Kgaolo 75

Motswedi wa Boitumelo

KA NAKO ya bodihedi jwa gagwe mo Galilea, Jesu o ne a dira dikgakgamatso, mme jaanong o di boeletsa gape mo Judea. Ka motlhala, o kgoromeletsa ledimona ntle go tswa mo monneng yo le neng le ntse le mo itsa go bua. Batho baa gakgamala, mme bakgadi ba tsosa ngongorego eo e tshwanang le eo e neng ya tsosiwa kwa Galilea. “O kgoromeletsa badimo ntlè ka Beelesebube, kgōsana ea badimo,” ba bolela jalo. Ba bangwe ba batla bosupi jo bogolwane go tswa go Jesu jwa gore tota ke mang, mme ba leka go mo raela ka go kopa sesupo se se tswang kwa legodimong.

Ka go bo a itse seo ba se akantseng, Jesu o fetola bakgadi ba gagwe ba Judea fela jaaka a ne a fetola ba kwa Galilea. O tlhalosa gore bogosi bongwe le bongwe joo bo kgaoganeng mo gare bo tla wa. O botsa ka go re: “Ekare ha Satane le èna a ikgaogantse, bogosi yoa gagwè bo tla èma yañ?” O bontsha boemo jo bo kotsi jwa bakgadi ba gagwe ka go re: “Ha ke kgoromeletsa badimo ntlè ka monwana oa Modimo, e tla bo yalo bogosi yoa Modimo bo tsile mo go lona.”

Batho bao ba bonang dikgakgamatso tsa ga Jesu ba tshwanetse go arabela ka tsela e e tshwanang le kafa bao ba neng ba bona Moshe a dira kgakgamatso ba neng ba dira ka gone makgolokgolo a dingwaga pelenyana. Ba ne ba khutsa ka go re: “Seo se, ke monwana oa Modimo”! Gape e ne e le “monwana oa Modimo” oo o neng wa kwala Melao e e Lesome mo matlapeng. Mme “monwana oa Modimo”—moya wa gagwe o o boitshepo, kana maatla a gagwe a dirang—ke one o o kgonisang Jesu go kgoromeletsa badimona ntle le go fodisa balwetsi. Jalo Bogosi jwa Modimo eleruri bo mo bakgading bano, ereka Jesu, eleng Kgosi e e tlhomilweng ya Bogosi joo, a le mo gare ga bone.

Go tswa foo Jesu o bontsha gore kgono ya gagwe ya go leleka badimona ke bosupi jwa gore o feta Satane ka maatla, fela jaaka monna yo o nonofileng a tla go fenya monna yo o tlhomeletseng sentle yo o disitseng bonno jwa gagwe. Gape o boeletsa setshwantsho seo a neng a se bua kwa Galilea mabapi le moya o o bosula. Moya o tswa mo mothong, mme e re fa motho yoo a sa thibe phatlha ya one ka dilo tse di molemo, moya oo o boe o na le e mengwe e supa, mme boemo jwa motho yoo bo bifa go feta pele.

Fa mosadi mongwe yo o fa gare ga batho bao a ntse a reeditse dithuto tseno, o kukega maikutlo mo a khutsang ka lentswe le legolo a re: “Go segō sebopèlō se se gu belegeñ, le mabèlè a u a amuleñ.” Ereka keletso ya mosadi mongwe le mongwe wa Mojuda e le go nna motsadi wa moperofeti mongwe mme segolobogolo Mesia, go a tlhaloganyesega go bo mosadi yono a ka bua jalo. Go lebega a ne a akanya gore Maria o tshwanetse a bo a itumela fela thata ka go bo e le mmaagwe Jesu.

Lefa go ntse jalo, ka bofefo fela Jesu o tlhamalatsa mosadi yoo mabapi le motswedi wa boitumelo jwa boammaaruri. “E,” o arabela jalo, “me bogolo go segō ba ba utlwañ lehoko ya Modimo, ba le boloka.” Le ka motlha Jesu ga a ise a ko a kae gore mmaagwe, ebong Maria, o tshwanetse go tlotliwa ka mo go kgethegileng. Go na le moo, o ne a bontsha gore boitumelo jwa boammaaruri bo bonwa mo go nneng motlhanka yo o ikanyegang wa Modimo, e seng mo dikamanong dipe tsa senama kana diphitlhelelo.

Fela jaaka a ne a dira kwa Galilea, gape Jesu o tswela pele go kgalemela batho ba kwa Judea bao ba mo kopa sesupo se se tswang legodimong. O ba bolelela gore ga ba na go newa sesupo sepe fa e se sesupo sa ga Jona. Jona o ne a nna sesupo ka go nna malatsi a mararo mo leruarueng le ka go rera ga gagwe ka bopelokgale, moo go neng go felela ka go re Baninife ba tlhotlheletsege go ikotlhaya. “Me, bōnañ,” ga rialo Jesu, “eo mogolo go heta Yona o ha.” Ka mo go tshwanang mohumagadi wa Sheba o ne a gakgamadiwa ke botlhale jwa ga Solomone. “Me bōnañ,” Jesu o rialo gape, “eo mogolo go heta Solomone o ha.”

Jesu o tlhalosa gore fa motho a tshuba lobone, ga a lo beye mo mosimeng kana kafa tlase ga sebeelo sa mabele mme o le baya mo godimo ga setlhomo sa lobone e le gore batho ba kgone go bona lesedi. Gongwe o itsise gore go ruta le go dira dikgakgamatso fa pele ga batho bano ba ba thamo di thata ba ba mo reeditseng go tshwana le go fitlha lesedi la lobone. Matlho a babogedi bano ga a bone sentle, kana a pelekane, jalo boitlhomo jwa boikaelelo jwa dikgakgamatso tsa gagwe ga bo fitlhelelwe.

Jesu o sa tswa go leleka ledimona a bo a dira gore motho wa semumu a bue. Seno se tshwanetse go tlhotlheletsa batho ba ba bonang sentle, kana ba ba sa pelekanang matlho, go baka tiro e kgolo eno e e galalelang le go bolela mafoko a a molemo! Lefa go le jalo, seno ga se se se diragalang ka bakgadi bano. Jalo Jesu o digela ka go re: “Ke gōna, u ipōnè, e se re kgotsa lesedi ye le mo go wèna ea bo e le lehihi. Ke gōna, ea re ha mmele oa gago otlhe o tletse lesedi, go se na gopè ha go leñ lehihi, o tla bonesèga otlhe hèla; hèla yaka go tuka sentlè ga lobōnè go tlo go gu nèe lesedi.” Luke 11:14-36; Ekesodo 8:18, 19; 31:18; Mathaio 12:22, 28.

▪ Batho ba itshwara jang fa Jesu a sena go fodisa monna mongwe?

▪ “Monwana oa Modimo” ke eng, mme Bogosi jwa Modimo bo mo gare ga bareetsi ba ga Jesu jang?

▪ Motswedi wa boitumelo jwa boammaaruri ke eng?

▪ Motho o ka nna jang le leitlho le le bonang sentle?