Buka ya Bibela ya bo 29—Yoele

Mokwadi: Yoele

Lefelo Leo E Kwaletsweng kwa go Lone: Juda

Go Wediwa ga go E Kwala: mo e ka nnang ka 820 B.C.E. (?)

 1. Ke ditiragalo dife tse dikgolo tseo di tlhalosiwang mo polelelopeleng ya ga Joele?

LEFATSHE le kgakgabadiwa ke masomosomo, lesogodi le legolo la ditshenekegi. Molelo o o kwa pele ga tsone le kgabo e e kwa morago di digela tshenyo e kgolo eno. Gongwe le gongwe go na le leuba le legolo. Letsatsi le fetoga go nna lefifi mme ngwedi ene o nna madi, ka go bo letsatsi le legolo le le boifisang la ga Jehofa le gorogile. O ntsha taolo ya gore go latlhelwe sekele mme merafe e phuthelwe kwa tshenyegong. Lefa go ntse jalo, bangwe ba tla “gololwa.” (Yoele 2:32) Go tlhatlhoba ditiragalo tseno tse di boitshegang go dira gore polelelopele ya ga Joele e kgatlhise thata e bo e nne mosola thata mo go rona.

 2. Ke eng seo re se itseng ka Joele le tiro ya gagwe ya boperofeti?

² Buka eno e simololwa ka polelo e e reng “Lehoko ya ga Yehofa ye le tsileñ kwa go Yoele morwa Phethuele.” Bibela ga e re bolelele sepe se sengwe gape kaga Joele ka sebele sa gagwe. Ke molaetsa wa boperofeti o o gatelelwang mme e seng mokwadi wa one. Leina “Joele” (Sehebera, Yoh·ʼelʹ) go kaiwa fa le raya gore “Jehofa Ke Modimo.” Go bo Joele ka sebele a itse thata kaga dilo tsa Jerusalema, tempele ya one, le dilo tse di amanang le ditiro tse di dirwang mo tempeleng go ka nna ga bo go kaya gore o ne a kwala buka eno ya gagwe kwa Jerusalema kana mo Juda.—Yoele 1:1, 9, 13, 14; 2:1, 15, 16, 32.

 3. Ke mabaka afe a a dirang gore go kaiwe gore letlha la boperofeti jwa ga Joele e ka nna ya bo e le 820 B.C.E.?

³ Buka eno ya Yoele e ne ya kwalwa leng? Seno se ka se ke se tlhalosiwe ka tlhomamo. Bakanoki ba kaya matlha a a farologaneng go tloga fela pele ga 800 B.C.E. go ya go mo e ka nnang ka 400 B.C.E. Tlhaloso e Joele a e kwadileng mo polelelopeleng ya gagwe kaga katlholo ya ga Jehofa mo merafeng mo molapong wa ga Jehoshafate e akantsha motho gore o ka ne a ile a kwala boperofeti jwa gagwe nako nngwe morago ga fa Jehofa a sena go thusa Kgosi Jehoshafate wa Juda go bona phenyo e kgolo, mme jalo e le morago ga fa Jehoshafate a sena go nna kgosi ka 936 B.C.E. (Yoele 3:2, 12; 2 Ditih. 20:22-26) Moperofeti Amose o ka nna a bo a ile a tsopola dintlha tsa gagwe mo mokwalong wa Yoele. Seno he, se tla raya gore boperofeti jwa ga Joele bo ne jwa kwalwa pele ga jwa ga Amose, yo o neng a simolola go dira jaaka moperofeti mo bogareng jwa 829 le 804 B.C.E. (Yoele 3:16; Amose 1:2) Gore buka eno e kwadilwe pelenyana go ka nna ga kaiwa gape ke boemo joo buka e beilweng mo go jone mo Dikwalong tsa Sehebera e leng fa gare ga Hosea le Amose. Ka jalo go akantshiwa fa letlha le boperofeti jwa ga Joele bo kwadilweng mo go lone e ka nna 820 B.C.E.

