‘Nna Molatedi wa Me’—Jesu O ne A Kaya Eng?

1, 2. Ke taletso efe e e di gaisang tsotlhe e motho a ka e newang, mme ke potso efe e re ka ipotsang yone?

KE TALETSO efe e e di gaisang tsotlhe e o kileng wa e newa? O ka tswa o akanya ka nako ya fa o ne o laleditswe go ya tiragalong nngwe e e kgethegileng, gongwe e le lenyalo la batho ba o ba ratang thata. Kgotsa o ka tswa o gopola letsatsi la fa o ne o laleditswe go tla go newa tiro e e botlhokwatlhokwa. Fa o kile wa lalediwa sengwe se se ntseng jalo, ga go pelaelo gore o ile wa itumela tota wa ba wa ikutlwa o le motlotlo. Le fa go ntse jalo, boammaaruri ke gore, o neilwe taletso e e botoka go gaisa tseo. Mongwe le mongwe wa rona o neilwe taletso eo. Mme tsela e re tsibogelang taletso eo ka yone, e re ama fela thata. Ke tshwetso e e botlhokwa go di gaisa tsotlhe tse re ka di dirang mo botshelong.

² Taletso eo ke efe? Ke e e tswang mo go Jesu Keresete, Morwa yo o tsetsweng a le esi wa Modimo Mothatayotlhe Jehofa, mme e kwadilwe mo Baebeleng. Mo go Mareko 10:21 re bala mafoko ano a ga Jesu: ‘Tla o nne molatedi wa me.’ Tota ka mafoko ao, Jesu o ne a laletsa mongwe le mongwe wa rona. Re tshwanetse go ipotsa, ‘Ke tla tsibogela taletso eo jang?’ Gongwe o ka nna wa re: “A go na le motho yo o ka ganang taletso e e molemo jalo?” O tla gakgamalela go itse gore batho ba le bantsi ba ile ba e gana. Ka ntlha yang?

3, 4. (a) Ke eng se se ka tsewang se eletsega ka monna yo o neng a ya kwa go Jesu go ya go mmotsa potso kaga botshelo jo bo sa khutleng? (b) Ke dinonofo dife tse di molemo tse Jesu a ka tswang a ile a di bona mo mmusing yoo yo mmotlana wa mohumi?

³ Akanya ka sekai sa motho yo o neng a newa taletso e e ntseng jalo ka tlhamalalo dingwaga di ka nna 2 000 tse di fetileng. E ne e le monna yo o neng a tlotlega thata. O ne a na le dilo tse tharo tse batho ba nang le go di tseela kwa godimo, le e leng go di eletsa—bosha, khumo le taolo. Pego ya Baebele e mo tlhalosa e le “lekau,” a “humile thata,” e bile e le “mmusi.” (Mathaio 19:20; Luke 18:18, 23) Le fa go ntse jalo, go ne go na le sengwe se se botlhokwa thata ka lekawana leno. O ne a utlwaletse Morutisi yo Mogolo, Jesu, mme a rata se a se utlwileng ka ene.

⁴ Bontsi jwa babusi ba motlha oo ba ne ba sa neye Jesu tlotlo e e mo tshwanetseng. (Johane 7:48; 12:42) Mme mmusi yono ene o ne a itshwara ka tsela e e farologaneng le eo. Baebele ya re: “Ya re [Jesu] a tswa a tsena mo tseleng, monna mongwe a siana mme a wela ka mangole fa pele ga gagwe a ba a mo tlhoma potso a re: ‘Moruti yo o Molemo, ke eng se ke tshwanetseng go se dira gore ke rue botshelo jo bo sa khutleng?’” (Mareko 10:17) Ela tlhoko kafa monna yono a neng a tlhoafaletse go bua le Jesu ka teng, a tabogela kwa go ene mo pele ga batho, fela jaaka bahumanegi ba ne ba ka dira. Mo godimo ga moo, o ne a khubama ka mangole fa pele ga Keresete go bontsha tlotlo. Ka gone, o ka bona gore o ne a le boikokobetso ka selekanyo se se rileng e bile a lemoga gore o tlhoka dilo tsa semoya. Jesu o ne a anaanela dinonofo tse di ntseng jalo. (Mathaio 5:3; 18:4) Ke gone ka moo “Jesu a [ileng a] mo leba mme a ikutlwa a mo rata.” (Mareko 10:21) Jesu o ile a araba potso ya lekawana leno jang?

