Kgaolo 25

Go Utlwela Molepero Botlhoko

FA Jesu le barutwa ba gagwe ba banè ba etela metse ya Galalea, dikgang kaga dilo tse di gakgamatsang tseo a di dirang di anama go ralala kgaolo eo. Dikgang tsa ditiro tsa gagwe di fitlha kwa motseng mongwe koo go nang le monna yo o bolawang ke lepero gone. Ngaka Luke o mo tlhalosa jaaka yo o “tletseñ lepero.” Fa bolwetse jono jo bo maswe bo setse bo etegetse, bo ja dikarolo tse di farologaneng tsa mmele ka iketlo. Jalo molepero yono o mo boemong jo bo tlhomolang pelo.

Fa Jesu a fitlha mo motseng oo, molepero yono o a mo atamela. Go ya ka Molao wa Modimo, molepero o tshwanetse go ntsha tlhagiso ka go goa a re, “Itshekologō, itshekologō!” go sireletsa ba bangwe gore ba seka ba tla gaufi thata le ene mme jwa ba tshelegela. Jaanong molepero yono o wela fa fatshe ka sefatlhego a bo a kopa Jesu a re: “Morèna, ha u rata, u na le thata go nntlahatsa.”

Abo monna yono a na le tumelo mo go Jesu jang ne! Lefa go le jalo, abo bolwetsi jwa gagwe bo tshwanetse jwa bo bo mo dira gore a lebege a tlhomola pelo jang ne! Jesu o tla dirang? O ne o tla dirang? Jesu a tlhotlhelediwa ke kutlwelobotlhoko, o otlolola letsogo la gagwe a bo a ama monna yono, a re: “Kea rata: u ntlahalè.” Mme ka bonako fela lepero le a mo tlogela.

A o ne a ka rata gore motho yo o kutlwelobotlhoko jaaka yono a nne kgosi ya gago? Tsela eo Jesu a tshwarang molepero yono ka yone e re neela tsholofelo ya gore ka nako ya puso ya Bogosi jwa Gagwe, polelelopele eno ya Bibela e tla diragadiwa: “O tla tlhomogèla bahumanegi le batlhoki pelo, me meōea ea batlhoki o tla e boloka.” Ee, Jesu ka nako eo o tla diragatsa keletso ya pelo ya gagwe ya go thusa botlhe bao ba bogang.

Le eleng pele ga go fodisiwa ga molepero, bodihedi jwa ga Jesu bo ne bo setse bo ntse bo tsosa kgatlhego e kgolo mo bathong. Jesu jaanong o laela monna yono yo o fodisitsweng, a diragatsa boperofeti jwa ga Isaia, ka go re: “U seka ua bolèlèla opè.” Morago ga moo o mo laela ka go re: “Tsamaea u ichupetsè moperisiti, u ntshetse bontlahaco yoa gago kaha Moshe o laotseñ ka gōna, gore e nnè chupō mo go bōnè.”

Me monna yono o itumetse thata mo eleng gore ga a kgone go sa rothise mmutla madi kaga motlholo ono. O a tsamaya a bo a simolola go anamisa dikgang gongwe le gongwe, kwantle ga pelaelo a baka kgatlhego le go batla go itse mo bathong mo eleng gore Jesu ga a kgone go tsena ka tlhamalalo mo motseng oo. Ka gone, Jesu o nna kwa mafelong a a kwa thoko koo go tla bo go sa nneng ope gone, mme batho go tswa gongwe le gongwe ba tla koo go mo reetsa le gore ba fodisiwe malwetsi a bone. Luke 5:12-16; Mareko 1:40-45; Mathaio 8:2-4; Lefitiko 13:45; 14:10-13; Pesalema 72:13; Isaia 42:1, 2.

▪ Ke phelelo efe eo lepero le ka nnang le yone, mme ke tlhagiso efe eo molepero a neng a tshwanetse go e neela?

▪ Molepero mongwe o ne a ikuela jang mo go Jesu, mme re ka ithuta eng go tswa mo karabelong ya ga Jesu?

▪ Monna yo o neng a fodisitswe o palelwa ke go utlwa Jesu jang, mme matswela ke afe?