Kgaolo 111

Sesupo sa Metlha ya Bofelo

JAANONG ke Labobedi mo tshokologong. Jaaka Jesu a ntse mo Thabeng ya Lotlhware, a lebile tempele kwa tlase, Petere, Anderea, Jakobe, le Johane ba tla kwa go ene mo sephiring. Ba amegile thata ka tempele, ereka Jesu a sa tswa go bolelela pele gore ga go leje lepe le le tla tlogelwang le tlhatlagane le le lengwe mo go yone.

Mme go lebega ba na le sengwe gape se ba se akantseng jaaka ba atamela Jesu. Dibeke di sekae pele ga foo, o ne a kile a bua ka ‘go nna gone ga gagwe’ eleng nako eo ‘Morwa motho a tla senolwang ka yone.’ Mme pelenyana ga foo, o ne a ba boleletse kaga “bokhutlō yoa lehatshe.” Ka jalo baaposetoloi ba batla go itse.

“Re bolèlèlè,” ba a bua, “go re, dilō tse [tse di tla felelang ka go senngwa ga Jerusalema le tempele ya yone] di tla dihala leñ? Le seshupō e tla nna eñ sa go tla ga gago, le sa bokhutlō yoa lehatshe?” Totatota, potso ya bone e na le dikarolo di le tharo. Sa ntlha, ba batla go itse ka go senngwa ga Jerusalema le tempele ya gagwe, morago ka go nna gone ga ga Jesu ka maatla a Bogosi, mme sa bofelo ka bokhutlo jwa tsamaiso yotlhe ya dilo.

Mo karabong ya gagwe e telele, Jesu o araba dikarolo tseno tsotlhe tse tharo tsa potso eno. O ba neela sesupo se se bontshang gore tsamaiso ya Bajuda ya dilo e tla fela leng; mme o ba neela mo go oketsegileng. Sesupo se sengwe gape se a se ntshang ke se se tla bontshang barutwa ba gagwe ba isagwe gore jaanong ba tshela mo nakong ya go nna gone ga gagwe le sa fa bokhutlo jwa tsamaiso yotlhe ya dilo bo tla bo bo le gaufi.

Fa dingwaga di ntse di tsamaya, baaposetoloi ba simolola go bona go diragadiwa ga boperofeti jwa ga Jesu. Ee, tsone dilo tseo a neng a di bolelela pele di simolola go diragala mo motlheng wa bone. Ka gone, Bakeresete bao ba santseng ba tshela mo dingwageng tse 37 moragonyana, ka 70 C.E., ga ba welwe ke go senngwa ga tsamaiso ya Bajuda le tempele ya bone ba sa itse.

Lefa go ntse jalo, go nna gone ga ga Keresete le bokhutlo jwa tsamaiso ya dilo ga go a ka ga diragala ka 70 C.E. Go nna gone ga gagwe ka maatla a Bogosi go diragala moragonyana thata. Mme leng? Seno se senoga fa go sekasekiwa boperofeti jwa ga Jesu.

Jesu o bolelela pele gore go tla nna le “dintwa, le medumō ea dintwa.” O bolela gore, “Morahe o tla cogologèla morahe,” go tla nna gape le tlhaelo ya dijo, dithoromo tsa lefatshe, le dikgogodi tsa malwetsi. Barutwa ba gagwe ba tla ilwa le go bolawa. Baperofeti ba maaka ba tla nna gone mme ba tla tsietsa ba le bantsi. Boikepo bo tla oketsega, le lorato lwa ba bantsi lo tla tsidifala. Ka yone nako eo, go tla bolelwa mafoko a a molemo a Bogosi jwa Modimo mo lefatsheng lotlhe jaaka bosupi mo merafeng yotlhe.

Lemororo boperofeti jwa ga Jesu bo ne jwa diragadiwa go le gonnye fela pele ga go senngwa ga Jerusalema ka 70 C.E., bo diragadiwa mo go golwane ka nako ya go nna gone ga gagwe le ya bokhutlo jwa tsamaiso ya dilo. Go sekasekiwa ga ditiragalo tsa lefatshe go tloga ka 1914 go senola gore boperofeti jono jwa ga Jesu jwa botlhokwa bo ile jwa nna jwa diragadiwa mo go golwane go tloga ka ngwaga oo.