 4. Ke bosupi bofe jo bo leng gone jo bo supang gore buka ya Yoele e boammaaruri?

⁴ Dintlha tse di tsopotsweng mo boperofeting jono mmogo le ditshupiso tse di fitlhelwang mo Dikwalong tsa Bokeresete tsa Segerika di supa fa boperofeti joo bo le boammaaruri. Mo letsatsing la Pentekosete, Petere o ne a bua ka “moperofeti Yoele” mme o ne a dirisa dingwe tsa dipolelelopele tsa gagwe. Paulo o ne a tsopola yone polelelopele eo mme a bontsha kafa e neng ya diragala ka gone mo Bajudeng le mo bathong ba e seng Bajuda. (Yoele 2:28-32; Dit. 2:16-21; Bar. 10:13) Dipolelelopele tsa ga Joele tseo di neng di bua kgatlhanong le merafe e e gaufi di ne tsa diragala tsotlhe fela. Motse o mogolo wa Ture o ne wa dikaganyediwa ke Nebukadenesare, mme moragonyana motse oo o o mo setlhaketlhakeng o ne wa senngwa ke Alexander the Great. Filisitia le ene o ne a nyelela ka tsela e e tshwanang. Edoma o ne a fetoga naga fela e e kgakgabetseng. (Yoele 3:4, 19) Le ka motlha Bajuda ga ba ise ba ko ba belaele gore Yoele ke karolo ya Dikwalo, mme ba ne ba baya buka eno mo maemong a bobedi mo go se go tweng ke baperofeti ba maemo a mabotlana.

 5. Polelelopele ya Yoele e bonala ka tsela efe e e gakgamatsang gore e tlhalosa dikgang ka papamalo?

⁵ Mokgwa o buka ya Yoele e kwadilweng ka one ke o o opang kgomo lonaka le o o tlhalosang ka botswerere. O gatelela dintlha ka go di boeletsa a bo a dirisa dipapiso tse di kgatlhisang. O bitsa lesogodi la tsie a re ke morafe, batho, le gore ke mophato wa masole. Meno a tsone a ntse jaaka a ditau, di tshwana le dipitse ka sebopego, mme mosumo wa tsone o ntse jaaka wa dikara tsa ntwa fa di ya kwa ntweng. The Interpreter’s Bible fa e re tsopolela mafoko a buka nngwe e e tlhalosang ka tsie ya re: “Tsela e Joele a tlhalosang tlhaselo ya tsie ka gone ga e gaisiwe ke epe ka go opa kgomo lonaka mo ditlhalosong tsotlhe tsa yone.”a Tlhokomela jaanong jaaka Joele a bua dipolelelopele kaga letsatsi le le boifisang la ga Jehofa.

SEO SE LENG MO GO YOELE

 6. Ke ponatshegelo efe e e boitshegang eo Joele a e bonang pele?

⁶ Tlhaselo ya ditshenekegi e ruputletsa lefatshe; letsatsi la ga Jehofa le atametse (1:1–2:11). Abo Joele a bona ponatshegelo e e tshosang jang ne! Tlhaselo e e senyang ya seboko, tsie, tsie e e gagabang e e senang diphuka, le mafele. Ditlhare tsa mofine le tsa mofeige di tlhotlhorilwe, mme lefatshe le aperwe ke leuba. Ga go na ditshupelo dipe tsa mabele kana tsa dino tseo di isiwang kwa ntlong ya ga Jehofa. Joele o tlhagisa baperisiti le batlhanka ba Modimo gore ba ikwatlhae. “Iya wè! a letsatsi y[e] legolo!” o a tlhaeletsa, “gonne letsatsi ya ga Yehofa le atametse, le tla tla yaka tshenyo e e cwañ kwa go Mothataeotlhe.” (1:15) Diphologolo di kaila fela mo tsietsing. Dikgabo tsa molelo di jele naga ya phulo le ditlhare, mme sekgwa se laitswe ke molelo.

 7. Mophato o o tlhaselang wa masole wa ga Jehofa o tlhalosiwa jang?

⁷ Utlwatsa tlhagiso! “Letsañ lonaka mo Siona, lo ōpeñ mokgosi oa choshō mo thabeñ ea me e e boitshèpō.” (2:1) Letsatsi la ga Jehofa le atametse, letsatsi la lefifi le letobo je le kwenneng. Ao tlhe! Bontsi jo bogolo jwa batho ebile ba na le thata e kgolo. Ba fetolela lefatshe le le tshwanang le Edena go nna naga fela e e kgakgabetseng. Ga go na sepe se se falolang. Bano ba taboga fela jaaka dipitse le mosumo wa bone o ntse jaaka wa dikara tsa ntwa mo godimo ga dithaba. Ba thelesegela mo teng ga motse fela jaaka batho ba ba baakanyeditsweng go ya ntweng, ba fofa mo godimo ga makotswana le dintlo le go tsena ka difensetere. Lefatshe le tsenwe ke tsebetsebe mme magodimo aa thekesela. Jehofa ke ene a laolang mophato o mogolo ono wa masole. “Motlha oa ga Yehofa o mogolo, o boitshèga thata: me e mañ eo o ka o ichōkèlañ?”—2:11.

 8. (a) Tlhaselo ya ditshenekegi e ka kganelwa jang fela? (b) Ke tuelo efe eo Jehofa a e solofetsang?

