Kgaolo 109

Jesu o Senola Baganetsi ba Gagwe

JESU o tlhakantse baganetsi ba gagwe ba bodumedi tlhogo mo eleng gore ba tshaba go mmotsa sepe go tswelela gape. Ka jalo o tswelela pele go senola go tlhoka kitso ga bone. “Lo gopola eñ kaga Keresete?” o a botsa. “Ke morwa mañ?”

“Ke morwa Dafide,” Bafarasai ba a araba.

Lefa Jesu a sa ganele gore Dafide tota ke mogologolwane wa ga Keresete, kana Mesia, o botsa jaana: “Ha e le yalo, Dafide o bua ka Mōea [mo go Pesalema 110] a mmitsa Morèna yañ? a re, Yehofa o na a raea Morèna oa me, a re, Dula kaha lecogoñ ya me ye legolo, go tlo go tsamaeè ke beè baba ba gago tlhatse ga dinaō tsa gago? Me ha e bo ne ne Dafide a mmitsa Morèna, o nntse morwawè yañ?”

Bafarasai ba didimetse, ka go bo ga ba itse tota gore Keresete, kana motlodiwa ke mang. Mesia ga se setlogolwana fela sa motho sa ga Dafide, jaaka Bafarasai go lebega ba dumela jalo, mme o ne a kile a nna kwa legodimong mme o ne a le mogolo mo go Dafide, kana e le Morena wa gagwe.

Fa jaanong a retologela kwa bontsintsing jwa batho le kwa barutweng ba gagwe, Jesu o ba tlhagisa ka bakwadi le Bafarasai. Ereka bano ba ruta Molao wa Modimo, “ba dutse mo setuloñ sa ga Moshe,” Jesu o kgothatsa jaana: “Cotlhe tse ba di lo raeañ, lo di dihè, lo di tlhōkōmèlè.” Mme o oketsa ka go re: “Lo se ka loa diha kaha ditihoñ tsa bōnè; gonne ba tla ba bue, me ba se ke ba dihe.”

Ke baitimokanyi, mme Jesu o ba senola fela ka puo e e tshwanang le ya fa a ne a ja kwa ntlong ya Mofarasai mongwe dikgwedi tse di fetileng. “Ditihō cotlhe tsa bōnè,” a rialo, “ba di diha gore di bōnwè ke batho.” Mme o naya dikai, a akgela jaana:

“Ba atlhamolose difelaketere tsa bōnè.” Dikgetsinyana tse dinnye tseno, tse di golegelelwang mo phatleng kana mo letsogong, di na le dikarolo tse nnè tsa Molao: Ekesodo 13:1-10, 11-16 le Duteronome 6:4-9; 11:13-21. Mme Bafarasai ba godisa dikgetsana tseno gore ba akantshe batho gore ba tlhagafaletse Molao.

Jesu o tswelela ka go re ‘ba godisa makantsa a diaparo tsa bone.’ Baiseraele ba laelwa go dira makantsa mo diaparong tsa bone mo go Dipalō 15:38-40, mme Bafarasai ba godisa a bone go feta a mongwe le mongwe. Sengwe le sengwe se direlwa go itshupa! “Ba rate bonnō yo bo kwa pele mo medihoñ,” Jesu o bolela jalo.

Se se utlwisang botlhoko, barutwa ba gagwe le bone ba amilwe ke go eletsa go nna kwa godimo. Ka jalo o kgalema jaana: “Me lona, lo se ka loa bidiwa Rabi, gonne Moruti oa lona moñwe hèla, me lona lotlhe lo bana ba monna. Me lo se ka loa bitsa opè rra eno mo lehatshiñ; gonne Rra eno o moñwe hèla, eo o kwa legodimoñ. Le gōna lo se ka loa bidiwa Beñ, gonne Muñ oa lona o moñwe hèla, eboñ Keresete.” Barutwa ba tshwanetse go tlosa keletso ya bone ya go nna ba ba kwa pele! “Eo o leñ mogolo bogolo mo go lona o tla nna modihedi oa lona,” Jesu o ba kgothatsa jalo.

Morago o bolela gore bakwadi le Bafarasai ba latlhegile, a bolela gangwe le gape gore ke baitimokanyi. Ba “cwaletse batho bogosi yoa legodimo,” a rialo, mme ba “shuputsa matlo a basadi ba ba batlhōlagadi, me ea re [ba] nntse [ba] diha yalo, [ba] gōlōle merapèlō e le seipatō hèla.”

“A bo go latlhèga lona bagogi ba lo hohuhetseñ,” Jesu o bolela jalo. O kgalela Bafarasai go sa boneng ga bone botlhokwa jwa dilo tsa semoya, jaaka go supiwa ke dipharologanyo tse ba di itlhomelang. Ka sekai, ba bolela gore, ‘Ga gore sepe fa motho a ikana ka tempele, mme yo o ikanang ka gouda ya tempele ene o molato.’ Mme go kaya ga bone gore gouda ya tempele e botlhokwa go gaisa dilo tsa semoya tse di amanang le lefelo leo la kobamelo, ke go itshupa gore ga ba na boitsholo jo bo tlhamaletseng.

Morago, jaaka a ne a dirile pelenyana, Jesu o kgalela Bafarasai go tlogela “dilō tsa molaō tse di boima bogolo di sa dihwa, eboñ tshiamishō, le kutlwèlō botlhoko, le boikañō” mme ba tlhokomela dilo tse di tshwanang le go ntsha tsa bosome, kana karolo ya bolesome, ya ditlhatshana tse di seng botlhokwa.

Jesu o bitsa Bafarasai ‘bagogi ba ba foufetseng, bao ba tlhotlhang ba ntsha montsana, me ba metsa kamela!’ Ba tlhotlha montsana mo bojalweng jwa bone jwa mofine, eseng fela ka gore e le tshenekegi, mme ka gonne e sa itsheka go ya ka mokgwa wa kobamelo. Lefa go le jalo, go tlhokomologa ga bone dilo tse dikgolo tsa Molao go tshwana fela le go metsa kamela, eo le yone e leng phologolo e e sa itshekang go ya ka mokgwa wa kobamelo. Mathaio 22:41–23:24; Mareko 12:35-40; Luke 20:41-47; Lefitiko 11:4, 21-24.

▪ Ke ka ntlha yang fa Bafarasai ba didimala fa Jesu a ba botsa kaga seo Dafide a neng a se bua mo go Pesalema 110?

▪ Ke ka ntlha yang fa Bafarasai ba ne ba godisa dikgetsana tsa bone tse di nang le Dikwalo le makantsa a diaparo tsa bone?

▪ Ke kgakololo efe eo Jesu a e nayang barutwa ba gagwe?

▪ Ke dipharologanyo dife tse Bafarasai ba di itirelang ka bobone mme Jesu o ba kgalela go tlogela dilo tse di leng botlhokwa jang?