Karolo e nngwe ya sesupo eo Jesu a e nayang ke go nna gone ga “se se makgapha a a shwahatsañ.” Selo seno se se makgapha se ne sa nna gone ka 66 C.E. e le ‘masole a a dikaganyeditseng’ a Roma a a neng a thekeleditse Jerusalema le a a neng a diga lobota lwa tempele. “Se se makgapha” seno se eme fa se sa tshwanelang gone.

Mo tiragatsong e kgolwane ya sesupo seno, selo se se makgapha seno ke Lekgotla la Kgolagano ya Merafe le motlhatlhami wa lone, Lekgotla la Merafe e e Kopaneng. Labodumedi e leba mokgatlho ono wa lefatshe wa kagiso jaaka moemedi wa Bogosi jwa Modimo. Abo seo se le makgapha jang ne! Fa nako e ntse e tsamaya, babusi ba bopolotiki bao ba tsalanang le UN ba tla tsogologela Labodumedi (setshwani sa Jerusalema) mme ba tla mo senya.

Ka jalo Jesu o bolelela pele jaana: “Go tla nna sepitla se segolo mo metlheñ euō, se se e señ se ke se nne, e sa le ka tshimologō ea lehatshe go tla nakoñ eno; nya, le gōna go se ketla go tlhōla go nna yalo gopè.” Lefa go senngwa ga Jerusalema ka 70 C.E. eleruri e ne e le sepitla se segolo, go bile go ile ga begwa go bolailwe batho ba ba fetang milione, e ne e se sepitla se segolo se se fetang Morwalela wa kgolokwe wa motlha wa ga Noa. Ka jalo tiragatso e kgolwane ya karolo ya boperofeti jono jwa ga Jesu e santse e tla bonwa.

Go Nna le Tsholofelo mo Metlheng ya Bofelo

Jaaka Labobedi, Nisane 11, e ya kwa bokhutlong, Jesu o tswelela a ntse a tlotla le baaposetoloi ba gagwe ka sesupo sa go nna gone ga gagwe ka maatla a Bogosi le sa bokhutlo jwa tsamaiso ya dilo. O ba tlhagisa gore ba seka ba sala morago bo Keresete ba maaka. O bolela gore go tla dirwa maiteko a ‘go timetsa le eleng baitshenkedwi, fa go ka kgonega.’ Mme jaaka bontsu ba ba bonelang kgakala, baitshenkedwi bano ba tla kgobokanela koo ba kgonang go bona dijo tsa semoya tsa boammaaruri gone, eleng, ka go bo Keresete wa boammaaruri a tla bo a le gone mme a sa bonale. Ga ba kitla ba tsiediwa mme ba phuthaganela Keresete wa maaka.

Bo Keresete ba maaka ba ka kgona go bonala ka namana fela. Go farologana le seo, Jesu o tla nna gone a sa bonale. O tla nna gone mo nakong e e boifisang thata mo hisitoring ya motho, jaaka Jesu a re: “Letsatsi le tla hihala, le kgwedi le eōna ga e ketla e ntsha lesedi ya eōna.” Ee, nako eno e tla nna e e lefifi go gaisa fa esale motho a nna gone. Go tla nna jaaka ekete letsatsi le fifetse go le motshegare, jaaka ekete ngwedi ga o a bonesa mo bosigong.

“Dinonohō tsa magodimo di tla reketlisiwa,” Jesu o tswelela jalo. Ka jalo o bontsha gore magodimo a mmatota a tla nna mo boemong jo bo sa tlwaelegang. Magodimo ga a kitla a nna fela bonno jwa dinonyane, mme a tla tlala ka difofane tsa ntwa, dirokete, le dipatlisiso tsa mo loaping. Poifo le thubakanyo di tla gaisa dipe fela tse batho ba kileng ba nna natso mo hisitoring ya bone.

