SEGOPA se tshwara monna yo o sa kgoneng go iphemela se bo se simolola go mo itaya. Ba akanya gore o tshwanetse go swa. Fela fa go lebega e kete ba tlile go mmolaya, go tlhaga masole mme ba namola monna yono ka bothata mo segopeng se se dikgoka. Monna yono ke moaposetoloi Paulo. Batlhasedi ba gagwe ke Bajuda ba ba ganetsang thata go rera ga ga Paulo mme ba mo latofatsa ka gore o leswafatsa tempele. O namolwa ke Baroma ba ba eteletsweng pele ke molaodi wa bone, Kalaudio Lisiase. Mo tlhakatlhakanong eo, Paulo o tshwarwa jaaka mmelaelwa wa gore ke sekebekwa.

Dikgaolo tse supa tsa bofelo tsa buka ya Ditiro di tlhalosa ka botlalo kgetsi e e simolotseng ka go tshwarwa gono. Go tlhaloganya hisitori ya ga Paulo mo go tsa molao, se a neng a latofadiwa ka sone, kafa a neng a iphemela ka teng, le sengwe ka mokgwa wa kotlhao wa Roma go dira gore re tlhaloganye dikgaolo tseno ka mo go oketsegileng.

Tiro ya ga Kalaudio Lisiase e ne e akaretsa go boloka tolamo kwa Jerusalema. Molaodi wa Moroma wa Judea yo o neng a mo feta ka maemo, o ne a nna kwa Kaesarea. Tsela e Lisiase a neng a dira dilo ka teng mo kgannyeng ya ga Paulo e ka lejwa e le go sireletsa motho mo thubakanyong le go tshwara motho yo o neng a kgoreletsa kagiso. Tsela e Bajuda ba neng ba arabela ka yone e ne ya tlhotlheletsa Lisiase gore a ise legolegwa la gagwe kwa bonnong jwa masole kwa Toreng ya Antonia.—Ditiro 21:27–22:24.