe tse di tsènañ ka molomo di hetèla mo mpeñ, me di ee go latlhèlwa kwa ntlè? Me dilō tse di cwañ ka molomo di cwa mo peduñ; me cōna tseuō di itshekolola motho. Gonne mo peduñ go cwa megopolō e e boshula, le dipolaō, le dikgokahalō, le boaka, le bogodu, le pateleco, le dikgalō: Dilō tse ke cōna tse di itshekololañ motho: me go ya ka diatla tse di sa tlhapiwañ ga go ko go itshekolola motho.”

Fano Jesu ga a bue kgatlhanong le bophepa jo bo tshwanetseng. Ga a ganetse gore motho o tshwanetse go tlhapa diatla tsa gagwe pele ga a apaya dijo kana aa ja. Go na le moo, Jesu o kgala boitimokanyo jwa baeteledipele ba bodumedi ba ba lekang ka boferefere go tila melao ya Modimo ya tshiamo ka go gatelela go dirisiwa ga dingwao tse di sa kwalwang mo dikwalong. Ee, ke ditiro tse di boikepo tse di itshekololang motho, mme Jesu o bontsha gore tseno di simologa mo pelong ya motho. Yohane 7:1; Duteronome 16:16; Mathaio 15:1-20; Mareko 7:1-23; Ekesodo 20:12; 21:17; Isaia 29:13.

▪ Jesu o lebagana le kganetso efe jaanong?

▪ Bafarasai ba mo pega molato ofe, mme go ya ka Jesu, Bafarasai ba tlola Molao wa Modimo ka boomo jang?

▪ Jesu o senola gore ke dilo dife tseo di itshekololang motho?