⁸ Boelang kwa go Jehofa; moya o a goromediwa (2:12-32). Mme go na le sengwe se se ka dirwang go thibela tlhaselo eno. Jehofa o gakolola jaana: “Retologèlañ mo go nna ka pelo eotlhe, . . . lo ikgagolè dipelo, e señ diaparō, lo retologèlè mo go Yehofa Modimo oa lona.” (2:12, 13) Go lela ga lonaka go phuthela batho kwa kokoanong e e boitshepo. Fa ba boela kwa go ene, ‘Jehofa o tla huhanela lefatshe la gagwe, a tlhomogela batho ba gagwe pelo.’ (2:18) O tla ba segofatsa le go ba itshwarela, mme o tla kganela motlhasedi. Go na le gore e nne nako ya poifo, ke nako ya go ipela le go itumela, gonne go tla nna maungo le mabele le beine e e itekanetseng le lookwane. Jehofa o tla duelela ditshenyegelo tsotlhe tse di bakilweng ke majo a lesomo le legolo la gagwe la tsie. O solofetsa ka go re: “Lo tla yèla mo letlotloñ lo kgora, me lo tla baka leina ya ga Yehofa Modimo oa lona, eo o lo dihetseñ ka kgakgamaco.” (2:26) Ba tla itse gore Jehofa ke ene fela Modimo wa bone mo Iseraele.

 9. Ke polelelopele efe e e amang pelo eo e latelang?

⁹ Jehofa a re: “Me go tla dihala moragō ga mo, go re, ke tla thèla mōea oa me mo bathuñ botlhe; me bana ba lona ba basimane le ba basetsana ba tla perofesa, banna bagolo ba lona ba tla lōra ditōrō, makau a lona a tla bōna dipōnatshègèlō. Le mo batlhankeñ le mo malateñ ke tla thèla mōea oa me mo metlheñ euō.” Go tla nna ditshupo tse di boifisang mo letsatsing le mo kgweding pele ga go tla ga motlha wa ga Jehofa. Lefa go le jalo bangwe ba tla falola. “Go tla dihala, go re, leha e le mañ eo o tla bitsañ leina ya ga Yehofa o tla gololwa.”—2:28-32.

10. Ke eng se se tshwanetseng go diragala mo molapong wa ga Jehoshafate?

¹⁰ Merafe e tla atlholelwa mo “molapoñ oa ga Yehoshafate” (3:1-21). Jehofa o tla busetsa batshwarwa ba Juda le Jerusalema ga bone. Merafe e tla phuthiwa; Ture, Sidone, le Filisitia di tla duelela go kgala le go golega batho ba ga Jehofa ka tuelo e kgolo. Reetsa kafa Jehofa a gwetlhang merafe ka gone: “Lo baakanyeñ ntwa: cosañ digañka; a batlhabani botlhe ba atamèlè, a ba tlhatlogè.” (3:9) A ba thule megoma ya bone go nna ditšhaka mme ba tle kwa molapong wa ga Jehoshafate (moo go rayang gore “Jehofa Ke Moatlhodi”). Taolo ya ga Jehofa e a utlwala e re: “Tsenyañ thipa ea mabèlè, gonne mabèlè a budule: . . . kgatiseco ea boyalwa yoa mofine e tletse; didibelecō dia penologa; gonne boikèpō yoa bōnè bo bogolo. A bontsintsi, bontsintsi yoa batho mo molapoñ oa katlholèlō! gonne motlha oa ga Yehofa o atametse mo molapoñ oa katlholèlō.” (3:13, 14) Letsatsi le kgwedi di a fifala. Jehofa o duma a le mo Siona, a dira gore legodimo le lefatshe di thekesele, mme o itshupa a le botshabelo le kago ya phemelo mo bathong ba gagwe. Ba tla tshwanela go itse gore ke Jehofa Modimo wa bone.

11. Joele jaanong o tlhalosa jang masego a a tswang kwa go Jehofa ao a tla latelang?

¹¹ Abo go tla nna le kgora e kgolo jang ne e e tshwanang le ya paradaise “mo motlheñ ouō”! (3:18) Dithaba di tla elela ka beine, makhubu a tla elela ka mashi, mme melatswana e tla tswela metsi a le mantsi thata. Mogobe wa metsi a a lapolosang o tla elela o tswa mo ntlong ya ga Jehofa. Egepeto le Edoma, tseo di ileng tsa tsholola madi a a senang molato mo Juda, di tla nna tshwafalo fela, mme Juda le Jerusalema di tla nna le banni ka bosakhutleng, ‘gonne Jehofa o tla bo a agile mo Siona.’—3:21.

