Kgaolo 83

O Laleditswe ke Mofarasai Mongwe

JESU o santse a le kwa legaeng la Mofarasai mongwe wa maemo a a kwa godimo, mme o sa tswa go fodisa monna mongwe yo o neng a bolawa ke bolwetsi jwa bophogophogo. Jaaka a elatlhoko baengkaene ba kgetha manno a a kwa pele kwa moletlong oo wa dijo, o ruta thuto nngwe kaga boikokobetso.

“E re ha moñwe a gu laleditse modihō oa nyalō,” Jesu o gakolola jalo, “u seka ua dula mo mannoñ a a kwa pele; e se re kgotsa moñwe eo o tlotlègañ bogolo go wèna a ba a laledicwe ke èna; Me eo o gu laleditseñ naè a tla, a gu raea, a re, Shutèla monna eo; me hoñ u simolole go tsaea setulō se se kwa moragōragō ka ditlhoñ.”

Jalo Jesu o gakolola ka go re: “E re ha u laledicwe, u eè u tseè setulō se se kwa moragōragō; gore, e tle e re eo o gu laleditseñ a tla, a gu rèe, a re, Tsala, dulèla kwa pele; hoñ u tla dihana le tlotlō ha pele ga ba ba dutseñ ba ya nau.” Fa Jesu a digela a re: “Gonne moñwe le moñwe eo o ikgodisañ o tla ñōtlohadiwa; me eo iñōtlahatsañ o tla godisiwa.”

Morago ga moo, Jesu o bua le Mofarasai yo o mo laleditseng a ba a tlhalosa kafa a ka dirang ka teng moletlo wa dijo oo eleruri o tlotliwang ke Modimo. “E re ha u diha modihō oa motshegare, leha e le oa maitsiboea, u se ka ua laletsa ditsala tsa gago, leha e le bana ba ga rrago, leha e le ba losika loa gago, leha e le ba ga eno ba ba humileñ; e se re kgotsa le bōnè, ba ba ba gu bitsa, me tuèlō e gu dihalèle. Me e re u diha modihō, laletsa bahumanegi, le digōlè, le batlhotsi, le dihohu; Me u tla nna segō; gonne bōnè ga ba na se ba ka gu duèlañ ka shōna.”

Go baakanyetsa ba ba seng sego moletlo wa go nna jalo wa dijo go tla itumedisa mmaakanyi wa one ka gonne, jaaka Jesu a tlhalosetsa molaletsi wa gagwe, “U tla duèlwa mo go cogeñ ga basiami.” Tlhaloso ya ga Jesu kaga moletlo ono wa dijo e gakolola molalediwa ka ene mongwe wa mofuta o mongwe wa moletlo wa dijo. “Go segō eo o tla yañ senkgwè mo bogosiñ yoa Modimo,” molalediwa yoo a rialo. Lefa go le jalo, ga se botlhe bao ba tseelang kwa godimo tebelelo e e itumedisang eo, jaaka Jesu a tswelela go bontsha ka setshwantsho.

“Monna moñwe o kile a diha modihō o mogolo oa maitsiboea, me a laletsa batho ba le bantsi Me . . . a roma motlhanka oa gagwè a ea go raea ba ba laledicweñ, go re, Tlaañ, gonne dilō cotlhe di baakancwe. Me botlhe hèla ba ea seōpō señwe, ba simolola go ipata. Oa ntlha a mo raea, a re, Ke rekile sebata sa lehatshe, me ke chwanetse go ea go se bōna; kea gu rapèla, a ke ichwarèlwè, ke ipoletse. Me eo moñwe a re, Ke rekile dikgomo tsa boyokwe ba le batlhano, me ke ea go di leka; kea gu rapèla, a ke ichwarèlwè, ke ipoletse. Me eo moñwe a re, Ke nyetse mosadi, ke gōna ke sa kakeñ ka ea.”

A diipato tse di sa utlwaleng jang ne! Gantsi tshimo kana diruiwa di tlhatlhobiwa pele ga di rekiwa, jalo ga go tlhokege ka gope gore di sekasekiwe morago. Ka mo go tshwanang, go nyala ga motho ga go a tshwanela go mo thibela go amogela taletso e e botlhokwa jalo. Jalo fa morena wa bone a utlwa ka diipato tseno, o a galefa a bo a fa motlhanka wa gagwe taolo e e reng:

“Tsamaea ka bonakō, u cwèlè kwa mebileñ le mo diherwaneñ tsa motse, me u lere kwano mo teñ bahumanegi, le digōlè, le dihohu, le batlhotsi. Me motlhanka a re, Morèna, se u se laotseñ se dihilwe, me bonnō bo sa le gōna. Me morèna a raea motlhanka, a re, Cwèla kwa ditseleñ tse dikgolo, le kwa dikgoreñ, me u ba kgōnè go tsèna, gore ntlo ea me e tlalè . . . Ga go opè oa banna bauō ba ba laledicweñ eo o tla isañ modihō oa me mo ganoñ.”

Setshwantsho seno se tlhalosa seemo sefe? Ebu, “morèna” eo o dirileng moletlo wa dijo o emela Jehofa Modimo; “motlhanka” yo o laletsang, ke Jesu Keresete; mme “modihō o mogolo oa maitsiboea,” ke ditshono tsa go tshwanelegela Bogosi jwa magodimo.

Bao ba neng ba amogela taletso lantlha ya go tshwanelegela Bogosi e ne e le, pele ga batho botlhe, baeteledipele ba bodumedi jwa Sejuda ba motlha wa ga Jesu. Lefa go ntse jalo, ba ne ba gana taletso eo. Ka gone labobedi, segolobogolo go simolola ka Pentekosete ya 33 C.E., go ne ga lalediwa batho ba ba nyatsegang le ba maemo a a kwa tlase ba morafe wa Bajuda. Mme go ne ga seka ga arabela ba ba lekaneng go tlatsa manno a a 144 000 mo Bogosing jwa Modimo jwa selegodimo. Jalo laboraro ebile e le la bofelo ka 36 C.E., eleng dingwaga di le tharo le sephatlo moragonyana, go ne ga lalediwa batho ba ba sa rupang bao eseng Bajuda, mme go phuthiwa ga batho bao go ne ga tswelela go fitlha mo motlheng wa rona. Luke 14:1-24.

▪ Jesu o ruta thuto efe kaga boikokobetso?

▪ Molaletsi o ka dira moletlo wa dijo o o amogelwang ke Modimo jang, mme ke ka ntlhayang fa o tla mo itumedisa?

▪ Ke ka ntlhayang fa diipato tsa balalediwa di sa utlwale?

▪ Ke eng seo se tshwantshediwang ke setshwantsho sa ga Jesu sa “modihō o mogolo oa maitseboea”?