Ka baka leo, Jesu a re, go tla nna le “pitlaganō ea merahe, e rarañwa ke lewatle le dintèlō go shuma ka kgwashō e kgolo; Le batho ba idibadiwa ke poihō le tebèlèlō ea dilō tse di tlañ mo lehatshiñ.” Eleruri, nako eno e e lefifi mo botshelong jwa motho e tla gogela kwa nakong ya fa, jaaka Jesu a bua, “go tla bōnalañ seshupō sa Morwa Motho kwa legodimoñ: hoñ dichaba cotlhe tsa lehatshe di tla hutsahala.”

Mme ga se botlhe ba ba tla bong ba hutsafetse fa ‘Morwa motho a tla ka maatla’ go tla go senya tsamaiso e e boikepo eno ya dilo. “Baitshenkedwi,” ba ba 144 000 bao ba tla busang le Keresete mo Bogosing jwa gagwe jwa selegodimo, ga ba kitla ba hutsafala, lefa e le ditsala tsa bone, tseo Jesu a kileng a di bitsa “dinku di sele.” Lefa ba tla bo ba tshela mo nakong e e lefifi go gaisa mo hisitoring ya motho, bano ba reetsa kgothatso eno ya ga Jesu: “E tla re dilō tse di simologa go dihala, hoñ lo lelalè, lo choletsè ditlhōgō tsa lona; ka gonne thekololō ea lona e tla bo e atamèla.”

E le gore barutwa ba gagwe ba ba tla bong ba tshela mo metlheng eo ya bofelo ba kgone go bona gore bokhutlo bo gaufi, Jesu o naya setshwantsho seno: “Bōnañ setlhare sa mofeige, le ditlhare cotlhe: E re ha yanoñ di tlhoga, loa se bōna, me loa itse ka losi ha letlhabula le setse le atametse. Hèla yalo le lona, ha lo bōna dilō tse di dihala, itseñ ha bogosi yoa Modimo bo atametse. Amarure, kea lo raea, Losika lo, ga lo ketla lo heta go tsamaee dilō cotlhe di dihale pele.”

Ka gone, fa barutwa ba gagwe ba bona dikarolo tse dintsi tsa sesupo seno di diragadiwa, ba tshwanetse go lemoga gore bokhutlo jwa tsamaiso ya dilo bo gaufi le gore Bogosi jwa Modimo bo tla tloga bo nyeletsa boikepo jotlhe. Ebile tota, bokhutlo bo tla tla batho ba ba tla bonang go diragadiwa ga dilo tsotlhe tse Jesu a di bolelelang pele ba santse ba tshela! Fa a kgothatsa barutwa ba ba tla bong ba tshela mo malatsing a ditiragalo tse dikgolo tseo a bofelo, Jesu o bua jaana:

“Lo itlhōkōmèlè, gore e se re kgotsa dipelo tsa lona tsa imahadiwa ke go kgora bobe, le ke go tagwa, le ke ditlhodiègèlō tsa botshelō yono, me letsatsi yeuō ya lo wèla ka choganeco yaka seru: Gonne le tla wèla yalo botlhe ba ba agileñ mo lehatshiñ yeotlhe hèla. Me lona lebèlèlañ ka metlha eotlhe, me lo rapèlè gore lo kaiwè ha lo chwanetse go halola mo diloñ tse cotlhe tse di tla dihalañ, le go èma ha pele ga Morwa Motho.”

Makgarebane A A Botlhale le A A Dieleele

Jesu o ne a ntse a araba kopo ya baaposetoloi ba gagwe ya gore a ba neye sesupo sa go nna gone ga gagwe ka maatla a Bogosi. Jaanong o ba naya dikarolo tse dingwe tsa sesupo ka ditshwantsho di le tharo.

Go diragadiwa ga setshwantsho sengwe le sengwe go tla bonwa ke bao ba tla bong ba tshela ka nako ya go nna gone ga gagwe. O simolola sa ntlha ka mafoko ano: “Hoñ bogosi yoa legodimo bo tla chwantshiwa le makgarebane a le shomè, a a kileñ a tsaea dipōnè tsa aōna, me a cwa a ea go kgatlhantsha monyadi. Me a matlhano a aōna a bo a le dieleele, me a matlhano a bo a le botlhale.”

