Kgaolo 76

O Ja le Mofarasai

MORAGO ga fa Jesu a sena go araba balatofatsi bao ba belaelang motswedi wa nonofo ya gagwe ya go fodisa monna yo o neng a sa kgone go bua, Mofarasai mongwe o mo laletsa go tla go ja dijo le ene. Pele ga ba ka ja, Bafarasai ba dira ngwao ya go tlhapa diatla tsa bone go fitlha fela kwa sekgonong. Ba dira seo pele le morago ga dijo mme le eleng fa go ntse go jewa. Lemororo ngwao eno e sa thulane le molao o o kwadilweng wa Modimo, se fetelela go pota ka kwa ga se Modimo a se tlhokang mo kgannyeng ya bophepa jwa kafa mokgweng.

Fa Jesu ene a sa dire ngwao eno, molaletsi wa gagwe o a gakgamala. Lemororo kgakgamalo ya gagwe a sa e bue ka molomo, Jesu o a e lemoga a bo a re: “Aitse yana, lona Bafarisai loa tlo lo tlhacwe bokahantlè yoa senwelō le mogocana; me bokahateñ yoa lona bo tletse bogagapa le boshula hèla. Dieleele ke lona; eo o dihileñ bokahantlè, a ga aa diha bokahateñ le yōna?”

Ka jalo Jesu o senola boitimokanyi jwa Bafarasai bao kafa ngwaong ba tlhapang diatla tsa bone mme ba palelwa ke go tlhatswa boikepo mo dipelong tsa bone. O ba gakolola ka go re: “Acwañ bahumanegi ka dilō tse di mo teñ; me, bōnañ, dilō cotlhe di tla bo di lo ntlahaletse.” Go aba ga bone go tshwanetse go tlhotlhelediwa ke pelo e e ratang, eseng ke keletso ya go kgatlha ba bangwe ka go itira jaaka ba ba siameng.

“Goa bo go latlhèga lona Bafarisai!” Jesu o a tswelela, “ka go bo lo ntsha sa boshomè sa kwena, le sa rue, le sa merōgō eotlhe lekgèthō; me lo tlhokomologa tshiamishō, le loratō loa Modimo: tseno, lo no lo chwanetse go di diha, le tse diñwe lo sa di tlogele di sa dihwa.” Molao wa Modimo go Iseraele o tlhoka gore go ntshiwe ditsabosome, kana karolo nngwe le nngwe ya bosome, ya dilo tse di bonwang mo masimong. Kwena le rue ke ditlhatshana kana digwere tse di jewang tseo di dirisiwang go natetsha dijo. Bafarasai ka kelotlhoko ba ntsha le eleng sa bosome sa ditlhatshana tseno tse di seng botlhokwatlhokwa, mme Jesu o ba kgalela go tlhokomologa dilo tse di leng botlhokwa go feta eleng go bontsha lorato, go bontsha bopelonomi, le go nna pelontle.

Fa a tswelela pele ka go ba kgala, Jesu a re: “Go latlhèga lona Bafarisai! gonne lo rata ditulō tse di kwa pele pele mo matluñ a thutō, le ditumedishō mo marèkèloñ. Go latlhèga lona bakwadi le Bafarisai, baitimokanyi! Ka gonne lo chwana yaka diphupu tse di sa bonaleñ, me batho ba tsamaea ha godimo ga cōna ba sa itse.” Leswe la bone ga le bonale. Bodumedi jwa Bafarasai bo iponatsa fela kafa ntle mme bo sena mosola kafa teng! Bo theilwe mo boitimokanying.

Fa a sena go utlwa kgalo e e ntseng jalo, agente mongwe, mongwe wa ba ba rutilweng Molao wa Modimo, o ngongorega ka go re: “Moruti, ha u bua yana, le rona ua re kgōba.”

Jesu o tshwaya baitseanape bano ba Molao phoso le bone, ka go re: “Le lona, go latlhèga lona ba molaō! gonne lo belesa batho merwalō e e botlhokotlhoko go rwalwa; me lona ka losi lo gana go ama merwalō euō leha e le ka monwana moñwe oa lona. A bo go latlhèga lona! ka lo aga dihikancwè tsa baperofeti, me ke borra eno ba ba ba bolaileñ.”

Merwalo e Jesu a buang ka yone ke dingwao tsa molomo, mme agente bano ga ba dire sepe fela e le go fokotsa taolo e le nngwe fela e potlana go tlhofofaletsa batho. Jesu o senola gore ba ile gape ba dumalana le go bolaiwa ga baperofeti, mme o ba tlhagisa ka go re: “Madi a baperofeti botlhe, a a cholocweñ e sa le ka mothèō oa lehatshe, [a tla lopiwa] mo losikeñ lo; Go simolola ka madi a ga Abele, go tla go hitlha mo madiñ a ga Sakaria eo o shwetseñ ha gare ga sebesho le tempela; E, kea lo raea, a tla lōpiwa mo losikeñ lo.”

Lefatshe la batho ba ba neng ba tshwanetse go rekololwa le simologile ka go tsalwa ga bana ba ga Adame le Efa; ka jalo, Abele o ne a tshela “e sa le ka mothèō oa lehatshe.” Morago ga polao e e setlhogo ya ga Sakaria, masole a Siria a ne a tlhasela Juda. Mme Jesu o bolelela pele kaga go senngwa mo go maswe le go feta ga losika lwa gagwe ka go bo lo na le boikepo jo bogolo. Go senngwa mono go diragala mo e ka nnang dingwaga tse 38 moragonyana, ka 70 C.E.

Fa a tswelela ka go ba kgala, Jesu a re: “Go latlhèga lona ba molaō: ka lo tlositse sekopololō sa kicō; lona ka losi ga loa ka loa tsèna, me le ba ba rileñ baa tsèna, lo ba kgoreleditse.” Baitseanape ba Molao ba na le boikarabelo jwa go tlhalosetsa batho Lefoko la Modimo, go phutholola se lo se bolelang. Mme ba palelwa ke go dira seno mme ebile ba thibela batho tshono ya gore ba ka tlhaloganya.

Bafarasai le baitseanape ba Molao ba gaketse thata ka ntlha ya go bo Jesu a ba senola. Fa a tswa mo ntlong eo, ba simolola go mo ganetsa ka maatla le go mmotsakaka dipotso. Ba leka go mo direla serai sa gore a bue sengwe seo ba ka dirang gore a tshwarwe. Luke 11:37-54; Duteronome 14:22; Mika 6:8; 2 Ditihalō 24:20-25.

▪ Ke ka ntlhayang fa Jesu a ile a kgala Bafarasai le baitseanape ba Molao?

▪ Ke merwalo efe e borramolao ba e pegang mo bathong?

▪ “Mothèō oa lehatshe” ke leng?