Kgaolo 57

Go Utlwela ba ba Patikegileng Botlhoko

MORAGO ga Jesu a sena go latofatsa Bafarasai ka dingwao tsa bone tse di solegelang bone molemo fela, o tlogela barutwa ba gagwe. O ka nna wa gakologelwa gore, pelenyana ga foo, boiteko jwa gagwe jwa go ngwega le bone go ya go ikhutsa go sekae bo ne jwa kgorelediwa ke batho ba bantsi fa ba ne ba ba bona. Jaanong, o ya kwa dikgaolong tsa Ture le Sidona, a na le barutwa ba gagwe, e leng sekgala sa dikilometara tse dintsi go ya kwa bokone. Go bonala fa loeto leno e le lone fela le Jesu a tsamayang le barutwa ba gagwe mo go lone go tswa Iseraele.

Morago ga Jesu a sena go bona ntlo e a ka nnang mo go yone, o tlhalosa gore ga a batle ope a ka itse kwa a leng teng. Lefa go le jalo, le e leng mo kgaolong eno e e seng ya Baiseraele, ga go kgonege gore a seka a lemogiwa. Mosadi mongwe wa Mogerika, yo o tsaletsweng mono mo Finikia wa Siria, o a mmona a ba a simolola go kopa ka go re: “Nkutlwèla botlhoko, Morèna, Morwa Dafide; morwadiake o chweñwa thata ke badimo.” Lefa go ntse jalo, Jesu ga a mo fetole gotlhelele.

La bofelo, barutwa ba ga Jesu ba mo raya ba re: “Mo reè a tsamaeè, gonne o re tlhaeletsa kwa moragō.” Fa Jesu a tlhalosa lebaka la go bo a mo tlhokomologa, a re: “Ga kea roñwa ha e se kwa dinkuñ tse di timetseñ tsa ntlo ea Iseraela.”

Lefa go ntse jalo, mosadi yoo ga a itlhoboge. O atamela Jesu a ba a khubama fa pele ga gagwe. O kopa ka go re, “Morèna, a u ko u nthusè.”

Abo pelo ya ga Jesu e tshwanetse go bo e amiwa ke go ikuela ga mosadi yoo ka tlhoafalo jang ne! Lefa go le jalo, gape o lebisa kwa boikarabelong jwa gagwe jwa ntlha, eleng jwa go direla batho ba Modimo ba Iseraele. Ka nako yone eo, gongwe e le go leka tumelo ya gagwe, o bua ka pono ya Bajuda ya go sa rate batho ba merafe e sele, a gatelela ka go re: “Ga goa chwanèla ha go ka tsèwa diyō tsa bana, me tsa latlhèlwa dinca [“dintšanyana,” NW].”

Ka lentswe la gagwe la go tlhomoga pelo le ponalo ya sefatlhego, ruri Jesu o bontsha bopelotlhomogi jwa gagwe mo bathong ba eseng Bajuda. Ebile o nolofatsa go tshwantshiwa ga Baditšhaba le dintša ka go ba bitsa ‘dintšanyana.’ Go na le go tenega, mosadi o dirisa kakgelo ya ga Jesu ya go tlhaolwa ga bone ke Bajuda a ba a lemotsha jaana ka boikokobetso: “E, Morèna; gonne le e leñ dinca [“dintšanyana,” NW] di tle di ye matlhotlhora a a wañ mo lomatiñ loa boyelō loa beñ ba cōna.”

Jesu o fetola ka go re, “Iya, mosadi! tumèlō ea gago e kgolo: a go gu dihalèlè kaha u ratañ ka gōna.” Mme go diragala fela jalo! Fa a boela kwa legaeng la gagwe, o fitlhela morwadie a le mo bolaong, a fodile ka botlalo.

Go tswa kgaolong ya lotshitshi lwa lewatle ya Sidona, Jesu le barutwa ba gagwe ba tsamaela kwa ntlheng e nngwe ya naga eo go ya kwa moseja wa Noka ya Joredane. Go bonala ba kgabaganya Joredane golo gongwe kwa godimo ga Lewatle la Galilea ba bo ba tsena mo kgaolong ya Dikapolise kafa botlhaba jwa lewatle. Fa ba le koo ba palama thaba, mme boidiidi jwa batho baa ba bona ba bo ba lere ditlhotsa, digole, difofu, le bosusu ba bone kwa go Jesu, le ba le bantsi bao ba lwalang kana ba golafetseng ka tsela nngwe. Ba ba latlhela fela fa dinaong tsa ga Jesu, mme o a ba fodisa. Batho ba gakgamadiwa ke go bona dimumu di bua, digole di tsamaya, difofu di bona; mme ba galaletsa Modimo wa Iseraele.

Jesu o neela monna mongwe yo o susu a bile a sa kgone go bua gotlhelele tlhokomelo e e kgethegileng. Gantsi bosusu ba tlhabiwa ke ditlhong motlhofo fela, bogolo jang fa ba le mo bathong ba bantsi. Jesu o ka nna a bo a lemoga go tshoga ga monna yono. Jalo ka go mo tlhomogela pelo Jesu o mo ntsha mo boidiiding jwa batho ka sephiri. Fa ba le bosi koo, Jesu o lemotsha se a tlileng go se mo direla. O tsenya menwana ya gagwe mo ditsebeng tsa monna yono mme, morago ga a sena go kgwa mathe, o ama loleme lwa gagwe. Go tswa foo, Jesu a lebile kwa legodimong, o hemela kwa godimo a bo a re: “Kabologa.” Fa a rialo, monna yoo o boa a utlwa gape, mme o kgona go bua sentle fela.

Fa Jesu a sena go dira diphodiso tse dintsi tseno, boidiidi joo jwa batho ba arabela ka kanaanelo. Ba re: “O dihile dilō cotlhe sentlè: o diha gore ba ba boshushu ba utlwè, le ba ba dimumu gore ba buè.” Mathaio 15:21-31; Mareko 7:24-37.

▪ Ke ka ntlhayang fa Jesu a sa fodise morwadia mosadi wa Mogerika gone fela foo?

▪ Morago, Jesu o ya le barutwa ba gagwe kae?

▪ Jesu o dirisana jang le monna yo o susu le yo o sa kgoneng go bua ka go mo tlhomogela pelo?