Ka polelwana “bogosi yoa legodimo bo tla chwantshiwa le makgarebane a le shomè,” Jesu ga a reye gore bontlhanngwe jwa bao ba ruang Bogosi jwa legodimo ke batho ba ba dieleele mme bontlhanngwe ke ba ba botlhale! Nnyaa, mme o raya gore malebana le Bogosi jwa legodimo, go na le karolo e e tshwanang le seo kana sele, kana gore dikgang tse di malebana le Bogosi di tla tshwana le selo se se ntseng jaana.

Makgarebane a a lesome a tshwantshetsa Bakeresete botlhe bao ba tla nnang mo Bogosing jwa legodimo kana bao ba bolelang gore ba tla nna mo go jone. Phuthego ya Bokeresete e ne ya solofediwa go nyalwa ke Jesu Keresete yo o tsositsweng, Monyadi yo o galaleditsweng, ka Pentekosete ya 33 C.E. Mme lenyalo leo le ne le tla nna gone kwa legodimong ka nako eo e sa bolelwang mo isagweng.

Mo setshwantshong seno, makgarebane a a lesome a tswa ka boikaelelo jwa go kgatlhantsha monyadi le go tsena mo popelelong ya lenyalo. Fa a goroga, ba tla tshuba dipone tsa bone go bonesa tsela ya popelelo, ka go dira jalo ba mo naya tlotlo jaaka a tla bo a tsenya monyadiwa wa gagwe mo ntlong e a e baakanyeditsweng. Lefa go ntse jalo, Jesu o a tlhalosa: “A a dieleele, e rile a tsaea dipōnè tsa aōna, a na a se ka a tsaea loukwane nacō. Me a a botlhale, e rile a tsaea dipōnè tsa aōna, a ba a tsaea loukwane ka digwana tsa aōna. Me yana ea re monyadi a sa nntse a diegile, makgarebane a ōtsèla aotlhe, a rōbala.”

Tiego ya monyadi e bontsha gore go nna gone ga ga Keresete jaaka Kgosi e e busang go tla nna mo nakong ya isagwe e e santseng e le kgakala le go tla. Kgabagare o nna mo setulong sa gagwe sa bogosi ka 1914. Mo bosigong jo boleele jwa pele ga seo, makgarebane otlhe a a robala. Mme ga ba kgalelwe seno. Makgarebane a a dieleele a kgalelwa go sa nne le lookwane lwa dinkgwana tsa bone. Jesu o tlhalosa ka moo makgarebane a tsogang ka gone pele ga monyadi a goroga: “Me ea re bosigo gare ga kuiwa, ga twe, Bōnañ, monyadi ke eo! Cwañ lo eè go mo kgatlhantsha. Hoñ makgarebane auō a coga aotlhe, a baakanya dipōnè tsa aōna. Me a a dieleele a raea a a botlhale, a re, Re tsheleleñ loukwane loa lona, gonne dipōnè tsa rona dia tima. Me a a botlhale a ba hetola, a re, Go ka tla ga se ka ga lekana rona le lona; bogolo eañ kwa go ba ba rekisañ, me lo ithèkèlè.”

Lookwane lo tshwantshetsa seo se bolokang Bakeresete ba boammaaruri ba phatsima jaaka masedi. Seno ke Lefoko le le tlhotlheleditsweng la Modimo, leo Bakeresete ba itshwarelelang thata ka lone, mmogo le moya o o boitshepo, o o ba thusang go tlhaloganya Lefoko leo. Lookwane lwa semoya lo thusa makgarebane a a botlhale go phatsimisa lesedi fa ba amogela monyadi mo popelelong ya go ya kwa moletlong wa lenyalo. Mme setlhopha sa makgarebane a a dieleele ga se a tshola lookwane lo lo tlhokegang lwa semoya mo dinkgwaneng tsa one. Ka jalo Jesu o tlhalosa se se diragalang jaana:

“Me ea re [makgarebane a a dieleele] a sa nntse a ile go rèka [lookwane] monyadi a tla; me a a iketleeditseñ a tsèna naè mo modihoñ oa nyalō; me moyakō oa cwalwa. Me moragō ga tla makgarebane a mañwe, a re, Morèna, Morèna, re bulèlè. Me a ba hetola, a re, Amarure kea lo raea, Ga ke lo itse.”