 5. Jesu o ne a araba lekawana la mohumi jang, mme re itse jang gore “selo se le sengwe” se a neng a se tlhaela e ne e se gore a nne motlhoki? (Bona le mokwalo o o kwa tlase.)

⁵ Jesu o ile a bontsha gore Rraagwe o setse a tlhalositse tshedimosetso e e arabang potso eo e e botlhokwa e e malebana le go bona botshelo jo bo sa khutleng. O ile a umaka Dikwalo, mme lekawana leno le ne la bolela gore le ikobela Molao wa ga Moshe ka boikanyegi. Le fa go ntse jalo, e re ka Jesu a na le temogo e e sa tlwaelegang, o ne a kgona go bona se se mo pelong. (Johane 2:25) O ile a lemoga gore mmusi yono o na le bothata jo bo amanang le dilo tsa semoya—bothata jo bo masisi tota. Ke gone ka moo Jesu a ileng a re: “Selo se le sengwe se a tlhaela mo go wena.” Selo seo e ne e le sefe? Jesu o ile a re: “Tsamaya, o rekise dilo le fa e le dife tse o nang le tsone o bo o neye bahumanegi.” (Mareko 10:21) A Jesu o ne a bolela gore motho o tshwanetse go nna motlhoki fa a batla go direla Modimo? Nnyaa.a Keresete o ne a senola sengwe se se botlhokwa thata.

 6. Ke taletso efe e Jesu a neng a e naya mmusi yo mmotlana wa mohumi, mme tsela e a ileng a arabela ka yone e senola eng ka pelo ya gagwe?

⁶ Jesu o ne a senola se monna yono a neng a se tlhaela ka go mo abela tshono eno e e molemolemo: ‘Tla o nne molatedi wa me.’ A ko o akanye fela—Morwa wa Modimo Mogodimodimo a laletsa monna yono ka tlhamalalo go nna molatedi wa gagwe! Gape Jesu o ne a mo solofetsa tuelo e e sa lekaneng le epe. O ne a re: “O tla nna le letlotlo kwa legodimong.” A mmusi yono yo mmotlana wa mohumi o ile a sola molemo tshono eo—taletso eo e e molemolemo? Pego ya re: “A utlwa botlhoko fa a utlwa lefoko leno a ba a tswa a tsamaya a hutsafetse, gonne o ne a na le dithuo di le dintsi.” (Mareko 10:21, 22) Ka gone, mafoko ao a a sa lebelelwang a ga Jesu a ne a senola sengwe ka pelo ya monna yono. O ne a rata dithoto tsa gagwe thata, mme kwantle ga pelaelo, o ne a rata le taolo le maemo a a tsamaisanang le tsone. Ka maswabi, lorato lo a neng a rata dilo tseo ka lone lo ne lo feta lo a neng a rata Keresete ka lone. Ka gone, “selo se le sengwe” se monna yono a neng a se tlhaela e ne e le go rata Jesu le Jehofa ka pelo yotlhe le ka lorato lwa go intsha setlhabelo. Ka go bo lekawana leno le ne le tlhaela lorato lo lo ntseng jalo, le ne la gana taletso eo e e sa tshwaneng le epe! Mme gone, taletso eo e go ama jang?

 7. Ke eng fa re ka tlhomamisega gore taletso ya ga Jesu e akaretsa le rona gompieno?

⁷ Taletso ya ga Jesu e ne e sa ame monna yoo fela; e bile e ne e sa ame batho ba se kae fela. Jesu o ile a re: “Fa mongwe a batla go ntshala morago a a . . . ntshale morago ka metlha.” (Luke 9:23) Ela tlhoko gore lefoko “mongwe” le bontsha gore mongwe le mongwe fela a ka nna molatedi wa ga Keresete fa ruri a “batla” go dira jalo. Modimo o ngokela batho ba ba ntseng jalo ba ba dipelo di ikanyegang kwa go Morwawe. (Johane 6:44) Ga a ngoke fela batho ba ba humileng, kgotsa ba ba humanegileng, kgotsa ba lotso kana setšhaba se se rileng, e bile ga a ngoke fela ba ba neng ba tshela mo motlheng oo, go na le moo, batho botlhe ba newa tshono ya go amogela taletso eo ya ga Jesu. Tota mafoko a ga Jesu a a reng, ‘Tla o nne molatedi wa me’ a a go ama le wena. Ke eng fa o tshwanetse go latela Keresete? Mme go nna molatedi wa gagwe go akaretsa eng?