Kgaolo 16

Go Tlhoafalela Kobamelo ya ga Jehofa

BOMORWARRAA Jesu ka mmè—barwa ba bangwe ba ga Maria—ke Jakobe, Josefa, Simone, le Judase. Pele ga bano botlhe ba tsamaya le Jesu le barutwa ba gagwe go ya kwa Kaperenama, e leng motse o o gaufi le Lewatle la Galilea, gongwe ba ema kwa legaeng la bone kwa Nasaretha gore balelapa botlhe ba kgone go phutha dilo tse ba di tlhokang.

Mme ke ka baka lang fa Jesu a ya kwa Kaperenama go na le go tsweledisa bodihedi jwa gagwe mo Kana, mo Nasaretha, kana mo lefelong le lengwe mo dithabeng tsa Galilea? Ntlha ke go re, Kaperenama o agilwe mo lefelong le le tlhatlogileng mme ebile go bonala e le motse o mogolo. Gape, bontsi jwa barutwa ba Jesu a sa tswang go nna nabo bosheng ba nna mo Kaperenama kana gaufi le gone, mme ka jalo ga ba ne ba tlhoka gore ba tlogele magae a bone ba tle ba amogele thuto e a e ba nayang.

Ka nako ya fa a nna mo Kaperenama, Jesu o dira ditiro tse di gakgamatsang, jaaka fa ka boene a supa seo dikgwedi moragonyana. Mme mo nakong e khutshwane Jesu le balekane ba gagwe ba mo tseleng gape. Ke dikgakologo, mme ba mo tseleng ya bone go ya Jerusalema go ya Tlolaganyong ya 30 C.E. Fa ba le koo, barutwa ba gagwe ba bona sengwe kaga Jesu se gongwe ba neng ba ise ba se bone pele.

Go ya ka Molao wa Modimo, Baiseraele ba ne ba tlhoka go dira ditlhabelo tsa diphologolo. Jalo, go sola paka e molemo, barekisi ba ba mo Jerusalema ba rekisa diphologolo kana dinonyane ka boikaelelo jwa se. Mme ba rekisetsa gone fela mo teng ga tempele, mme ba tsietsa batho ka go ba lopa madi a mantsi.

Ka kgakalo e kgolo, Jesu o dira seiteo ka go tshopha mogala a bo a lelekela barekisi kwa ntle. O tshololela fa fatshe madi a ditshipi a baananyi ba madi a bo a pitikolola ditafole tsa bone. “Tlosañ dilō tse ha!” o goa bao ba rekisang maphoi. “Se ntsheñ ntlo ea ga Rrè ntlo ea thèkèlō.”

Fa barutwa ba ga Jesu ba bona seno, ba gakologelwa boperofeti kaga Morwa Modimo jo bo reng: “Tlhōahalèlō ea ntlo ea gago e tla nya.” Mme Bajuda ba a botsa: “O re shupetsa seshupō sehe, ka ele ha u diha dilō tse?” Jesu o a araba: “Senyañ tempela e, me ke tla e cosa ka malatsi a le mararo.”

Bajuda ba tsaya gore Jesu o bua kaga tempele ya sebele, mme jalo ba botsa ka go re: “Tempela e, e yele dinyaga di le mashomè manè le borataro mo go agiweñ, me a u tla e cosa ka malatsi a le mararo?” Lefa go ntse jalo, Jesu o bua ka tempele ya mmele wa gagwe. Mme morago ga dingwaga tse tharo, barutwa ba gagwe ba gakologelwa puo eno ya gagwe fa a tsosiwa mo baswing. Yohane 2:12-22; Mathaio 13:55; Luke 4:23.

▪ Morago ga moletlo wa lenyalo wa kwa Kana, ke mafelo afe a Jesu a yang go one?

▪ Ke ka baka lang fa Jesu a gaketse, mme o dira eng?

▪ Barutwa ba ga Jesu ba ne ba gakologelwa eng fa ba ne ba bona ditiro tsa gagwe?

▪ Jesu a reng kaga “tempela e,” mme o ne a rayang?