Kgaolo 5

Jesu O Tsholetswe Kae Mme Leng?

MMUSIMOGOLO wa Pusokgolo ya Roma, ebong Kaesara Augustus, o ntshitse taolo ya gore mongwe le mongwe o tshwanetse go boela kwa toropong e a tsaletsweng kwa go yone go ya go kwadisiwa. Jalo Josefa o ya kwa lefelong le a tsaletsweng kwa go lone, eleng toropo ya Bethelehema.

Batho ba bantsi ba teng koo kwa Bethelehema go ikwadisa, mme lefelo le le losi fela le Josefa le Maria ba ka le bonang go nna mo go lone ke bojelo jwa dipitse. Jesu o tsalelwa fano, koo diesela le diphologolo tse dingwe di tlhatlhelwang teng. Maria o mo phutha ka dikatana tsa matsela a bo a mo robatsa mo bojelong, lefelo leo le bolokang dijo tsa diphologolo.

Eleruri e ne e le ka kaelo ya Modimo go bo Kaesare Augustus a ile a dira molao wa ikwadiso. Seno se ne sa kgonisa gore Jesu a tsalelwe kwa Bethelehema, motse o Dikwalo bogologolo di neng tsa bolelela pele gore e ne e tla nna lefelo le mmusi yo o solofeditsweng o neng a tla tsholelwa kwa go lone.

Abo jono e le bosigo jo bo botlhokwa jang ne! Kwa sekgweng kwa madisong setlhopha sa badisa se phatsimelwa ke lesedi le legolo mo ntlheng tsotlhe. Ke kgalalelo ya ga Jehofa! Mme moengele wa ga Jehofa o ba raya a re: “Se boiheñ; gonne, bōnañ, ke lo lereditse mahoko a a molemō, a boitumèlō yo bogolo, yo bo tla dihalèlañ batho botlhe. Gonne, gompiyeno, mo motsiñ oa ga Dafide, lo tsalecwe Mmoloki, eo e leñ Keresete Morèna. Me se, e tla nna seshupō mo go lona; lo tla hitlhèla ñwanyana a phuthecwe ka matsela, a letse mo boyeloñ yoa dipitse.” Ka bofefo fela baengele ba bantsi gape ba a bonala ba bo ba opela ba re: “Kgalalèlō e nnè go Modimo kwa bogodimodimoñ, le kagishō e nnè mo lehatshiñ mo bathuñ ba o kgatlhègañ thata mo go bōnè.”

Fa baengele ba emelela, badisa ba raana ba re: “A re eeñ hèla yana kwa Bethelehema, re bonè selō se, se se dihetseñ, se Morèna o se re itsiseñ.” Ba itlhaganelela go ya koo mme ba fitlhela Jesu fela fa moengele a neng a rile ba tla mo fitlhela teng. Fa badisa ba tlhalosa se moengele o se ba boleletseng, botlhe ba ba utlwang ka gone ba a gakgamala. Maria ene o boloka dipolelo tseno tsotlhe le go di ngomaela mo pelong ya gagwe.

Batho ba bantsi gompieno ba dumela gore Jesu o ne a tsalwa ka December 25. Mme December ke lobaka lwa dipula, lo lo tsididi kwa Bethelehema. Badisa ba ne ba ka se bo ba le kwa madisong bosigogare ba na le matsomane a bone mo nakong eo ya ngwaga. Gape, go ne go sa bonale fa Kaesara wa Roma a ne a ka batla gore batho bao ba neng ba setse ba sekametse mo go mo tsuologeleng ba tsamaye loeto lo loleele mo marigeng a a gaupanyang go ya go ikwadisa. Go bonala he fa Jesu a ile a tsholwa nako nngwe mo tshimologong ya gwetla wa ngwaga eo. Luke 2:1-20; Mika 5:2.

▪ Ke goreng Josefa le Maria ba ne ba etela kwa Bethelehema?

▪ Ke selo sefe se se gakgamatsang se se neng sa diragala mo bosigong jo Jesu a tsetsweng ka jone?

▪ Re itse jang gore Jesu a ka bo a sa tsholwa ka December 25?