Ka yone nako eo, “morwawè eo mogolo a bo a le kwa nageñ.” A o ko o lebelele go bona gore o ka lemoga gore o emela mang ka go reetsa kgang eno yotlhe. Jesu o bua jaana ka morwa yo mogolo: “Ea re a tla a atamèla ntlo, a utlwa kopèlō le pinō. Me a bitsa moñwe oa batlhanka, a mmotsa, a re, Ke eñ se se dihwañ yana? Me a mo raea, a re, Monnao o tsile; mme rrago o tlhabile namane e e nonneñ, ka go bo a mmonye a itekanetse hèla, Me a nna bogale, a gana go tsèna: me rragwè a cwèla kwa go èna, a mo rapèla. Me a hetola rragwè, a re, Bōna, ke gu dihetse ka dinyaga tse dintsi tse, le gōna ga ke e se nke ke tlole taolō ea gago gopè: leha go nntse yalo, ga u e se o ko u nnee leha e le potsane, gore ke dihè mokete le ditsala tsa me, Me morwao eo, eo o shupuditseñ dilō tsa gago le baakahadi, o rile a a nntse a tla hèla, ua mo tlhabisa namane e e nonneñ.”

Ke bomang, go tshwana le morwa mogolo, yo o ileng a ngongoregela go utlwelwa botlhoko le go tlhokomelwa ga baleofi? A ga se bakwadi le Bafarasai? Ereka Jesu a buile setshwantsho seno ka ntlha ya go bo ba ne ba mo baya molato wa gore o amogela baleofi, go phepafetse gore ke bone ba ba emelwang ke morwa yo mogolo.

Mme barwa ba babedi bano ba emela bomang mo motlheng wa segompieno? E tshwanetse ya bo e le bao ba ileng ba batla go itse mo go lekaneng ka boikaelelo jwa ga Jehofa mo ba ileng ba nna le motheo wa go nna le kamano le ene. Morwa yo mogolo o emela bangwe ba maloko a “lecomanyane,” kana ‘phuthego ya batsalwapele ba ba kwadilweng kwa legodimong.’ Batho ba ne ba na le boikutlo jo bo tshwanang le jwa morwa yoo yo mogolo. Ba ne ba sa eletse go amogela ba setlhopha sa selefatshe, eleng “dinku di sele,” bao ba neng ba ikutlwa gore ba ne ba tlosa tlhokomelo go tswa mo go bone.