Kgaolo 90

Tsholofelo ya Tsogo

LABOFELO Jesu o goroga ka kwa ntle ga Bethania, motsana o o ka nnang dikilometara di le tharo go tswa kwa Jerusalema. E setse e le malatsi a sekae fela esale ka loso le phitlho tsa ga Lasaro. Bokgaitsadie ebong Maria le Maratha ba santse ba hutsafetse, mme batho ba le bantsi ba tlile fa legaeng la bone go ba gomotsa.

Fa ba ntse ba hutsafetse jalo, mongwe o bolelela Maratha gore Jesu o e tla. Ka jalo o a tloga a ba a itlhaganelela go mo kgatlhantsha, go bonala a sa bolelele Maria. Fa a fitlha kwa go Jesu, Maratha o boelela seo ene le Maria ba tshwanetseng ba bo ba ile ba nna ba se bua gantsi mo malatsing a le manè a a fetileng: “Ha u ka bo u nu u le ha, kgantsadiake o ko a se ka a shwa.”

Lefa go ntse jalo, Maratha o bontsha tsholofelo, a akantsha gore Jesu o ne a santse a ka direla kgaitsadie sengwe. O bolela jaana: “Me le yana kea itse, go re, leha e le eñ se u se lōpañ Modimo, Modimo o tla se gu naea.”

“Kgantsadio o tla ba a coga,” Jesu o solofetsa jalo.

Maratha o tsaya gore Jesu a bua ka tsogo ya mo lefatsheng ya mo isagweng, eo Aberahame le batlhanka ba bangwe ba Modimo le bone ba neng ba e lebeletse. Ka jalo o araba jaana: “Kea itse ha a tla ba a coga mo go cogeñ ka letsatsi ya bohèlō.”

Lefa go ntse jalo, Jesu o naya tsholofelo ya thuso ya ka bonako, ka go araba a re: “Ke nna cogō le botshelō.” O gakolola Maratha gore Modimo o mo neile thata ya go fenya loso, o bolela jaana: “Eo o dumèlañ mo go nna, leha a shwa, leha go nntse yalo o tla tshela; Me leha e le mañ eo o tshelañ, a ba a dumèla mo go nna, ga a ketla a shwa gopè.”

Jesu ga a akantshe Maratha gore baikanyegi bao ba neng ba tshela ka nako eo ba ka se bone loso. Nnyaa, mme se a se bolelang ke gore go bontsha tumelo mo go ene go ka gogela kwa botshelong jo bosakhutleng. Botshelo jo bo ntseng jalo bo tla itumelelwa ke batho ba le bantsi jaaka phelelo ya go tsosiwa ga bone ka letsatsi la bofelo. Mme ba bangwe ba ba ikanyegang ba tla falola bofelo jwa tsamaiso eno ya dilo mo lefatsheng, mme mo go bano mafoko a ga Jesu a tla diragala ka tsela ya mmatota. Ga ba kitla ba swa! Morago ga polelo e e gakgamatsang eno, Jesu o botsa Maratha a re: “A mo ua go dumèla?”

“E, Morèna,” o araba jalo. “Ke dumetse ha u le Keresete, Morwa Modimo, eboñ èna eo o tlañ mo lehatshiñ.”

Maratha jaanong o itlhaganelela go ya go bitsa Maria, a mmolelela jaana kwa thoko: “Moruti o ha, me oa gu bitsa.” Maria o tswa mo ntlong ka bonako. Fa ba bangwe ba bona a tsamaya, ba a mo latela, ba gopola gore o ya kwa lebitleng la kgakologelo.

Fa Maria a tla kwa go Jesu, o wela fa dinaong tsa gagwe a lela. “Morèna, ha u ka bo u nu u le ha, kgantsadiake o ko a se ka a shwa,” o bolela jalo. Jesu o fuduega thata fa a bona gore Maria le boidiidi jwa batho jo bo mo setseng morago ba a lela. “Lo mmeile kae?” o botsa jalo.

Ba fetola ba re, “Morèna, tla u bōnè.”

Jesu le ene o a lela, a baka gore Bajuda ba re: “Bōnañ yaka a na a mo rata!”

Bangwe ba gakologelwa fa Jesu, ka Moletlo wa Metlaagana, dikgwedi di le mmalwa tse di fetileng, a ne a ile a fodisa lekawana lengwe le le tsetsweng le foufetse, mme ba botsa ba re: “A monna eo, eo o houholotseñ matlhō a eo o na a houhetse, a o na a sa kake a diha le gōna, go re, monna eo a se ka a shwa?” Yohane 5:21; 6:40; 9:1-7; 11:17-37.

▪ Jesu o goroga leng labofelo kwa Bethania, mme boemo bo ntse jang koo?

▪ Ke mabaka afe ao a dirang gore Maratha a dumele mo tsogong?

▪ Jesu o amiwa jang ke loso lwa ga Lasaro?