Kgaolo 63

Kgakololo e Nngwe Gape E E Tlhamalatsang

FA JESU le baaposetoloi ba gagwe ba le mo ntlong nngwe mo Kaperenama, go tlotliwa ka sengwe gape kwantle ga kganetsano e baaposetoloi ba neng ba nna le yone ya gore ke mang yo mogolo. Tiragalo eno le yone e ka nna ya bo e ile ya diragala morago ga ba sena go boela kwa Kaperenama, fa Jesu a ne a sena nabo ka namana. Moaposetoloi Johane o bega jaana: “Re bonye moñwe a kgoromeletsa badimo ntlè ka leina ya gago: me ra mo itsa, ka go bo a sa re sale moragō.”

Ka phepafalo Johane o leba baaposetoloi jaaka setlhopha sa bafodisi se se kgethegileng, se se nang le tshwanelo eo se le nosi. Jalo o ikutlwa ka gore monna o ne a dira ditiro tse dikgolo kafa go sa tshwanelang ka go bo a ne a se bontlhanngwe jwa setlhopha sa bone.

Lefa go ntse jalo, Jesu o gakolola ka go re: “Lo se ka loa mo itsa: gonne ga go na motho opè eo o ka reñ a diha tihō ea nonohō ka leina ya me, a ba a ka bua boshula kaga me ka boheho. Gonne eo o sa tlhabaneñ le rona, o ntlheñ ea rona. Gonne leha e le mañ eo o tla lo nosañ metse ka senwèlō ka go bo lo le ba ga Keresete, amarure kea lo raea, Ga a ketla a tlhōka tuèlō ea gagwè gōpè.”

Go ne go sa tlhokafale gore monna yono a bo a setse Jesu morago ka sebele sa gagwe gore a nne kafa letlhakoreng ja gagwe. Phuthego ya Bokeresete e ne e ise e tlhongwe, jalo go sa nneng karolo ya setlhopha seo go ne go sa reye gore o ne a le wa phuthego e e farologaneng. Monna yoo ruri o ne a na le tumelo mo leineng la ga Jesu mme ka gone o ne a kgona go atlega mo go lelekeng badimona. O ne a dira sengwe seo se neng se tshwanela sentle seo Jesu a neng a re se ne se tlhoka tuelo. Ka go dira seno, Jesu o ne a bontsha gore o ne a se kitla a latlhegelwa ke tuelo.

Mme go tweng fa e le gore monna yoo o ne a ka kgopisiwa ke mafoko le ditiro tsa baaposetoloi? Seno se ne se tla nna masisi thata! Jesu o ne a tlhalosa jaana: “Leha e le mañ eo o tla kgopañ moñwe oa ba babōtlana ba, ba ba dumèlañ mo go nna, go ka nna molemō bogolo mo go èna ha lolwala lo logolo lo ka gokèlèlwa mo thamuñ ea gagwè, me a thabuediwa mo lewatleñ.”

Jesu a re balatedi ba gagwe ba tshwanetse go tlosa sengwe le sengwe mo matshelong a bone le eleng se se rategang thata jaaka letsogo, lenao, kana leitlho seo se ka ba kgopang. Go botoka gore motho a seka a nna le selo seno se se rategang mme a tsene mo Bogosing jwa Modimo go na le gore a se ngaparele mme a latlhelwe mo Gehenna (mokoa o o shang wa matlakala gaufi le Jerusalema), moo go tshwantshetsang tshenyego ya bosakhutleng.

Jesu gape o ne a tlhagisa ka go re: “Lo bōnè, gore lo se nyatse opè oa ba babōtlana ba; gonne kea lo raea, ka re, kwa legodimoñ baengele ba bōnè ba lebile ka metlha eotlhe sehatlhōgō sa ga Rrè eo o kwa legodimoñ.” Go tswa foo o tshwantshetsa botlhokwatlhokwa jwa “ba babōtlana” ka go bua kaga monna mongwe wa dinku tse di lekgolo mme a latlhegelwa ke e le nngwefela. Monna yoo o tla tlogela tse 99 go ya go senka e le nngwefela e e latlhegileng, Jesu o a tlhalosa, mme fa a e bona o e itumelela thatathata go gaisa tse 99. “Hèla yalo,” Jesu o a digela, “ga se go rata ga Rra eno eo o kwa legodimoñ gore moñwe oa ba babōtlana ba, a nyèlèlè.”

Gongwe a akantse ka kganetsano ya baaposetoloi, Jesu o kgothatsa ka gore: “Nnañ le lecwai mo go lona, me lo agisanyè.” Dijo tse di senang moutlwalo di dirwa monate ka letswai. Jalo he, letswai la tshwantshetso le dira gore se motho a se buang se amogelwe motlhofo. Go nna le letswai le le ntseng jalo go thusa gore go nne le kagiso.

Mme ka ntlha ya go sa itekanelang ga batho, ka dinako tse dingwe go tlhaga dikgang tse di masisi. Jesu gape o baakanyetsa ka kaelo ya go dirisanya le tsone. “Ha oa ga eno a gu leohetse,” Jesu o a bolela, “ea u mo kaèlè molato oa gagwè lo le babedi hèla: e tla re ha a gu utlwile u tla bo u gapile oa ga eno.” Fa a sa reetse, Jesu o gakolola ka go re, “A go eè moñwe hèla, leha e le ba le babedi nau, gore lehoko leñwe le leñwe le tlhōmamisiwè ka melomo ea bashupi ba le babedi, leha e le ba le bararo.”

Ke fela fa e le gore dilo tsotlhe di padile, Jesu a reng, “u bolèlèlè phuthègō,” ke gore, balebedi ba ba ikarabelelang ba phuthego ba ba ka ntshang phetso ya katlholelo. Fa e le gore moleofi o ka se dirisanye le phetso ya bone, Jesu o digela ka gore, “mo go wèna u mo kaeè yaka chaba hèla, le mokgethisi.”

Mo go direng phetso e e ntseng jalo, balebedi ba tshwanetse go utlwa thatathata ditaolo tsa Lefoko la ga Jehofa. Ka jalo, fa ba fitlhela gore motho o na le molato mme ebile o tshwanela kotlhao, katlholo eo ‘e tla bo e bofilwe kwa legodimong.’ Mme se ba se “bohololañ mo lehatshiñ,” ke gore ba sa bone motho molato, se tla bo se “boholocwe kwa legodimoñ.” Mo dikgannyeng tse di ntseng jalo tsa katlholelo, Jesu a re, “kwa ba le babedi kgotsa ba le bararo ba phuthegileñ gōna ka leina ya me, hoo, nna ke gōna mo gare ga bōnè.” Mathaio 18:6-20; Mareko 9:38-50; Luke 9:49, 50.

▪ Ke ka ntlha yang fa go ne go sa tlhokafale mo motlheng wa ga Jesu gore go tsamaiwe le ene?

▪ Kgang ya go kgopisa yo mmotlana e masisi go le kana kang, mme Jesu o ne a tshwantshetsa jang botlhokwa jwa ba ba ntseng jalo ba babotlana?

▪ Ke eng se go bonalang se ile sa dira gore Jesu a kgothaletse baaposetoloi ba gagwe gore ba nne le letswai mo go bone?

▪ Go ‘bofa’ le go ‘bofolola’ go na le botlhokwa bofe?