Kgaolo 19

O Ruta Mosadi wa Mosamaria

FA BA le mo tseleng go tswa Judea go ya Galilea, Jesu le barutwa ba gagwe ba ralala kgaolo ya Samaria. Ka ntlha ya letsapa la mosepele, mo e ka nnang ka sethoboloko ba ema ba ikhutsa fa sedibeng se se gaufi le motse wa Sikara. Sediba seno se ne se ile sa epiwa makgolokgolo a dingwaga pele ke Jakobe, mme se santse se le gone nako kgolo ke eno, gaufi le motse wa motlha wa segompieno wa Nablus.

Fa Jesu a ntse a ikhuditse foo, barutwa ba gagwe ba tsena mo motseng go ya go reka dijo. Fa mosadi wa Mosamaria a tla go ga metsi, o mo kopa a re: “A u ko o nnosè metse.”

Bajuda le Basamaria ka kakaretso ga ba na ditirisano mmogo dipe ka ntlha ya go tlhaolana mo go mo mading a bone. Jalo, ka kgakgamalo, mosadi o mmotsa a re: “Go nntse yañ, wèna u re u le Moyuda, u lōpa go nwa mo go nna ke le mosadi oa Samaria?”

Jesu o mo araba ka go re, “Ha u ka bo u nu u itse . . . eo o gu raeañ a re, A u ko u nnosè; u ka bo u lopile èna, me o ka bo a gu nositse metse a a tshedileñ.”

Mosadi yoo o araba ka go re, “Morèna, ga u na se u gañ ka shōna, me sediba se boteñ: me metse a a tshedileñ auō, u a tsere kae? A u mogolo go heta rra echo Yakobe, eo o re neileñ sediba se, le èna a nwa mo go shōna, le bomorwawè, le dikgomo tsa gagwè.”

“Moñwe le moñwe eo o nwañ metse a, o tla ba a nyōrwa gapè,” Jesu o lemotsha jalo. “Me leha e le mañ eo o tla nwañ metse a ke tla a mo nosañ, ga a ketla a tlhōla a nyōrwa gopè; me metse a ke tla a mo nosañ, a tla cwa mocwedi oa metse mo go èna, a a cwèlèlañ botsheloñ yo bo sa khutleñ.”

“Morèna, a u ko o nnosè metse auō, gore ke se ka ka tlhōla ke nyōrwa, leha e le go tsamaea mosepele o molele oa go tla kwano go ga,” mosadi yoo o arabela jalo.

Jaanong Jesu o mo raya a re: “Ea u bitsè monna oa gago, me u tlè kwano.”

“Ga ke na monna,” o araba jalo.

Jesu o dumalana le polelo ya gagwe. “U buile sentlè, ua re, Ga u na monna: Gonne u kile ua nu u na le banna ba le batlhano; me eo u nañ naè gompiyeno, ga se monna oa gago: m[e] u boletse ka boamarure.”

“Morèna, kea lemoga ha u le moperofeti,” mosadi o bolela jalo ka kgakgamalo. O senola kgatlhego ya gagwe ya semoya, a lemotsha gore Basamaria ba “ōbama mo thabeñ [ya Gerisima, e e leng gaufi] me lona [Bajuda] loa re, Yerusalema ke gōna kwa batho ba chwanetseñ go ōbama gōna.”

Lefa go le jalo, Jesu o supa gore lefelo la kobamelo ga se selo sa botlhokwa. O bolela gore, “Lobaka loè tla, le gompiyeno lo hitlhile, lo baōbamedi ba amarure ba tla ōbamelañ Rara ka lōna, ka Mōea le ka boamarure: gonne Rara o batla ba ba nntseñ yalo go nna baobamedi ba gagwè. Modimo ke Mōea, me ba ba o ōbamèlañ ba na le go o ōbamèla ka mōea le ka boamarure.”

Mosadi yono o kgatlhega fela thata. A re, “Kea itse ha Mesia aa tla, eo o bidiwañ Keresete: e tla re ha èna a tsile, o tla re bolèlèla dilō cotlhe.”

Jesu a re, “Nna eo ke buañ nau, ke nna èna.” A ko o akanye ka gone tlhe! Mosadi yono yo o tlileng nokeng go le motshegare o mogolo, gongwe e le go tila go kopana le basadi ba motse oo bao ba mo nyaletsang tsela ya gagwe ya botshelo, o bontshiwa botsalano ka tsela e e gakgamatsang ke Jesu. O mmolelela puo phaa ka seo a iseng a ke a se bolelele ope phatlalatsa. Diphelelo e nna dife?