LEBAKA LA GO BO E LE MOSOLA

12. Ke boperofeti bofe jo bo botlhokwa jwa Yoele joo Petere a neng a bo otlelela ka Pentekosete?

¹² Baakgedi bangwe ba ile ba bolela gore Joele ke moperofeti yo o begang fela ka mahutsana. Lefa go ntse jalo, batho ba Modimo bone ba mo leba jaaka mmoledi wa mafoko a a molemo thata a kgololo. Moaposetoloi Paulo o gatelela ntlha eno mo go Baroma 10:13, a re: “Leha e le mañ eo o tla bitsañ leina ya Morèna o tla bolokwa.” (Yoele 2:32) Tiragatso e e gakgamatsang ya polelelopele eno ya ga Joele e ne ya nna mo letsatsing la Pentekosete ya 33 C.E. Mo tiragalong eo Petere o ne a tlhotlhelediwa go tlhalosa gore go tshololelwa ga moya wa Modimo mo barutweng ba ga Keresete e ne e le tiragatso ya boperofeti jwa ga Joele. (Dit. 2:1-21; Yoele 2:28, 29, 32) Petere o ne a otlelela thata botlhokwa jwa mafoko a boperofeti jwa ga Joele ka go re: “Leha e le mañ eo o tla bitsañ leina ya Morèna o tla bolokwa.”—Dit. 2:21, 39, 40.

13. (a) Ke go tshwana gofe go go gakgamatsang mo go iponatsang gareng ga Yoele le Tshenolō? (b) Ke dilo dife tse dingwe tseo di leng mo go Yoele mme e le tseo di fitlhelwang gape le mo dipolelelopeleng tse dingwe?

¹³ Go na le tshwano e e gakgamatsang thata e e bonalang mo sebetsong sa tsie se se tlhalosiwang ke Joele le sebetso se se boleletsweng pele mo go Tshenolō kgaolo 9. Le gone moo letsatsi le a fifala. Lesogodi la tsie le tshwana le dipitse tse di baakanyeditsweng tlhabano, di dira mokgwasa o o tshwanang le wa dikara tsa ntwa, mme di na le meno a eketeng a ditau. (Yoele 2:4, 5, 10; 1:6; Tshen. 9:2, 7-9) Boperofeti jwa ga Joele mo go Yoele 2:31, jo bo bolelang gore letsatsi le fetoga go nna lefifi, bo tshwana le jo bo tlhalosiwang mo mafokong a Isaia 13:9, 10 le Tshenolō 6:12-17, le mo go Mathaio 24:29, 30, koo Jesu a bontshang gore boperofeti joo bo diragala mo nakong ya fa Morwa motho a tla ka nonofo le ka kgalalelo e kgolo. Mafoko a Yoele 2:11 a a reng, “motlha oa ga Yehofa o mogolo, o boitshèga thata,” go bonala a kaiwa gape ke Malaki 4:5. Mafoko a mangwe a a tshwanang a a reng ‘motlha wa lefifi le letobo’ a fitlhelwa gape go Yoele 2:2 le Sefania 1:14, 15.

14. Ke dipolelo dife tse di mo go Yoele tseo di goletsang bolaodi jwa ga Jehofa le bopelonomi jwa gagwe jo bo lorato?

¹⁴ Polelelopele ya Tshenolō e bua ka “letsatsi ye legolo” la bogale jwa Modimo. (Tshen. 6:17) Joele le ene o bolelela pele kaga nako eo, a bontsha gore e tla re fa “motlha oa ga Yehofa” o tlela merafe, botlhe ba ba bitsang leina la gagwe gore ba bone tshireletsego le polokesego ‘ba tla gololwa.’ “Yehofa o tla nna botshabèlō yoa batho ba gagwè.” Letlotlo le le tshwanang le la Edena le tla busediwa gape: “Me go tla dihala mo motlheñ ouō, go re, dithaba di tla rōtha boyalwa yoa mofine yo bo monate, le makhubu a tla èlèla mashi, le melacwana eotlhe ea Yuda e tla èlèla metse; le mocwedi o tla cwa mo tluñ ea ga Yehofa.” Fa a tlhalosa ka ditsholofetso tse di molemo tseno tsa tsosoloso, Joele gape o goletsa bolaodi jwa ga Jehofa Modimo mme o ikuela jaana go botlhe ba ba dipelo tse di ikanyegang mo motheong wa kutlwelobotlhoko jwa Gagwe: “Lo retologèlè mo go Yehofa Modimo oa lona: gonne o pelontlè, o tletse bopelotlhomogi, o bonya go galeha, o letlōtlō ya boutlwèlō botlhoko.” Botlhe ba ba reetsang boikuelo jono jo bo tlhotlheleditsweng ba tla roba melemo e e sa khutleng.—Yoele 2:1, 32; 3:16, 18; 2:13.

[Dintlha tse di kwa tlase]