Kgaolo 26

O Boetse Gae Kwa Kaperenama

GO TLA go fitlha jaanong tumo ya ga Jesu e utlwetse gongwe le gongwe, mme batho ba le bantsi ba etela kwa a nnang teng kwa mafelong a a kwa kgakala. Lefa go ntse jalo, morago ga malatsi a le mmalwa, o boela kwa Kaperenama a raletse Lewatle la Galilea. Ka bofefo fela dikgang di anama mo motseng otlhe gore o boetse gae, mme batho ba le bantsi ba tla mo ntlong eo a leng mo go yone. Bafarasai le barutisi ba Molao ba tswa le eleng kwa kgakala kwa Jerusalema.

Batho ba bantsi thata mo eleng gore ba pitlagana mo kgorwaneng, mme ga go na phatlha e ope a ka tsenang mo teng ka yone. Go tloga go diragala tiragalo nngwe e e sa tlwaelegang eleruri. Se se diragalang mo pakeng eno ke se se botlhokwatlhokwa, ka go bo se re thusa go lemoga gore Jesu o na le nonofo ya go tlosa se se tsalang pogo ya batho le go busetsa botsogo jwa bao a ba tlhophileng.

Fa Jesu a ntse a ruta boidiidi, banna ba le banè ba tla ba rwele monna mongwe yo o suleng ditokololo ka bolao mme ba mo tsenya mo ntlong. Ba batla gore Jesu a fodise tsala ya bone, mme ka ntlha ya boidiidi jwa batho, ga ba kgone go tsena mo teng. Abo go swabisa jang ne! Lefa go le jalo ga ba itlhoboge. Ba palama mo godimo ga borulelo jo bo sephara, ba phunya phatlha mo go jone, ba bo ba folosetsa bolao jo monna yo o suleng ditokololo a leng mo go jone gaufi le Jesu.

A Jesu o gakadiwa ke go kgaupediwa mono? Legoka! Go na le moo, o kgatlhiwa thatathata ke tumelo ya bone. O raya monna yo o suleng ditokololo a re: “Dibe tsa gago u di ichwarecwe.” A mme tota Jesu o ka itshwarela dibe? Bakwadi le Bafarasai ga ba akanye jalo. Ba akanya jaana mo dipelong tsa bone: “Monna eo, o buèlañ yana? oa tlhapatsa; emañ eo o ka ichwarèlañ dibe, ha e se moñwe hèla, eboñ Modimo?”

Ereka a itse se ba se akantseng, Jesu o ba raya a re: “Ana lo akanyeletsaǹ dilo tse mo dipeduñ tsa lona? Mo go ka nnañ boheho ke gohe? a e ka nna go raea motho eo o [suleng ditokololo, NW], go re, Dibe tsa gago u di ichwarecwe; kgotsa go re, Coga, u tseè bolaō yoa gago, u tsamaeè.”

Go tswa foo, Jesu o letlelela boidiidi jwa batho, go akaretsa le batho ba ba mo tshwayang diphoso go bona tshupo e e sa tlwaelegang eo e tla bontshang gore o na le nonofo ya go itshwarela dibe mo lefatsheng le gore eleruri ke motho yo o nang le maatla go feta lefa e le ope fela yo o kileng a tshela. O retologela go yo o suleng ditokololo a bo a re: “Coga, u tseè bolaō yoa gago, u eè kwa tluñ ea gago.” Mme o dira jalo fela fa a sena go rialo, a tsamaya a tshotse bolao jwa gagwe batho botlhe bao ba mmona! Batho ka go gakgamala ba galaletsa Modimo ba bo ba khutsa ka go re: “Ga re e se re ke re bone mo go nntseñ yana gopè”!

A o etse tlhoko gore Jesu o amanya dibe le bolwetsi le gore go itshwarelwa ga dibe go amana le go bona botsogo jo bo molemo jwa mmele? Bibela e tlhalosa gore motsadi wa rona wa ntlha, ebong Adame, o ne a leofa le gore rotlhe re ruile diphelelo tsa boleo joo, eleng, bolwetsi le loso. Mme fa go busa Bogosi jwa Modimo, Jesu o tla itshwarela dibe tsa botlhe ba ba ratang Modimo le go Mo direla, mme ke gone bolwetsi jotlhe bo tla tlosiwang. Abo seo se tla bo se le molemo jang ne! Mareko 2:1-12; Luke 5:17-26; Mathaio 9:1-8; Baroma 5:12, 17-19.

▪ Ke eng se se neng sa baka tiragalo e ruri e jesang kgakge?

▪ Monna yo o suleng ditokololo o ne a fitlha jang fa go Jesu?

▪ Ke ka ntlhayang fa rotlhe re le baleofi, mme Jesu o ne a baakanyetsa jang tsholofelo ya gore boitshwarelo jwa dibe tsa rona le botsogo jo bo itekanetseng di ka kgonega?