Kgaolo 98

Barutwa baa Ganetsana fa Loso lwa ga Jesu lo Atamela

JESU le barutwa ba gagwe ba gaufi le Noka ya Joredane, koo ba kgabaganyang go tswa mo kgaolong ya Perea go tsena mo Judea. Batho ba bangwe ba le bantsi ba tsamaya le bone go ya kwa Tlolaganyong ya 33 C.E., eo e saletsweng ke mo e ka nnang beke fela.

Jesu o tsamaya kwa pele ga barutwa ba gagwe, mme ba gakgamadiwa ke bopelokgale jwa gagwe. Gakologelwa gore dibeke di sekae pelenyana ga foo fa Lasaro a ne a swa le fa Jesu a ne a tloga a tswa kwa Perea go ya Judea, Thomase o ne a kgothatsa ba bangwe jaana: “Le rona a re tsamaeeñ, re tlè re shwè naè.” Gakologelwa gape gore morago ga gore Jesu a tsose Lasaro, ba Kgotlakgolo ya Bajuda ba ne ba loga maano a gore Jesu a bolawe. Ga go gakgamatse go bo barutwa ba gagwe ba tsenwa ke letshogo fa ba tsena mo Judea gape.

Go ba baakanyetsa se se larileng kwa pele, Jesu o tseela ba ba 12 kwa thoko mme a bo a ba raya a re: “Bōnañ, re tlhatlogèla kwa Yerusalema; me Morwa Motho o tla neèlwa baperisiti ba bagolo le bakwadi; me ba tla atlhola gore a shwè; Me ba tla mo neèla Badichaba go shotlwa, le go seolwa, le go bapolwa: me e tla re ka letsatsi ya boraro o tla cosiwa.”

Leno ke lekgetlo la boraro mo dikgweding tse di sa tswang go feta leo mo go lone Jesu a bolelelang barutwa ba gagwe ka loso lwa gagwe le tsogo. Lefa ba mo reetsa, ba palelwa ke go tlhaloganya. Gongwe ke ka gonne ba dumela mo go tsosolosiweng ga bogosi jwa Iseraele mo lefatsheng, mme ba lebeletse pele go ipelela kgalalelo le tlotlo mo bogosing jwa selefatshe le Keresete.

Gareng ga bao ba yang kwa Tlolaganyong go na le Salome, mmaagwe baaposetoloi Jakobe le Johane. Jesu o ne a ile a bitsa banna bano “Bomorwa tumō ea maru,” go tlhomamisega e ne e le ka ntlha ya botlhaga jwa bone. Batho ba babedi bano ba ne ba na le nako e telele ba ntse ba fitlhile keletso ya bone ya go nna ba ba kwa godimo mo Bogosing jwa ga Keresete, mme ba ne ba boleletse mmaabo keletso eno ya bone. Jaanong o atamela Jesu mo boemong jwa bone, o obama fa pele ga gagwe, mme o a mo kopa.

“U eletsa eñ?” Jesu o a botsa.

O araba ka go re, “Laola gore bomorwaake ba babedi ba, ba dulè, moñwe kaha cogoñ ya gago ye legolo, le eo moñwe kaha go ya molèma mo bogosiñ yoa gago.”

A lemoga koo kopo eno e tswang gone, Jesu o raya Jakobe le Johane a re: “Ga lo itse se lo se lōpañ. A lo nonohile go nwa senwèlō se ke tlogañ ke se nwa?”

“Re nonohile,” ba araba jalo. Le eleng lefa Jesu a sa tswa go ba bolelela gore o lebanwe ke pogiso e e botlhoko e e tla felelang ka loso, go lebega ba sa lemoge gore ke seo a se rayang ka “senwèlō” seo a tla tlogang a se nwa.

Lefa go ntse jalo, Jesu o ba raya a re: “Senwèlō sa me rure lo tla se nwa: me go dula kaha cogoñ ya me ye legolo, le kaha cogoñ ya me ya molèma, ga se ga me go go aba, me ke ga bōnè ba ba go baakanyedicweñ ke Rrè.”

Fa nako e ntse e tsamaya barutwa ba bangwe ba ba lesome ba lemoga seo Jakobe le Johane ba neng ba se kopa, mme ba a galefa. Gongwe Jakobe le Johane ke bone ba ba neng ba di goga kwa pele mo kgogakgoganong e e neng e le fa gare ga baaposetoloi pelenyana ya gore ke mang yo mogolo go gaisa ba bangwe. Kopo ya bone ya jaanong e senola gore ga ba a dirisa kgakololo eo Jesu a neng a e ba naya mo kgannyeng eno. Ka maswabi, keletso ya bone ya go nna le maemo a a kwa godimo e santse e nonofile.

Jalo go dirisana le kgang e e tsogileng moragonyana eno le keletso e e bosula e e e tsositseng, Jesu o kgobokanya ba ba 12. O ba kgalemela jaana ka lorato: “Loa itse ha balaodi ba Badichaba ba bo ba le bogōma mo go bōnè, le bagolo ba bōnè ba gagamatsa taolō mo go bōnè. Ga go ketla go nna yalo mo go lona: me leha e le mañ eo o ratañ go tla a nna mogolo mo go lona, a a nnè modihedi oa lona; Le gōna leha e le mañ eo o ratañ go nna oa pele mo go lona, a a nnè motlhanka oa lona.”

Jesu o ba tlhometse sekao seo ba tshwanetseng go se latela, jaaka a tlhalosa jaana: “Hèla yaka Morwa Motho a na a sa tla go dihèlwa, me e le go dihèla, le go ntsha botshelō yoa gagwè go nna thèkololō ea batho ba le bantsi.” Jesu ga a direla batho ba bangwe fela mme o tla direla botlhe le eleng go ba swela! Barutwa bano ba tshwanetse go nna le boikutlo jo bo tshwanang le jwa ga Keresete jwa go eletsa go direla ba bangwe go na le gore ba direlwe le go nna ba babotlana go na le ba maemo a a kwa godimo. Mathaio 20:17-28; Mareko 3:17; 9:33-37; 10:32-45; Luke 18:31-34; Yohane 11:16.

▪ Ke ka ntlhayang fa barutwa ba tlelwa ke poifo jaanong?

▪ Jesu o baakanyetsa barutwa ba gagwe seo se larileng kwa pele jang?

▪ Jesu o kopiwa eng, mme seno se ama barutwa ba bangwe jang?

▪ Jesu o dirisana jang le bothata jo barutwa ba gagwe ba nang najo?