Morago ga gore Keresete a goroge ka Bogosi jwa gagwe jwa selegodimo, setlhopha sa makgarebane a a botlhale sa Bakeresete ba boammaaruri ba ba tloditsweng se ne sa tsoga mme sa ikamogelela tshiamelo ya bone ya go bonesa lefatshe leno le le lefifi ka go baka Monyadi wa bone yo jaanong a boileng. Mme bao ba tshwantshediwang ke makgarebane a a dieleele ba ne ba sa ipaakanyetsa go mo amogela ka pako jalo. Ka jalo fa nako e tla, Keresete ga a ba bulele mojako wa go tsena mo moletlong wa lenyalo kwa legodimong. O ba tlogela kwantle mo lefifing la bosigo jo bogolo jwa lefatshe, gore ba senngwe le badiri botlhe ba tshiamololo. Jesu o ne a fetsa ka gore, “Ke gōna disañ, gonne ga lo itse letsatsi leha e le nakō.”

Setshwantsho sa Ditalenta

Jesu o tswelela go bua le baaposetoloi ba gagwe mo Thoteng ya Lotlhware ka go ba bolelela setshwantsho se sengwe gape, sa bobedi mo go tse tharo. Malatsi a sekae pele ga foo, fa a ne a santse a le kwa Jeriko, o ne a ba bolelela setshwantsho sa diponto go bontsha gore Bogosi bo ne bo tla tla morago ga lobaka lo loleele mo isagweng. Setshwantsho seo a se bolelang jaanong, lefa se na le dikarolo di sekae tse di tshwanang, mo tiragatsong ya sone se tlhalosa ditiro tseo di tla bonalang fa Keresete a setse a le gone ka maatla a Bogosi. Se bontsha gore barutwa ba gagwe ba tshwanetse go dira fa ba santse ba le mo lefatsheng go oketsa “dilō tsa gagwè.”

Jesu o simolola jaana: “Gonne go [ke gore, maemo a a amanang le Bogosi] chwana yaka monna eo e rileñ a ètèla kwa lehatshiñ le sele, a bitsa batlhanka ba gagwè, me a ba neèla dilō tsa gagwè.” Jesu ke ene monna yo e rileng pele ga a etela kwa kgakala kwa legodimong a naya batlhanka ba gagwe—barutwa ba gagwe bao ba tla nnang mo Bogosing jwa selegodimo—dilo tsa gagwe. Dilo tseno tsa gagwe ga se dithoto tse di bonalang, mme di emela tshimo e e lemilweng eo a ileng a e tlhagolela gore e kgone go ntsha barutwa ba ba oketsegileng.

Jesu o naya batlhanka ba gagwe dilo tsa gagwe ka bokhutshwane fela pele ga a tlhatlogela kwa legodimong. Jang? Ka go ba laela gore ba nne ba ntse ba dira mo tshimong e e lemilweng ka go rera molaetsa wa Bogosi go ya kwa bokhutlong jwa lefatshe. Fela jaaka Jesu a bolela: “Moñwe a mo neèla ditalenta di le [tlhano], eo moñwe di le pedi, eo moñwe e le ñwe hèla; moñwe le moñwe a neèlwa kaha nonohoñ ea gagwè; me a itse go tloga a ea loetoñ loa gagwè.”

Ditalenta di le robedi—dilo tsa ga Keresete—ka gone di abiwa go ya ka dinonofo tsa batlhanka, kana kafa ba ka kgonang ka gone mo semoyeng. Batlhanka ba emela ditlhopha tsa barutwa. Mo lekgolong la ntlha la dingwaga, setlhopha se se neng sa amogela ditalenta di le tlhano go lebega se ne sa akaretsa baaposetoloi. Jesu o tswelela pele go bolela gore batlhanka bao ba neng ba amogela ditalenta di le tlhano le di le pedi botlhe ba ne ba di oketsa go menagane gabedi ka go rera ga bone ka Bogosi le go dira barutwa. Lefa go ntse jalo, motlhanka yo a neng a amogela talenta e le nngwe o ne a e fitlha mo mmung.

