Kgaolo 49

Loeto lo Longwe lwa go ya go Rera kwa Galilea

MORAGO ga mo e ka nnang dingwaga tse pedi tsa go rera ka tlhagafalo, a jaanong Jesu o tla repisa le go kgobakgetsi? Go na le go dira jalo, o oketsa tiro ya gagwe ya go rera ka go simolola loeto lo longwe gape, lwa boraro lwa Galilea. O etela ditoropo le metse yotlhe e e mo nageng eo, a ruta mo disinagogeng le go rera mafoko a a molemo a Bogosi. Se a se bonang mo loetong lono lwa gagwe se mo neela tumelo e e tletseng ya gore go botlhokwa fela thata go feta le eleng pele gore a gotetse tiro ya gagwe ya go rera.

Gongwe le gongwe kwa Jesu a yang gone, o bona kafa bontsi jwa batho bo tlhokang go fodisiwa semoyeng ka gone le go gomodiwa. Ba tshwana le dinku tse di senang modisa, ba patikegile ebile ba gasame, mme o ba tlhomogela pelo. O raya barutwa ba gagwe a re: “Thōbō e kgolo rure, me barobi ba bannye. Me ke gōna, rapèlañ Morèna oa thōbō, gore a romè barobi mo thoboñ ea gagwè.”

Jesu o na le thulaganyo ya tiro. O bitsa baaposetoloi ba ba 12, ba a ba tlhophileng mo e ka nnang sebaka sa ngwaga se se fetileng. O ba kgaoganya sebedisebedi, a dira ditlhopha tse thataro tsa bareri, le go ba neela ditaelo. A re: “Lo se ka loa tsèna mo tseleñ epè ea Badichaba, leha e le mo motsiñ opè oa Basamaria lo se ka loa tsèna mo go ōna; Me bogolo lo eeñ kwa dinkuñ tse di timetseñ tsa ntlo ea Iseraela. Me lo ètè lo rera, lo re, Bogosi yoa legodimo bo atametse.”

Bogosi jono jo ba tshwanetseng go rera ka jone ke jo Jesu a ba rutileng go bo rapelela mo thapelong ya sekao. Bogosi bo ne bo atametse ka kgopolo ya gore Kgosi e e tlhophilweng ke Modimo, Jesu Keresete, o ne a le gone. Go neela barutwa ba gagwe ditshwanelego tsa go nna baemedi ba goromente oo o mogolo go feta wa batho, Jesu o ba neela thata ya go fodisa balwetsi le eleng go tsosa baswi. O ba laela gore ba dire ditirelo tseno kwantle ga tuelo.

Go tswa foo o bolelela barutwa ba gagwe gore ba seka ba dira dipaakanyetso tsa dilo dipe tse di bonalang tsa loeto lwa bone lwa go rera. “Se tseeñ gouda, leha e le selefera, leha e le kgōtlhō mo pataneñ tsa lona tsa madi: Leha e le kuana ea loètō, leha e le dikobō di le pedi, leha e le ditlhako, leha e le tsamma: ka gonne modihi o chwanecwe ke seyō sa gagwè.” Bao ba anaanelang molaetsa ba ne ba tla arabela mme ba thuse ka dijo le marobalo. Jaaka Jesu a bua: “Me leha e ka ne e le motse ohe, leha e le motsana o lo tsènañ mo go ōna, lo senkè eo o chwanetseñ gōna; me lo nnè hoñ, go tlo go tsamaeè lo cwè gōna.”

Go tswa foo Jesu o laela ka moo ba ka atamelang beng ba ntlo ka molaetsa wa Bogosi ka gone. “Me e re lo tsèna mo tluñ,” o laela jalo, “lo e dumedisè. Me ha ntlo euō e le eōna e e chwanetseñ, a kagishō ea lona e tlè mo go eōna: me ha e le e e sa chwanèlañ, a kagishō ea lona e boèlè mo go lona. Me leha e le bomañ ba ba se ketlañ ba lo chola, leha e le go reetsa mahoko a lona, e re lo cwa mo tluñ euō, kgotsa mo motsiñ ouō, lo itlhotlhorè dithole mo dinaoñ tsa lona.”

Fa a bua kaga motse o o sa amogeleng molaetsa wa bone, Jesu o senola gore katlholo e e tla ba tlelang e tla nna e e botlhoko thata. O tlhalosa jaana: “E tla re mo motlheñ oa tshèkō, go tla nna botoka kaga lehatshe ya Sodoma le Gomora, bogolo go motse ouō.” Mathaio 9:35–10:15; Mareko 6:6-12; Luke 9:1-5.

▪ Jesu o simolola leng loeto lwa gagwe lwa boraro lwa go ya go rera kwa Galilea, mme le mo neela tumelo efe?

▪ Fa a romela baaposetoloi ba gagwe ba ba 12 go ya go rera, o ba neela ditaelo dife?

▪ Ke eng fa go ne go tshwanetse gore barutwa ba rere ba re Bogosi bo atametse?