Basamaria Ba Le Bantsi Ba a Dumela

Fa ba goroga ba tswa kwa Sikara ba tshotse dijo, barutwa ba fitlhela Jesu a le fa sedibeng sa ga Jakobe se ba mo tlogetseng fa go sone, le seo jaanong a buang le mosadi wa Mosamaria a le fa go sone. Fa barutwa ba goroga, o a tsamaya, a tlogela nkgwana ya gagwe ya metsi, a bo a ya kwa motseng.

Ereka a kgatlhegela thatathata dilo tse Jesu a di mmoleletseng, o bolelela banna ba ba mo motseng a re: “Tlaañ, lo bōnè monna eo o mpoleletseñ dilō cotlhe tse ke nntseñ ka nna ka di diha le bogologolo.” Go tswa foo, e le ka tsela ya go dira gore ba batle go itse, o a botsa: “A e ka nna èna Keresete?” Potso eno e diragatsa boikaelelo jwa yone—banna bao ba ya go iponela ka bobone.

Fa dilo di eme jalo, barutwa ba kgothaletsa Jesu gore a je dijo tse ba tlileng natso go tswa kwa motseng. Mme o ba araba ka go re: “Ke na le seyō se ke se yañ, se lo sa se itseñ.”

“A moñwe o tsile a mo choletse diyō go ya?” barutwa ba a botsana. Jesu o a tlhalosa: “Seyō sa me ke go diha go rata ga eo o nthomileñ, le go wetsa tihō ea gagwè. A ga lo re, Go sa na le dikgwedi di le nnè, me go tle thōbō ea mabèlè?” Mme a lebisitse thobong ya semoya, Jesu a re: “Lebañ, lo bōnè masimo, ha a setse a le mashweu a go rōywa. Eo o rōbañ o chola tuèlō, me a phuthèle botshelō yo bo sa khutleñ louñō; gore eo o yalañ le eo o rōbañ ba itumèlè mmōgō.”

Gongwe Jesu o setse a kgona go bona phelelo e e molemolemo ya go kopana ga gagwe le mosadi wa Mosamaria—gore ba le bantsi ba ne ba dumela mo go ene ka ntlha ya bosupi jwa mosadi yono. O rerela batho ba motse oo a re: “O mpoleletse dilō cotlhe tse di nntseñ ka nna ka di diha le bogologolo.” Ka jalo, fa banna ba Sikara ba tla kwa go ene fa sedibeng, ba mo kopa gore a name a ntse le bone mme a bue le bone mo go oketsegileng. Jesu o amogela taletso eo a bo a nna koo ka malatsi a le mabedi.

Fa Basamaria ba ntse ba reeditse Jesu, ba le bantsi ba a dumela. Go tswa foo ba raya mosadi ba re: “Yanoñ rea dumèla eseñ ka ntlha ea go bolèla ga gago hèla: gonne ka rosi re mo ikutlwetse, me rea itse ha rure motho eo e le Mmoloki oa lehatshe.” Eleruri mosadi wa Mosamaria o re fa sekao se se molemo sa kafa re ka neelang bosupi kaga Keresete ka gone ka go dira gore bareetsi ba batle go itse e le gore ba tle ba batlisise mo go oketsegileng!

Gakologelwa gore jaanong e setse e le dikgwedi di le nnè pele ga thobo—e go lebegang e le thobo ya barele, eo mo Palasetine e diragalang ka dikgakologo. Jalo he go bonala fa e le kgwedi ya November kana December. Seno se raya gore morago ga Tlolaganyo ya 30 C.E., Jesu le barutwa ba gagwe ba senya dikgwedi di ka hera bobedi mo Judea ba ruta le go kolobetsa. Go tswa foo jaanong ba leba kwa kgaolong ya legae la bone ya Galilea. Ke eng seo ba tla se bonang fa ba fitlha koo? Yohane 4:3-43.

▪ Ke ka ntlha yang fa mosadi wa Mosamaria a ne a gakgamadiwa ke go bo Jesu a ne a bua le ene?

▪ Ke eng seo Jesu a se mo rutang kaga metsi a botshelo le kwa go obamelwang gone?

▪ Jesu o mo senolela jang gore ene ke mang, mme ke ka ntlha yang fa boipolelo jono bo gakgamatsa?

▪ Ke bosupi bofe jo mosadi wa Mosamaria a bo neelang mme ka diphelelo dife?

▪ Dijo tsa ga Jesu di amana jang le thobo?

▪ Re ka tlhomamisa jang lobaka lwa bodihedi jwa ga Jesu mo Judea morago ga Tlolaganyo ya 30 C.E.?