“Me yana ea re moragō, go sena go heta lobaka lo lolele,” Jesu o a tswelela, “morèna oa batlhanka bauō a tla, me a gopola melato nabō, e o e ba neetseñ.” Keresete o ne a seka a gopola melato eo nabo fa e se go fitlha mo lekgolong la bo 20 la dingwaga, dingwaga di ka nna 1 900 moragonyana, ka gone eleruri e ne e le “lobaka lo lolele.” Jesu o tlhalosa jaana:

“Me eo o na a amogetse ditalenta di le tlhano, a tla a bile a chotse ditalenta tse diñwe di le tlhano, a re, Morèna, u nu u nnetse ditalenta di le tlhano: bōna, ke bile ke bapetse ditalenta tse diñwe [di le] tlhano. Morèna oa gagwè a mo raea, a re, U dihile sentlè, motlhanka eo o molemō le boikañō: u nntse u le boikañō mo diloñ tse di pōtlana, ke tla gu laodisa dilō di le dintsi: tsèna mo boitumeloñ yoa morèna oa gago.” Motlhanka yo o filweng ditalenta di le pedi le ene ka mo go tshwanang o ne a ntsifatsa ditalenta tsa gagwe sebedi, mme o ne a akgolwa ka go tshwana a bo a neelwa tuelo.

Lefa go le jalo, batlhanka bano ba tsena jang mo boitumelong jwa Mong wa bone? Ebu, boitumelo jwa Mong wa bone, ebong Jesu Keresete, e ne e le go amogela Bogosi fa a ya kwa legodimong kwa go Rraagwe. Fa e le ka batlhanka ba gagwe ba ba ikanyegang ba motlha wa segompieno, ba ipela fela thata ka ba sikarisiwa maikarabelo a a oketsegileng a Bogosi, le jaaka ba ntse ba digela botshelo jwa bone jwa mo lefatsheng, ba tla nna le boipelo jo bogolo jwa go tsosediwa kwa Bogosing jwa selegodimo. Mme go tweng ka motlhanka wa boraro?

“Morèna, ke gu itsile ha u le monna eo o pelo e thata,” motlhanka yono o ngongorega jalo. “Me ka boiha, ka ea ka hitlha talenta ea gago mo mbuñ: bōna, u na le se e leñ sa gago ke se.” Motlhanka yono o ne a ganne gotlhelele go dira tiro mo tshimong e e lemilweng ka go rera le go dira barutwa. Ka jalo mong yono o mmitsa “eo o boshula le bochwakga” mme a bo a mo atlhola jaana: “Mo tseeleñ talenta euō, . . . Me motlhanka eo o senañ molemō lo mo kgoromeletsè kwa lehihiñ ye le kwa ntlèntlè: go tla nna selelō le phuranyō ea mènō gōna.” Botlhe ba setlhopha sa motlhanka yo o boikepo yono, ba latlhelwa kwantle, ba amogiwa boipelo bope fela jwa semoya.

Seno se ruta botlhe bao ba iphakang go nna balatedi ba ga Keresete thuto e kgolo. Ba tshwanetse go dira ba oketsa dilo tsa Mong wa bone wa selegodimo ka go nna le karolo e e tletseng mo tirong ya go rera fa e le gore ba batla a ba akgola le go ba duela, le fa ba batla go tila go latlhelwa kwa ntle kwa lefifing mme ba senyediwa ruri. A o tlhaga mo ntlheng eno?

Fa Keresete A Goroga ka Maatla A Bogosi

Jesu o santse a na le baaposetoloi ba gagwe mo Thoteng ya Lotlhware. Fa a araba kopo ya bone ya gore a ba neye sesupo sa go nna gone ga gagwe le sa bokhutlo jwa tsamaiso ya dilo, jaanong o ba naya setshwantsho sa bofelo mo go tse tharo tse di latelelanang. “Me e tla re Morwa Motho a tla ka kgalalèlō ea gagwè, a na le baengele botlhe,” Jesu o a simolola, “hoñ o tla dula mo setuloñ sa gagwè sa bogosi sa kgalalèlō.”

