Kgaolo 20

Kgakgamatso Ya Bobedi Mo Kana

FA Jesu a boela kgaolong ya legae la gagabo morago ga a sena go rera ka bophara mo Juda, ga se gore o ya go ikhutsa. Go na le moo, o simolola bodihedi jo bo bileng bo le bogolwane mo Galilea, lefatshe leo a goletseng mo go lone. Mme barutwa ba gagwe, mo boemong jwa go nna le ene, ba boela magaeng kwa malapeng a bone le kwa ditirong tsa bone tsa pele tsa boitshediso.

Ke molaetsa ofe o Jesu a simololang go o rera? Ke molaetsa ono: “Bogosi yoa Modimo bo atametse: ikwatlhaeeñ, lo dumèlè Mahoko a a Molemō.” Mme karabelo ke efe? Batho ba Galilea ba amogela Jesu. Botlhe ba mo neela tlotlo. Lefa go ntse jalo, seno segolobogolo ga se ka ntlha ya molaetsa wa gagwe mme, go na le moo, ke ka go bo ba le bantsi mo go bone ba ne ba le kwa Tlolaganyong mo Jerusalema dikgwedinyana tse di fetileng mme ba ne ba bone ditshupo tse di gakgamatsang tse a neng a di dira.

Go bonala sentle fa Jesu a simolola bodihedi jwa gagwe jo bogolo jwa kwa Galilea mo Kana. O ka nna wa gakologelwa gore, erile go le pelenyana, fa a ne a boa go tswa Judea, o ne a fetola metsi bojalwa kwa moketeng mongwe wa lenyalo koo. Mo pakeng eno ya bobedi, ngwana wa modirelapuso wa ga Kgosi Herode Antipase o lwala fela thata. Fa a utlwalela gore Jesu o tlile mo Kana go tswa Judea, modiredi yono o tsaya matsapa a go tswa kwa legaeng la gagwe mo Kaperenama go ya go senka Jesu. Ka bohutsana jo bogolo, monna yoo o a kopa: ‘Tsweetswee tlaa ka bofefo, pele ga ngwanake a tlhokafala.’

Jesu o arabela ka go re: ‘Boela gae. Morwao o fodile! ’ Modiredi wa ga Herode o a dumela mme o tsaya loeto lo loleele go ya gae. Fa a ntse a tsamaya o kgatlhantshiwa ke batlhanka ba gagwe, bao ba neng ba sianela go mmolelela gore dilo tsotlhe di siame—morwawe o fodile! ‘O fodile leng?’ o a botsa.

‘Maabane ka nako ya 1:00 motshegare,’ baa araba.

Modiredi yono o lemoga gore ke yone nako ya fa Jesu a ne a re, ‘Morwao o fodile!’ Morago ga moo, monna yono le botlhe ba ntlo ya gagwe ba nna barutwa ba ga Keresete.

Ka gone, Kana o bona lesego la go nna lefelo leo, ka go supa go boa ga gagwe kwa Judea, Jesu o dirileng dikgakgamatso gabedi kwa go lone. Tseno, legale, ga se tsone fela dikgakgamtsao tseo a ileng a di dira go fitlha jaanong, mme di botlhokwa ka jaana di tshwaya go boela ga gagwe mo Galilea.

Jesu jaanong o leba gae kwa Nasaretha. O tla feta a kopana le eng koo? Yohane 4:43-54; Mareko 1:14, 15; Luke 4:14, 15.

▪ Fa Jesu a boela mo Galilea, go diragalang ka barutwa ba gagwe, mme batho ba mo amogela jang?

▪ Ke kgakgamatso efe e Jesu a e dirang, mme e ama jang ba ba kopanyelediwang?

▪ Kana he o newa lesego lefe ke Jesu?