Kgaolo 40

Thuto Malebana le Kutlwelobotlhoko

JESU o ka tswa a santse a le mo Naine, koo a sa tswang go tsosa morwa wa motlholagadi gone bosheng jaana, kana gongwe o etetse motse mongwe o o fa gaufi. Mofarasai mongwe yo o bidiwang Simone o batla go tlhatlhoba motho yo o dirang ditiro tse di ntseng jalo tse di tlhomologileng ka kelotlhoko. Jalo o laletsa Jesu gore a tle go ja le ene.

Ereka Jesu a ne a leba sebaka seo jaaka tshono ya go direla bao ba neng ba le gone, o amogela taletso eo, fela jaaka a ile a amogela ditaletso tsa gore a je le bakgethisi le baleofi. Lefa go ntse jalo, fa a tsena kwa ntlong ya ga Simone, Jesu ga a amogele tlhokomelo ya botsalano eo gantsi e neelwang baeng.

Dinao tseo di rweleng dimphetšhane di a gotela le go tlala leswe ka ntlha ya go sepela mo ditseleng tse di lorole, mme go tlhapisa dinao tsa baeng ka metse a a tsididi ke tiro e e tlwaelegileng ya go amogela baeng. Mme dinao tsa ga Jesu ga di tlhapisiwe fa a goroga. Kana gone gore o amogela katlo ya go mo amogela, seo eleng mokgwa o o tlwaelegileng. Mme ga a neelwe lookwane le le tlwaelegileng la go amogela baeng la moriri wa gagwe.

Fa ba ntse ba ja, fa baeng ba ntse ba dutse fa tafoleng, mosadi mongwe yo o sa lalediwang o tsena mo ntlong eo ka tshisibalo. O itsege mo motseng oo gore o tshela botshelo jwa boitshwaro jo bo sa siamang. Gongwe o ka tswa a utlwile dithuto tsa ga Jesu, go akaretsa le taletso ya gagwe ya gore a ‘botlhe bao ba imelwang ba tle kwa go ene gore a ba lapolose.’ Mme ereka a kgatlhilwe thata ke seo a se boneng le go se utlwa, jaanong o batlana le Jesu.

Mosadi yoo o atamela kafa morago ga ga Jesu mo tafoleng a bo a khubama fa dinaong tsa gagwe. Fa dikeledi tsa gagwe di ntse di wela mo dinaong tsa gagwe, o di phimola ka moriri wa gagwe. Gape o ntsha lookwane le le nkgang monate mo selwaneng sa gagwe, mme fa a ntse a atla dinao tsa gagwe, o di tshela ka lookwane mo godimo. Simone o lebelela ka go sa rate. “Monna eo, ha e kabo e le moperofeti,” o akanya jalo, “o kabo a lemogile mosadi eo o mo amañ, go re, ke mañ, le kaha o nntseñ ka gōna: ka e le moleohi.”

Ereka Jesu a lemoga se a se akanyang, o bolela jaana: “Simona ke na le señwe se nka se buañ nau.”

“Moruti, a ko u buè,” o araba jalo.

“Ga bo go le motho eo go tsèwañ dilō molato mo go èna, me a bo a na le batho ba le babedi ba ba molato naè,” Jesu o simolola jalo. “Moñwe a le molato dipondo di le mashomè matlhano, me eo moñwe a le molato dipondo di le tlhano hèla. Me e rile ka ba sena sepè go leha ka shōna, a ba ichwarèla boo babedi. Ka re, mpolèlèla, go re, eo o tla mo ratañ bogolo mo go bōnè ko ohe?”

“Kea gopola,” Simone o bolela jalo, gongwe a bontsha a sa kgatlhegele potso e e lebegang e sa ame kgang, “e tla nna èna eo o mo ichwaretseñ go le gogolo.”

“U gopotse sentlè,” Jesu a rialo. Mme morago ga moo o retologela kwa mosading yoo, a bo a raya Simone a re: “A u bōna mosadi eo? Ke tsile mo ntluñ ea gago, me ga ua ka ua nnaea metse a dinaō; me eo, o nkolobeditse dinaō ka dikeledi, a di phimola ka moriri oa gagwè. Ga ua ka ua nkatla; me mosadi eo, ke sa le ke tsèna, ga a e se a ke a khutle go nkatla dinaō. Tlhōgō ea me ga ua ka ua e tlotsa loukwane: me mosadi eo, o ntloditse dinaō ka setlōlō.”

Ka gone mosadi yoo o bontshitse ka moo a ikotlhayang go tswa pelong ka gone ka ntlha ya go sa itshware sentle ga gagwe ga nako e e fetileng. Jalo Jesu o konela ka go re: “Ke gōna ke gu raeañ, ke re, Dibe tsa gagwè tse di leñ dintsi o di ichwarecwe; gonne o ratile go le gogolo; me eo o ichwarecweñ go le gobōtlana, o rata go le gobōtlana.”

Jesu ga a mpampetse kana go dumalana le boitshwaro jo bo sa siamang ka tsela epe. Go na le moo, tiragalo eno e bontsha ka moo a tlhaloganyang batho ka kutlwelobotlhoko ka gone bao ba dirang diphoso mo botshelong mme bao ereng morago ga moo ba bo ba bontsha gore baa di ikotlhaela mme ka gone ba tla mo go Keresete gore a ba golole. Jesu o neela mosadi yoo tapologo ya mmatota ka go re: “Tumèlō ea gago e gu bolokile; tsamaea ka kagishō.” Luke 7:36-50; Mathaio 11:28-30.

▪ Jesu o amogelwa jang ke Simone yo a neng a etetse kwa ga gagwe?

▪ Ke mang yo o batlanang le Jesu, mme ka ntlhayang?

▪ Jesu o neela setshwantsho sefe, mme o se dirisa jang?