Batho ga ba kgone go bona baengele fa ba le mo kgalalelong ya bone ya selegodimo. Ka jalo go goroga ga Morwa motho, Jesu Keresete, le baengele ga go kake ga bonwa ke batho. Ba ne ba goroga ka ngwaga wa 1914. Mme ka boikaelelo bofe? Jesu o tlhalosa jaana: “Merahe eotlhe e tla phuthèlwa ha pele ga gagwè. Me o tla ba kgaoganya bañwe mo go ba bañwe, yaka modisa a tla a kgaoganye dinku le dipodi; Me dinku o tla di baea kaha lecogoñ ye legolo, me dipodi kaha go ya molèma.”

Fa a tlhalosa seo se tla diragalang ka bao e rileng go kgaoganngwa ba isiwa kafa letlhakoreng le le siameng, Jesu o bua jaana: “Hoñ Kgosi e tla raea ba ba kaha cogoñ ya eōna ye legolo, e re, Tlaañ, lona basegōhadiwa ba ga Rrè, ruañ bogosi yo lo bo baakanyedicweñ e sa le ka tlhōlègō ea lehatshe.” Dinku tsa setshwantsho seno ga di ne di busa le Keresete kwa legodimong mme di tla rua Bogosi ka tsela ya go nna babusiwa ba jone mo lefatsheng. “Tlhōlègō ea lehatshe” e ne e le fa Adame le Efa ba ne ba nna le bana ba bone ba ntlha bao ba neng ba ka solegelwa molemo ke paakanyetso ya Modimo ya go golola batho.

Mme ke ka ntlhayang fa dinku di amogelwa ke Kgosi mme a di phuthela kafa letlhakoreng la moja? “Gonne ke le ka nna tlala,” Kgosi e araba jalo, “me loa mpha diyō: ke le ka nna lenyōra, me loa nnosa: ke le ka nna moeñ, me loa nchola: Ke ne ke sa apara, mme loa nkapesa: ke ne ke bobola, me loa ntekola: ke ne ke le mo tluñ ea kgolegèlō, me loa tla kwa go nna.”

Ereka dinku di le mo lefatsheng, di batla go itse gore di ka tswa di diretse Kgosi ya tsone ya selegodimo ditiro tse di molemo tseo jang. “Ana Morèna, re kile ra gu bōna leñ u le tlala, me ra gu yesa?” ba a botsa, “kgotsa u le lenyōra, me ra gu nosa? Re gu bonye leñ u le moeñ, me ra gu chola? goñwe u sa apara, me ra gu apesa? Me re gu bonye leñ, u bobola, kgotsa u le mo tluñ ea kgolegèlō, me ra ea kwa go wèna?”

“Amarure kea lo raea,” Kgosi e a araba, “Ereka lo go dihetse moñwe oa bōnè ba, bonnake, ba ba bōtlana ba, lo go dihetsè nna.” Bomorwarraagwe Keresete ke ba ba ba 144 000 ba ba setseng mo lefatsheng bao ba tla busang le ene kwa legodimong. Mme go ba direla molemo, jaaka Jesu a bolela, go tshwana fela le fa go diretswe ene.

Morago, Kgosi o bua le dipodi. “Tlogañ ha go nna, bahutsegi ke lona, lo eeñ moleloñ o o sa khutleñ, o o baakanyedicweñ diabolo le baengele ba gagwè: Gonne ke ne ka nna tlala, me ga loa ka loa mpha diyō: ke ne ka nna lenyōra, me ga loa ka loa nnosa; Ke ne ka nna moeñ, me ga loa ka loa nchola; ke sa apara, me ga loa ka loa nkapesa; ka bobola, ka ba ka nna mo tluñ ea kgolegèlō, me ga loa ka loa ntihèla.”

