Botlhale Jwa Modimo bo Bonala mo Dilong Tsa Tlholego

“Ke Ene yo o re rutang go feta diphologolo tsa lefatshe, e bile o re dira botlhale go feta dibopiwa tse di fofang tsa magodimo.”—JOBE 35:11.

DINONYANE di na le bokgoni jo bo gakgamatsang. Batho ba ba dirang difofane ba kgatlhwa ke tsela e dinonyane di fofang motlhofo ka yone. Mefuta mengwe ya dinonyane e kgona go fofa dikilometara di le diketekete mo godimo ga bophadiphadi jwa metsi a lewatle di sa kaelwe ke sepe mme di bo di goroga sentle kwa di yang teng.

Bokgoni jo bongwe jo bo tlhomologileng jo dinonyane di nang le jone—jo bo senolang botlhale jwa Modiri wa tsone—ke tsela e di buisanang ka yone ka go bitsana le ka go letsa melodi. Akanya ka dikai dingwe.

Tsela e Dinonyane di Buisanang ka Yone

Mefuta mengwe ya dinonyane e simolola go buisana le pele ga mae a di leng mo go one a thuthuga. Ka sekai, nonyane e namagadi ya makwetekwio e kgona go beela mae a ka nna robedi, e beela lee le le lengwe ka letsatsi. Fa mamphorwana a a mo dikgapetleng a ne a ka gola ka lobelo lo lo lekanang, a ne a tla tswa mo lobakeng lwa malatsi a feta robedi. Mmaone yo o sa ntseng a tshwanelwa ke go elama lee le le lengwe le le iseng le thuthuge, o ne a tla lebana le tiro e e thata ya go tlhokomela mamphorwana a a matlhagatlhaga a a nang le beke a dule mo dikgapetleng. Go na le moo, mamphorwana otlhe a le robedi a makwetekwio a tla tswa mo dikgapetleng tsa one mo lobakeng lwa diura di le thataro. Seo se kgonega jang? Babatlisisi ba ile ba akantsha gore lengwe la mabaka a konokono ke gore, mamphorwana a makwetekwio a buisana fa a sa ntse a le mo teng ga dikgapetla mme ka tsela nngwe a rulaganya go tswa mo dikgapetleng tseo ka nako e le nngwe.

Fa dinonyane di setse di godile, gantsi e tonanyana ke yone e letsang molodi. E dira jalo segolobogolo ka paka e di gwelang ka yone e le go tshwaya lefelo la yone gore tse dingwe di se ka tsa tla mo go lone kgotsa go ngoka e namagadi. Nngwe le nngwe ya mefuta e le diketekete ya dinonyane e na le tsela e di buisanang ka yone, mme seno se thusa tse di namagadi go itse molekane wa mofuta wa tsone.

Gantsi dinonyane di rata thata go letsa molodi ka makuku le fa letsatsi le phirima mme di na le mabaka a a utlwalang a go bo di dira jalo. Ka dinako tseo ga go na phefo e ntsi e bile ga go na medumo e mentsi e e tla kgoreletsang molodi wa tsone. Babatlisisi ba lemogile gore molodi wa dinonyane o utlwala sentle thata mo mosong le maitseboa go gaisa motshegare.

Le fa gantsi dinonyane tse ditonanyana e le tsone di letsang molodi, dinonyane tseno tsotlhe tse ditonanyana le tse di namagadi di kgona go opela le go dira medumo e e farologaneng e e nang le bokao jo bo sa tshwaneng. Ka sekai, nonyane ya Chaffinches e kgona go dira melodi le medumo e le robonngwe. Di dira molodi o o rileng fa di tlhagisa tse dingwe ka kotsi e e mo lefaufaung—jaaka nonyane e e fofang e batla sengwe se e ka se jang—mme di dira molodi o sele fa di tlhagisa tse dingwe ka kotsi e e tlhagang go tswa fa fatshe.

Mpho E e Di Gaisang Tsotlhe

Ruri botlhale jo Jehofa a bo tsentseng mo dinonyaneng tseno bo a kgatlha. Mme fa go tliwa mo mekgweng ya go buisana, batho ba kgatlha le go feta. Jobe 35:11 ya re Modimo o dirile batho ba le “botlhale go feta dibopiwa tse di fofang tsa magodimo.” Batho ba na le bokgoni jo bo tlhomologileng jwa go tlhalosa dikgopolo tse di boima le tse di raraaneng ba dirisa modumo o o dirwang ke dirwe tse di ntshang lentswe kgotsa ka go itshikinya mmele.

Go farologanya le dibopiwa tse dingwe, go bonala masea a tsholwa a na le bokgoni jwa go ithuta dipuo tse di raraaneng. Lokwalopaka lwa Internet la American Scientist la re: “Bana ba bannye ba kgona go ithuta puo nngwe le fa batsadi ba bone ba sa e bue le bone ka tlhamalalo; bana bangwe ba disusu ba kgona le go itlhamela puo ya bone ya diatla fa e le gore ga ba e rutiwa kwa lapeng.”

