Kgaolo 78

Nnang Lo Iketleeditse!

FA A sena go tlhagisa boidiidi jwa batho kaga go nna pelotshetlha, a bo a tlhagisa barutwa ba gagwe kgatlhanong le go itshwenya ka dilo tse di bonalang ka mo go sa tlhokafaleng, Jesu o kgothatsa jaana: “Lecomanyane, se boiheñ; gonne Rra eno o natehèlwa ke go lo naea bogosi.” Ka go rialo o senola gore ke batho ba palo e potlana fela (bao morago ba neng ba tlhalosiwa ba le 144 000) bao ba tla tsenang mo Bogosing jwa selegodimo. Bontsi jwa batho bao ba amogelang botshelo jo bosakhutleng ba tla nna babusiwa ba selefatshe ba Bogosi joo.

A mpho e kgolo ruri, “bogosi”! Fa a ne a tlhalosa kafa barutwa ba tshwanetseng go arabela ka gone fa ba bo amogela, Jesu o kgothatsa jaana: “Rekisañ tse lo nañ nacō, me lo ntshè maacō.” Ee, ba tshwanetse go dirisa dikhumo tsa bone go thusa ba bangwe semoyeng mme ka gone ba age “lohumō kwa magodimoñ, lo lo sa tlhaeleñ.”

Morago Jesu o kgothaletsa barutwa ba gagwe go nna ba iketleeleditse go boa ga gagwe. A re: “A dithèka tsa lona di tlañwe, le dipōnè tsa lona a di tukè: Le lona lo nnè yaka batho ba ba lebeletseñ morèna oa bōnè, ha a boea kwa modihoñ oa nyalō: go re, e tle e re a tla a kgwanyakgwanya, ba mmulèlè ka boheho. Go segō batlhanka bauō, ba e tla reñ morèna oa bōnè a tla, a ba hitlhèle ba lebeletse; amarure, kea lo raea, O tla ikokwaèla, a ba dudisa go ya, me o tla tla a ba neèla diyō.”

Mo setshwantshong seno, go iketleeletsa ga batlhanka go boa ga morena wa bone go bontshiwa ke go tsholetsa ga bone diaparo tsa bone tse ditelele le go di tlama ka meitlamo ya bone le go tswelela ba dira ditiro tsa bone go fitlhelela go nna bosigo ba bonesitse ka dipone tse di tladitsweng ka lookwane lo lontsi. Jesu o tlhalosa jaana: ‘Fa morena a ka goroga ka tebelo ya bobedi [go tloga mo e ka nnang ka nako ya borobongwe go ya go bosigogare], lefa e le ka ya boraro [go tloga bosigogare go ya mo e ka nnang ka nako ya boraro mo mosong], mme a ba fitlhela ba iketleeditse, a bo ba ka itumela jang ne!’

Morena o duela batlhanka ba gagwe ka tsela e e sa tlwaelesegang. O dira gore ba nne fa lomating lwa bojelo a ba a simolola go ba direla. O ba tshwara, eseng jaaka makgoba, mme jaaka ditsala tse di ikanyegang. Abo e le tuelo e e molemo jang ne ya go tswelela ga bone ba direla mong wa bone mo bosigong jotlhe fa ba mo letetse gore a bowe! Jesu o digela jaana: “Le lona, etleetsègañ; gonne Morwa Motho o tla ka nakō [e] lo sa e gopoleñ.”

Jaanong Petere o botsa jaana: “Morèna, sechwanchō se, a u se bua le rona, kgotsa u se bua le botlhe hèla?”

Go na le go araba ka tlhamalalo, Jesu o neela setshwantsho se sengwe. “Molebalebi eo o ikanyègañ, eo o botlhale,” o botsa jalo, “e be e le mañ, eo morèna oa gagwè o tla mo laodisañ ba ntlo ea gagwè, gore a ba abèlè diyō mo lobakeñ lo e leñ lōna? Go segō motlhanka eouō, eo e tla reñ morèna oa gagwè a tla, a mo hitlhèlè a nntse a diha yalo. Amarure kea lo raea, o tla mmaea molaodi oa dilō cotlhe tse o nañ nacō.”

“Morèna” ka phepafalo ke Jesu Keresete. “Molebalebi” o tshwantshetsa “lecomanyane” la barutwa jaaka setlhopha, mme “ba ntlo ea gagwè” ba lebisitse go sone setlhopha seno sa ba ba 144 000 bao ba amogelang Bogosi jwa selegodimo, mme tlhaloso eno e tlhomolola tiro ya bone jaaka batho ka bongwe. “Dilō cotlhe” tseo molebalebi yo o ikanyegang a tlhomiwang go di tlhokomela ke dilo tsa segosi tsa morena mo lefatsheng, tseo di akareletsang babusiwa ba selefatshe ba Bogosi joo.

Fa a tswelela ka setshwantsho seo, Jesu o bontsha gore go ka nna ga kgonega gore maloko otlhe a molebalebi yoo, kana setlhopha sa motlhanka, ba seka ba ikanyega botlhe, a tlhalosa jaana: “Ha motlhanka eouō a ka ithaea mo peduñ ea gagwè, a re, Morèna oa me o diegile go tla; me a simolola go betsa batlhanka le malata, le go ya le go nwa, le go tagwa; Morèna oa motlhanka eouō o tla tla ka letsatsi ye o sa mo lebeleleñ ka yeōna, . . . me o tla mo kgwathisa thata.”

Jesu o lemotsha gore go tla ga gagwe go kgoberile Bajuda, jaaka ba bangwe ba amogela dithuto tsa gagwe mme ba bangwe ba di gana. Pelenyana mo dingwageng tse di fetang tse tharo, o ne a kolobediwa mo metsing, mme jaanong kolobetso ya gagwe ya loso e ntse e atamela ka bonako go ya bokhutlong, mme jaaka a bolela: “Ke pitlaganye yañ go tsamaee go dihale!”

Morago ga a sena go lebisa barutwa ba gagwe mafoko ano, Jesu o bua le boidiidi jwa batho gape. O hutsafadiwa ke go gana ga bone ka botlhogoethata go amogela bosupi jo bo phepafetseng jwa gore ke mang le botlhokwa jwa gone. “Ea tle e re lo bōna leru le tlhatloga kwa bophirimatsatsi,” o lemotsha jalo, “lo tlo lo re, Go tla mookodi; me go dihale yalo. Me e re lo bōna phehō ea borwa e hoka, lo re, Go tla nna mogote o o hisañ; me go dihale. Baitimokanyi ke lona, lo itse go phutholola pōnalō ea legodimo le ea lehatshe; me go nntse yañ lo sa itse go phutholola motlha ono?” Luke 12:32-59.

▪ Ke ba le kae ba ba dirang “lecomanyane,” mme ba amogela eng?

▪ Jesu o gatelela jang botlhokwa jwa gore batlhanka ba gagwe ba nne ba iketleeleditse?

▪ Mo setshwantshong sa ga Jesu, “morèna,” “molebalebi,” “ba ntlo ea gagwè,” le “dilō cotlhe” ke bomang?