Kgaolo 11

Johane O Baakanya Tsela

GO SETSE go fetile dingwaga di le lesome le bosupa go tloga ka nako ya fa Jesu a ne a le ngwana wa dingwaga tse 12 yo o neng a botsaka baruti dipotso mo tempeleng. Ke dikgakologo tsa ngwaga wa 29 C.E. mme mongwe le mongwe go lebega a bua kaga ntsalaa Jesu ebong Johane, yoo o rerang mo nageng yotlhe go dikologa Noka ya Joredane.

Johane eleruri ke monna yo o kgatlhisang thata, ka tebego mmogo le ka go bua. Diaparo tsa gagwe ke tsa boboa jwa kamele, mme o itlama ka moitlamo wa letlalo mo lethekeng la gagwe. Dijo tsa gagwe ke tsie le mamepe a dinotshe. Mme molaetsa wa gagwe ke eng? “Ikwatlhae[e]ñ; gonne bogosi yoa legodimo bo atametse.”

Molaetsa ono o kgatlha bareetsi ba gagwe tota. Bontsi bo lemoga kafa go tlhokafalang ka teng gore ba ikotlhaye, ke gore, go fetola boikutlo jwa bone le go latlha mokgwa wa bone wa nako e e fetileng wa go tshela jaaka o o sa eletsegeng. Jalo batho ba lefelo lotlhe le le dikologileng Joredane, le eleng go tswa Jerusalema, ba tla kwa go Johane ka dipalo tse dikgolo, mme o a ba kolobetsa, ka go ba nwetsa mo teng ga metsi a Joredane. Ka ntlhayang?

Johane o kolobeletsa batho go bontsha letshwao, kana boipolelo, jwa go ikwatlhaela dibe tsa bone tse ba di dirileng kgatlhanong le Molao wa Modimo wa kgolagano go tswa pelong. Ka jalo, fa Bafarasai le Basadukai bangwe ba tla kwa Joredane, Johane o a ba nyatsa. “Lotsalō loa dinōga ke lona,” a rialo. “Uñwañ louñō lo lo chwanetseñ boikwatlhaō: Me lo seka loa gopola go ithaea, lo re, Re na le Aberahame, ke èna rra echo: ka gonne kea lo raea, Modimo o nonohile go cosetsa Aberahame bana ka mayè a.  Me le yana hèla selèpè se tsepilwe mo mecwiñ ea ditlhare; ka gōna, setlhare señwe le señwe se se sa uñweñ louñō lo lo molemō, sea rèñwa, se latlhèlwa mo moleloñ.”

Ka ntlha ya karabelo yotlhe eo batho ba e nayang Johane, Bajuda ba romela baperesiti le Balefi kwa go ene. Ba mmotsa ba re: “U mañ?”

Johane o ipolela ka go re: “Ga ke Keresete.”

“Me u eñ nè?” baa botsa. “A u Eliya?”

O araba ka go re, “Nya.”

“A u èna moperofeti eo?”

“Nya.”

Ka jalo ba simolola go tlhoafala: “U mañ? gore re tlè re hetolè ba ba re romileñ. Ua reñ kaga gago?”

Johane o tlhalosa ka go re: “Nna ke lencwe ya moñwe eo o kuañ mo nageñ, a re, Siamisañ tsela ea ga Yehofa, yaka moperofeti Isaia a kile a bua.”

“Me u kolobeletsañ,” ba batla go itse, “ha u se Keresete, leha e le Eliya, leha e le èna moperofeti?”

O araba ka gore, “Ke kolobetsa ka metse: me mo gare ga lona go eme moñwe eo lo sa mo itseñ, Eboñ èna eo o tlañ moragō ga me.”

Johane o baakanya tsela ka go dira gore batho ba nne le dipelo tsa boemo jo ba ka kgonang go amogela Mesia, yo o tla nnang Kgosi. Johane o bolela jaana kaga Yono: “Eo o tlañ moragō ga me o nonohile bogolo go nna, eo ditlhako tsa gagwè ke sa chwanèlañ go di mo cholèla.” Ebile tota Johane a re: “Eo o tlañ moragō ga me, o bile o nntse pele ga me: gonne o na a leeō pele ga me.”

Ka jalo, molaetsa wa ga Johane wa go re, “bogosi yoa legodimo bo atametse,” ke tlhagiso ya phatlalatsa ya gore bodihedi jwa Kgosi e e tlhophilweng ya ga Jehofa, ebong Jesu Keresete, bo tloga bo simolola. Yohane 1:6-8, 15-28; Mathaio 3:1-12; Luke 3:1-18; Ditihō 19:4.

▪ Johane ke monna wa mofuta ofe?

▪ Ke ka ntlhayang fa Johane a kolobetsa batho?

▪ Ke ka ntlhayang fa Johane a ka bolela gore Bogosi bo atametse?