O Ikutlwa Jang?

O ikutlwa jang fa o reeditse nonyane e letsa molodi o o monate kgotsa fa o reeditse ngwana a simolola go ithuta go bua? A o lemoga botlhale jwa Modimo mo dilong tse a di dirileng?

Fa mopesalema Dafide a sena go tlhatlhanya ka tsela e a dirilweng ka yone, o ne a tlhotlheletsega go raya Modimo a re: “Ke tla go baka ka gonne ke dirilwe ka tsela e e boitshegang e e gakgamatsang. Ditiro tsa gago di a gakgamatsa, jaaka moya wa me o lemoga sentle.” (Pesalema 139:14) Fa o ntse o sekaseka botlhale jwa Modimo jo bo bonalang mo dilong tse a di bopileng, ruri tumelo ya gago ya gore Modimo o na le bokgoni jwa go go naya kaelo e e molemo, e tla gola.

Dinaledi di Senola Maatla a Modimo

“Tsholeletsang matlho a lona kwa godimo lo bone. Ke mang yo o bopileng dilo tseno? Ke Ene yo o tlisang masomosomo a tsone ka palo, a di bitsa tsotlhe ka maina. Ka ntlha ya bogolo jwa maatla a a boitshegang, le ka go bo a na le nonofo e kgolo, ga go le fa e le nngwe ya tsone e e tlhaelang.”—ISAIA 40:26.

LETSATSI ke naledi e e bogolo jo bo lekanetseng fela. Tota le fa go ntse jalo, bogolo jwa lone bo feta jwa lefatshe ka makgetlo a le 330 000. Letsatsi le feta bontsi jwa dinaledi tse di leng gaufi le lefatshe. Mme gone, bogolo jwa dinaledi tse dingwe tse di jaaka e e bidiwang V382 Cygni bo feta jwa letsatsi ka makgetlo a le 27.

Letsatsi le na le maatla a kana kang? Akanya fela gore molelo o ne o tla bo o le mogote go le kana kang fa o kgona go utlwa mogote wa one o le bokgakala jwa dikilometara di le 15. Letsatsi le bokgakala jwa dikilometara di ka nna dimilione di le 150 go tswa mo lefatsheng. Le fa go ntse jalo, fa letsatsi le tlhabile sentle, mogote wa lone o ka ntsha motho marophi! Se se gakgamatsang ke gore, maatla a letsatsi a a fitlhang mo lefatsheng a ka nna bilione fela. Le fa go ntse jalo, karolonyana eno ya maatla a letsatsi e lekane go thusa gore botshelo bo nne teng mo polaneteng eno.

Tota e bile, baitsesaense ba ile ba bolela gore maatla otlhe a a tswang mo letsatsing fela a lekane go thusa dipolanete tse dingwe di ka nna dibilione di le 31 tse di jaaka lefatshe. Kgotsa tsela e nngwe e re ka e dirisang go lekanya maatla ano a magolo a letsatsi: Fa maatla otlhe a letsatsi a ne a ka kopanngwa ka motsotswana fela, aterese ya Internet ya Space Weather Prediction Center (SWPC) ya re, a ne a ka tlamela United States “mo dingwageng di le 9 000 000 tse di tlang ka maatla a a lekanang le a naga eo e a dirisang gone jaanong.”

Maatla a letsatsi a tswa mo bogareng jwa lone—jaaka a sedirisiwa sa nuklea se se thubaganyang diatomo gore di ntshe maatla a mantsi. Letsatsi le legolo thata mme bogare jwa lone bo kitlane thata jaana mo e leng gore go tsaya dingwaga di le dimilionemilione gore maatla a a tswang mo bogareng jwa lone a fitlhe mo lefatsheng. Aterese ya Internet ya SWPC ya re: “Fa letsatsi le ne le ka emisa go ntsha maatla gompieno, go ne go tla tsaya dingwaga di le 50 000 000 gore matswela a seo a bonale mo Lefatsheng!”

Jaanong akanya ka ntlha eno: Fa o leba loapi lo lo apogileng bosigo, o bona dinaledi di le diketekete tse nngwe le nngwe ya tsone e ntshang maatla a mantsi a a lekanang le a letsatsi. Mme baitsesaense ba bolela gore go na le dinaledi di le dibilionebilione mo lobopong!

Dinaledi tseno tsotlhe di tswa kae? Babatlisisi ba le bantsi ba dumela gore ka mabaka mangwe a le jaanong ba sa a tlhaloganyeng, lobopo lo itlhagetse fela ka tshoganyetso mo e ka nnang dingwaga di le dibilione di le 14 tse di fetileng. Baebele ya re: “Mo tshimologong Modimo o ne a bopa magodimo le lefatshe.” (Genesise 1:1) Ga go pelaelo gore Ene yo o dirileng metšhine eno e megolo e e ntshang maatla e re e bitsang dinaledi, o ka bidiwa yo o ‘nang le nonofo e kgolo.’—Isaia 40:26.