Lefa go ntse jalo, dipodi di ngongorega jaana: “Morèna, re kile ra gu bōna leñ u le tlala, kgotsa lenyōra, kgotsa moeñ, kgotsa u sa apara, kgotsa u bobola, kgotsa u le mo tluñ ea kgolegèlō, me re se ka ra gu dihèla?” Dipodi di atlholwa botlhoko mo motheong wa seo dinku di neng di atlholwa di le tshiamo ka sone. “Ereka lo se ka loa go dihèla moñwe oa ba ba bōtlana ba [wa bakaulengwe ba me],” Jesu o a araba, “le nna ga loa ka loa go ntihèla.”

Ka jalo go nna gone ga ga Keresete ka maatla a Bogosi, pele fela ga sepitla se segolo se tla go fedisa tsamaiso e e boikepo eno ya dilo, e tla nna nako ya katlholo. Dipodi di tla ya “mo pecoñ e e sa khutleñ: me basiami [dinku] ba tla ea mo botsheloñ yo bo sa khutleñ.” Mathaio 24:2–25:46; 13:40, 49; Mareko 13:3–37; Luke 21:7–36; 19:43, 44; 17:20–30; 2 Timotheo 3:1-5; Yohane 10:16; Tshenolō 14:1-3.

▪ Ke eng seo se dirang gore baaposetoloi ba botse, mme ke eng se sengwe se go lebegang ba se akantse?

▪ Ke karolo efe ya boperofeti jwa ga Jesu eo e neng ya diragadiwa ka 70 C.E., mme go ne ga seka ga diragala eng ka nako eo?

▪ Boperofeti jwa ga Jesu bo ne jwa diragadiwa leng lantlha, mme tiragatso ya jone e kgolwane e ne e tla nna leng?

▪ Selo se se makgapha ke eng mo tiragatsong ya sone ya ntlha le ya bofelo?

▪ Ke ka ntlhayang fa sepitla se segolo se se kile sa nna le tiragatso ya sone ya bofelo fa Jerusalema e ne e senngwa?

▪ Ke maemo afe a lefatshe ao a tshwayang go nna gone ga ga Keresete?

▪ ‘Merafe yotlhe ya lefatshe e tla hutsafala’ leng, mme balatedi ba ga Keresete ba tla bo ba dira eng?

▪ Ke sesupo sefe se Jesu a se neelang seo se tla thusang barutwa ba gagwe ba mo isagweng go bona fa bokhutlo bo tla bo bo le gaufi?

▪ Jesu o neela barutwa ba gagwe bao ba tla bong ba tshela mo metlheng eo ya bofelo kgothatso efe?

▪ Makgarebane a a lesome a tshwantshetsa bomang?

▪ Phuthego ya Bokeresete e ne ya solofediwa go nyalwa ke monyadi wa yone leng, mme monyadi o tla leng go isa monyadiwa wa gagwe kwa moletlong wa lenyalo?

▪ Lookwane lo emela eng, mme ke eng seo makgarebane a a botlhale a kgonang go se dira fa a na le lone?

▪ Moletlo wa lenyalo o tshwarelwa kae?

▪ Ke tuelo efe e kgolo eo e latlhegelang makgarebane a a dieleele, mme a felela jang?

▪ Ke thuto efe eo setshwantsho sa ditalenta se e rutang?

▪ Batlhanka ke bomang, mme dilo tseo ba di newang ke eng?

▪ Mong o tla leng go tla go bona kafa ba dirileng ka gone, mme o fitlhela eng?

▪ Boitumelo joo motlhanka yo o ikanyegang a tsenang mo go jone ke eng, mme motlhanka wa boraro, eleng yo o boikepo o diragalelwa ke eng?

▪ Ke ka ntlhayang fa go nna gone ga ga Keresete e tshwanetse go nna go go sa bonaleng, mme ke tiro efe eo a e dirang ka nako eo?

▪ Dinku di rua Bogosi ka tlhaloganyo efe?

▪ “Tlholègō ea lehatshe” e ne e le leng?

▪ Batho ba atlholwa mo motheong ofe gore ke dinku kana ke dipodi?