Kgaolo 94

Botlhokwa jwa go Rapela le go Ikokobetsa

PELENYANA, fa a ne a le kwa Judea, Jesu o ne a bua setshwantsho kaga botlhokwa jwa go rapela ka metlha. Jaanong, mo loetong lwa gagwe lwa bofelo lwa go ya kwa Jerusalema, o gatelela gape botlhokwa jwa go sa lese go rapela. Go lebega Jesu a santse a le mo Samaria kana kwa Galilea fa a bolelela barutwa ba gagwe setshwantsho seno gape:

“E kile ea re mo motsiñ moñwe, ga bo go le moatlhodi eo o sa boiheñ Modimo, le motho a sa mo re sepè; Me ga bo go le mosadi eo o motlhōlagadi mo motsiñ ouō; me a nna a ea kwa go èna gantsi, a re, Ntshèka mo go eo o mpatikañ. Me a nna a gana ka lobaka: me ea re kwa moragō a ithaea, a re, Leha ke sa boihe Modimo, le motho ke sa mo re sèpe; Leha go nntse yalo, ereka motlhōlagadi eo, a nchwenya, ke tla mo sèkèla, gore a se ka a mphatlola tlhōgō ka go boeaboea ga gagwè.”

Jesu jaanong o bontsha gore kgang ya gagwe e dira jang, ka go re: “Utlwañ se moatlhodi eo o sa siamañ o se buañ. Me Modimo ōna, a ga o ketla o sèkèla ba e leñ baitshenkedwi ba ōna, ba ba goèlañ kwa go ōna motshegare le bosigo, me o bile o pelotelele kaga bōnè.”

Jesu ga a reye gore Jehofa Modimo o tshwana ka tsela epe fela le moatlhodi yoo yo o sa siamang. Go na le moo, fa e le gore le eleng moatlhodi yo o sa siamang o tla arabela fa a kopiwa gantsintsi, ga go na pelaelo ya gore Modimo, yo o tshiamo ebile o le molemo thata, o tla arabela fa batho ba gagwe ba sa kgaotse go mo rapela. Jalo Jesu o tswelela jaana: “Kea lo bolèlèla, [Modimo] O tla ba sèkèla ka bonakō.”

Gantsi batho ba maemo a kwa tlase le ba ba humanegileng ga ba direlwe tshiamo, fa bao ba nnang le maatla le ba ba humileng gantsi e le bone ba ba ratiwang. Lefa go ntse jalo, Modimo ga o kitla o tlhomamisa fela gore baikepi ba atlholwa ka tshiamo mme gape o tla tlhomamisa gore batlhanka ba gagwe ba tsholwa ka tsela e e siameng ka go ba naya botshelo jo bosakhutleng. Mme ke batho ba ba kae bao ka mmatota ba dumelang gore Modimo o tla dira gore tshiamiso e diragadiwe ka bonako?

A bua segolobogolo ka maatla a thapelo ao a amanang le tumelo, Jesu o botsa jaana: “E tla re Morwa Motho a tla, a o tla hitlhèla tumèlō mo lehatshiñ?” Lefa potso eno e tlogetswe e sa arabiwa, e ka tswa e kaya gore tumelo e e ntseng jalo e tla bo e le nnye fa Keresete a tla ka maatla a Bogosi.

Gareng ga bao ba reeditseng Jesu go na le bao ba neng ba ikutlwa ba tlhomamisegile gore ba na le tumelo. Ba itshepa ka bobone gore ba tshiamo, mme ba lebela ba bangwe kwa tlase. Bano ba ka nna ba bo ba kopanyeletsa le eleng bangwe ba barutwa ba ga Jesu. Jalo o lebisa setshwantsho se se latelang mo go bone:

“Banna ba le babedi ba kile ba ea tempeleñ, ba ea go rapèla; moñwe e le Mofarisai, eo moñwe e le mokgethisi. Mofarisai ènè, a èma, a ithapèlèlèla yana, a re, Modimo, kea gu leboga ka go bo ke sa nna yaka batho ba bañwe, ba le baikgagapeledi, le basiamolodi, le ba boaka, kgotsa yaka mokgethisi eo. Ke tle ke ikitse go ya gabedi ka weke moñwe le moñwe; le sa boshomè sa cotlhe tse ke di bapalañ ke se ntshe.”

Bafarasai ba itsege ka go itshupa ga bone phatlalatsa ba le tshiamo go kgatlha ba bangwe. Malatsi a a tlwaelegileng a go itima dijo ga bone ao ba a itlhometseng ke Mosupologo mongwe le mongwe le Labone mongwe le mongwe, mme ba ne ba ntsha tsa bolesome ba sa tlhaetse sepe fa ba ntsha le eleng ditlhatsana tse dinnye tsa tshimo. Dikgwedi di se kae pele ga foo, go nyenyefatsa ga bone batho ba ba tlwaelegileng go ile ga bonala kwa Moletlong wa Diobo fa ba ne ba re: “Batho ba ba bantsi ba ba sa itseñ molaō, [ke gore, diphuthololo tsa one tsa Bafarisai] ba hutsegile.”

Fa a tswelela ka setshwantsho sa gagwe, Jesu o bua jaana ka motho yo o ‘hutsegileng’ yoo: “Me mokgethisi èna, a èmèla kwa kgakala, le e leñ matlhō a se ka a a lelaletsa legodimoñ, me a ititaea sehuba, a re, Modimo, nkutlwèla botlhoko, nna eo ke leñ moleohi.” Ka gonne mokgethisi a boletse ditlhaelo tsa gagwe ka boikokobetso, Jesu a re: “Kea lo bolèlèla, Monna eo, o hologetse kwa tluñ ea gagwè a siamisicwe bogolo go eo moñwe: gonne moñwe le moñwe eo o ikgodisañ o tla ñōtlahadiwa; me eo o iñōtlahatsañ, o tla godisiwa.”

Ka gone Jesu o otlelela gape botlhokwa jwa go ikokobetsa. Ka go bo ba godiseditswe mo tikologong e e tlhotlhelediwang ke Bafarasai bao ba iponang gore ba tshiamo le bao ka metlha ba gatelelang thata maemo le boemo jo bo kwa godimo, ga go gakgamatse gore le eleng barutwa ba ga Jesu ba amiwa ke seno. Lefa go le jalo, abo Jesu a ba ruta thuto e e molemo jang ne ya boikokobetso! Luke 18:1-14; Yohane 7:49.

▪ Ke ka ntlhayang fa moatlhodi yo o sa siamang a reetsa kopo ya motlholagadi, mme ke thuto efe eo Jesu a e rutang ka setshwantsho seno?

▪ Ke tumelo efe eo Jesu a tla e batlang fa a goroga?

▪ Jesu o ne a lebisa setshwantsho sa gagwe kaga Mofarasai le mokgethisi go bomang?

▪ Ke boikutlo bofe jwa Bafarasai jo bo tshwanetseng jwa tilwa?