Mmusi yo o Humileng o Dira Tshwetso e e Seng Botlhale

MMUSI yo mmotlana wa mohumi o ne a siame, a ikobela molao, e bile a rata bodumedi. O ne a tla kwa go Jesu, mme a wela ka mangole fa go ene, a re: “Moruti yo o Molemo, ke eng se ke tshwanetseng go se dira gore ke rue botshelo jo bo sa khutleng?”

Fa Jesu a mo araba o ne a re go tlhokega gore a ikobele ditaelo tsa Modimo gore a bone botshelo. Fa mmusi yono a ne a kopa Jesu gore a tlhalose ka tlhamalalo, Jesu o ne a re: “O se ka wa bolaya motho, O se ka wa dira boaka, O se ka wa utswa, O se ka wa ntsha bosupi jwa maaka, Tlotla rrago le mmago, gape, O rate moagelani wa gago jaaka o ithata.” Ditaelo tseno e ne e le tsone tsa konokono mo Molaong o o neng o neilwe Moshe. Go tswa foo monna yono o ne a re: “Ke bolokile tsotlhe tseno; ke sa ntse ke tlhaela eng?”—Mathaio 19:16-20.

Jesu o ne a “ikutlwa a mo rata” mme a re: “Selo se le sengwe se a tlhaela mo go wena: Tsamaya, o rekise dilo le fa e le dife tse o nang le tsone o bo o neye bahumanegi, mme o tla nna le letlotlo kwa legodimong, mme o tle o nne molatedi wa me.”—Mareko 10:17-21.

Mmusi yono yo mmotlana o ne a tshwanetse go dira tshwetso e e bokete ka ponyo ya leitlho. O ne a tla dirang? A o ne a tla tlogela dikhumo tsa gagwe ka go rata mme a nne molatedi wa ga Jesu, kana o ne a tla batla go boloka dithoto tsa gagwe? A o ne a tla batla matlotlo mo lefatsheng, kana o ne a tla batla matlotlo kwa legodimong? Eno e tshwanetse ya bo e ne e le tshwetso e e bokete. Go ne go bonala sentle gore o ne a rata dilo tsa bomodimo, ka gonne o ne a boloka Molao mme a botsa ka se a neng a tshwanetse go se dira gore a amogelwe ke Modimo. O ne a tla dira tshwetso efe? O ne a “tswa a tsamaya a hutsafetse, gonne o ne a na le dithuo di le dintsi.”—Mareko 10:22.

Tshwetso e mmusi yono yo mmotlana a e dirileng e ne e se botlhale. Fa a ne a nnile molatedi yo o ikanyegang wa ga Jesu, o ka bo a ne a bona se a neng a se batla, e leng botshelo jo bo sa khutleng. Ga re bolelelwe gore o ne a felela kae. Le fa go ntse jalo, re itse gore dingwaga di ka nna masome a manè moragonyana, masole a Baroma a ne a ripitla Jerusalema le karolo e kgolo ya Judea. Bajuda ba bantsi ba ne ba latlhegelwa ke dikhumo tsa bone mme ba swa.

Go farologana le mmusi yoo yo mmotlana, moaposetoloi Petere le barutwa ba bangwe ba ne ba dira tshwetso e e botlhale. Ba ne ba ‘tlogela dilo tsotlhe’ mme ba sala Jesu morago. Tshwetso eo e ne ya ba solegela molemo tota! Jesu o ne a ba raya a re ba ne ba tla amogela go menagane gantsi go feta se ba neng ba se tlogetse. Gape ba ne ba tla bona botshelo jo bo sa khutleng. Ba ne ba ka se ikwatlhaele tshwetso e ba neng ba e dirile.—Mathaio 19:27-29.

Rotlhe re tshwanelwa ke go dira ditshwetso mo botshelong—dingwe tsa tsone di dipotlana mme tse dingwe ke tse dikgolo. Jesu o ne a naya kgakololo efe malebana le ditshwetso tseo? A o tla amogela kgakololo ya gagwe? Fa o e amogela, o tla solegelwa molemo thata. A re sekasekeng kafa re ka latelang Jesu ka teng mme re solegelwe molemo ke se a se buileng.