Kgaolo 58

Dinkgwe le Sebediso

BOIDIIDI jo bogolo bo phuthegetse kwa go Jesu mo Dikapolise. Ba le bantsi ba tswa kgakala go tla mo karolong eno e e tletseng Baditšhaba go mo reetsa le gore ba fodisiwe malwetsi a bone. Ba tlile le diroto tse dikgolo, kana ditlatlana, tseo kafa mokgweng ba di dirisang go tsenya mefago fa ba tsamaya ba raletse mafelo a Baditšhaba.

Lefa go ntse jalo, kwa bofelong Jesu o bitsa barutwa ba gagwe a bo a re: “Ke tlhomogèla batho ba bantsi ba pelo, ka gonne go hetile malatsi a le mararo ba nntse ba tlhotse le nna, me ba sena se ba se yañ? Me e tla re ha ke ba tsamaisetsa kwa magaeñ a bōnè ka tlala, ba tla dimèlèla mo tseleñ: ka ba bañwe ba bile ba cwa kgakala.”

“Ana dinkgwè tse di ka lekanañ go kgorisa batho ba di tla bo di cwa kae hano mo gare ga naga hèla?” barutwa ba botsa jalo.

Jesu o botsa gore: “Lo na le dinkgwè di le kaee?”

“Di shupa,” ba araba jalo, “le ditlhapi di se kaee.”

Jesu o laela batho gore ba nne fa fatshe, o tsaya dinkgwe le ditlhapi, o rapela Modimo, oa di nathoganya, mme a bo a simolola go di neela barutwa ba gagwe. Bao, le bone, ba di neelang batho, bao ba jang go fitlhelela ba kgora. Moragonyana ga moo, fa go selwa mafofora, a tlala mo dirotong di supa, lemororo mo e ka nnang banna ba le 4 000, mmogo le basadi le bana, ba jele!

Jesu o phatlalatsa boidiidi joo jwa batho, o palama mokoro le barutwa ba gagwe, mme ba kgabaganyetsa ka kwa lotshitshing lo lo kwa bophirima jwa Lewatle la Galilea. Fano Bafarasai, ka nako eno ba patilwe ke maloko a lekoko lengwe la bodumedi la Basadukai, ba leka go raela Jesu ka go mo kopa gore a ba bontshe sesupo sengwe se se tswang kwa legodimong.

Ka go lemoga maiteko a bone a go mo raela, Jesu o araba ka go re: “Ea re ha go le maitsiboea, loa tlo lo re, Go tla coga go sele; ka legodimo le le lehibidu. Me e re ka moshō, lo re, Go tla tlhōla go le letlōlōlō: ka legodimo le le lehibidu le boncho. Lo itse go lemoga pōnalō ea legodimo; me lo palèlwa ke go re, metlha e kaèla kae?”

Ka gone moo, Jesu o ba bitsa losika lo lo boikepo le lo lo tletseng boaka mme a ba tlhagisa gore, jaaka a boleletse Bafarasai pelenyana ga moo, ga go na sesupo sepe se ba tla se neelwang kwantle ga sesupo sa ga Jona fela. Fa a tsamaya, ene le barutwa ba gagwe ba tsena mo mokorong mme ba leba kwa Bethesaida mo bokonebotlhaba jwa lotshitshi lwa Lewatle la Galilea. Mo tseleng barutwa ba lemoga gore ba lebetse go tla le dinkgwe, go na le senkgwe se le sengwe fela mo go bone.

Ka go gopola kgang eo a neng a e tshwere le Bafarasai le baemanokeng ba ga Herode ba Basadukai, Jesu o tlhagisa jaana: “Lo tlhōkōmèlè, lo itisè mo sebedishoñ sa Bafarisai, le mo sebedishoñ sa ga Herode.” Go bonala gore go umaka ga ga Jesu sebediso go dira gore barutwa ba akanye gore o lebesitse mo senkgweng seo ba neng ba lebala go tla ka sone, ka jalo ba simolola go ganetsana ka kgang eo. Ereka Jesu a lemoga go tlhokakutlwisisano ga bone, a re: “Lo tseisanyeditseñ kgañ ka go bo lo sena dinkgwè?”

Bosheng jaana, Jesu o ne a sa tswa go fa dikete tsa batho dinkgwe ka dikgakgamatso, kgakgamatso eno ya bofelo gongwe o ne a e dira mo e ka nnang letsatsi le le lengwe kana a mabedi a a fetileng. Ba tshwanetse go itse gore gaa amega ka go tlhokafala ga dinkgwe tsa mmatota. “A ga lo gakologelwe?” o a ba gakolola, “e rile ke ñathoganyetsa ba ba makgolo a mashomè matlhano dinkgwè tse tlhano, lo [ne] loa tlatsa diroto di le kaee ka dikabetla tse lo di setseñ?”

“Di le shomè le bobedi,” ba fetola jalo.

“Me ea re mo dinkgweñ tse di shupa tsa ba ba makgolo a mashomè manè, lo [no] loa tlatsa diroto di [le] kaee ka dikabetla tse lo di setseñ?”

“Di shupa,” ba araba jalo.

“A lo sa nntse lo e se lo tlhaloganye?” Jesu o botsa jalo. “Ana go nntse yañ lo sa lemoge ha ke ne ke sa bue le lona kaga dinkgwè? Me e le gore lo itisè mo sebedishoñ sa Bafarisai le Basadukai.”

Kwa bofelong barutwa ba a tlhaloganya. Sebediso, selo se se bedisang e le go dira gore borotho bo gogomoge, e ne e le lefoko le gantsi le neng le dirisediwa go tlhalosa go bola. Ka gone jaanong barutwa ba tlhaloganya gore Jesu o dirisa tshwantshiso, gore o ba tlhagisa gore ba itise kgatlhanong le “thutō ea Bafarisai le Basadukai,” thuto e e nang le matswela a a bodisang. Mareko 8:1-21; Mathaio 15:32–16:12.

▪ Ke eng fa batho ba tlile ka diroto tse dikgolo tsa mofago?

▪ Morago ga go tloga mo Dikapolise, Jesu o tsaya maeto afe ka mokoro?

▪ Ke tlhokakutlwisisano efe eo barutwa ba nang le yone mabapi le kakgelo ya ga Jesu kaga sebediso?

▪ Jesu o ne a rayang kaga ‘sebediso sa Bafarasai le Basadukai’?