Kgaolo 34

O Kgetha Baaposetoloi ba Gagwe

GO SETSE jaanong go fetile ngwaga le sephatlo fa e sale Johane Mokolobetsi a bega Jesu jaaka Kwana ya Modimo mme Jesu a simolola bodihedi jwa gagwe jwa phatlalatsa. Ka nako eo, Anderea, Simone Petere, Johane, mme gongwe le Jakobe (morwarraa Johane), mmogo le Filipo le Nathanaele (yo o bileng a bidiwa Barotholomea), ba ne ba setse ba le barutwa ba gagwe ba ntlha. Morago, ba le bantsi ba ne ba tlhakanela le bone mo go saleng Keresete morago.

Jaanong Jesu o ipaakanyeditse go kgetha baaposetoloi ba gagwe. Bano ba ne ba tla nna ditsala tsa gagwe tse di gaufigaufi tseo di neng di tla thapisiwa ka mo go kgethegileng. Mme pele ga a ka ba kgetha, Jesu o ya kwa thabeng a bo a lala a rapela bosigo joo jotlhe, gongwe a kopa botlhale le masego a Modimo. Fa bo sena go sa, o bitsa barutwa ba gagwe mme o kgetha ba le 12 mo go bone. Lefa go ntse jalo, ereka ba tswelela go nna barutwana ba ga Jesu, ba santse gape ba bidiwa barutwa.

Ba barataro ba ba umakilweng fa godimo, ba Jesu a ba kgethang, ke ba ba neng ba fetoga barutwa ba gagwe ba ntlha. Mathaio, yo Jesu a neng a mmitsa a le mo ofising ya gagwe ya lekgetho, le ene o a kgethiwa. Ba bangwe ba batlhano ba ba kgethiwang ke Judase (yo o bileng a bidiwa Thadaeo), Judase Isekariota, Simone wa Mokanana, Thomase, le Jakobe morwa Alefaeo. Jakobe yono gape o bidiwa Jakobe yo Mmotlana, gongwe e le ka go bo a sena mmele o o kalo kana a le mmotlana mo go moaposetoloi Jakobe yo mongwe.

Jaanong ba ba 12 bano ba setse ba feditse lobakanyana ba na le Jesu, mme o ba itse sentlentle. Tota, ba sekae mo go bone ke ba masika a gagwe. Jakobe le morwarraagwe Johane ka phepafalo ke bontsalae totatota. Mme go bonala sentle gore gongwe Alefaeo e ne e le morwarraa Josefa, ene yo o neng a nna rraagwe Jesu wa motlhokomedi. Jalo morwa Alefaeo, ebong moaposetoloi Jakobe, le ene o ne a tla nna ntsalaa Jesu.

Legale, Jesu ga a na bothata bope jwa go gakologelwa maina a baaposetoloi ba gagwe. A mme wena o ka ba gakologelwa? Ebu, o ka gakologelwa fela gore go na le ba le babedi ba ba bidiwang Simone, ba le babedi ba ba bidiwang Jakobe, le ba le babedi ba ba bidiwang Judase, le gore Simone o na le morwarraagwe ebong Anderea, le gore Jakobe o na le morwarraagwe ebong Johane. Eno ke tsela ya go gakologelwa baaposetoloi ba ba herang bobedi. Ba bangwe ba banè ke mokgethisi (Mathaio), yo e rileng moragonyana a belaela (Thomase), yo o neng a bidiwa a ntse fa tlase ga setlhare (Nathanaele), le tsala ya gagwe Filipo.

Ba le some le bongwe mo baaposetoloing ke ba ba tswang kwa Galilea, kwa kgaolong ya legae la ga Jesu. Nathanaele o tswa kwa Kana. Filipo, Petere, le Anderea bone ba tswa Bethesaida, lefa go ntse jalo, Petere le Anderea moragonyana ba fudugela kwa Kaperenama koo go bonalang Mathaio a ne a nna teng. Jakobe le Johane ba ne ba le mo kgwebong ya go tshwara ditlhapi mme le bone go bonala fa ba ka ne ba ne ba nna kwa Kaperenama kana gaufi le gone. Go bonala gore Judase Isekariota, yo o neng a re moragonyana a oka Jesu, ke ene fela moaposetoloi yo o neng a tswa kwa Judea. Mareko 3:13-19; Luke 6:12-16.

▪ Ke baaposetoloi bafe ba ba ka nnang ba bo ba ne ba le masika a ga Jesu?

▪ Baaposetoloi ba ga Jesu ke bomang, mme o ka gakologelwa maina a bone jang?

▪ Baaposetoloi bano ba ne ba tswa kwa mafelong afe?