Kgaolo 82

Jesu o Leba Gape Kwa Jerusalema

KA BONAKONYANA fela Jesu o wela gape mo tseleng, a tsamaya a ruta mo metseng e megolo le mo metsaneng yotlhe. Kafa go lebegang ka gone o mo kgaolong ya Perea, kwa moseja ga Noka ya Joredane fa o le kafa Judea. Mme o lebile kwa Jerusalema.

Botlhajana jwa Bajuda jwa gore ke batho ba palonyana e e rileng fela ba ba tla bonang poloko e ka tswa e le jone jo bo dirang gore monna yono a botse a re: “Morèna, ba ba bolokwañ a ba babōtlana?” Fa a araba, Jesu o dira gore batho ba akanye ka se se tlhokafalang gore motho a bolokwe: “Ganèlañ [ke gore, lwelang, kana ipateleleng] go tsèna ka kgōrō e e pitlaganyeñ.”

Maiteko a a ntseng jalo a magolo a tshwanetse go dirwa ka potlako “gonne kea lo raea, bantsi,” Jesu o a tswelela, “ba tla batla go tsèna, me ba tla retelèlwa.” Ke ka ntlhayang fa ba tla retelelwa? O tlhalosa gore ‘e tla re fa mong wa ntlo a setse a eme a tswala setswalo mme batho ba ema kafa ntle mme ba simolola go kgwenyakgwenya, ba re, “Morèna, Morèna, re bulèlè,” o tla re: “Ga ke lo itse kwa lo cwañ gōna; ntlogèlañ lona lotlhe badihi ba tshiamololō!”’

Go bonala fa ba ba tswaletsweng kwa ntle ba itlela ka nako e e leng ya bone fela. Mme ka nako eo setswalo sa tshono se tswetswe ebile se lotletswe. Fa ba ne ba batla go tsena ba ne ba tshwanetse go bo ba tlile go sale gale, lemororo gongwe nako eo e ne e sa ba siamela go dira jalo. Eleruri, botlhe ba ba tlhokomologang go dira kobamelo ya ga Jehofa selo se segolo mo botshelong ba tlile go diragalelwa ke dilo tse di hutsafatsang!

Bajuda bao Jesu a romilweng go tla go ba rerela, gantsi, ba ile ba palelwa ke go dirisa tshono e kgolo ya go ikamogelela paakanyetso ya Modimo ya poloko. Jalo Jesu o bolela gore ba tla lela le go phuranya meno fa ba latlhelwa kwa ntle. Mo letlhakoreng je lengwe, batho ba ba tswang kwa “botlhabatsatsi, le kwa bophirimatsatsi, le kwa botsheka, le kwa borwa,” ee, ba ba tswang mo merafeng yotlhe, “ba tla dula mo bogosiñ yoa Modimo.”

Jesu o a tswelela: “Go na le ba moragō [batho bao eseng Bajuda ba ba nyadiwang, mmogo le Bajuda ba ba lebelwang kwa tlase] ba ba tla nnañ ba pele, go bile go na le ba pele [eleng Bajuda ba ba humileng ebile e le ba maemo a a kwa godimo mo bodumeding] ba ba tla nnañ ba moragō.” Go nna ba morago go raya gore batho ba ba ditshwakga, ba ba sa lebogeng bao ga ba kitla ba nna gone mo Bogosing jwa Modimo gotlhelele.

Bafarasai jaanong ba tla kwa go Jesu mme ba mo raya ba re: “Cwa mono, u tsamaeè, gonne Herode [Antipase] o rata go bo a ka gu bolaea.” E ka nna ya bo e le gore Herode ke ene yo o simolotseng go gasa kgang eno e e seng ya boammaaruri a dira gore Jesu a tswe mo lefelong leo. Herode o ka nna a bo a ne a boifa gore o tloga a nna le seabe se sengwe gape mo losong lwa moperofeti yo mongwe gape wa Modimo fela jaaka a ne a bolaya Johane Mokolobetsi. Mme Jesu o raya Bafarasai a re: “Eañ, lo reè phokoyè euō, lo re, Bōna, ke kgoromeletsa badimo ntlè, ke hodisa gompiyeno le ka moshō, me e tla re ka letsatsi ya boraro ke be ke dihwa boitekanèlō.”

Morago ga go wetsa tiro ya gagwe koo, Jesu o tswelela ka loeto lwa gagwe lwa go ya Jerusalema ka go bo, jaaka a tlhalosa, “ga go kake ga nna, go re, moperofeti o ka shwèla kwa ntlè ga Yerusalema.” Ke ka ntlhayang fa go ne go ka lebelelwa gore Jesu o ne a tla bolaelwa mo Jerusalema? Ke ka go bo Jerusalema ke motsemogolo, koo maloko a a 71 a kgotlakgolo ya Sanehederine a leng gone le koo ditlhabelo tsa diphologolo di direlwang gone. Ka jalo, go tla bo go sa tshwanela gore “Kwana [oa] Modimo” a bolaelwe gope fela kwantle ga Jerusalema.

“Yerusalema wè! Yerusalema wè! wèna eo u bolaeañ baperofeti, u kgobotletsa ka mayè ba ba roñwañ kwa go wèna,” Jesu o bua jalo ka khutsafalo, “ke ka bo ke phuthile bana ba gago mmōgō gantsi yañ, yaka koko e tle e phuthèle mamphorwana a eōna mo diphukeñ tsa eōna, me lo ganne. Bōna, ntlo ea lona lo e tlogelecwe e le letlōtla hèla.” Morafe oo o ne o hutsitswe, ka baka la go gana Morwa Modimo!

Jaaka fa Jesu a tswelela go leba Jerusalema, o lalediwa kwa ntlong ya kgosi ya Bafarasai. Ke Sabata, mme batho ba mo etse tlhoko fela thata, ereka go na le monna mongwe foo yo o bolawang ke bolwetse jwa bophogophogo, eleng go tlala metsi gongwe mo mabogong a gagwe le mo dinaong. Jesu o bua le Bafarasai le baitse ba Molao ba ba foo, ka go ba botsa a re: “A go lètlèlecwe go hodisa ka letsatsi ya sabata, kgotsa nya?”

Ga go ope yo o buang sepe. Jalo Jesu o fodisa monna yoo a bo a mo laela gore a tsamaye. Go tswa foo o botsa ka go re: “Ke ohe oa lona eo e ka reñ ha a na le esela, leha e le kgomo, ha e wetse mo sedibeñ, me a se ke a akoha a ea go e ntsha hèla ka letsatsi ya sabata?” Gape, ga go ope yo o mo arabang. Luke 13:22–14:6; Yohane 1:29.

▪ Ke eng seo Jesu a bontshang gore se a tlhokafala go bona poloko, mme ke ka ntlhayang fa ba bantsi ba tswaletswe kwa ntle?

▪ Ba “moragō” ba ba tla nnang ba pele ke bomang, le ba “pele” ba ba tla nnang ba morago?

▪ Lebaka e ka tswa e ne e le lefe la gore go bolelwe gore Herode o ne a batla go bolaya Jesu?

▪ Ke ka ntlhayang fa go ne go sa tshwanela gore moperofeti a bolaelwe ka kwa ntle ga Jerusalema?